ମୋଦି- ସି ବୈଠକ ବିକାଶମୂଳକ ଭାଗିଦାରୀକୁ ଦୋହରାଇଲେ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କୁ ମହାବଳିପୁରମରେ ସାକ୍ଷାତ କଲେ |ଏଠାରେ ଦୁଇ ନେତାଙ୍କ ମଧ୍ୟରେ ହୋଇଥିବା ଅଣଆନୁଷ୍ଠାନିକ କଥାବାର୍ତ୍ତା ସଫଳ ହୋଇଛି କାରଣ ଦୁହେଁ ବିଭିନ୍ନ ଦ୍ଵିପକ୍ଷୀୟ ଚିନ୍ତା ଉଦ୍ରେକକାରୀ ବିଷୟ ଉପରେ ମନଖୋଲା କଥାବାର୍ତ୍ତା କରିଛନ୍ତି | ଏହି ଆଲୋଚନା ସଂପ୍ରତି ଆନ୍ତର୍ଜାତୀୟ ଏବଂ ଆଞ୍ଚଳିକ କ୍ଷେତ୍ରରେ ଦେଖାଦେଇଥିବା ଗୋଣ୍ତଗୋଳିଆ ପରିସ୍ଥିତି ମଧ୍ୟରେ ଦୁଇ ଦେଶର ସଂପର୍କକୁ ଆହୁରି ସୁଦୃଢ କରିଛି |

ଦୁଇ ଶକ୍ତିଶାଳି ନେତାଙ୍କ ମଧ୍ୟରେ ଚେନ୍ନାଇରେ ହୋଇଥିବା ଦ୍ଵିତୀୟ ଅଣ ଆନୁଷ୍ଠାନିକ ଆଲୋଚନା ଦୁଇ ଦେଶକୁ ଆହୁରି ନିକଟତର କରାଇଛି | ପ୍ରଥମ ଦିନ କୌଶଳଗତ ପ୍ରସଙ୍ଗ, ପ୍ରାଚିନ ଐତିହାସିକ ଏବଂ ସାଂସ୍କୃତିକ ସଂପର୍କ, ବାଣିଜ୍ୟ, ସନ୍ତ୍ରାସବାଦ ଯୋଗୁଁ ନିରାପତ୍ତା ପ୍ରତି ରହିଥିବା ବିପଦ ଉପରେ ଆଲୋକପାତ କରିଥିଲା ଏବଂ ଦ୍ଵିତୀୟ ଦିନ ଦ୍ଵିପକ୍ଷୀୟ ସଂପର୍କ, ସ୍ଥିରତା, ବାଣିଜ୍ୟ, ପୁଞ୍ଜି ବିନିଯୋଗ ଏବଂ ସନ୍ତ୍ରାସବାଦ ଉପରେ ନିହିତ ଥିଲା |

ମହାବଳିପୁରମର ମନ୍ଦିର ପରିସରରେ ପ୍ରଧାନମନ୍ତ୍ରୀ ମୋଦି ସି ଜିନପିଙ୍ଗଙ୍କୁ ଦୁଇ ଦେଶର ସଭ୍ୟତାରେ ଥିବା ସାମଞ୍ଜସ୍ୟ ବିଷୟରେ ଆଲୋକପାତ କରିଥିଲେ | ତତ୍କାଳିନ ପଲ୍ଲଭ ରାଜବଂସ ସହିତ ଚୀନର ସଂପର୍କକୁ ଶ୍ରୀ ମୋଦି ଅବତାରଣା କରିଥିଲେ | ନିକଟରେ ବେଜିଙ୍ଗ ମଧ୍ୟ ଏସୀୟ ସଭ୍ୟତା ଆଲୋଚନା ଆୟୋଜନ କରିଥିଲା ଯେଉଁଥିରେ ଭାରତ ଯୋଗଦେଇ ନଥିଲା |

ଏହି ବୈଠକରେ ଦୁଇ ପକ୍ଷ ଅନେକ ବିଷୟରେ ନିଜର ଆଭିମୁଖ୍ୟ ସଂପର୍କରେ ଖୋଲାଖୋଲି ଆଲୋଚନା କରିଛନ୍ତି | ଭାରତର ବୈଦେଶିକ ସଚିବ ବିଜୟ ଗୋଖଲେ ସ୍ପଷ୍ଟ ଭାବେ କହିଛନ୍ତି ଯେ ବୈଠକରେ ଜମ୍ମୁ କଶ୍ମୀର ପ୍ରସଙ୍ଗ ଆଦୌ ଉତ୍ଥାପନ ହୋଇ ନାହିଁ ବରଂ ବିଶ୍ଵରେ ଏବେ ଦେଖାଦେଇଥିବା ଆର୍ଥିକ ମାନ୍ଦାବସ୍ଥା, ମନ୍ଥର ଅଭିବୃଦ୍ଧି ହାର ତଥା ବାଣିଜ୍ୟିକ ସମସ୍ୟା ଉପରେ ଆଲୋଚନା କରି ଉଭୟ ଶ୍ରୀ ମୋଦି ଏବଂ ଶ୍ରୀ ଜିନପିଙ୍ଗ ଦ୍ଵିପକ୍ଷୀୟ ସ୍ଵାର୍ଥ ନିମନ୍ତେ ଏକତ୍ର କାର୍ଯ୍ୟ କରିବାକୁ ସହମତ ହୋଇଛନ୍ତି | ବୈଦେଶିକ ମନ୍ତ୍ରୀ କହିଛନ୍ତି ଯେ ଏହି ଉଚ୍ଚ ସ୍ତରୀୟ ବୈଠକରେ 17ଟି ବିଷୟ ଉପରେ ଆଲୋଚନା ହୋଇଛି | ୱାହନ ବୈଠକରେ ପାଞ୍ଚଟି ବିଷୟରେ ଆଲୋଚନା ହୋଇଥିଲା ଯଥା କୌଶଳଗତ ସଂଯୋଗ, ଆସ୍ଥା ସୂଚକ ପଦକ୍ଷେପ ମାଧ୍ୟମରେ ସୀମା ସ୍ଥିରତାକୁ ବଜାୟ ରଖିବା, ବାଣିଜ୍ୟିକ ନିଅଣ୍ଟିଆ ପରିସ୍ଥିତି, ଆଫଗାନିସ୍ଥାନରେ ମିଳିତ ପ୍ରକଳ୍ପ ଏବଂ ଦୁଇ ଦେଶର ଲୋକମାନଙ୍କ ମଧ୍ୟରେ ସଂପର୍କ ପ୍ରତିଷ୍ଠା | ଏହି ପାଞ୍ଚଟି ପ୍ରସଙ୍ଗ ମଧ୍ୟରୁ ଆଫଗାନିସ୍ଥାନ ପ୍ରସଙ୍ଗକୁ ବାଦ ଦେଲେ ପ୍ରାୟ ଅନ୍ୟ ଅଧିକାଂଶ ପ୍ରସଙ୍ଗ ମହାବଳିପୁରମରେ ମଧ୍ୟ ଆଲୋଚନା ହୋଇଛି |

ଭାରତର ଅର୍ଥ ମନ୍ତ୍ରୀ ନିର୍ମଳା ସୀତାରମଣ ଏବଂ ଚୀନର ଉପ ପ୍ରଧାନମନ୍ତ୍ରୀ ହୁ ଚୁନୁହାଙ୍କୁ ନେଇ ବାଣିଜ୍ୟ ଏବଂ ପୁଞ୍ଜି ବିନିଯୋଗ କ୍ଷେତ୍ରରେ ରହିଥିବା ସମସ୍ୟାକୁ ଦୂର କରିବା ପାଇଁ ଏକ ଉଚ୍ଚ ସ୍ତରୀୟ କମିଟି ଗଠନ କରାଯିବା ଏକ ଉଲ୍ଲେଖନୀୟ ଅଗ୍ରଗତି | ଗତ ଡିସେମ୍ବର ମାସରେ ଚୀନର ବୈଦେଶିକ ମନ୍ତ୍ରୀ ନୂଆଦିଲ୍ଲୀ ଗସ୍ତ କରିବା କାଳରେ ଟେନ ପିଲର ବୁଝାମଣା ସ୍ଵାକ୍ଷରିତ ହୋଇଥିଲା ଯେଉଁଥିରେ ପର୍ଯ୍ୟଟନ, ଯୁବ ସଂପର୍କର ଆଦାନପ୍ରଦାନ, ଗଣମାଧ୍ୟମ ଏବଂ ବୁଦ୍ଧିଜୀବି ଫୋରମ ଏବଂ ସଂଗ୍ରହାଳୟ ପରିଚାଳନା ଆଦି ଅନ୍ତର୍ଭୁକ୍ତ | ଅଗଷ୍ଟରେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ବେଜିଙ୍ଗ ଗସ୍ତ କରିବା କାଳରେ ଏହିସବୁ କ୍ଷେତ୍ରର ପ୍ରୋତ୍ସାହନ ପାଇଁ ମଧ୍ୟ ଗୁରୁତ୍ଵ ଦେଇଥିଲେ | କିଛି ଦିନ ତଳେ ପର୍ଯ୍ୟଟନର ବିକାଶ ପାଇଁ ଚୀନ ନାଗରିକମାନଙ୍କ ନିମନ୍ତେ ଭିସା କୋହଳ କରିଛି ଭାରତ |

ମହାବଳିପୁରମର ଅଣ ଆନୁଷ୍ଠାନିକ ବୈଠକରେ ତାମିଲନାଡୁ ଏବଂ ଫୁଜିଆନ ପ୍ରଦେଶ ମଧ୍ୟରେ ସାମୁଦ୍ରିକ ସଂପର୍କ ବୃଦ୍ଧି କରିବା ପାଇଁ ମତ ପ୍ରକାଶ ପାଇଛି | ଦୁଇ ଦେଶର ପ୍ରାଚିନ ସାମୁଦ୍ରିକ ସଂପର୍କକୁ ଉଜାଗର କରିବା ପାଇଁ ଏକ ପ୍ରତିଷ୍ଠାନ ପ୍ରତିଷ୍ଠା କରିବା ଉପରେ ମଧ୍ୟ ଆଲୋଚନା ହୋଇଛି |

ଏହି ଅଣ ଆନୁଷ୍ଠାନିକ ବୈଠକ ଦୁଇ ଦେଶର ନେତାଙ୍କ ମଧ୍ୟରେ ଏକ ଅନୁକୂଳ ବାତାବରଣ ସୃଷ୍ଟି କରିବା ପାଇଁ ଅଭିପ୍ରେତ ଥିଲା | ଏଣୁ ଏଥିରେ ହୋଇଥିବା ଆଲୋଚନା ଆନୁଷ୍ଠାନିକ ଆଲୋଚନା ବୋଲି କୁହାଯାଇ ନପାରେ କିନ୍ତୁ ଏହାର ସୁଦୂର ପ୍ରସାରୀ ପ୍ରଭାବ ନିଶ୍ଚୟ ରହିଛି | ପ୍ରଧାନମନ୍ତ୍ରୀ ମୋଦି ଏବଂ ରାଷ୍ଟ୍ରପତି ଜିନପିଙ୍ଗ ଏପରି ଅଣ ଆନୁଷ୍ଠାନିକ ବୈଠକ ବ୍ୟବସ୍ଥାକୁ ପ୍ରସଂଶା କରିଥିଲେ | ଉଭଯ ଏହି ବ୍ୟବସ୍ଥାକୁ ଜାରି ରଖିବା ପାଇଁ ରାଜି ହୋଇଥିଲେ | ତୃତୀୟ ଅଣ ଆନୁଷ୍ଠାନିକ ବୈଠକ ପାଇଁ ଜିନପିଙ୍ଗ ପ୍ରଧାନମନ୍ତ୍ରୀ ମୋଦିଙ୍କ ଚୀନ ଗସ୍ତ ପାଇଁ ଆମନ୍ତ୍ରଣ କରିଛନ୍ତି ଯାହାକୁ ଶ୍ରୀ ମୋଦି ସ୍ଵୀକାର କରିଛନ୍ତି |



ଆଲେଖ: ଶ୍ରୀକାନ୍ତ କୋଣ୍ତାପଲ୍ଲୀ

ଭାବାନୁବାଦ: ରାମଚଂଦ୍ର ନାଥ