ଆର.ସି.ଇ.ପି ଆଲୋଚନାରେ ଭାରତର ସ୍ପଷ୍ଟ ଆଭିମୁଖ୍ୟ

ନଭେମ୍ବର 2ରୁ 4 ପର୍ଯ୍ୟନ୍ତ ହେବାକୁ ଥିବା ପୂର୍ବ ଏସିଆ ସମ୍ମିଳନୀ, ଆସିଆନ ସମ୍ମିଳନୀ ଏବଂ ଅନ୍ୟ ତତସଂପର୍କୀୟ ବୈଠକ ପୂର୍ବରୁ ଆଞ୍ଚଳିକ ବ୍ୟାପକ ଅର୍ଥନୈତିକ ଭାଗିଦାରୀ (ଆର.ସି.ଇ.ପି) ଆଲୋଚନାକୁ ସଫଳର ଆଶା କରାଯାଉଛି। ଏହାଦ୍ୱାରା 2020 ଜୁନରେ ହେବାକୁ ଥିବା ଆନୁଷ୍ଠାନିକ ବୁଝାମଣା ପାଇଁ ରାସ୍ତା ପରିସ୍କାର ହୋଇଯିବ। ଆସନ୍ତା ମାସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ପୂର୍ବ ଏସିଆ ସମ୍ମିଳନୀରେ ଭାଗ ନେବା ପାଇଁ ବ୍ୟାଙ୍ଗକ ଯିବେ। ବୈଠକର କାର୍ଯ୍ୟସୂଚିରେ ଆର.ସି.ଇ.ପିର ପ୍ରସଙ୍ଗ ମଧ୍ୟ ଉଠିବ।

ଦକ୍ଷିଣ ପୂର୍ବ ଏସିଆ ରାଷ୍ଟ୍ର ସଂଘ(ଆସିଆନ)ର ଦଶଟି ସଦସ୍ୟ ଦେଶ ଏବଂ ଏହାର ଛଅଟି ଆଲୋଚନାକାରୀ ଦେଶ ଭାରତ, ଜାପାନ, ଦକ୍ଷିଣ କୋରିଆ, ନ୍ୟୁଜଲ୍ୟାଣ୍ତ, ଅଷ୍ଟ୍ରେଲିଆ ଏବଂ ଚୀନ 2012 ନଭେମ୍ୱରରୁ ଆର.ସି.ଇ.ପି ଆଲୋଚନାରେ ସଂପୃକ୍ତ ଅଛନ୍ତି। ବିଗତ ସାତ ବର୍ଷରେ ବିଭିନ୍ନ ବୁଝାମଣାକୁ ନେଇ ବହୁବାର ଆଲୋଚନା ହୋଇଛି। ବ୍ୟାଙ୍ଗକରେ ଚଳିତ ସପ୍ତାହରେ ଆଞ୍ଚଳିକ ବାଣିଜ୍ୟ ଆଲୋଚନାକୁ ନେଇ ଏକ ବଡ ବୈଠକ ଶେଷ ହୋଇଛି। ଏଥିରେ ପ୍ରାୟ 80 ଭାଗ ଆଲୋଚନା ବୁଝାମଣା ଶେଷ ହୋଇଛି। ମୋଟ 225ଟି ବୁଝାମଣା ମଧ୍ୟରୁ 185ଟି ବୁଝାମଣା ଉପରେ ସହମତି ପ୍ରକାଶ ପାଇଛି ଯାହା ମୁଖ୍ୟତଃ ଦ୍ରବ୍ୟ, ସେବା ଏବଂ ପୁଞ୍ଜି ବିନିଯୋଗ ଉପରେ ପର୍ଯ୍ୟବଶିତ।

ଭାରତ ସମେତ ଆସିଆନ ସଦସ୍ୟ ଏବଂ ଏହାର ଭାଗିଦାରୀ ରାଷ୍ଟ୍ରମାନେ ଆଞ୍ଚଳିକ ଅର୍ଥନୈତିକ ଆଲୋଚନା କରିବାରେ ଆର.ସି.ଇ.ପି ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। ଆର.ସି.ଇ.ପିରେ ଭାଗନେବା ଭାରତର ଆକ୍ଟ ଇଷ୍ଟ ନୀତିର ଏକ ମୁଖ୍ୟ ଭାଗ। ଆର.ସି.ଇ.ପି ଥରେ ସଫଳ ହେଲାପରେ ଆନ୍ତ ଆଞ୍ଚଳିକ ବ୍ୟବସାୟରେ ସ୍ଥିରତା ଦେଖାଦେବ ଏଐବଂ ପଥ ସୁଗମ ହେବ। ଏହାସତ୍ତ୍ୱେ ମଧ୍ୟ ବିଭିନ୍ନ କାରଣରୁ ଏହା ଏତେଟା ସହଜ ହେବନି କାରଣ ପ୍ରତ୍ୟେକ ଦେଶ ନିଜ ଦେଶର ସାମଗ୍ରୀକୁ ସୁରକ୍ଷା ଦେବା ପାଇଁ କେତେକ କ୍ଷେତ୍ରରେ ବୁଝାମଣା ଦିଗରେ ଅସହମତ ହୋଇପାରନ୍ତି। ବିଶେଷକରି ଆଠଟି ପ୍ରସଙ୍ଗ ଉପରେ ମନ୍ତ୍ରୀ ସ୍ତରୀୟ ଆଲୋଚନାରେ ସମାଧାନ ହେବା ଦରକାର ଆର.ସି.ଇ.ପିର ଅନ୍ତିମ ବୁଝାମଣା ପୂର୍ବରୁ। ବିବାଦ ସମାଧାନ ପ୍ରକ୍ରିୟା, ଇ-ବାଣିଜ୍ୟ ଏବଂ ମୂଳ ନିୟମ ଭାରତ ପାଇଁ ମୁଖ୍ୟ ଚିନ୍ତାର ବିଷୟ ରହିଛି। ମନ୍ତ୍ରୀ ସ୍ତରୀୟ ବୈଠକରେ ବାଣିଜ୍ୟ ମନ୍ତ୍ରୀ ପିୟୁଷ ଗୋୟଲ ଭାରତର ପ୍ରତିନିଧିତ୍ୱ କରିଛନ୍ତି। କିନ୍ତୁ ଏହି ବୈଠକ ସଫଳ ହେଲା ନାହିଁ କାରଣ ଅଧିକାଂଶ ବିବାଦୀୟ ପ୍ରସଙ୍ଗ ଅମିମାଂଶିତ ରହିଗଲା। ଏପରିକି ମିଳିତ ବିବୃତ୍ତି ଉପରେ ମଧ୍ୟ ସହମତି ପ୍ରକାଶ ପାଇନଥିଲା।

ଭାରତ ନିୟମ ଭିତ୍ତିକ ଆଞ୍ଚଳିକ ବାଣିଜ୍ୟ ବ୍ୟବସ୍ଥା ପ୍ରତି ପ୍ରତିବଦ୍ଧ ଥିବାରୁ ଏକ ଆପୋଷ ବୁଝାମଣା ଯେପରି ହୋଇପାରିବ ସେଥିପାଇଁ ଅନ୍ୟ ଦେଶମାନଙ୍କ ସହ କଥାବାର୍ତ୍ତା କରୁଛି। ଭାରତର ଚିନ୍ତା ଯେ ମୂଳ ନିୟମକୁ କାର୍ଯ୍ୟକାରୀ କରାନଗଲେ ଭାରତ ବଜାରରେ ଚୀନ ସିଧାସଳଖ ପ୍ରବେଶ କରିବ। ଚୀନର ବାଣିଜ୍ୟିକ ବିବାଦ ଆମେରିକା ସହିତ ଚାଲୁଥିବାରୁ ଆର.ସି.ଇ.ପି ବୁଝାମଣା ଶିଘ୍ର ଚୁଡାନ୍ତ କରିବାକୁ ଚିନ ଚାହୁଁଛି ଯାହାଦ୍ୱାରା ଭାରତ ପରି ଦେଶମାନଙ୍କରେ ଏହାର ବାଣିଜ୍ୟ କାରବାର ବଢିଯିବ।

ଏବେ ଭାରତ ଏବଂ ଚିନ ମଧ୍ୟରେ ଯେଉଁ ବାଣିଜ୍ୟ ଅସମତୁଳତା ରହିଛି ତାହା ଆର.ସି.ଇ.ପି ପରେ ଅର୍ଥହୀନ ହୋଇଯିବ। ଏବଂ ଭାରତର ଚିନ ସହିତ ବାଣିଜ୍ୟ କାରବାରରେ 50 ବିଲିୟନ ଡଲାରର ନିଅଣ୍ଟ ରହିଛି ଏବଂ ଚିନ ଲାଭରେ ଅଛି। ଭାରତର ଏହି ଚିନ୍ତାକୁ ଦୂର କରିବା ପାଇଁ ଚିନ ଏକ ଉଚ୍ଚ ସ୍ତରୀୟ କମିଟି ଗଠନ କରିଛି। ଭାରତର ଅର୍ଥନୀତି ସିଧାସଳଖ ଭାବେ ଦୁଗ୍ଧ ଉତ୍ପାଦନ ଶିଳ୍ପ ଉପରେ ପଡିବ କାରଣ ଏ କ୍ଷେତ୍ରରେ ଅଷ୍ଟ୍ରେଲିଆ ଏବଂ ନ୍ୟୁଜଲ୍ୟାଣ୍ତ ଆଗରେ ଅଛନ୍ତି। ଏଣୁ ଭାରତ ଏଥିପ୍ରତି ସଜାଗ ରହିଛି।

ନିଜ ଦେଶର ଉତ୍ପାଦିତ ସାମଗ୍ରୀର ସୁରକ୍ଷା ଢାଞ୍ଚା ପାଇଁ ପ୍ରସ୍ଥାବକୁ ଯଦି ଗ୍ରହଣ କରାଯାଏ ତେବେ ଭାରତ ଆର.ସି.ଇ.ପିରେ ଯୋଗଦେବ। ଏହାଦ୍ୱାରା ଭାରତର ନାମମାତ୍ର ଚାଷି ଏବଂ କ୍ଷୁଦ୍ର ଶିଳ୍ପ ଯେପରି କ୍ଷତିଗ୍ରସ୍ତ ନହେବ। ବାଣିଜ୍ୟ ମନ୍ତ୍ରୀ ପିୟୁଷ ଗୋୟଲ କହିଛନ୍ତି ଯେ କୌଣସି ମୁକ୍ତ ବାଣିଜ୍ୟ ଉପରେ ସ୍ୱାକ୍ଷର କରିବା ପୂର୍ବରୁ ଘରୋଇ ଶିଳ୍ପ ଏବଂ ଦେଶର ଲୋକମାନଙ୍କର ହିତର ସୁରକ୍ଷା ପ୍ରତି ଅଗ୍ରାଧିକାର ଦିଆଯିବ। ଭାରତ ଏହା ସୁନିଶ୍ଚିତ କରିବ ଯେ ସେବା ଏବଂ ନିବେଶ ଆଦି ପ୍ରତ୍ୟେକ ଦିଗରୁ ଜାତୀୟ ସ୍ୱାର୍ଥ ଯେପରି ସୁରକ୍ଷିତ ରହିବ।

ଆଲେଖ: ରାହୁଲ ମିଶ୍ର

ଭାବାନୁବାଦ: ରାମଚଂଦ୍ର ନାଥ