ବ୍ରିକ୍ସ ରାଷ୍ଟ୍ରସମୂହ ସହ ଭାରତର ସମ୍ପର୍କ ବୃଦ୍ଧି

ଭାରତର ବହୁପକ୍ଷୀୟ ଆଭିମୁଖ୍ୟରେ ଏହାର ବିଦେଶୀ ନୀତିରେ ବ୍ରିକ୍ସ ସମୂହର ଏକ ଅତ୍ୟନ୍ତ ମହତ୍ବପୂର୍ଣ୍ଣ କୌଶଳଗତ ସ୍ଥାନ ରହିଛି | ବିଶ୍ଵ ଭୂ-ରାଜନୀତିରୁ ଭୂ-ଅର୍ଥନୀତିକୁ ଗତି କରୁଥିବା ସମୟରେ, ବ୍ରିକ୍ସ ରାଷ୍ଟ୍ରମାନଙ୍କରେ ଉଭା ହେଉଥିବା ଅର୍ଥବ୍ୟବସ୍ଥା ଭବିଷ୍ୟତରେ ବିଶ୍ଵର ପ୍ରମୁଖ ସଂସ୍ଥା ମଧ୍ୟରେ ପରିଗଣିତ ହେବ | ଏହି ସନ୍ଦର୍ଭରେ ବ୍ରାଜିଲର ରାଜଧାନୀ ବ୍ରସିଲିଆରେ ଏକାଦଶ ଶିଖର ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଯୋଗଦାନ ଗୁରୁତ୍ୱପୂର୍ଣ୍ଣ ମନେ କରାଯାଉଛି | ଶିଖର ସମ୍ମିଳନୀ ହେବା ପୂର୍ବରୁ ପ୍ରଧାନମନ୍ତ୍ରୀ ମୋଦୀ ସମ୍ମିଳନୀର ମହତ୍ଵ ଉପରେ ବର୍ଣ୍ଣନା କରିବାକୁ ଯାଇ କହିଥିଲେ ଯେ ଭାରତ ଓ ବ୍ରିକ୍ସର ଅନ୍ୟ ସଦସ୍ୟ ରାଷ୍ଟ୍ର ମାନେ ବ୍ରିକ୍ସ ଢାଞ୍ଚା ମଧ୍ୟରେ ଆତଙ୍କବାଦ ବିରୁଦ୍ଧରେ ସହଯୋଗ ପାଇଁ ଏକ ବ୍ୟବସ୍ଥା ଗଠନ ଲାଗି ଯୋଜନା କରୁଛନ୍ତି |

ଭାରତର ପ୍ରଧାନମନ୍ତ୍ରୀ ବ୍ରିକ୍ସ ବ୍ୟବସାୟ ପରିଷଦରେ ଉଦବୋଧନ ବେଳେ କହିଥିଲେ ଯେ ବିଶ୍ଵ ମାନ୍ଦାବସ୍ଥା ଦେଇ ଗତି କରୁଥିବା ବେଳେ ବିଶ୍ଵ ଆର୍ଥିକ ଅଭିବୃଦ୍ଧିର 50 ପ୍ରତିଶତ ବ୍ରିକ୍ସ ରାଷ୍ଟ୍ର ଗୁଡିକର ଅବଦାନ ରହିଛି | ତେବେ ଏହା ସତ୍ତ୍ୱେ ମଧ୍ୟ ଏହି ରାଷ୍ଟ୍ର ଗୋଷ୍ଠୀର ଆର୍ଥିକ ଅଭିବୃଦ୍ଧିକୁ ତ୍ୱରାନ୍ୱିତ କରିବା ସହ ଜ୍ଞାନକୌଶଳ ଓ ଅଭିନବ ପ୍ରୟାସ ବଳରେ ଲକ୍ଷ ଲକ୍ଷ ଲୋକଙ୍କୁ ଦାରିଦ୍ର୍ୟମୁକ୍ତ କରାଯାଇପାରିଛି | ଆମ ବଜାରର ଆକାର ଓ ବିବିଧତା ପରସ୍ପର ମଧ୍ୟରେ ପରିପୂରକ | ବ୍ରିକ୍ସ ବ୍ୟବସାୟ ଫୋରମରେ ଭାରତରେ ନିବେଶ ଲାଗି ଆହ୍ଵାନ ଜଣାଇ ସେ କହିଛନ୍ତି ଯେ ଭାରତ ହେଉଛି ବିଶ୍ଵର ସର୍ବୋତ୍ତମ ମୁକ୍ତ ତଥା ପୁଞ୍ଜି ନିବେଶ ଅନୁକୂଳ ଅର୍ଥନୀତି ରାଷ୍ଟ୍ର | ଭାରତରେ ପୁଞ୍ଜି ନିବେଶର ଅସିମ ସମ୍ଭାବନା ଓ ସୁଯୋଗ ରହିଛି ବୋଲି ଜଣାଇ ଭାରତରେ ବିଶେଷକରି ଭିତ୍ତି ଭୂମି ବିକାଶ କ୍ଷେତ୍ରରେ ପୁଞ୍ଜି ନିବେଶ ଲାଗି ବ୍ରିକ୍ସ ସଦସ୍ୟ ରାଷ୍ଟ୍ରର ବ୍ୟବସାୟୀ ମାନଙ୍କୁ ସେ ଆହ୍ଵାନ ଦେଇଥିଲେ| ସେ କହିଥିଲେ ଯେ ବ୍ରିକ୍ସର ଆଗାମୀ ଶିଖର ବୈଠକ ବସିବା ପୂର୍ବରୁ ଅତିକମରେ ପାଞ୍ଚୋଟି କ୍ଷେତ୍ର ଚିହ୍ନଟ କରି ଆପୋଷ ସ୍ଵାର୍ଥ ଆଧାରରେ ମିଳିତ ସହଯୋଗରେ କାର୍ଯ୍ୟ କରିବା ଉଚିତ | 

ବ୍ରିକ୍ସ ଫୋରମ, ସଦସ୍ୟ ରାଷ୍ଟ୍ରର ଶୀର୍ଷ ନେତା ମାନଙ୍କୁ ଆନ୍ତର୍ଜାତୀୟ ଉଦବେଗ ତଥା ଆପୋଷ ସ୍ଵାର୍ଥ ସମ୍ବଳିତ ପ୍ରସଙ୍ଗ ନେଇ ବ୍ୟାପକ ଆଲୋଚନା କରିବା ଲାଗି ଅବସର ପ୍ରଦାନ କରିଥାଏ | ଏହି ବ୍ରିକ୍ସ ସମ୍ମିଳନୀ, ଦ୍ଵିପକ୍ଷୀୟ, ଆଞ୍ଚଳିକ ଓ ବହୁପକ୍ଷୀୟ ପ୍ରସଙ୍ଗ ନେଇ ମତ ଆଦାନ ପ୍ରଦାନ ଲାଗି ନେତାମାନଙ୍କୁ ସୁଯୋଗ ପ୍ରଦାନ କରିଥାଏ | ଏହି ଶିଖର ବୈଠକ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରୁଷ ରାଷ୍ଟ୍ରପତି ଭ୍ଲାଦିମିର ପୂତିନଙ୍କ ସହ ସାକ୍ଷାତ ଆଲୋଚନା କରିଥିଲେ | ରାଷ୍ଟ୍ରପତି ପୂତିନଙ୍କ ସହ ବୈଠକ ଅତ୍ୟନ୍ତ ସଫଳ ଥିଲା ବୋଲି ପ୍ରଧାନମନ୍ତ୍ରୀ ଟୁଇଟ କରି ଜଣାଇଥିଲେ ଓ ଭାରତ ଓ ରୁଷ ମଧ୍ୟରେ ଥିବା ସମ୍ପର୍କର ବ୍ୟାପକ ସମୀକ୍ଷା କରାଯାଇଥିଲା ବୋଲି ସେ କହିଥିଲେ | ଭାରତ ଓ ରୁଷ ବାଣିଜ୍ୟ, ସୁରକ୍ଷା ଓ ସଂସ୍କୃତି ଭଳି କ୍ଷେତ୍ରରେ ଦୃଢ ସହଯୋଗ କରୁଛନ୍ତି | ଦ୍ଵିପକ୍ଷୀୟ ସମ୍ପର୍କ ଯୋଗୁଁ ଦୁଇ ଦେଶର ଲୋକମାନେ ଉପକୃତ ହେବେ | ପୂତିନ କହିଛନ୍ତି ଯେ ରୁଷ ଓ ଭାରତ ମଧ୍ୟରେ ଦ୍ଵିପକ୍ଷୀୟ କାରବାର 17 ପ୍ରତିଶତ ଅଭିବୃଦ୍ଧି ହାର ବୃଦ୍ଧି ପାଇଛି | ରାଷ୍ଟ୍ରପତି ପୂତିନ, ଆସନ୍ତା ବର୍ଷ ମେ ମାସରେ ରୁଷରେ ଅନୁଷ୍ଠିତ ହେବାକୁ ଥିବା ବିଜୟ ଦିବସ ସମାରୋହରେ ଯୋଗ ଦେବା ଲାଗି ଶ୍ରୀ ମୋଦୀଙ୍କୁ ଆମନ୍ତ୍ରଣ କରିଛନ୍ତି |

ପ୍ରଧାନମନ୍ତ୍ରୀ ଶ୍ରୀ ମୋଦୀ, ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ସହ ମଧ୍ୟ ଆଳାପ ଆଲୋଚନା କରିଥିଲେ | ସେମାନଙ୍କ ମଧ୍ୟରେ ମମଲ୍ଲାପୁରମରେ ଦ୍ଵିତୀୟ ଅଣଆନୁଷ୍ଠାନିକ ଶିଖର ସମ୍ମିଳନୀର ଗୋଟିଏ ମାସ ପରେ ଦ୍ଵିତୀୟ ଥର ଲାଗି ଏହି ସାକ୍ଷାତ ଆଲୋଚନା ହୋଇଥିଲା | ଉଭୟ ନେତା ଭାରତ ଓ ଚୀନ ମଧ୍ୟରେ ଦ୍ଵିପକ୍ଷୀୟ ସମ୍ପର୍କକୁ ଆହୁରି ମଜବୁତ କରିବା ନେଇ ମୁଖ୍ୟତଃ ଆଲୋଚନା କରିଥିଲେ | ଭାରତ ଦ୍ଵାରା ଆଞ୍ଚଳିକ ବ୍ୟାପକ ଆର୍ଥିକ ଭାଗୀଦାରୀ (ଆରସିଇପି)ରେ ଯୋଗ ନଦେବାଲାଗି ନିଷ୍ପତ୍ତି ନେବାର ଅଳ୍ପ କିଛି ଦିନ ପରେ ଏହି ବୈଠକ ଅନୁଷ୍ଠିତ ହୋଇଥିଲା | ସୂଚନା ଯୋଗ୍ୟ ଯେ ଭାରତ ଆରସିଇପିରେ ସାମିଲ ହେଉ ବୋଲି ଚୀନ ଚାହେଁ ଓ ଚୀନର ନେତାମାନେ ଏସଙ୍କ୍ରାନ୍ତରେ ଏବେ ମଧ୍ୟ ଆଶା ରଖିଛନ୍ତି | ଏହି ବୈଠକ କାଳରେ ରାଷ୍ଟ୍ରପତି ସି ଜିନପିଙ୍ଗ, ଦ୍ଵିତୀୟ ଅଣଆନୁଷ୍ଠାନିକ ବୈଠକ ସମୟରେ ତାଙ୍କୁ ଭବ୍ୟ ସ୍ଵାଗତ ସମ୍ବର୍ଦ୍ଧନା ଦିଆଯାଇଥିବାରୁ ପ୍ରଧାନମନ୍ତ୍ରୀ ମୋଦୀଙ୍କୁ ଧନ୍ୟବାଦ ଜଣାଇଥିଲେ | ସେ ମଧ୍ୟ ଆସନ୍ତା ବର୍ଷ ଚୀନ ଦ୍ଵାରା ଆୟୋଜିତ ହେବାକୁ ଥିବା ତୃତୀୟ ଅଣଆନୁଷ୍ଠାନିକ ଶିଖର ବୈଠକ ଲାଗି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଆମନ୍ତ୍ରଣ କରିଥିଲେ | ବାଣିଜ୍ୟ ଓ ଅର୍ଥନୀତି ଉପରେ ଏକ ନୂତନ ଉଚ୍ଚ ସ୍ତରୀୟ ବ୍ୟବସ୍ଥା ଖୁବ ଶୀଘ୍ର ପ୍ରତିଷ୍ଠା ଲାଗି ଦୁଇ ନେତା ମତବ୍ୟକ୍ତ କରିଥିଲେ | ଉଭୟ ନେତା, ଦୁଇ ଦେଶର ସ୍ଵତନ୍ତ୍ର ପ୍ରତିନିଧି ମାନଙ୍କ ମଧ୍ୟରେ ସୀମା ସଙ୍କ୍ରାନ୍ତୀୟ ମାମଲା ନେଇ ଆଉ ଏକ ବୈଠକ କରିବା ଲାଗି ସେମାନଙ୍କ ଇଚ୍ଛା ବ୍ୟକ୍ତ କରିଥିଲେ ଓ ସୀମା ଇଲାକାରେ ଶାନ୍ତି ଓ ସ୍ଥିରତା ବଜାୟ ରଖିବା ନେଇ ଦୋହୋରାଇଥିଲେ | ସେମାନେ ମଧ୍ୟ ବ୍ରିକ୍ସ, ଡବ୍ଲ୍ୟୁଟିଓ ଓ ଆରସିଇପି ଭଳି ପାରସ୍ପରିକ ପ୍ରସଙ୍ଗ ଉପରେ ବ୍ୟାପକ ଚର୍ଚ୍ଚା କରିଥିଲେ | 

ଭାରତର ପ୍ରଧାନମନ୍ତ୍ରୀ ଓ ଚୀନ ରାଷ୍ଟ୍ରପତି, ଆସନ୍ତା ବର୍ଷହେବାକୁ ଥିବା ଦୁଇ ଦେଶ ମଧ୍ୟରେ କୂଟନୈତିକ ସମ୍ପର୍କ ସ୍ଥାପନାର 70 ବର୍ଷ ପୂର୍ତ୍ତି ପାଳନ ଉପଲକ୍ଷେ ପ୍ରସ୍ତୁତିର ସମୀକ୍ଷା କରିଥିଲେ | ଏହି ସମାରୋହ ପାଳନ ଦ୍ଵାରା ଦୁଇ ଦେଶ ମଧ୍ୟରେ ସମ୍ପର୍କ ଆହୁରି ଦୃଢୀଭୂତ ହେବ ବୋଲି ନେତା ଦ୍ୱୟ ସହମତି ପ୍ରକାଶ କରିଛନ୍ତି | 

ମୂଳ ଲେଖା : ରୂପା ନାରାୟଣ ଦାସ, ରଣନୀତିକ ବିଶ୍ଳେଷକ 

ଅନୁବାଦ : ରୀତା ଯୋଶୀ