ଗୋତବାୟା ରାଜପକ୍ଷେ ଶ୍ରୀଲଙ୍କାର ସପ୍ତମ ରାଷ୍ଟ୍ରପତି ଭାବେ ନିର୍ବାଚିତ

ଶ୍ରୀଲଙ୍କାରେ ଗତ ଶନିବାର ଦିନ ରାଷ୍ଟ୍ରପତି ପଦ ପାଇଁ ନିର୍ବାଚନ ଅନୁଷ୍ଠିତ ହୋଇଛି | ଶ୍ରୀଲଙ୍କା ପୋଡୁଜନ ପେରାମୁନା(ଏସଏଲପିପି)ର ଶ୍ରୀ ଗୋତବାୟା ରାଜପକ୍ଷେ ମୋଟ 52.25 ପ୍ରତିଶତ ଭୋଟ ପାଇ ଦେଶର ସପ୍ତମ ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି | ଶ୍ରୀଲଙ୍କାର ଅନୁରାଧାପୁର ନଗରୀରେ ପଦ ଓ ଗୋପନୀୟତାର ଶପଥ ପାଠ କରିବେ ବୋଲି ସେ ଘୋଷଣା କରିଛନ୍ତି | ଶ୍ରୀଲଙ୍କାର ନୂତନ ରାଷ୍ଟ୍ରପତି ଭାବେ ନିର୍ବାଚିତ ହୋଇଥିବାରୁ ଭାରତର ପ୍ରଧାନମନ୍ତ୍ରୀ ସମେତ ବିଶ୍ଵନେତା ମାନେ ଶ୍ରୀ ଗୋତବାୟା ରାଜପକ୍ଷେଙ୍କୁ ଅଭିନନ୍ଦନ ଜଣାଇଛନ୍ତି |

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାଙ୍କ ବାର୍ତ୍ତାରେ କହିଛନ୍ତି ଭାରତ ଓ ଶ୍ରୀଲଙ୍କା ମଧ୍ୟରେ ସମ୍ପର୍କକୁ ଆହୁରି ଘନିଷ୍ଠ କରିବା ପାଇଁ ନବ ନିର୍ବାଚିତ ଶ୍ରୀଲଙ୍କା ରାଷ୍ଟ୍ରପତି ତାଙ୍କ ସହ ମିଳିମିଶି କାମ କରିବାକୁ ପ୍ରତିଶ୍ରୁତି ଦେଇଛନ୍ତି | ଭାରତର ଜନସାଧାରଣ ଓ ନିଜ ତରଫରୁ ଶ୍ରୀ ଗୋତବୟାଙ୍କୁ ଶୁଭେଚ୍ଛା ଜଣାଇ ଶ୍ରୀ ମୋଦୀ କହିଛନ୍ତି ଯେ ଶ୍ରୀ ରାଜପକ୍ଷେଙ୍କ ଦକ୍ଷ ନେତୃତ୍ଵ ଅଧୀନରେ ଶ୍ରୀଲଙ୍କା ଶାନ୍ତି ଓ ସମୃଦ୍ଧି, ଭାଇଚାରା, ସାଂସ୍କୃତିକ ଓ ଐତିହାସିକ ପ୍ରଗତି ପଥରେ ଆଗେଇ ଚାଲିବ ଏବଂ ଭାରତ ଓ ଶ୍ରୀଲଙ୍କା ମଧ୍ୟରେ ବହୁ ଦିନରୁ ପୁରୁଣା ସମ୍ପର୍କ ଆହୁରି ମଜବୁତ ହେବ ବୋଲି ତାଙ୍କର ଦୃଢ ବିଶ୍ଵାସ ରହିଛି | ଏହିସବୁ ଲକ୍ଷ ହାସଲ ପାଇଁ ଶ୍ରୀଲଙ୍କାର ନୂଆଁ ସରକାର ସହ ହାତକୁ ହାତ ମିଳାଇ ଭାରତ କାର୍ଯ୍ୟ ଜାରି ରଖିବ ବୋଲି ଭାରତର ପ୍ରତିଶୃତିବଦ୍ଧତାକୁ ଶ୍ରୀ ମୋଦୀ ଦୋହୋରାଇଛନ୍ତି | ଶ୍ରୀ ରାଜପକ୍ଷେ ମଧ୍ୟ ବିକାଶ ଓ ନିରାପତ୍ତାକୁ ନିଶ୍ଚିତ କରିବା ପାଇଁ ଭାରତ ସହ ଅତି ଘନୀଷ୍ଠ ଭାବେ କାମ କରିବାକୁ ଇଚ୍ଛା ବ୍ୟକ୍ତ କରିଛନ୍ତି |

ଶ୍ରୀଲଙ୍କାକୁ ଉନ୍ନୟନ ଓ ସୁରକ୍ଷା ସହାୟତା କ୍ଷେତ୍ରରେ ଭାରତ ଏକ ଗୁରୁତ୍ୱପୂର୍ଣ୍ଣ ଭାଗୀଦାରୀ ରାଷ୍ଟ୍ରର ଭୂମିକା ନିଭାଉଛି | କିନ୍ତୁ ମହିନ୍ଦା ରାଜପକ୍ଷଙ୍କ ଦ୍ଵିତୀୟ କାର୍ଯ୍ୟକାଳ ସମୟରେ ଭାରତ-ଶ୍ରୀଲଙ୍କା ସମ୍ପର୍କରେ ସାମାନ୍ୟ ଫିକା ପଡି ଯାଇଥିଲା | ତେବେ 2015 ରୁ 2019 ମଧ୍ୟରେ ସେହି ଦ୍ଵିପ ରାଷ୍ଟ୍ରରେ ନେସନାଲ ୟୁନିଟି ସରକାରଙ୍କ ଅମଳରେ ଦୁଇ ଦେଶ ମଧ୍ୟରେ ଆପୋଷ ବୁଝାମଣା ପୁନଃସ୍ଥାପିତ ହୋଇଥିଲା | ଦ୍ଵିପକ୍ଷୀୟ ସମ୍ପର୍କକୁ ଆହୁରି ମଜବୁତ କରିବା ପାଇଁ ପ୍ରତିଶ୍ରୁତିବଦ୍ଧତା ପାଳନ କରିବା ସକାଶେ ଭାରତ ଓ ଶ୍ରୀଲଙ୍କା ମଧ୍ୟରେ ଅନେକ ବୁଝାମଣା ପତ୍ର ମଧ୍ୟ ସ୍ବାକ୍ଷରିତ ହୋଇଥିଲା | କିନ୍ତୁ ଶ୍ରୀଲଙ୍କାର ପ୍ରଶାସନିକ ବାଧାବିଘ୍ନ ଓ ଦେଶୀୟ ସ୍ତରରେ ପ୍ରତିବାଦ ଯୋଗୁଁ ଅନେକ ବୁଝାମଣା କାର୍ଯ୍ୟକାରୀ ହୋଇପାରି ନାହିଁ | ଶ୍ରୀ ଗୋତବାୟା ରାଜପକ୍ଷେ ଓ ତାଙ୍କ ପ୍ରଶାସନର ଆଭିମୁଖ୍ଯ ଓ ହାବଭାବ ଉପରେ ଏହିସବୁ ବୁଝାମଣାପତ୍ର ଗୁଡିକର ଭାଗ୍ୟ ଏବେ ନିର୍ଭର କରୁଛି |ଶ୍ରୀଲଙ୍କାରେ ଭାରତର ଉନ୍ନୟନମୂଳକ ପ୍ରକଳ୍ପର କାର୍ଯ୍ୟକାରିତାରେ ବିଳମ୍ବ ଓ ଶ୍ରୀଲଙ୍କାରେ ଚୀନ ତରଫରୁ ସାମରିକ ଉପସ୍ଥିତି ବୃଦ୍ଧି ଯାହାଦ୍ୱାରା ଶ୍ରୀଲଙ୍କାର ତାମିଲ ସମ୍ପ୍ରଦାୟକୁ ରାଜନୈତିକ ପୁନର୍ଥଇଥାନ ପ୍ରକ୍ରିୟା ବାଧାପ୍ରାପ୍ତ ହେବା ସଙ୍ଗେ ସଙ୍ଗେ ଭାରତ-ଶ୍ରୀଲଙ୍କା ସମ୍ପର୍କ କ୍ଷ୍ୟତିଗ୍ରସ୍ତ ହେବା ଉଦବେଗର କାରଣ ହୋଇଛି |

ଶ୍ରୀ ଗୋତବାୟାଙ୍କ ବିଜୟ ଫଳରେ ପ୍ରଶାସନରେ ତାଙ୍କ ପରିବାର ଏକ ଗୁରୁତ୍ୱପୂର୍ଣ୍ଣ ଭୂମିକା ନିଭାଇବ ବୋଲି ଆଶା କରାଯାଉଛି| ରାଜପକ୍ଷଙ୍କ ଭାଇମାନେ ଯେଉଁ ଗୁରୁତ୍ୱପୂର୍ଣ୍ଣ ଦାୟିତ୍ବରେ ରହିଛନ୍ତି ସେ ଗୁଡିକ ସହ ନୂତନ ପ୍ରଶାସନ ସାଲିସ କରିବ କି ନାହିଁ ତାହା ଦେଖିବାକୁ ବାକି ଅଛି | ରାଜପକ୍ଷେଙ୍କ ପରିବାରର ଚୀନ ସହ ଘନିଷ୍ଠ ସମ୍ପର୍କ ଥିବା କାହାକୁ ଅଛପା ନାହିଁ | ମହିନ୍ଦା ରାଜପକ୍ଷେଙ୍କ ଶାସନ କାଳରେ ଗୋତାବାୟା ପ୍ରତିରକ୍ଷା ସଚିବ ଥିଲେ ଏବଂ ସେହି ସମୟରେ ଶ୍ରୀଲଙ୍କା ଦ୍ଵାରା ଭାରତର ସୁରକ୍ଷା ଉଦବେଗ ଗୁଡିକ ପ୍ରତି ଅଣଦେଖା କରାଯାଇଥିଲା | ତେବେ ପରବର୍ତ୍ତୀ ସମୟରେ ରାଜପକ୍ଷଙ୍କ ପରିବାର ନିଜର ଭୁଲ ବୁଝିପାରିଥିଲେ ଓ କ୍ଷମତାକୁ ଫେରିଲେ ଏଥିରେ ସଂଶୋଧନ କରିବେ ବୋଲି ପ୍ରତିଶ୍ରୁତି ଦେଇଥିଲେ |

ପ୍ରତିରକ୍ଷା ସଚିବ ଥିବା ବେଳେ ଗୋତବାୟା ରାଜପକ୍ଷେ 2005 ରୁ 2009 ମସିହା ପର୍ଯ୍ୟନ୍ତ ଏଲଟିଟିଇ ବିରୁଦ୍ଧରେ ସଂଗ୍ରାମ କ୍ଷେତ୍ରରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଇଥିଲେ | ତେବେ ମାନବାଧିକାର ଲଙ୍ଘନ ଓ ସିଂହଳ ବୌଦ୍ଧ ଜାତୀୟତାବାଦୀ ଉଗ୍ରବାଦୀ ଗୋଷ୍ଠୀକୁ ସମର୍ଥନ ତଥା ସାମ୍ପ୍ରଦାୟିକ କାର୍ଯ୍ୟକଳାପ ଆଦି ତାଙ୍କ ବିରୁଦ୍ଧରେ ଅଭିଯୋଗ ହୋଇଥିଲା | ଏଥର ରାଷ୍ଟ୍ରପତି ନିର୍ବାଚନରେ ଶ୍ରୀଲଙ୍କାର ସଂଖ୍ୟାଲଘୁ ସମ୍ପ୍ରଦାୟର ଅଧିକାଂଶ ଭୋଟ ତାଙ୍କର ପ୍ରତିଦ୍ଵନ୍ଦୀ ସଜିଦ ପ୍ରେମଦାସାଙ୍କୁ ମିଳିଛି ହେଲେ ଶ୍ରୀଲଙ୍କାର ସବୁ ନାଗରିକ ମାନଙ୍କ ସେ ରାଷ୍ଟ୍ରପତି ବୋଲି ଗୋତବାୟା ଘୋଷଣା କରିଛନ୍ତି |

ନିର୍ବାଚନରେ ବିଜୟୀ ହେଲା ପରେ ଗୋତବାୟା ତାଙ୍କ ପ୍ରଥମ ଉଦବୋଧନରେ ଇଷ୍ଟର ରବିବାର ବୋମା ବିସ୍ଫୋରଣ ପରେ ଦେଶର ଭୁଷୁଡି ପଡିଥିବା ଅର୍ଥନିତୀକୁ ସଜାଡିବାରେ ସେ ପ୍ରାଧାନ୍ୟ ଦେବେ ବୋଲି କହିଛନ୍ତି | ରାଷ୍ଟ୍ରପତି ଭାବେ ତାମିଲ ସମସ୍ୟା ପ୍ରତି ସେମାନଙ୍କ ଆଭିମୁଖ୍ୟ ଉପରେ ଭାରତ ତୀକ୍ଷଣ ଦ୍ରୁଷ୍ଟି ରଖିବ | କାରଣ ଭାରତ ଶ୍ରୀଲଙ୍କା ସମ୍ପର୍କରେ ତାମିଲ ସମ୍ପ୍ରଦାୟର ବିକାଶ ଏକ ମୁଖ୍ୟ ପ୍ରସଙ୍ଗ ବୋଲି ବିବେଚନା କରାଯାଉଛି | ଗୋତବାୟାଙ୍କ ଶାସନ କାଳରେ ନୂଆଦିଲ୍ଲୀ ଓ କଲୋମ୍ବୋ ମଧ୍ୟରେ ନିରାପତ୍ତା ସମ୍ପର୍କ ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି |

ଭାରତ ଓ ଶ୍ରୀଲଙ୍କା ସମ୍ପର୍କକୁ ମଜବୁତ କରିବା ଏବଂ ଦୁଇ ଦେଶ ମଧ୍ୟରେ ବିଭିନ୍ନ କ୍ଷେତ୍ରରେ ଥିବା ସମ୍ପର୍କକୁ ଦୃଢୀଭୂତ କରିବା ପାଇଁ ଦୁଇ ଦେଶର ସରକାର ମଧ୍ୟରେ ଆପୋଷ ସହଯୋଗ ଓ ବୁଝାମଣାର ଆବଶ୍ୟକତା ରହିଛି | ସେହି ଦେଶ ଭିତରେ ଘଟୂଥିବା ଘଟଣାବଳୀ ଗୁଡିକ ଦୁଇ ଦେଶକୁ ପ୍ରଭାବିତ କରୁଛି | କୌଣସି ନିର୍ଦ୍ଧିଷ୍ଟ ଦେଶର ରାଜନୈତିକ, ଅର୍ଥନୈତିକ ଓ ନିରାପତ୍ତା ସହାୟତା ପାଇଁ କିମ୍ବା କାହାପ୍ରତି ପାତର ଅନ୍ତର ବିନା ଏକ ସମତୁଲ ବୈଦେଶିକ ନୀତି ଅବଲମ୍ବନ ପାଇଁ ଗୋତବାୟା ରାଜପକ୍ଷେ ପ୍ରଶାସନର ଇଚ୍ଛା ଓ ଦକ୍ଷତା ଉପରେ ଭାରତ ଶ୍ରୀଲଙ୍କା ମଧ୍ୟରେ ଭବିଷ୍ୟତ ସମ୍ପର୍କ ନିର୍ଭର କରୁଛି |

ମୂଳ ଲେଖା : ଡଃ ଗୁଲବୀନ ସୁଲତାନା, ଗବେଷଣା ବିଶ୍ଳେଷକ, ଆଇଡ଼ିଏସଏ

ଅନୁବାଦ : ଜଗନ୍ନାଥ ମଲ୍ଲିକ, ରୀତା ଯୋଶୀ