ତାଲିବାନ –ଆମେରିକା କଥାବାର୍ତ୍ତା ପୁନଃ ଆରମ୍ଭ ହେବାକୁ ଯାଉଥିବାବେଳେ ଆଗକୁ ବଡ଼ ଆହ୍ୱାନର ସମ୍ଭାବନା

ବାଗ୍ରାମ ବିମାନ ଘାଟି ପରିସରରେ ଆୟୋଜିତ ଏକ ଧନ୍ୟବାଦ ସମର୍ପଣ ଉତ୍ସବରେ ଯୋଗଦେବା ଅବସରରେ ତାଲିବାନ ସହ ପୁନଃ କଥାବାର୍ତ୍ତା ଆରମ୍ଭ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଘୋଷଣା କରିବା ପରେ ସେହି ବିମାନଘାଟି ପରିସରରେ ଅବସ୍ଥିତ ଏକ ଚିକିତ୍ସା କେନ୍ଦ୍ର ବାହାରେ ତାଲିବାନ ସନ୍ତ୍ରାସବାଦି ମାନଙ୍କ ଦ୍ୱାରା ଗତକାଲି ଏକ ଶକ୍ତିଶାଳି ଆତ୍ମଘାତି ବିସ୍ଫୋରଣ କରାଯାଇଛି। ଡୋନାଲ୍ଡ ଟ୍ରମ୍ପଙ୍କ ସହ କଥାବାର୍ତ୍ତା ପାଇଁ ତାଲିବାନର ଏକ ରାଜନୈତିକ ଦଳ ପ୍ରସ୍ତୁତ ହେଉଥିବାବେଳେ କାବୁଲ ସ୍ଥିତ ନାଟୋର ଏକ ସାମରିକ ଘାଟି ଉପରେ ତାଲିବାନ ଦ୍ୱାରା ଆକ୍ରମଣ ପରେ ଆମେରିକା ରାଷ୍ଟ୍ରପତିଙ୍କ ଶାନ୍ତି କଥାବାର୍ତ୍ତାକୁ ସ୍ଥଗିତ ରଖିଥିଲେ ଏବଂ କଥାବାର୍ତ୍ତା ପୁନଃ ଆରମ୍ଭ କରିବାକୁ ଘୋଷଣା କରିଥିବାବେଳେ ପୁଣି ଏଭଳି ଆକ୍ରମଣ ଏ କ୍ଷେତ୍ରରେ ବାଧା ସୃଷ୍ଟି କରିଛି। ସେପ୍ଟେମ୍ବର ମାସରୁ ଶାନ୍ତି କଥାବାର୍ତ୍ତା ବନ୍ଦ ରହିଥିବାବେଳେ ଅସ୍ତ୍ର ବିରତି ପାଇଁ ସର୍ତ୍ତ ଚୁଡାନ୍ତ ହେବାବେଳେ ଯୁଦ୍ଧ ବନ୍ଦ ହେବବୋଲି କହି କଥାବାର୍ତ୍ତା ପାଇଁ ଖୋଲାମନ ରଖିଥିବା କଥା ତାଲିବାନ କହୁଛି। ଏହାପରେ ତାଲିବାନ ପକ୍ଷରୁ ଚିନ, ରୁଷ ଓ ପାକିସ୍ତାନର ନେତାମାନଙ୍କ ସହ ମଧ୍ୟ କଥାବାର୍ତ୍ତା କରାଯାଇଛି।

ବିଳମ୍ୱ ସତ୍ତ୍ୱେ ଆମେରିକା ଓ ତାଲିବାନ ମଧ୍ୟରେ କଥାବାର୍ତ୍ତା ପୁନଃ ଆରମ୍ଭ ହୋଇଥିବା କଥା ତାଲିବାନ ମୁଖପାତ୍ର ସୁହେଲ ଶହିନ୍ ସୂଚନା ଦେଇଛନ୍ତି। ଆଫଗାନିସ୍ଥାନର ନାମ ଇସଲାମିକ ରିପବ୍ଲିକ ନରଖି ଇସଲାମିକ ଏମିରେଟ ରଖିବାକୁ ତାଲିବାନ ଚାହୁଁଥିବାବେଳେ ରାଷ୍ଟ୍ରପତି ଅଶରଫ ଘନିଙ୍କ ନେତୃତ୍ୱାଧିନ ଆଫଗାନ ସରକାର ଏହାକୁ ବିରୋଧ କରୁଛନ୍ତି ଏବଂ ଆଫଗାନ ସରକାରଙ୍କ ମୂଳ ପରିଚୟ ସହ ସାଲିସ କରାଯିବା ନାହିଁ ବୋଲି କହୁଛନ୍ତି।

ସେପ୍ଟେମ୍ୱର ମାସରେ ଆମେରିକା କଥାବାର୍ତ୍ତା ବନ୍ଦ କରିବା ପୂର୍ବରୁ ଅନେକ ସମସ୍ୟାର ସମାଧାନ ହୋଇଥିବା କଥା ତାଲିବାନ କହୁଛି କିନ୍ତୁ ଆମେରିକା ସହ ଯୁଦ୍ଧ ବିରତି ଏବଂ ଆଫଗାନ ସରକାରଙ୍କ ସହ ଶାନ୍ତି କଥାବାର୍ତ୍ତା ବିଷୟରେ କିଛି ସମାଧାନ ହୋଇପାରି ନାହିଁ। ଏହି ପ୍ରସଙ୍ଗ ଅସମାଧିତ ହୋଇ ରହିଥିବାରୁ ଆମେରିକା, ତାଲିବାନ ଓ ଆଫଗାନ ସରକାରଙ୍କ ମଧ୍ୟରେ ଆଗାମି ଦିନରେ ଏହା ଉପରେ କଥାବାର୍ତ୍ତା ହେବାର ଆବଶ୍ୟକତା ରହିଛି।

ତାଲିବାନ କାବୁଲ ସରକାରଙ୍କ ସ୍ଥିତାବସ୍ଥା ବିଷୟ କଥାବାର୍ତ୍ତାରେ ଉତ୍ଥାପନ କରିବା ଅନ୍ୟ ଏକ ଅସହଜ ବିଷୟ ବୋଲି ବିବେଚନା କରାଯାଉଛି। ସେପ୍ଟେମ୍ୱର 28 ତାରିଖରେ ଆଫଗାନ ରାଷ୍ଟ୍ରପତି ପଦ ପାଇଁ ନିର୍ବାଚନ ହୋଇଛି କିନ୍ତୁ ଏପର୍ଯ୍ୟନ୍ତ ଫଳାଫଳ ଜଣାପଡି ନାହିଁ। ଡକ୍ଟର ଘନିଙ୍କ ପ୍ରତିଦ୍ୱନ୍ଦି ଅବଦ୍ଦୁଲ୍ଲା ଅବଦୁଲ୍ଲା ଭୋଟ ଗଣତିରେ ସାଧୁତା ଓ ସ୍ୱଚ୍ଛତା ପାଇଁ ଦାବି କରି ବିଭିନ୍ନ ସ୍ଥାନରେ ପ୍ରତିବାଦ ସଭାମାନ କରୁଛନ୍ତି। ନିର୍ବାଚନ ବିବାଦକୁ ନେଇ ଯଦି ହିଂସା ବ୍ୟାପିବ ତେବେ ଆମେରିକା-ତାଲିବାନ କଥାବାର୍ତ୍ତା କ୍ଷେତ୍ରରେ ଏକ ମସ୍ତବଡ ସମସ୍ୟା ସୃଷ୍ଟି ହେବ।

ଯଦି ଘନିଙ୍କ ସରକାର ପ୍ରତି ଗଣ ସମର୍ଥନ ନମିଳିବ ତେବେ ତାଲିବାନ ତାଙ୍କର ବୈଧତାକୁ ନେଇ ବିବାଦ ସୃଷ୍ଟି କରିବାର ଆଶଙ୍କା ରହିଛି। ଏଭଳି କ୍ଷେତ୍ରରେ ତାଲିବାନ ପ୍ରକୃତ ପ୍ରତିନିଧି ବୋଲି ନିଜକୁ ବିବେଚନା କରୁଛି। ଏନେଇ ଅନ୍ତର୍ଜାତୀୟ କ୍ଷେତ୍ରରେ ମଧ୍ୟ ସମାଧାନ ପନ୍ତା ଖୋଜା ଚାଲିଛି ଏବଂ କ୍ଷମତା ପରିସରରେ ତାଲିବାନକୁ ରଖାଯିବ ବୋଲି ଅନ୍ତର୍ଜାତୀୟ ପକ୍ଷଗୁଡିକ ମଧ୍ୟ ସୂଚନା ଦେଲେଣି।

ରୁଷରେ ପ୍ରକାଶିତ ଏକ ଖବରରୁ ଜଣା ପଡିଛି ଆଇଏସଆଇଏସ ସନ୍ତ୍ରାସବାଦିମାନେ ଆଫଗାନିସ୍ଥାନରେ ପ୍ରବେଶ କରିସାରିଥିବାରୁ କ୍ଷମତା ବଣ୍ଟନ ବ୍ୟବସ୍ଥାରେ ତାଲିବାନକୁ ସାମିଲ ନକରିବାର ଏବେ କୌଣସି ଉପାୟ ନାହିଁ। ବର୍ତ୍ତମାନ ଆଫଗାନିସ୍ଥାନରେ ଇସଲାମିକ ଷ୍ଟେଟ ସନ୍ତ୍ରାସବାଦ ଗୋଷ୍ଠିର ଉପସ୍ଥିତିକୁ ନେଇ ଆମେରିକା ଓ ରୁଷ ପକ୍ଷରୁ ଉଦବେଗ ପ୍ରକାଶ କରି କୁହାଯାଇଛି ସୋଭିଏତ ରୁଷ ବିଭାଜନ ପରେ ମଧ୍ୟ ଏସିଆ ଅଞ୍ଚଳରେ ଆଜି ନହେଲେ କାଲି ଅରାଜକତା ସୃଷ୍ଟି ହେବ ଏବଂ ଚିନର ସିନସିୟାଙ୍ଗ ପ୍ରଦେଶରେ ଅରାଜକତା ବ୍ୟାପିବ। ଆଇଏସ ପକ୍ଷରୁ ସମସ୍ୟାକୁ ଦୀର୍ଘ କାଳିନ ଭାବରେ ଦୂରରେ ରଖିବା ପାଇଁ ଏକ ବହୁ ସ୍ତରୀୟ କ୍ଷମତା ବଣ୍ଟନ ବ୍ୟବସ୍ଥାରେ ତାଲିବାନକୁ ସାମିଲ କରାଯାଉ ବୋଲି ଚିନ ଓ ଆମେରିକା ଚାହୁଁଛନ୍ତି। ଏକଥା ସତ ଯେ ଆଫଗାନ ସରକାରଙ୍କ ସହ ତାଲିବାନ ଯୁଦ୍ଧ ବିରତି ଘୋଷଣା କଲା ମାତ୍ରକେ ଅନ୍ୟ ପକ୍ଷଭୁକ୍ତ ରାଷ୍ଟ୍ରଗୁଡିକ ଆଫଗାନିସ୍ଥାନର ଭିନ୍ନ ଭିନ୍ନ ଗୋଷ୍ଠି ଗୁଡିକ ସହ କଥାବାର୍ତ୍ତା ଆରମ୍ଭ କରିବାକୁ ଆଗେଇ ଆସିବେ।

ଅପରପକ୍ଷେ ଦେଖିବାକୁ ଗଲେ ଶାନ୍ତି କଥାବାର୍ତ୍ତା ପାଇଁ କୌଣସି ଅନୁକୂଳ ପରିବେଶ ନଥିବାରୁ ଆଫଗାନିସ୍ଥାନର ମୋଟାମୋଟି ପରିସ୍ଥିତି ଖରାପ ହେବାର ଆଶଙ୍କା ମଧ୍ୟ ରହିଛି। ଆସ୍ଥା ସୃଷ୍ଟି ପାଇଁ ପଦକ୍ଷେପ ନେବା ପାଇଁ ଆମେରିକା ଘୋଷଣା କରୁବୋଲି କେତେକ ମହଲରୁ ମଧ୍ୟ ଆହ୍ୱାନ ଦିଆ ଯାଇଛି। ଆଫଗାନର ପୂର୍ବତନ ରାଷ୍ଟ୍ରପତି ହମିଦ କର୍ଜାଇ ତାଲିବାନର ଆସ୍ଥାଭାଜନ ହେବା ପାଇଁ ଆଫଗାନିସ୍ଥାନରେ ଏକ ତରଫା ଯୁଦ୍ଧ ବିରତି ଘୋଷଣା କରିବାକୁ ଆମେରିକାକୁ ଆହ୍ୱାନ ଦେଇଛନ୍ତି।

ଆଫଗାନିସ୍ଥାନର ଏହିସବୁ ଘଟଣାବଳି ଓ ପରିସ୍ଥିତି ପ୍ରତି ବାରତକୁ ନିଘା ରଖିବାକୁ ପଡିବ। ଭାରତ ଆଫଗାନିସ୍ଥାନର ପୁନଃର୍ଗଠନ ପାଇଁ ପ୍ରତିବଦ୍ଧ ରହିଛି। ଭାରତ ପକ୍ଷରୁ ବିଭିନ୍ନ ପ୍ରକଳ୍ପ ପାଇଁ ଆଫଗାନିସ୍ଥାନକୁ 2 ବିଲିୟନ ଡଲାର ସହାୟତା ଦିଆଯାଇ ସାରିଛି।

ଆଫଗାନିସ୍ଥାନର ଆଭ୍ୟନ୍ତରିଣ ଶାନ୍ତି ପାଇଁ ଆମେରିକା, ତାଲିବାନ ଏବଂ ନିଜେ ଆଫଗାନ ସରକାର କଣ କରୁଛନ୍ତି ତାହା ଦେଖିବାର କଥା। କଥାବାର୍ତ୍ତା ଉପରେ ସମଗ୍ର ବିଶ୍ୱ ନିଘା ରଖିଛି।

ଆଲେଖ୍ୟ: କଲୋଳ ଭଟାଚାର୍ଯ୍ୟ

ଭାଷାନ୍ତର: ଜଗନ୍ନାଥ ମଲ୍ଲିକ, ରାମଚଂଦ୍ର ନାଥ