ପ୍ରଧାନମନ୍ତ୍ରୀ କହିଛନ୍ତି ଅର୍ଥନୀତି ଦ୍ରୁତ ଅଭିବୃଦ୍ଧି ପଥରେ ଅଗ୍ରସର ହେଉଛି

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ଭାରତୀୟ ଅର୍ଥନୀତି ଦ୍ରୁତ ଅଭିବୃଦ୍ଧି ପଥରେ ଅଗ୍ରସର ହେଉଛି | ଜିଡ଼ିପି ଅଭିବୃଦ୍ଧି ହାର ମାନ୍ଦାବସ୍ଥା ଦେଇ ଗତି କରୁଥିବା ପରିପ୍ରେକ୍ଷୀରେ ପ୍ରଧାନମନ୍ତ୍ରୀ କହିଛନ୍ତି ଯେ ଆଗାମୀ ପାଞ୍ଚ ବର୍ଷ ମଧ୍ୟରେ ଭାରତୀୟ ଅର୍ଥନୀତିକୁ 5 ଟ୍ରିଲିଅନ ଡଲାରରେ ପରିଣତ କରିବା ଲାଗି ତାଙ୍କ ସରକାର ପ୍ରତିଶୃତିବଦ୍ଧ |

ପ୍ରଧାନମନ୍ତ୍ରୀ ସରକାରଙ୍କ ଆର୍ଥିକ ନୀତିକୁ ପ୍ରଶଂସା କରି କହିଛନ୍ତି ଅତୀତରେ ସରକାରଙ୍କ ଦ୍ଵାରା ଅନେକ ବଳିଷ୍ଠ ପଦକ୍ଷେପ ନିଆଯାଇଛି ଯାହାର ପରିଣାମ ଆଗାମୀ ବର୍ଷରେ ଦେଖିବାକୁ ମିଳିବ | ଭାରତୀୟ ଶିଳ୍ପ ମହାସଂଘ ଆସୋଚାମର 100 ବର୍ଷ ପୂର୍ତ୍ତି ଉପଲକ୍ଷେ ଆୟୋଜିତ କାର୍ଯ୍ୟକ୍ରମରେ ଉଦବୋଧନ ଦେଇ ଭାରତୀୟ ଅର୍ଥନୀତି ମାନ୍ଦାବସ୍ଥା ଦେଇ ଗତି କରୁଛି ବୋଲି ଯେଉଁ ଚର୍ଚ୍ଚା ଚାଲିଛି ସେ ଧାରଣାକୁ ଦୂର କରିବା ପାଇଁ ସେ ଦୃଢ ଯୁକ୍ତି ଉପସ୍ଥାପନ କରିଥିଲେ |

ଅବଶ୍ୟ ଗତ କିଛି ଦିନ ଧରି ଜିଡ଼ିପି ଅଭିବୃଦ୍ଧିର ନିମ୍ନଗାମୀ ଅବସ୍ଥାକୁ ନେଇ ଜୋରସୋରରେ ଚର୍ଚ୍ଚା ଚାଲିଛି | ଆନ୍ତର୍ଜାତୀୟ ଅର୍ଥନୈତିକ ମାନ୍ଦାବସ୍ଥା ପରିପ୍ରେକ୍ଷୀରେ ଏହି ଚର୍ଚ୍ଚା ଚାଲିଛି | ଆମେରିକା ଓ ଚୀନ ମଧ୍ୟରେ ବାଣିଜ୍ୟ ବିବାଦ ଜାରି ରହିଥିବା ବେଳେ ଏହା ଭାରତୀୟ ଅର୍ଥବ୍ୟବସ୍ଥା ଉପରେ ମଧ୍ୟ ପ୍ରଭାବ ପକାଉଛି | ଏଥିରେ ତିଳେ ମାତ୍ର ସନ୍ଦେହ ନାହିଁ ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏପରି ସମୟରେ କାର୍ଯ୍ୟଭାର ସମ୍ଭାଳି ଥିଲେ ଯେତେବେଳେ ଦେଶର ଅର୍ଥନୀତି ଅନାଦେୟ ଋଣ ଦ୍ଵାରା ଅଧିକ ମାତ୍ରାରେ ପ୍ରଭାବିତ ଥିଲା |

ଅନାଦେୟ ଋଣ ଯୋଗୁଁ ସରକାରୀ ବ୍ୟାଙ୍କିଙ୍ଗ ପ୍ରତିଷ୍ଠାନ ଗୁଡିକର ସ୍ଥିତି ଭଲ ନାହିଁ | ପ୍ରଧାନମନ୍ତ୍ରୀ କହିଥିଲେଯେ ରାଷ୍ଟ୍ରାୟତ୍ତ କ୍ଷେତ୍ରର ବ୍ୟାଙ୍କ ଗୁଡିକର ସ୍ଥିତି ପୁନଃସ୍ଥାପନା କରିବା ଥିଲା ତାଙ୍କ ସରକାରଙ୍କ ସର୍ବୋଚ୍ଚ ପ୍ରାଥମିକତା | ଶ୍ରୀ ମୋଦୀ ଆହୁରି ମଧ୍ୟ କହିଛନ୍ତି ଭାରତୀୟ ରିଜର୍ବ ବ୍ୟାଙ୍କର ତତ୍ତ୍ଵାବଧାନରେ ରାଷ୍ଟ୍ରାୟତ୍ତ କ୍ଷେତ୍ରର ଅଧା ଡଜନରୁ ଅଧିକ ବ୍ୟାଙ୍କ ଏଭଳି ପରିସ୍ଥିତିରୁ ମୁକୁଳିପାରିଛନ୍ତି|

ଏହା ସତ ଯେ ଗତ ପାଞ୍ଚ ବର୍ଷ ମଧ୍ୟରେ ଏନଡ଼ିଏ ସରକାର ରାଷ୍ଟ୍ରାୟତ୍ତ ବ୍ଯାଙ୍କ ଗୁଡିକୁ ସମ୍ମିଶ୍ରଣ କରିବା ପ୍ରକ୍ରିୟା ଆରମ୍ଭ କରିଛନ୍ତି ଯଦ୍ୱାରା ସେମାନେ ପ୍ରତିଦ୍ଵନ୍ଦୀ ହୋଇପାରିବେ ଓ ଏହି କ୍ଷେତ୍ରରେ ସର୍ବଶ୍ରେଷ୍ଠ ପ୍ରତିଦ୍ଵନ୍ଦୀ ଭାବେ ସକ୍ଷମ ହୋଇପାରିବେ |

ଆସୋଚାମ ବୈଠକରେ ପ୍ରଧାନମନ୍ତ୍ରୀ, ଅନାଦେୟ ଋଣ ଯୋଗୁଁ ବ୍ୟାଙ୍କିଙ୍ଗ କ୍ଷେତ୍ରର ଋଣ ଦେବାର ସ୍ଥିତି ଭୁଷୁଡିପଡିଥିବା ଅର୍ଥବ୍ୟବସ୍ଥା ପାଇଁ ବିପଦ ରହିଥିବା ବିଷୟରେ ବ୍ୟାପକ ଆଲୋଚନା କରିଥିଲେ | ଏହା ସତ ଯେ ଅନେକ ଶିଳ୍ପସଂସ୍ଥା ଋଣ ପରିଶୋଧ କରିନଥିବାରୁ ଦେଶର ଆର୍ଥିକ ସ୍ଥିତି ମାନ୍ଦାବସ୍ଥାରେ ରହିଛି |

ଦେବାଳିଆ ପରିସ୍ଥିକୁ ସୁଧାରିବା ଲାଗି ଆଗତ କରାଯାଇଥିବା ଏସାର ଷ୍ଟିଲ ର ସଫଳ ପ୍ରସ୍ତାବ ବ୍ୟାଙ୍କିଙ୍ଗ ପ୍ରତିଷ୍ଠାନ ଗୁଡିକର ଅବସ୍ଥା ସୁଧାରିବାରେ ସହାୟକ ହେବ | ସରକାରଙ୍କ ଦ୍ଵାରା ନିଆଯାଇଥିବା ଗଠନମୂଳକ ପଦକ୍ଷେପ ଗୁଡିକ ଯୋଗୁଁ ବର୍ତ୍ତମାନ ସୁଫଳ ମିଳିବା ଆରମ୍ଭ ହୋଇଛି ବୋଲି ପ୍ରଧାନମନ୍ତ୍ରୀ ଦୃଢୋକ୍ତି ପ୍ରକାଶ କରିଛନ୍ତି | ସେ କହିଛନ୍ତି 2014 ରେ ତାଙ୍କ ସରକାର ଦାୟିତ୍ଵ ଗ୍ରହଣ କରିବା ବେଳେ ଅର୍ଥନୀତି ବିପର୍ଯ୍ୟସ୍ତ ଆଡକୁ ଗତି କରୁଥିଲା | ସେ କହିଛନ୍ତି ଏନଡ଼ିଏ ସରକାର ଅର୍ଥବ୍ୟବସ୍ଥା ସ୍ଥିର କରିବା ସହ ତତସଙ୍କ୍ରାନ୍ତୀୟ ଆବଶ୍ୟକୀୟ ପଦକ୍ଷେପ ନେଇଥିଲେ | ସରକାର ଉଦ୍ୟୋଗ କ୍ଷେତ୍ରର ଦୀର୍ଘ ଦିନରୁ ହୋଇଆସୁଥିବା ଦାବି ଗୁଡିକୁ ପୂରଣ କରିଛନ୍ତି |

ପ୍ରଧାନମନ୍ତ୍ରୀ କହିଛନ୍ତି ଯେ ସରକାର ଭାରତୀୟ ଉଦ୍ୟୋଗ କ୍ଷେତ୍ରର ସମସ୍ତ ସୁବିଧା ଅସୁବିଧା ବିଷୟ ବୁଝିଛନ୍ତି ଓ କର୍ପୋରେଟ ଟିକସ ହ୍ରାସ କରିବା ହେଉଛି ଏହାର ଜ୍ଵଳନ୍ତ ପ୍ରମାଣ | ପ୍ରଧାନମନ୍ତ୍ରୀ କହିଛନ୍ତି ଅର୍ଥନୀତିରେ ସ୍ବଚ୍ଛତା ଆଣିବା ଲାଗି ସରକାର ଅନେକ ପଦକ୍ଷେପ ଗ୍ରହଣ କରିଛନ୍ତି | ଟିକସିକରଣ କ୍ଷେତ୍ରରେ ସ୍ବଚ୍ଛତା ନିଶ୍ଚିତ କରିବା ଲାଗି ସାମଗ୍ରୀ ଓ ସେବା କର (ଜିଏସଟି) ଲାଗୁ କରିବା ହେଉଛି ଏଦିଗରେ ଆଉ ଏକ ବଳିଷ୍ଠ ପଦକ୍ଷେପ |

ଶ୍ରୀ ମୋଦୀ ମଧ୍ୟ କହିଛନ୍ତି 2014 ରେ ସହଜ ବ୍ୟବସାୟ ବାତାବରଣ କ୍ଷେତ୍ରରେ 190 ଟି ଦେଶ ମଧ୍ୟରେ ଭାରତର ସ୍ଥାନ 142 ତମ ରହିଥିବା ବେଳେ ନିବେଶ ପ୍ରସ୍ତାବ ଗୁଡିକୁ ଅନୁମୋଦନ କରିବା ସହ ଏକ୍ଷେତ୍ରରେ ସ୍ବଚ୍ଛତା ଆଣିବା ଲାଗି ସଂସ୍କାରମୂଳକ ପଦକ୍ଷେପ ଗ୍ରହଣ କରାଯାଇଥିବା ଯୋଗୁଁ ବ୍ୟବସାୟ ସୁଗମତା କ୍ଷେତ୍ରରେ ଦେଶ ତିନି ବର୍ଷ ଭିତରେ 63 ତମ ସ୍ଥାନକୁ ପହଞ୍ଚି ପାରିଛି | ସେ କହିଛନ୍ତି ଶ୍ରମ ସଂସ୍କାର ପାଇଁ ବହୁ ପଦକ୍ଷେପ ନିଆଯାଇଛି ଯେଉଁଥିରେ ଉଦ୍ୟୋଗ କ୍ଷେତ୍ର ଦ୍ଵାରା ବାଞ୍ଛିତ ଶ୍ରମ ଆଇନର ସଂହିତାକରଣ ଅନ୍ତର୍ଭୁକ୍ତ |

ସରକାର ବ୍ୟାଙ୍କ ଓ ଉଦ୍ୟୋଗ କ୍ଷେତ୍ରର ହିତସାଧନ ଲାଗି ଦେବାଳିଆ ଆଇନର ପୁନଃସଂଶୋଧନ କରିଛନ୍ତି ଯାହାକି ଅର୍ଥବ୍ୟବସ୍ଥାକୁ ଆହୁରି ମଜବୁତ କରିବ ବୋଲି ପ୍ରଧାନମନ୍ତ୍ରୀ ଜଣାଇଛନ୍ତି |.

ପ୍ରଧାନମନ୍ତ୍ରୀ ଆହୁରି ମଧ୍ୟ କହିଛନ୍ତି ଅର୍ଥନିତୀକୁ ପାଞ୍ଚ ଲକ୍ଷ ଟ୍ରିଲିୟନ ଡଲାରରେ ପରିଣତ କରିବା ଲାଗି ଯେଉଁ ଲକ୍ଷ ଧାର୍ଯ୍ୟ କରାଯାଇଛି ତାହା ଅନେକ ବିଚାର ବିମର୍ଶ ପରେ କରାଯାଇଛି ଓ ଏହି ଲକ୍ଷ ହାସଲ ହେବା ଆଦୌ ଅସମ୍ଭବ ନୁହେଁ | ‘ସ୍ଵଚ୍ଛ ଭାରତ ଅଭିଯାନ’ ସରକାରଙ୍କ ଏକ ମହାତ୍ବାକାଙ୍ଖ୍ୟୀ ଲକ୍ଷାଭିମୁଖୀ ଯୋଜନାର ଏକ ସ୍ପଷ୍ଟ ପ୍ରମାଣ ବୋଲି ପ୍ରଧାନମନ୍ତ୍ରୀ ଗୁରୁତ୍ଵାରୋପ କରିଛନ୍ତି | |
ମୁଳଲେଖା : ମନୀଷ ଆନନ୍ଦ, ବରିଷ୍ଠ ସମ୍ବାଦଦାତା, ଦ ନ୍ୟୂ ଇଣ୍ଡିଆନ ଏକ୍ସପ୍ରେସ

ଅନୁବାଦ: ଜଗନ୍ନାଥ ମଲ୍ଲିକ, ରୀତା ଯୋଶୀ