ଷ୍ଟାର୍ଟ ଅପ ଅଭିଯାନ ପ୍ରଗତି ପଥରେ

71 ତମ ସାଧାରଣତନ୍ତ୍ର ଦିବସ ଅବସରରେ ଷ୍ଟାର୍ଟ-ଅପ ଇଣ୍ଡିଆ ଯୋଜନାର ପ୍ରଜ୍ଞାପନ ମେଢ ପ୍ରଦର୍ଶନ ଏହା ପାଇଁ ଅତ୍ୟନ୍ତ ଗୌରବର ମୂହୁର୍ତ୍ତ ଥିଲା | ଏହି ଯୋଜନା ଯୋଗୁଁ ମାତ୍ର କିଛି ସମୟ ମଧ୍ୟରେ 300,000 ରୁ ଅଧିକ ଚାକିରି ସୃଷ୍ଟି ହେବା ସହ ଭାରତର ପ୍ରତି କୋଣ ଅନୁକୋଣରେ 26,000ରୁ ଅଧିକ ଷ୍ଟାର୍ଟ ଅପ ଆରମ୍ଭ କରାଯାଇଛି | ସରକାରଙ୍କ ଦ୍ଵାରା ଗ୍ରହଣ କରାଯାଇଥିବା ପରିବେଶ ବ୍ୟବସ୍ଥା ଯୋଗୁଁ ଷ୍ଟାର୍ଟ-ଅପ ଏକ ଉଚ୍ଚ ନିବେଶ ପଥରେ ଆଗେଇଚାଲିଛି | ଭାରତରେ ଷ୍ଟାର୍ଟ-ଅପର ମୂଲ୍ୟାୟନ 35 ବିଲିୟନ ଡଲାରକୁ ଟପିଯାଇଛି |

ବର୍ତ୍ତମାନ ଭାରତର ପ୍ରମୁଖ ବୈଷୟିକ ତଥା ପରିଚାଳନା ପ୍ରତିଷ୍ଠାନର ସ୍ନାତକ ପ୍ରାପ୍ତ ଛାତ୍ରଛାତ୍ରୀ ମାନେ ଷ୍ଟାର୍ଟ-ଅପକୁ ପସନ୍ଦ କରୁଛନ୍ତି ଏବଂ ଏହାକୁ କ୍ୟାରିଅର ବିକଳ୍ପ ଭାବେ ଚୟନ କରି ସେମାନେ ଦେଶରେ ଉଦ୍ୟମି ପ୍ରତିଭାକୁ ସଫଳତାର ସହ ପ୍ରତିପାଦନ କରୁଛନ୍ତି |

ସାଧାରଣତନ୍ତ୍ର ଦିବସ ଅବସରରେ ଷ୍ଟାର୍ଟ-ଅପ ପ୍ରଜ୍ଞାପନ ମେଢ ଆକର୍ଷଣର କେନ୍ଦ୍ରବିନ୍ଦୁ ରହିଥିବା ବେଳେ ଏହା ଦର୍ଶକ ମାନଙ୍କୁ ମନ୍ତ୍ରମୁଗ୍ଧ କରିଦେଇଥିଲା | ଏହି ପ୍ରଜ୍ଞାପନ ମେଢରେ ପରିବେଶ ବ୍ୟବସ୍ଥାକୁ ନିଖୁଣ ଭାବେ ଚିତ୍ରଣ କରାଯାଇ ଉତ୍କୃଷ୍ଟ ରଚନାତ୍ମକ ରୂପରେ ପ୍ରଦର୍ଶନ କରାଯାଇଥିଲା | ଏହି ମେଢରେ ଟିକସ ଛାଡ ଜରିଆରେ ପରିବେଶ ବ୍ୟବସ୍ଥା ତଥା ଏହାର ପ୍ରଗତି ସଙ୍କ୍ରାନ୍ତରେ ସଫଳତାର ସହ ଚିତ୍ରଣ କରାଯାଇଥିଲା |

ଷ୍ଟାର୍ଟ-ଅପ ଇଣ୍ଡିଆ ଯୋଜନା 2016 ରେ ଶୁଭାରମ୍ଭ ହୋଇଥିବା ବେଳେ ଏବେ ମଧ୍ୟ ପ୍ରାରମ୍ଭିକ ଚରଣରେ ରହିଛି | ତେବେ ଏହି ଚରଣରେ ଥିଲେ ସୁଦ୍ଧା ଷ୍ଟାର୍ଟ-ଅପ ଯୋଜନା ଅତ୍ୟଧିକ ସଫଳତା ହାସଲ କରିବା ସହ ଏଥିଯୋଗୁଁ ଅନ୍ୟ ଦେଶ ଗୁଡିକରୁ ବହୁ ବିଲିୟନ ଡଲାର ପୁଞ୍ଜି ନିବେଶ ହୋଇଛି |

ଉଦ୍ୟୋଗ ଓ ଆଭ୍ୟନ୍ତରୀଣ ବାଣିଜ୍ୟ ପ୍ରୋତ୍ସାହନ ବିଭାଗ ଦ୍ଵାରା ଷ୍ଟାର୍ଟ-ଅପ ନେଇ ଜାରୀ କରାଯାଇଥିବା ପରିସଂଖ୍ୟାନ ବାସ୍ତବରେ ଅତ୍ୟନ୍ତ ଉତ୍ସାହଜନକ | 28ଟି ରାଜ୍ୟ ଓ ସାତୋଟି କେନ୍ଦ୍ରଶାସିତ ଅଞ୍ଚଳର 551ଟି ଜିଲ୍ଲା ରେ 26,000 ଅଧିକଟି ଷ୍ଟାର୍ଟ-ଅପ ଏହି ବିଭାଗରେ ପଞ୍ଜୀକୃତ କରାଯାଇଛି | ଷ୍ଟାର୍ଟ-ଅପ ଗୁଡିକ କେବଳ ପ୍ରଯୁକ୍ତି ବିଦ୍ୟା ବା ଖାଦ୍ୟ ବିତରଣ ଅନୁପ୍ରୟୋଗରେ ସୀମିତ ନୁହେଁ ବରଂ ଏହା କୃଷକ ମାନଙ୍କ ଜୀବନମାନରେ ପରିବର୍ତ୍ତନ ଆଣିବା ଲାଗି ଦେଶର ଗ୍ରାମୀଣ ଅଞ୍ଚଳ ଗୁଡିକରେ ମଧ୍ୟ କାର୍ଯ୍ୟ ଜାରି ରଖିଛି | 2023 ମସିହା ସୁଦ୍ଧା କୃଷକ ମାନଙ୍କ ଆୟ ଦ୍ଵିଗୁଣିତ କରିବା ନେଇ ସରକାରଙ୍କ ମହାତ୍ବାକାଙ୍ଖ୍ୟୀ ଲକ୍ଷ ହାସଲ ଦିଗରେ ମଧ୍ୟ ଏହା ସହାୟତା କରୁଛି |

ଭାରତୀୟ ଷ୍ଟାର୍ଟ-ଅପରେ ନିବେଶକାରୀ ମାନେ ପୁଞ୍ଜିନିବେଶ ଲାଗି ଆଗେଇ ଆସିଛନ୍ତି | କେବଳ 2019 ମସିହାରେ ଭାରତୀୟ ଷ୍ଟାର୍ଟ-ଅପ କ୍ଷେତ୍ରରେ 14 ବିଲିୟନ ଡଲାର ନିବେଶ କରାଯାଇଥିଲା | ଜାପାନ, ଚୀନ ଓ ଆମେରିକା ର ବିତ୍ତୀୟ ସଂସ୍ଥା ଗୁଡିକ ମଧ୍ୟ ଉତ୍ତମ ଆମଦାନୀ ଲାଗି ଏହି ଷ୍ଟାର୍ଟ-ଅପରେ ପୁଞ୍ଜିନିବେଶ ଲାଗି ଆଗ୍ରହ ପ୍ରକାଶ କରିଛନ୍ତି | ଭାରତର ବଡ ବଡ ଶିଲ୍ପପତି ମାନେ ମଧ୍ୟ ଷ୍ଟାର୍ଟ-ଅପରେ ‘ଏଞ୍ଜେଲ ନିବେଶକ’ ପାଲଟିଯାଇଛନ୍ତି | ତେଣୁ ଷ୍ଟାର୍ଟ-ଅପ, ପରିଚାଳନା ଅନୁଭୂତି ପ୍ରାପ୍ତ କରିବା ଓ ଏହାର ସଂଚାଳନକୁ ବିକଶିତ କରିବା ତଥା ବୈଷୟିକ ଜ୍ଞାନକୌଶଳ ହାସଲ କରିବା ପାଇଁ ସକ୍ଷମ ହୋଇପାରିଛି |

ହେଲେ ସମାଲୋଚକ ମାନେ ମତ ଦେଇଛନ୍ତି ଯେ ବହୁ ମାତ୍ରାରେ ବିଦେଶୀ ନିବେଶ କ୍ଷେତ୍ରରେ କିଛି ଷ୍ଟାର୍ଟ-ଅପ , ବ୍ୟବସାୟ କାରବାର ପ୍ରଥାରେ ଅସଫଳ ହେବା ସହ ବହୁ କ୍ଷତିର ସମ୍ମୁଖୀନ ହୋଇଛନ୍ତି | ଏହା ଉଦଯୋଗୀ ଉଦ୍ୟୋଗୀ ମାନଙ୍କ ଲାଗି ଏକ ଚାଲେଞ୍ଜ ଭାବେ ଉଭା ହୋଇଛି | ନିରନ୍ତର ଲକ୍ଷ ସହ ଉପଯୁକ୍ତ ବ୍ୟବସାୟ ନୀତି ନିୟମକୁ ଉଦ୍ୟୋଗୀ ମାନେ ପ୍ରାଥମିକତା ଦେବା ଉଚିତ |

ଉପଭୋକ୍ତା ସେବା କ୍ଷେତ୍ରରେ ମଧ୍ୟ ଅନେକ ଷ୍ଟାର୍ଟ –ଅପ କାମ କରୁଛି | ଷ୍ଟାର୍ଟ –ଅପ ବିଭିନ୍ନ ବିଶ୍ୱବିଦ୍ୟାଳୟର ପ୍ରୟୋଗଶାଳାରେ ଅଭିନବତା ବୃଦ୍ଧି ଲାଗି ଏହାର ଧ୍ୟାନକେନ୍ଦ୍ରିତ କରୁଛି | ବୈଷୟିକ ଜ୍ଞାନକୌଶଳ ପ୍ରତିଷ୍ଠାନ ଗୁଡିକରେ ଗବେଷଣା ଓ ବିକାଶକୁ ପ୍ରୋତ୍ସାହିତ କରିବା ଲାଗି ସରକାର ଅନେକ ଯୋଜନା ଚଳେଇଛନ୍ତି | ଯାହାକି ଭାରତୀୟ ଷ୍ଟାର୍ଟ –ଅପ ପାଇଁ ଅତ୍ୟନ୍ତ ଆବଶ୍ୟକ | ବିଦେଶୀ ବଜାରରେ ପ୍ରବେଶ ଲାଗି ବିନିର୍ମାଣ କ୍ଷେତ୍ର ଉପରେ ଅଧିକ ଗୁରୁତ୍ଵ ଦେବାକୁ ପଡିବ ତେଣୁ ଷ୍ଟାର୍ଟ –ଅପର ଏହା ପରବର୍ତ୍ତୀ ଲକ୍ଷ୍ୟ ହେବା ଉଚିତ |

ଭାରତୀୟ ଷ୍ଟାର୍ଟ –ଅପ ଅଭିଯାନର ସଫଳତା ବାସ୍ତବରେ ପ୍ରଶଂସନୀୟ ଅଟେ କାରଣ ଏଥିଯୋଗୁଁ ଆମେରିକା ଓ ଇଂଲଣ୍ଡ ପରେ ହିଁ ଭାରତର ସ୍ଥାନ ରହିଛି | ସରକାରଙ୍କ ପକ୍ଷରୁ ଷ୍ଟାର୍ଟ –ଅପ ପାଇଁ ଟିକସ କ୍ଷେତ୍ରରେ ଯେଉଁ କୋହଳତା ବ୍ୟବସ୍ଥା କରାଯାଇଛି ତାହା ମଧ୍ୟ ଅତ୍ୟନ୍ତ ଉତ୍ସାହଜନକ | ଏଥିଯୋଗୁଁ ବଡ ବଡ ନିବେଶକାରୀ ମାନେ ବ୍ୟବସାୟ କ୍ଷେତ୍ରରେ ଉଚ୍ଚ ବିଚାରଧାରା ରହିଥିବା ଯୁବ ପିଢୀ ମାନଙ୍କ ସହ କାମ କରିବାଲାଗି ଆଗେଇ ଆସୁଛନ୍ତି | ପୂର୍ବରୁ ଋଣ ଦେବାଲାଗି କୁଣ୍ଠାବୋଧ କରୁଥିବା ବ୍ୟାଙ୍କ ଗୁଡିକ ମଧ୍ୟ ବର୍ତ୍ତମାନ ଷ୍ଟାର୍ଟ-ଅପ ଲାଗି ଋଣ ଦେବାକୁ ପ୍ରସ୍ତୁତ ଅଛନ୍ତି | ତେବେ ସରକାର, ଷ୍ଟାର୍ଟ-ଅପକୁ ପ୍ରୋତ୍ସାହନ ଦେବା ଲାଗି ପ୍ରତି ସହରରେ ଅତିକମରେ ଗୋଟିଏ ଶାଖାକୁ ଏହାର ଦାୟିତ୍ଵ ଦେବା ଉଚିତ |

ମୂଳଲେଖା : ମନୀଷ ଆନନ୍ଦ, ବରିଷ୍ଠ ସମ୍ବାଦଦାତାଦ ନିୟୁ ଇଣ୍ଡିଆନ ଏକ୍ସପ୍ରେସ

ଅନୁବାଦ : ରୀତା ଯୋଶୀ