ପଡୋଶୀ ରାଷ୍ଟ୍ର ପ୍ରଥମେ ନୀତିକୁ ଭାରତ ଦୋହରାଇଛି

ଭାରତ ଏହାର ପଡୋଶୀ ରାଷ୍ଟ୍ର ପ୍ରଥମେ ନୀତି ପ୍ରତି ଦୃଢ ପ୍ରତିଶ୍ରୁତିବଦ୍ଧତାକୁ ଦୋହରାଇଛି। ନରେନ୍ଦ୍ର ମୋଦି 2014 ମେ ମାସରେ ପ୍ରଧାନମନ୍ତ୍ରୀ ଦାୟିତ୍ୱ ଗ୍ରହଣ କରିବା ପରଠାରୁ ଏହି ନୀତିକୁ ବହୁବାର ଦୋହରାଇଛନ୍ତି। 2014 ମେ 26ରେ ତାଙ୍କର ଶପଥ ଗ୍ରହଣ ସମାରୋହକୁ ସେ ସାର୍କ ଦେଶର ମୁଖ୍ୟମାନଙ୍କୁ ଆମନ୍ତ୍ରଣ କରିଥିଲେ। ସେହି ବର୍ଷ ପ୍ରଧାନମନ୍ତ୍ରୀ ତାଙ୍କର ପ୍ରଥମ ବିଦେଶ ଗସ୍ତରେ ଭୁଟାନ ଯାଇଥିଲେ। ଦାରିଦ୍ର, କୁପୋଷଣ ଓ ସର୍ବ ଶିକ୍ଷା ସମସ୍ୟା ଦୂର କରିବା ପାଇଁ ମିଳିତ ଭାବେ ଉଦ୍ୟମ କରିବାକୁ ଶ୍ରୀ ମୋଦି ଦକ୍ଷିଣ ଏସିଆ ପଡୋଶୀ ରାଷ୍ଟ୍ରମାନଙ୍କୁ ଆହ୍ୱାନ ଜଣାଇଛନ୍ତି। ପଡୋଶୀ ରାଷ୍ଟ୍ରଗୁଡିକର କଲ୍ୟାଣ ପାଇଁ ଭା4ରତ ତାର ଅଭିଜ୍ଞତା ଏବଂ ବିଶେଷ ଜ୍ଞାନ ଆଦାନପ୍ରଦାନ କରିବାକୁ ପ୍ରସ୍ତୁତ ରହିଛି।

2020 ନୂଆ ବର୍ଷ ଉପଲକ୍ଷେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଆଭିମୁକ୍ୟକୁ ଆଗେଇ ନେବାକୁ ଯାଇ ଭୁଟାନର ରାଜା ଜିଗମେ କେଶର ନାମଗ୍ୟେଲ ୱାଙ୍ଗଚୁକ, ଭୁଟାନ ପ୍ରଧାନ ମନ୍ତ୍ରୀ ଡକ୍ଟର ଲୋଟେ ଶେରିଙ୍ଗ, ଶ୍ରୀଲଙ୍କା ରାଷ୍ଟ୍ରପତି ଗୋଟବାୟା ରାଜପକ୍ଷେ, ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେ, ମାଳଦ୍ୱୀପ ରାଷ୍ଟ୍ରପତି ଇବ୍ରାହିମ ମହମ୍ମଦ ସୋଲି, ବାଙ୍ଗଲାଦେଶ ପ୍ରଧାନମନ୍ତ୍ରୀ ଶେଖ ହସିନା ଏବଂ ନେପାଳ ପ୍ରଧାନମନ୍ତ୍ରୀ କେ.ପି ଶର୍ମା ଓଲିଙ୍କ ସହିତ ଟେଲିଫୋନରେ କଥାବାର୍ତ୍ତା କରିଛନ୍ତି।

ଦେଶବାସୀ ଓ ନିଜ ତରଫରୁ ଏହି ନେତାମାନଙ୍କୁ ଶ୍ରୀ ମୋଦି ନୂଆ ବର୍ଷର ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି। ପଡୋଶୀ ରାଷ୍ଟ୍ର ପ୍ରଥମେ ନୀତିକୁ ପ୍ରାଧାନ୍ୟ ଦିଆଯାଉଥିବା ବିଷୟକୁ ଶ୍ରୀ ମୋଦି ସେମାନଙ୍କ ସହ କଥାବାର୍ତ୍ତା ବେଳେ ଦୋହରାଇଛନ୍ତି। ପଡୋଶୀ ରାଷ୍ଟ୍ରଗୁଡିକ ଶାନ୍ତି, ନିରାପତ୍ତା ଓ ପ୍ରଗତି ତଥା ସମୃଦ୍ଧି ହାସଲ କରନ୍ତୁ ବୋଲି ସେ କାମନା କରିଛନ୍ତି। ଭୁଟାନର ରାଜାଙ୍କ ସହ କଥାବାର୍ତ୍ତା ବେଳେ ଶ୍ରୀ ମୋଦି ଗତବର୍ଷ ଗୁରୁତ୍ୱପୂର୍ଣ୍ଣ ସଫଳତାଗୁଡିକ ବିଷୟ ଉଲ୍ଲେଖ କରିଛନ୍ତି ଏବଂ ଭାରତ ଓ ଭୁଟାନ ମଧ୍ୟରେ ଏହି ସଫଳତା ଗୁଡିକ ସଂପର୍କକୁ ଆହୁରି ନିବିଡ କରିବ ବୋଲି ଆଶା ବ୍ୟକ୍ତ କରିଛନ୍ତି। ଗତ ବର୍ଷ ଭୁଟାନ ଯାଇଥିବାବେଳେ ତାଙ୍କୁ ସେଠାରେ ଦିଆଯାଇଥିବା ସମ୍ମାନ ସମ୍ୱର୍ଦ୍ଧନା ମନକୁ ଛୁଇଁ ପାରିଛି ବୋଲି ଶ୍ରୀ ମୋଦି କହିଛନ୍ତି। ଦୁଇ ଦେଶର ଯୁବ ସଂପ୍ରଦାୟ ମଧ୍ୟରେ ଆଦାନପ୍ରଦାନ ବୃଦ୍ଧି ବିଷୟକୁ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିବା ସଙ୍ଗେସଙ୍ଗେ ଭୁଟାନର ରାଜାଙ୍କୁ ଭାରତ ଆସିବାକୁ ନିମନ୍ତ୍ରଣ କରିଛନ୍ତି।

ଶ୍ରୀଲଙ୍କା ରାଷ୍ଟ୍ରପତି ଗୋତବାୟା ରାଜପକ୍ଷେ ଏବଂ ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେ ଶ୍ରୀ ମୋଦିଙ୍କ ଶୁଭେଚ୍ଛାକୁ ସାଦରେ ଗ୍ରହଣ କରିବା ସଙ୍ଗେସଙ୍ଗେ ନୂଆ ବର୍ଷରେ ଦୁଇ ଦେଶର ସଂପର୍କ ଆହୁରି ବୃଦ୍ଧି ପାଇବ ବୋଲି ଆଶା ବ୍ୟକ୍ତ କରିଛନ୍ତି। ଏହି ଲକ୍ଷ୍ୟ ହାସଲ ପାଇଁ ମିଳିମିଶି କାମ କରିବା ପାଇଁ ଉଭୟ ନେତା ସେମାନଙ୍କ ପ୍ରତିଶ୍ରୁତିବଦ୍ଧତାକୁ ଦୋହରାଇଛନ୍ତି।

ମାଳଦ୍ୱୀପର ସର୍ବାଙ୍ଗିନ ଉନ୍ନତି ଓ ସେ ଦେଶର ଲୋକମାନଙ୍କର ସର୍ବବିଧ ମଙ୍ଗଳ ହେଉବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମାଳଦ୍ୱୀପ ରାଷ୍ଟ୍ରପତିଙ୍କ ସହ କଥାବାର୍ତ୍ତା ବେଳେ କାମନା କରିଛନ୍ତି। ମାଳଦ୍ୱୀପ ରାଷ୍ଟ୍ରପତି ଶ୍ରୀ ଶୋଲି ଶ୍ରୀ ମୋଦିଙ୍କୁ ଶୁଭେଚ୍ଛା ଜଣାଇବା ସଙ୍ଗେସଙ୍ଗେ ଦୁଇ ଦେଶ ମଧ୍ୟରେ ବର୍ତ୍ତମାନର ସହଯୋଗକୁ ଆହୁରି ବୃଦ୍ଧି କରି ସଂପର୍କକୁ ନିବିଡ କରିବା ଏବଂ ମିଳିମିଶି କାମ କରିବା ପାଇଁ ନୂଆ ନୂଆ କ୍ଷେତ୍ରଗୁଡିକୁ ଚିହ୍ନଟ କରିବା ପାଇଁ ଇଛା ବ୍ୟକ୍ତ କରିଛନ୍ତି।

ବାଙ୍ଗଲାଦେଶ ପ୍ରଧାନମନ୍ତ୍ରୀ ଶେଖ ହସିନାଙ୍କୁ ନୂଆ ବର୍ଷର ଅଭିନନ୍ଦନ ଜଣାଇବା ସହିତ ଭାରତରେ ବାଙ୍ଗଲାଦେଶର ପୂର୍ବତନ ହାଇକମିଶନର ସୟଦ ମୁଆଜେମ ଅଲ୍ଲିଙ୍କ ଅକାଳ ବିୟୋଗରେ ଶୋକବ୍ୟକ୍ତ କରିଛନ୍ତି। 2019ରେ ଭାରତ ଏବଂ ବାଙ୍ଗଲାଦେଶ ହାସଲ କରିଥିବା ପ୍ରଗତିକୁ ଶ୍ରୀ ମୋଦି ସ୍ମରଣ କରିଛନ୍ତି।ବଙ୍ଗବନ୍ଧୁଙ୍କ ଜନ୍ମ ଶତାବ୍ଦି ଏବଂ ବାଙ୍ଗଲାଦେଶ ମୁକ୍ତି ଆନ୍ଦୋଳନର 50 ବର୍ଷ ପୂର୍ତ୍ତି ଉତ୍ସବ ଉପଲକ୍ଷେ ଦୁଇ ଦେଶର ସଂପର୍କ ଆହୁରି ବୃଦ୍ଧି ପାଇବ ବୋଲି ପ୍ରଧାନମନ୍ତ୍ରୀ ଶ୍ରୀ ମୋଦି ଆଶା ପୋଷଣ କରିଛନ୍ତି।

2019ରେ ଭାରତ ନେପାଳ ସଂପର୍କରେ ସନ୍ତୋଷ ପ୍ରକାଶ କରିବା ସହିତ ପ୍ରଧାନମନ୍ତ୍ରୀ ମୋଦି ନେପାଳ ପ୍ରଧାନମନ୍ତ୍ରୀ ଶ୍ରୀ ଓଲିଙ୍କୁ ଶୁଭେଚ୍ଛା ଜଣାଇବା ସହିତ ନୂଆ ବର୍ଷର ଅଭିନନ୍ଦନ ଜଣାଇଛନ୍ତି। ମୋତିହାରୀ ଅମଲେଖଗଞ୍ଜ ପେଟ୍ରୋଲିୟମ ପ୍ରଡକ୍ଟ ପାଇପଲାଇନ ଧାର୍ଯ୍ୟ ସମୟରେ ସମାପନ ହେବା ଓ ଅନ୍ୟାନ୍ୟ ପ୍ରକଳ୍ପର ଅଗ୍ରଗତି ଉପରେ ଶ୍ରୀ ମୋଦି ସନ୍ତୋଷ ବ୍ୟକ୍ତ କରିଛନ୍ତି। ବିରାଟନଗର ସମନ୍ୱିତ ଯାଞ୍ଚ ଘାଟି ଖୁବ ଶିଘ୍ର ଉଦଘାଟନ କରିବାକୁ ଦୁଇ ନେତା ସହମତ ହୋଇଛନ୍ତି।


ଆଲେଖ୍ୟ: ପଦମ୍ ସିଂହ
ଭାଷାନ୍ତର: ଜଗନ୍ନାଥ ମଲ୍ଲିକ, ରାମଚଂଦ୍ର ନାଥ