ପାକିସ୍ତାନରେ ନିମ୍ନଗାମିତାର ନୂଆ ସ୍ତର

ଗତ ଶୁକ୍ରବାର ଦିନ ପାକିସ୍ତାନ ସ୍ଥିତ ପବିତ୍ର ଶିଖ ପୀଠ ବିଶ୍ୱ ପ୍ରସିଦ୍ଧ ଗୁରୁଦ୍ୱାର ନାନକ ଶାହିବରେ ପ୍ରାୟ 400ରୁ ଅଧିକ ଉପଦ୍ରବି ଶିଖ ବିରୋଧି ସ୍ଲୋଗାନ ସହିତ ଉପଦ୍ରବ କରିଥିଲେ। ସେମାନେ ଗୁରୁଦ୍ୱାରକୁ ଘେରାଉ କରି ଟେକା ପଥର ଫିଙ୍ଗିଥିଲେ। ଏହି ଉପଦ୍ରବିମାନଙ୍କର ନେତୃତ୍ୱ ନେଇଥିଲା ମହମ୍ମଦ ହୋସେନର ପରିବାର ଯିଏକି ଗୁରୁଦ୍ୱାରର ପୂଜକଙ୍କ ଝିଅ ଜଗଜୀତ କୋରକୁ ଅପହରଣ କରି ଜୋରଜବରଦସ୍ତ ଧର୍ମ ପରିବର୍ତ୍ତନ କରି ବିବାହ କରିଥିଲା। ହସନର ଏହି କାର୍ଯ୍ୟକୁ ଶିଖ ସଂପ୍ରଦାୟ ବିରୋଧ କରିବା ପରେ ଏହି ଉପଦ୍ରବ କରାଯାଇଛି ।

ଏକ ଭିଡିଓରେ ଦେଖାଯାଇଛି ଯେ ଉପଦ୍ରବିମାନେ ଗୁରୁଦ୍ୱାର ନିକଟରେ ବିଭିନ୍ନ ଗାଳିଗୁଲଜ ସହିତ ନାନକ ଶାହିବ ସ୍ଥାନକୁ ପରିବର୍ତ୍ତନ କରି ଗୁଲାମେ ମୁସ୍ତଫା ନାମରେ ଖୁବ ଶିଘ୍ର ପରିବର୍ତ୍ତନ କରିବେ ବୋଲି ଧମକ ଦେଉଥିଲେ।

ଗୁରୁଦ୍ୱାର ମଧ୍ୟରେ ବହୁ ସଂଖ୍ୟାରେ ଶିଖ ଶ୍ରଦ୍ଧାଳୁମାନେ ଅଟକି ରହିଥିବା ଯୋଗୁଁ ପରିସ୍ଥିତି ଅତି ଗୁରୁତର ବୋଲି କୁହାଯାଇ ପାରିବ। ପାକିସ୍ତାନ ସରକାରଙ୍କ ପକ୍ଷରୁ ଅବହେଳା ଓ ନିଷ୍କ୍ରିୟତା ପାକିସ୍ତାନରେ ରହୁଥିବା ଶିଖ ସଂପ୍ରଦାୟର ଲୋକମାନଙ୍କ ନିରାପତ୍ତା ପ୍ରତି ଘୋର ପ୍ରଶ୍ନବାଚି ସୃଷ୍ଟି କରିଛି।

1469 ମସିହାରେ ଶିଖମାନଙ୍କର ପ୍ରଥମ ଗୁରୁ ଗୁରୁ ନାନକଦେବ ଜୀଙ୍କର ଜନ୍ମସ୍ଥାନ ନାନକନା ଶାହିବ ଗୁରୁଦ୍ୱାରକୁ ଏକ ପବିତ୍ର ସ୍ଥଳି ବୋଲି ଶିଖମାନଙ୍କର ବିଶ୍ୱାସ ରହିଛି। ଗତ ବର୍ଷ ସମଗ୍ର ବିଶ୍ୱରେ ଶିଖମାନେ ଗୁରୁ ନାନକଦେବଙ୍କର 550ତମ ଜୟନ୍ତି ପାଳନ କରିଥିଲେ। ଏଠାରେ ଉଲ୍ଲେଖଯୋଗ୍ୟ ଯେ ଶିଖମାନଙ୍କର ଦଶମ ଗୁରୁ ଗୁରୁ ଗୋବିନ୍ଦ ସିଂହଙ୍କର ଜୟନ୍ତି ପାଳନ କରାଯିବାର ଦିନକ ପରେ ନାନକନା ଶାହିବ ଗୁରୁଦ୍ୱାରରେ ଏଭଳି ଘଟଣା ଘଟିଛି।

ଗୁରୁଦ୍ୱାରରେ ଉପଦ୍ରବ ଘଟିବାର ତୁରନ୍ତ ପରେ ଭାରତ ଏହାକୁ ଦୃଢ ନିନ୍ଦା କରିଛି। ଜଗଜୀତ କୌରଙ୍କ ଧର୍ମ ପରିବର୍ତ୍ତନ କରିଥିବା ବ୍ୟକ୍ତି ଉପରେ ଏବଂ ଏହି ଉପଦ୍ରବ ଘଟଣାରେ ସଂପୃକ୍ତଙ୍କ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ପାକିସ୍ତାନରେ ଥିବା ଶିଖ ସଂପ୍ରଦାୟର ନିରାପତ୍ତା ଓ ସୁରକ୍ଷା ନିମନ୍ତେ ଭାରତ ପାକିସ୍ତାନ ନିକଟରେ ଦାବି କରିଛି। ନାନକ ଶାହିବ ଗୁରୁଦ୍ୱାରର ସୁରକ୍ଷାକୁ ସୁନିଶ୍ଚିତ କରିବା ପାଇଁ ସମସ୍ତ ପଦକ୍ଷେପ ଗ୍ରହଣ କରିବାକୁ ଭାରତ ପାକିସ୍ତାନକୁ କହିଛି।

ନାନକ ଶାହିବ ଉପରେ ଆକ୍ରମଣ ଖବର ପାଇବା ମାତ୍ରେ ପଞ୍ଜାବ ମୁଖ୍ୟ ମନ୍ତ୍ରୀ କ୍ୟାପଟେନ ଅମରିନ୍ଦର ସିଂହ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନଙ୍କୁ ଗୁରୁଦ୍ୱାର ମଧ୍ୟରେ ଅଟକି ରହିଥିବା ଲୋକମାନଙ୍କୁ ସୁରକ୍ଷା ଦେବାକୁ ତୁରନ୍ତ ପଦକ୍ଷେପ ନେବାକୁ ଅନୁରୋଧ କରିଥିଲେ। କେନ୍ଦ୍ର ମନ୍ତ୍ରୀ ହରସିମ୍ରତ କୌର ବାଦଲ ମଧ୍ୟ ଆକ୍ରମଣକୁ ଦୃଢ ନିନ୍ଦା କରିବା ସହିତ ପାକିସ୍ତାନରେ ସଂଖ୍ୟାଲଘୁମାନେ କିପରି ଅବସ୍ଥାରେ ରହିଛନ୍ତି ତାହା ପ୍ରତିଫଳିତ ହେଉଛି। ଏହା ପାକିସ୍ତାନର ମୁଖା ଖୋଲିଛି ବୋଲି ସେ କହିଛନ୍ତି। ଘଟଣାର ନିନ୍ଦା କରିବାକୁ ଯାଇ ନୂଆ ଦିଲ୍ଲୀ ସ୍ଥିତ ପାକିସ୍ତାନ ଉଚ୍ଚାୟୁକ୍ତ କାର୍ଯ୍ୟାଳୟ ବାହାରେ ବହୁ ସଂଖ୍ୟକ ଲୋକ ଏକତ୍ର ହୋଇଥିଲେ।

ଏହି ଘଟଣାକୁ ନିନ୍ଦା କରିବା ପାଇଁ ପାକିସ୍ତାନ ପ୍ରଧାନମନ୍ତ୍ରୀ ଇମରାନ ଖାନ ଦୁଇ ଦିନ ପର୍ଯ୍ୟନ୍ତ ଅପେକ୍ଷା କଲେ। ଇମରାନ ଖାନ କହିଲେ ଏହା ପାକିସ୍ତାନର ନୀତି କିମ୍ୱା ଉଦ୍ଦେଶ୍ୟ ନୁହେଁ ଏବଂ ଏହାକୁ ବରଦାସ୍ତ କରିହେବ ନାହିଁ। କିନ୍ତୁ ଉପଦ୍ରବିମାନଙ୍କ ବିରୁଦ୍ଧରେ କିଛି ବି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହିଁ। ଏଥିରୁ ପ୍ରମାଣିତ ହେଉଛି ଯେ ପାକିସ୍ତାନର ନେତୃତ୍ୱ ଉପଦ୍ରବକୁ ନିୟନ୍ତ୍ରଣ କରିବାରେ ଅକ୍ଷମ।

ଇମରାନ ଖାନଙ୍କ ବିବୃତ୍ତି ଆସିବା ପୂର୍ବରୁ ପାକିସ୍ତାନର ବୈଦେଶିକ ଅଫିସ କହିଛି ଯେ ନାନକ ଶାହିବ ଘଟଣା ମିଥ୍ୟା ଏବଂ ଏହା କେବଳ ଦୁଇ ଗୋଷ୍ଠି ମଧ୍ୟରେ ଏକ ଚା ଦୋକାନରେ ହୋଇଥିବା କଳହ ମାତ୍ର।

ପାକିସ୍ତାନର ସଂଖ୍ୟାଲଘୁମାନଙ୍କ ସୁରକ୍ଷାକୁ ସୁନିଶ୍ଚିତ କରିବା ପାଇଁ ସେ ଦେଶ ଉପରେ ଚାପ ପକାଇବା ପାଇଁ ଭାରତ ଆନ୍ତର୍ଜାତୀୟ ସମୁଦାୟକୁ ଆହ୍ୱାନ ଜଣାଇଛି।

ଆଲେଖ୍ୟ: ଅଶୋକ ସଜ୍ଜନହାର

ଭାଷାନ୍ତର: ଜଗନ୍ନାଥ ମଲ୍ଲିକ, ରାମଚଂଦ୍ର ନାଥ