ମ୍ୟୁନିଖ ସୁରକ୍ଷା ସମ୍ମିଳନୀ 2020 : ପ୍ରମୁଖ ପ୍ରସଙ୍ଗ

56 ତମ ମ୍ୟୁନିଖ ସୁରକ୍ଷା ସମ୍ମିଳନୀ (ଏମଏସସି) ଗତ ସପ୍ତାହରେ ଜର୍ମାନୀର ମ୍ୟୁନିଖରେ ଅନୁଷ୍ଠିତ ହୋଇଥିଲା | ଏହି ଶିଖର ବୈଠକରେ ପଶ୍ଚିମହୀନତା ବା “ୱେଷ୍ଟଲେସନେସ “ ଉପରେ ମୁଖ୍ଯତଃ ପ୍ରାଧାନ୍ୟ ଦିଆଯାଇଥିଲା | ଯାହାକି ମୂଲ୍ଯବୋଧ ଓ ରଣନୀତିକ ଅଭିମୁଖିକରଣ କ୍ଷେତ୍ରରେ ପାଶ୍ଚାତ୍ୟ ଦେଶ ଗୁଡିକ ମଧ୍ୟରେ ମତଭେଦ ଓ ଅନିଶ୍ଚିତତା ଯୋଗୁଁ ଉଭା ହୋଇଛି | ଏହି ସମ୍ମିଳନୀରେ ଉଦବୋଧନ ଦେବା ବେଳେ ନାଟୋର ମହାସଚିବ ଜେନ୍ସ ଷ୍ଟୋଲଟେନବର୍ଗ କହିଥିଲେ ୱାଶିଙ୍ଗଟନ ସହଯୋଗୀ ମେଣ୍ଟ ଓ ବୈଶ୍ଵିକ ଉଦବେଗ ଗୁଡିକରୁ ବିମୁଖ ହୋଇଯାଇଥିଲା | ଏହି ଅବସରରେ ଆମେରିକା ବୈଦେଶିକ ମନ୍ତ୍ରୀ ମାଇକ ପୋମ୍ପିଓ କହିଥିଲେ ଟ୍ରାନ୍ସଆଟଲାଣ୍ଟିକ ମେଣ୍ଟର ପରିସମାପ୍ତିକୁ ଅତ୍ୟଧିକ ଗୁରୁତ୍ଵ ଦିଆଯାଇଥିଲା | ପାଶ୍ଚାତ୍ୟ ଦେଶ ଗୁଡିକ ପ୍ରଗତି ପଥରେ ଆଗଉଛନ୍ତି ବୋଲି ଦର୍ଶାଇ ସେ କହିଥିଲେ ୱାଶିଙ୍ଗଟନ, ଇସଲାମିକ ଷ୍ଟେଟକୁ ପ୍ରତିହତ କରିବା ଲାଗି ଏକ ବହୁରାଷ୍ଟ୍ରୀୟ ପ୍ରୟାସର ନେତୃତ୍ଵ ନେଉଥିବା ବେଳେ ନାଟୋ ଜରିଆରେ ୟୁରୋପର ସୀମାବର୍ତ୍ତି ଇଲାକା ଗୁଡିକୁ ସୁରକ୍ଷା ପ୍ରଦାନ ଲାଗି ଏକ ମହତ୍ବପୂର୍ଣ୍ଣ ଭୂମିକା ନିଭାଉଛି | ତାଙ୍କ ମନ୍ତବ୍ୟକୁ ଜର୍ମାନୀ ରାଷ୍ଟ୍ରପତି ଫ୍ରାଙ୍କ-ୱାଲଟରଙ୍କ ପ୍ରତିକ୍ରିୟାର ଜବାବ ଭାବେ ଦେଖାଯାଉଛି | ଶ୍ରୀ ଫ୍ରାଙ୍କ କହିଥିଲେ ଯେ ଆମେରିକା ଆନ୍ତର୍ଜାତୀୟ ସମୁଦାୟର ବିଚାରଧାରାକୁ ପ୍ରତ୍ୟାଖ୍ୟାନ କରିଦେଇଥିଲା ଓ ପଡୋଶୀ ଓ ସହଯୋଗୀଙ୍କ ଆଳରେ କାର୍ଯ୍ୟ କରୁଥିଲା | ଫ୍ରାନ୍ସ ରାଷ୍ଟ୍ରପତି ଏମାନୁଏଲ ମାକ୍ରୋନ ମଧ୍ୟ ପାଶ୍ଚାତ୍ୟ ଦେଶ ଦୁର୍ବଳ ହେଉଥିବା ନେଇ ଚେତାବନୀ ଦେଇଥିଲେ | 

ନାଟୋକୁ ସମର୍ଥନ ଜଣାଇ ରାଷ୍ଟ୍ରପତି ମାକ୍ରୋନ, ପ୍ରତିରକ୍ଷା ମାମଲାରେ ଆମେରିକାର ସ୍ଵତନ୍ତ୍ର ଭାବେ କାର୍ଯ୍ୟ କରିବାର ଆବଶ୍ୟକତା ଉପରେ ପ୍ରାଧାନ୍ଯ ଦେଇଥିଲେ | ସମ୍ମିଳନୀର ଅଧ୍ୟକ୍ଷ ଇସ୍କିଙ୍ଗର, ନୂତନ ସାମରିକ ଶକ୍ତି ସହ ଏକ ୟୁରୋପୀୟ ରଣକୌଶଳ ପ୍ରସ୍ତୁତ ନେଇ ମାକ୍ରୋନଙ୍କ ଦୁରଦୃଷ୍ଟିକୁ ସ୍ଵାଗତ ଜଣାଇଥିଲେ | ୟୁକ୍ରେନରେ ଏହାର କାର୍ଯ୍ୟାନୁଷ୍ଠାନ ଲାଗି ରୁଷ ଉପରେ ୟୁରୋପୀୟ ସଂଘ ଦ୍ଵାରା କଟକଣା ଲଗାଯିବା ସତ୍ତ୍ୱେ ଫ୍ରାନ୍ସ ରାଷ୍ଟ୍ରପତି ରୁଷ ସହ କଥାବାର୍ତ୍ତା ଜାରି ରଖିବା ଉପରେ ଯୁକ୍ତି ବାଢିଥିଲେ | ଡୋନବାସ ଅଞ୍ଚଳରେ ପୁନର୍ବାର ସଂଘର୍ଷ ହେବାର ସମ୍ଭାବନା ରହିଥିବା ଦୃଷ୍ଟିରୁ ମ୍ୟୁନିଖ ସୁରକ୍ଷା ସମ୍ମିଳନୀର ଆୟୋଜକ ମାନେ ୟୁକ୍ରେନକୁ 2020 ର ସମ୍ଭାବ୍ୟ ବିପଦପୂର୍ଣ୍ଣ ଅଞ୍ଚଳ ଭାବେ ତାଲିକାଭୁକ୍ତ କରିଛନ୍ତି | 

ତେଣେ ପାଶ୍ଚାତ୍ୟ ଦେଶ ଗୁଡିକର ଆଦର୍ଶକୁ ଏବେ ଆହ୍ଵାନ ଦିଆଯାଉଛି ବୋଲି ଜର୍ମାନୀ ପ୍ରତିରକ୍ଷା ମନ୍ତ୍ରୀ ଏନେଗ୍ରେଟ କ୍ରେମ୍ପ-କାରେନବାଉର କହିଥିଲେ | ଆନ୍ତର୍ଜାତୀୟ ସ୍ତରରେ ସୁରକ୍ଷାକୁ ଆହୁରି ମଜବୁତ କରିବା ଲାଗି ସମନ୍ଵିତ ପ୍ରୟାସ ପାଇଁ ନିବେଦନ ଜଣାଇ ଆଫ୍ରିକାର ସାହେଲ ଆଞ୍ଚଲ ସମେତ ବିଦେଶ ମିଶନରେ ଅଧିକ ସକ୍ରିୟ ହେବା ଲାଗି ସେ ଜର୍ମାନୀକୁ ଆହ୍ଵାନ ଦେଇଥିଲେ |

ଚୀନ ଟେଲିଯୋଗାଯୋଗ କମ୍ପାନୀ ହୁଆୱେଇକୁ ନେଇ ଆମେରିକା ଓ ୟୁରୋପ ମଧ୍ୟରେ ମତଭେଦ ଲାଗିରହିଛି | ଏହି କମ୍ପାନୀ ବେଜିଂ ପାଇଁ ଏକ ଗୋଇନ୍ଦା ବୋଲି ଆମେରିକା କହିଆସୁଛି | ଆମେରିକା ବୈଦେଶିକ ମନ୍ତ୍ରୀ, ପଶ୍ଚିମାଞ୍ଚଳ ଭିତ୍ତିଭୂମିରେ ଅନୁପ୍ରବେଶ ଲାଗି ଚୀନର ମନ୍ଦ ରଣକୌଶଳ ପାଇଁ ହୁଆୱେଇ ଏକ ପ୍ରମୁଖ ମାଧ୍ୟମ ପାଲଟିଛି ବୋଲି ଦର୍ଶାଇ 5ଜି ନେଟୱର୍କ ସ୍ଥାପନରେ ଏକ ସୀମିତ ଭୂମିକା ଲାଗି ହୁଆୱେଇକୁ ଅନୁମତି ଦେବା ଉପରେ ଏହାର ନିଷ୍ପତ୍ତି ନେଇ ପୁନର୍ବିଚାର କରିବା ଲାଗି ଚେତାବନୀ ଦେଇଛନ୍ତି | ତେଣେ ଜର୍ମାନୀ ବୈଦେଶିକ ମନ୍ତ୍ରୀ ହେକୋ ମାସ, ୟୁରୋପର ଏକ ସର୍ବସମ୍ମତ ଆଭିମୁଖ୍ୟ ଓ ନାଟୋ ସଂସ୍କାରର ଆବଶ୍ୟକତା ବିଷୟ ଦର୍ଶାଇ ଆମେରିକା ଓ ୟୁରୋପ ମଧ୍ୟରେ କୌଣସି ସଂଘର୍ଷ ହେବା ବିଷୟକୁ ଖଣ୍ଡନ କରିଛନ୍ତି | 

ପଶ୍ଚିମ ଦେଶ ଗୁଡିକ ସର୍ବସମ୍ମତି କ୍ରମେ ଦକ୍ଷିଣ ଚୀନ ସାଗରରେ ଚୀନର କାର୍ଯ୍ୟାନୁଷ୍ଠାନ ଓ ଏହାର ସାମରିକରଣକୁ କମ କରିଦେଇଥିବାରୁ ଆମେରିକା ଓ ୟୁରୋପ ମଧ୍ୟରେ ମତଭେଦ ସୃଷ୍ଟି ହୋଇଥିବାର ଅନୁମାନ କରାଯାଉଛି | ତେବେ ଚୀନର ବୈଦେଶିକ ମନ୍ତ୍ରୀ ୱାଙ୍ଗ ୟି, ଚୀନ ସଦା ସର୍ବଦା ଶାନ୍ତିପୂର୍ଣ୍ଣ ବିକାଶ ଲାଗି କାର୍ଯ୍ୟ କରେ ବୋଲି ଜଣାଇ ତାଙ୍କ ଦେଶ ପକ୍ଷରୁ ଉଚିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି କହିଛନ୍ତି |ଏହି ସମ୍ମିଳନୀରେ ବୁହାନ କରୋନା ଭାଇରସ ସଂକ୍ରମଣର ମୁକାବିଲା ସଙ୍କ୍ରାନ୍ତରେ ମଧ୍ୟ ବ୍ୟାପକ ଆଲୋଚନା କରାଯାଇଥିଲା | ଚୀନ ଉପ- ବୈଦେଶିକମନ୍ତ୍ରୀ କିନ ଗାଙ୍ଗ, ଏହି ଭାଇରସର ମୁକାବିଲା ଲାଗି ତାଙ୍କ ସରକାରଙ୍କ ଦ୍ଵାରା ନିଆଯାଇଥିବା ପଦକ୍ଷେପ ପ୍ରତି ଉଚ୍ଚ ପ୍ରସଂଶା କରିଥିଲେ ଏବଂ ଏହି ଭାଇରସର ସଂକ୍ରମଣକୁ ଆମେ ରୋକିପାରିଛୁ ତେଣୁ ଏହି ଭାଇରସରେ ସଂକ୍ରମିତ ରୋଗୀଙ୍କ ମଧ୍ୟରେ ମାତ୍ର 1 ପ୍ରତିଶତ ରୋଗୀ ଚୀନ ବାହ୍ୟ ସୀମାର ଅଛନ୍ତି ବୋଲି ସେ କହିଛନ୍ତି | 

ଏହି ଶିଖର ବୈଠକରେ ଆମେରିକାର ସିନେଟର ଲିଣ୍ଡସେ ଗ୍ରାହାମ, ଏକ ଗଣତନ୍ତ୍ର ପ୍ରକ୍ରିୟାରେ କାଶ୍ମୀର ପ୍ରସଙ୍ଗ ର ସମାଧାନ ଲାଗି ସୁଚାଇଥିଲେ | ଏହାର ଜବାବରେ ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର କହିଥିଲେ ଯେ ଭାରତର ଦୃଢ ଗଣତନ୍ତ୍ର ନିଜେ ହିଁ ଏହି ସମସ୍ୟାର ସମାଧାନ କରିବା ଲାଗି ବେଶ ସକ୍ଷମ ଅଛି | ମ୍ୟୁନିଖ ଠାରେ ଡଃ ଜୟଶଙ୍କର ଆମେରିକା ବୈଦେଶିକ ମନ୍ତ୍ରୀ ମାଇକ ପୋମ୍ପିଓଙ୍କ ସହ ସାକ୍ଷାତ କରି ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫଙ୍କ ଆଗାମୀ ଭାରତ ଗସ୍ତ ସଙ୍କ୍ରାନ୍ତରେ ପୁଙ୍ଖାନୁପୁଙ୍ଖ ଆଲୋଇଚନା କରିଥିଲେ | ଏହି ସୁରକ୍ଷା ସମ୍ମିଳନୀ ଅବସରରେ ଶ୍ରୀ ଜୟଶଙ୍କର ସାଉଦୀ ଓ ଓମାନର ବୈଦେଶିକ ମନ୍ତ୍ରୀ ମାନଙ୍କ ସହ ମଧ୍ୟ ସାକ୍ଷାତ ଆଲୋଚନା କରିଥିଲେ |

ଏହି ଶିଖର ସମ୍ମିଳନୀରେ ପାଶ୍ଚାତ୍ୟ ମେଣ୍ଟର ବିଚାରଧାରା ଉପରେ ଅନେକ ମତ ଆଦାନ ପ୍ରଦାନ ହୋଇଥିବାରୁ ମ୍ୟୁନିଖ ସୁରକ୍ଷା ସମ୍ମିଳନୀକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି | ଏମଏସସି ଭଳି ଏହି ମଞ୍ଚରେ ବିଶ୍ଵ ପଟଳରେ ବର୍ତ୍ତମାନ ଉଭା ହୋଇଥିବା ବିପଦ ତଥା ସମସ୍ୟା ଗୁଡିକ ଉପରେ ଅନେକ ତର୍କ ବିତର୍କ ହେବା ସହ ଏସଙ୍କ୍ରାନ୍ତରେ ବିଚାର ବିମର୍ଶ ମଧ୍ୟ କରାଯାଇଥିଲା | ତେବେ ଏହା ମନେ ରଖିବାକୁ ହେବ ଯେ ଏହି ରାଷ୍ଟ୍ର ଗୁଡିକ ସମ୍ମୁଖୀନ ହେଉଥିବା ସମଧରଣର ସୁରକ୍ଷା ତଥା ପ୍ରତିରକ୍ଷା ସଙ୍କ୍ରାନ୍ତୀୟ ସମସ୍ୟା ଗୁଡିକ ନେଇ ଆପୋଷ ମତ ଆଦାନ ପ୍ରଦାନ କରିବାର ଆବଶ୍ୟକତା ଅଛି ଏବଂ ସାମୁହିକ ପ୍ରୟାସ ବଳରେ ମିଳିମିଶି କାର୍ଯ୍ୟ କଲେ ହିଁ ବିଶ୍ଵକୁ ଏକ ନିରାପଦ ଓ ସୁରକ୍ଷିତ ସ୍ଥଳୀରେ ପରିଣତ କରାଯାଇପାରିବ |

ମୂଳ ଲେଖା : ଡଃ ସଙ୍ଘମିତ୍ରା ଶର୍ମା , ୟୁରୋପୀୟ ବ୍ୟାପାର ଉପରେ ରଣନୀତିକ ବିଶ୍ଳେଷକ 

ଅନୁବାଦ : ରୀତା ଯୋଶୀ 

________