ଭାରତ ପର୍ତ୍ତୁଗାଲ ସଂପର୍କର ଏକ ନୂଆ ଅଧ୍ୟାୟ

ପର୍ତ୍ତୁଗାଲ ରାଷ୍ଟ୍ରପତି ମାର୍ସେଲୋ ରେବେଲୋ ଡି ସୌସା ଏକ ସଫଳ ଭାରତ ଗସ୍ତ କରିଛନ୍ତି। ତାଙ୍କ ଗସ୍ତର ସଫଳତା ପଛରେ ଦୁଇ ଦେଶର ସ୍ୱାର୍ଥ ସମ୍ୱଳିତ 14ଟି ବୁଝାମଣା ପତ୍ର ସ୍ୱାକ୍ଷର ରହିଛି। ଏଥିମଧ୍ୟରୁ ସାମୁଦ୍ରିକ ପରିବହନ ଏବଂ ବନ୍ଦର ବିକାଶ, ଷ୍ଟାର୍ଟ ଅପ, ମହାକାଶ, କୂଟନୈତିକ ପ୍ରଶିକ୍ଷଣ, ବୈତ୍ଜ୍ଞାନିକ ଗବେଷଣା ଏବଂ ଲୋକନୀତି।

ତାଙ୍କର ଗସ୍ତ ଭାରତ ଏବଂ ପର୍ତ୍ତୁଗାଲ ମଧ୍ୟରେ ଗତ ତିନି ବର୍ଷ ହେଲା ସଂପର୍କରେ ଯେଉଁ ପରିବ୍ୟାପ୍ତତା ଘଟିଛି ତାର ଏକ ନିଦର୍ଶନ। ଦୁଇ ଦେଶ ଦ୍ୱିପକ୍ଷୀୟ ସଂପର୍କକୁ ମଜବୁତ କରିବା ପାଇଁ ଆନ୍ତରିକ ଭାବେ ବିଭିନ୍ନ ପ୍ରୟାସ କରୁଛନ୍ତି।

ଆଜି ଅନେକ ଆନ୍ତର୍ଜାତୀୟ ଏବଂ ଦ୍ୱିପକ୍ଷୀୟ ପ୍ରସଙ୍ଗ ଉଭା ହୋଇଛି ଯେଉଁଥିରେ ଭାରତ ଏବଂ ପର୍ତ୍ତୁଗାଲ ନିଜର ସ୍ୱାର୍ଥ ଦେଖୁଛନ୍ତି। ଆଜି ବିଶ୍ୱ ଏକ ଅପ୍ରତ୍ୟାଶିତ ସ୍ଥିତି ଦେଇ ଗତି କରୁଛି। ଭୂ-ଆର୍ଥିକ ଏବଂ ଭୂ କୌଶଳଗତ ପ୍ରତିଦ୍ୱନ୍ଦିତା, ଦେବାଳିଆ ଅର୍ଥନୀତି, ପାରମ୍ପରିକ ଏବଂ ଅଣ ପାରମ୍ପରିକ ନିରାପତ୍ତା ବିପଦ ଆଜି ବିଶ୍ୱରେ ଦେଖାଦେଇଛି। ଏକବିଂଶ ଶତାବ୍ଦିରେ ଆନ୍ତର୍ଜାତୀୟକରଣ ଏକ ମୁଖ୍ୟ ବିନ୍ଦୁ। ଆଜି ଆମେ ଚତୁର୍ଥ ଶିଳ୍ପ ବିପ୍ଲବ ଆଡକୁ ଅଗ୍ରସର ହେଉଥିବା ବେଳେ ଜ୍ଞାନକୌଶଳର ଅପବ୍ୟବହାର ମଧ୍ୟ ବେଳେବେଳେ ହେଉଛି। ୟୁରୋପ ପ୍ରତି ଆମେରିକାର ଯେଉଁ ପ୍ରତିବଦ୍ଧତା ଦେଖାଦେଇଛି ତାହାଦ୍ୱାରା ଏକ ନୂଆ ଭାଗିଦାରୀ ଏବଂ ମେଣ୍ଟ ପାଇଁ ଆହ୍ୱାନ ଦେଉଛି।

ବିଶ୍ୱ ପଟ୍ଟଳରେ ଭାରତର ବର୍ଦ୍ଧିତ ପ୍ରାସଙ୍ଗିକତା ଏବଂ ୟୁରୋପୀୟ ସଂଘ ଓ ନାଟୋରେ ପର୍ତ୍ତୁଗାଲର ସଦସ୍ୟତା ଉଭୟ ଦେଶକୁ ବିଶ୍ୱ ସମସ୍ୟାର ମୁକାବିଲା ପାଇଁ ଏକତ୍ର କରିବାରେ ଭୂମିକା ଗ୍ରହଣ କରୁଛି। କୋରୋନା ଭାଇରସ ପରି ବିପଦ ଦୁଇ ଦେଶକୁ ମିଳିତ ଭାବେ କାର୍ଯ୍ୟ କରିବାକୁ ଅବସର ଦେଇଛି ଏବଂ ସଂପର୍କକୁ ସ୍ୱାଭାବିକ ଭାବେ ସୁଦୃଢ କରୁଛି।

ଏହି ପରିପ୍ରେକ୍ଷୀରେ ଭାରତ ଏବଂ ପର୍ତ୍ତୁଗାଲ ପରସ୍ପରର ମୂଳ ସୁରକ୍ଷା ଚିନ୍ତାକୁ ଦୂର କରିବା ପାଇଁ ଭାଗିଦାରିତା ସ୍ଥିର କରୁଛି। ପର୍ତ୍ତୁଗାଲ ପାର୍ଲାମେଣ୍ଟ 2019ର ପୁଲୱାମା ଆକ୍ରମଣକୁ ଦୃଢ ଭାବରେ ନିନ୍ଦା କରିଥିଲା ଏବଂ 2005ରେ ଲିସବନରୁ କୁଖ୍ୟାତ ଗ୍ୟାଙ୍ଗଷ୍ଟାର ଅବୁ ସଲିମକୁ ଭାରତକୁ ପ୍ରତ୍ୟାର୍ପଣ କରିଥିଲା। ବିଭିନ୍ନ ବିଶ୍ୱ ମଞ୍ଚରେ ପର୍ତ୍ତୁଗାଲ ଭାରତର ସଦସ୍ୟତାକୁ ସମର୍ଥନ କରିଆସିଛି। 500 ବର୍ଷ ପୂର୍ବେ ଭାସ୍କୋଡା ଗାମା ଯେଉଁ ସାମୁଦ୍ରିକ ସୁରକ୍ଷାକୁ ଗୁରୁତ୍ୱ ଦେଇଥିଲେ ସେହି ପରିପ୍ରେକ୍ଷୀରେ ଭାରତ ଏବଂ ପର୍ତ୍ତୁଗାଲ ଯଥାକ୍ରମେ ଭାରତ ମହାସାଗର ଏବଂ ଆଟଲାଣ୍ଟିକ ମହାସାଗର ପରି ଭୌଗୋଳିକ ସ୍ଥାନରେ ରହି ନିଜର ନିରାପତ୍ତାକୁ ସୁନିଶ୍ଚିତ କରିବାକୁ ଆପୋଷ ସହଭାଗିତା ଉପରେ କାର୍ଯ୍ୟ କରୁଛନ୍ତି।

ସେହିପରି ପର୍ତ୍ତୁଗାଲର ଜାତୀୟ ଅଭିନବତା ପରିବେଶ ବ୍ୟବସ୍ଥା ଏବଂ ଜ୍ଞାନଭିତ୍ତିକ ଅର୍ଥନୀତି ଭାରତ ପାଇଁ ପ୍ରାସଙ୍ଗିକତା ରଖୁଛି। ପର୍ତ୍ତୁଗାଲ ଆଜି ଆର୍ଟିଫିସିଆଲ ଇଣ୍ଟେଲିଜେନ୍ସ, ଇ- ଗଭର୍ଣ୍ଣାନ୍ସ ପରି କ୍ଷେତ୍ରରେ ଆଗୁଆ ରହିଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆଧୁନିକ ଜ୍ଞାନକୌଶଳରେ ଭାରତର ଅର୍ଥନୀତିର ଅଧୁନିକିକରଣ କରିବା ନୀତି ଏହି କ୍ଷେତ୍ରକୁ ଅଧିକ ପ୍ରାସଙ୍ଗିକ କରିଛି। ପର୍ତ୍ତୁଗାଲର କଂପାନିମାନେ ଭାରତର ମେକ ଇନ ଇଣ୍ତିଆ, କ୍ଲିନ ଇଣ୍ତିଆ, ଡିଜିଟାଲ ଇଣ୍ତିଆ ଏବଂ ଷ୍ଟାର୍ଟ ଅପ ଇଣ୍ତିଆ ପରି ଅଭିନବ ପ୍ରକଳ୍ପଗୁଡିକରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରୁଛନ୍ତି। ଅପରପକ୍ଷେ ଭାରତ ଠାରୁ ପର୍ତ୍ତୁଗାଲ କୁଶଳି ଲୋକଶକ୍ତିର ଆବଶ୍ୟକ କରୁଛି ଏପରିସ୍ଥଳେ ଦୁଇ ଦେଶର ବାଣିଜ୍ୟ ସଂପର୍କ ବୃଦ୍ଧି ପାଇଛି ଏବଂ ଦୁଇ ବର୍ଷ ମଧ୍ୟରେ ପର୍ତ୍ତୁଗାଲ ଭାରତରେ 1 ବିଲିୟନ ୟୁରୋ ସମ୍ୱଳିତ ପୁଞ୍ଜି ବିନିଯୋଗ କରିଛି।

ପର୍ତ୍ତୁଗାଲର ଖର୍ଚ ପ୍ରତିଯୋଗି ଏବଂ ବାଣିଜ୍ୟ ଅନୁକୂଳ ପରିବେଶ ଯୋଗୁଁ ଭାରତର କଂପାନି ଗୁଡିକ ବ୍ରିଟେନ ବଦଳରେ ପର୍ତ୍ତୁଗାଲରେ ବ୍ୟବସାୟ କରିବାକୁ ଅଧିକ ମନ ଦେଉଛନ୍ତି। ବହୁ ସଂଖ୍ୟକ ଭାରତୀୟ ପର୍ତ୍ତୁଗାଲରେ ରହୁଥିବାରୁ ଦୁଇ ଦେଶର ଲୋକମାନଙ୍କ ମଧ୍ୟରେ ସଂପର୍କ ସ୍ୱାଭାବିକ ଭାବେ ନିବିଡ ହୋଇଛି ଏବଂ ଭାରତ ଯୋଗ, ଆୟୁର୍ବେଦ ବ୍ୟତିତ ପର୍ଯ୍ୟଟନ, ପୁନଃବ୍ୟବହାରଯୋଗ୍ୟ ଶକ୍ତି, ଆବର୍ଜନା ପରିଚାଳନା, ସାମୁଦ୍ରିକ ବିଜ୍ଞାନ, ପ୍ରତିରକ୍ଷା ଏବଂ କୃଷି ଉପରେ ଭାଗଦାରିତା ନିଭାଉଛନ୍ତି। ଏଣୁ ରାଷ୍ଟ୍ରପତି ଡି ସୌସାଙ୍କ ଭାରତ ଗସ୍ତ ଦୁଇ ଦେଶ ମଧ୍ୟରେ ସଂପର୍କକୁ ଆହୁରି ଅଧିକ ସୁଦୃଢ କରିଛି।

ଆଲେଖ୍ୟ: ରାଜୋର୍ସି ରାୟ

ଭାବାନୁବାଦ: ରାମଚଂଦ୍ର ନାଥ