ଆମେରିକା ରାଷ୍ଟ୍ରପତିଙ୍କ ଗସ୍ତ ଯୋଗୁଁ ଦ୍ଵିପକ୍ଷୀୟ ରଣନୀତିକ ଭାଗୀଦାରୀତା ଆହୁରି ମଜବୁତ ହେବ

ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ଫଙ୍କ ଭାରତରେ ଛତିଶ ଘଣ୍ଟାର ସରକାରୀ ଗସ୍ତ ସମାରୋହ ପୂର୍ଣ୍ଣ ଓ ଅତ୍ୟନ୍ତ ଫଳପ୍ରଦ ହୋଇଛି | ଭାରତ ଗସ୍ତ କରିବାରେ ସେ ହେଉଛନ୍ତି ସପ୍ତମ ଆମେରିକୀୟ ରାଷ୍ଟ୍ରପତି | ଗତ ଦୁଇ ଦଶନ୍ଧିରେ ସମସ୍ତ ଚାରି ଜଣ ଯାକ ରାଷ୍ଟ୍ରପତି ଭାରତ ଗସ୍ତ କରିଥିଲେ ଯେଉଁଥିରୁ ଭାରତ-ଆମେରିକା ମଧ୍ୟରେ ସମ୍ପର୍କ କେତେଯେ ନିବିଡ ରହିଛି ତାହା ସ୍ପଷ୍ଟ ଅନୁମେୟ ହେଉଛି | ରାଷ୍ଟ୍ରପତିଙ୍କ ସହ ଆମେରିକାର ପ୍ରଥମ ମହିଳା ମେଲାନିଆ ଟ୍ରମ୍ଫ, ଝିଅ ଇଭାଙ୍କା ଓ ଜୋଇଁ ଜେରେଡ କୁଶନର ତଥା ଏକ ଉଚ୍ଚ ସ୍ତରୀୟ ପ୍ରତିନିଧି ଦଳ ଭାରତ ଗସ୍ତରେ ଆସିଥିଲେ |

ରାଷ୍ଟ୍ରପତି ଟ୍ରମ୍ଫଙ୍କୁ ଅହମଦାବାଦରେ ଏକ ବିଶାଳ ଜନସମାଗମରେ ଭବ୍ୟ ସ୍ଵାଗତ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା | ସାବରମତି ଆଶ୍ରମ ପରିଦର୍ଶନ କରିବା ପରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅହମଦାବାଦର ମୋଟେରା ଷ୍ଟାଡିୟମ ଠାରେ ଆୟୋଜିତ ନମସ୍ତେ ଟ୍ରମ୍ଫ କାର୍ଯ୍ୟକ୍ରମରେ ପ୍ରାୟ 1 ଲକ୍ଷ 25 ହଜାର ଜଣ ଉପସ୍ଥିତ ଥିବା ଏକ ଜନସମୁଦ୍ରରେ ଉଦବୋଧନ ଦେଇଥିଲେ | ଏଠାରେ ସ୍ମରଣ କରିଦିଆଯାଇପାରେ ଯେ ପାଞ୍ଚ ମାସ ପୂର୍ବେ ରାଷ୍ଟ୍ରପତି ଟ୍ରମ୍ଫ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହୁଷ୍ଟନରେ ଆୟୋଜିତ ହାଉଡି ମୋଦୀ କାର୍ଯ୍ୟକ୍ରମରେ ଭାରତୀୟ ଆମେରିକୀୟ ସମୁଦାୟର ଏକ ବିଶାଳ ସଭାରେ ସମ୍ବୋଧନ କରିଥିଲେ | ରାଷ୍ଟ୍ରପତି ଟ୍ରମ୍ଫ ପ୍ରଧାନମନ୍ତ୍ରୀ ମୋଦୀଙ୍କ ବ୍ୟକ୍ତିତ୍ବ ଓ ନେତୃତ୍ଵ ସହ ଭାରତର ଉପଲବ୍ଧି ଗୁଡିକ ବଖାଣିଥିଲେ | ସେ କହିଥିଲେ ଯେ ମାତ୍ର 70 ବର୍ଷରେ ଭାରତ ଏକ ପ୍ରମୁଖ ଅର୍ଥନୈତିକ ରାଷ୍ଟ୍ର ଭାବେ ଉଭା ହୋଇଛି, ଯାହାକି ଏକ ସର୍ବକାଳିନ ବିଶାଳ ଗଣତନ୍ତ୍ର ତଥା ବିଶ୍ଵର ସବୁଠୁ ବିସ୍ମୟକର ରାଷ୍ଟ୍ର | ଏହି ଅବସରରେ ଦୁଇ ନେତାଙ୍କ ମଧ୍ୟରେ ଉତ୍ତମ ବ୍ୟକ୍ତିଗତ ତାଳମେଳ ଥିବାର ସ୍ପଷ୍ଟ ପ୍ରତୀୟମାନ ହୋଇଥିଲା | ବିଶ୍ଵବିଖ୍ୟାତ ତାଜମହଲ ପରିଦର୍ଶନ ଲାଗି ଆଗ୍ରାକୁ ସ୍ୱଳ୍ପ ସମୟ ପାଇଁ ଯାତ୍ରା କରିବା ପରେ ରାଷ୍ଟ୍ରପତି ଟ୍ରମ୍ଫ ଓ ତାଙ୍କ ପ୍ରତିନିଧି ଦଳ ନୂଆଦିଲ୍ଲୀ ରେ ପହଞ୍ଚିଥିଲେ |

ନୂଆଦିଲ୍ଲୀରେ ପହଞ୍ଚିବା ପରେ ରାଷ୍ଟ୍ରପତି ଟ୍ରମ୍ଫଙ୍କୁ ରାଷ୍ଟ୍ରପତି ଭବନ ପ୍ରାଙ୍ଗଣରେ ଆନୁଷ୍ଠାନିକ ଭାବେ ଉଚ୍ଛ୍ଵସିତ ସ୍ଵାଗତ ସମ୍ବର୍ଦ୍ଧନା ଦିଆଯାଇଥିଲା | ଶ୍ରୀ ଟ୍ରମ୍ଫ ଓ ପ୍ରଥମ ମହିଳା ଜାତିର ପିତା ମହାତ୍ମା ଗାନ୍ଧୀଙ୍କ ସମାଧି ପୀଠ ରାଜଘାଟକୁ ଯାଇ ନିଜର ଶ୍ରଦ୍ଧା ସୁମନ ଅର୍ପଣ କରିଥିଲେ | ଏହାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ରାଷ୍ଟ୍ରପତି ଟ୍ରମ୍ଫ ଆନୁଷ୍ଠାନିକ କଥାବାର୍ତ୍ତା କରିଥିଲେ | ଏହି କଥାବାର୍ତ୍ତାରେ ଆଞ୍ଚଳିକ ଓ ବୈଶ୍ଵିକ ପ୍ରସଙ୍ଗ ନେଇ ବ୍ୟାପକ ଆଲୋଚନା କରି ଦୁଇ ନେତା ପାକିସ୍ତାନକୁ ଏହା ନିଶ୍ଚିତ କରିବା ପାଇଁ କହିଥିଲେ ଯେ ସନ୍ତ୍ରାସବାଦ କାର୍ଯ୍ୟ ଲାଗି ଏହାର ନିୟନ୍ତ୍ରଣାଧୀନ କୌଣସି ଅଞ୍ଚଳର ଉପଯୋଗ ଯେପରି ନକରୁ ଏବଂ 26/11 ମୁମ୍ବାଇ ତଥା ପଠାନକୋଟ ଭଳି ଆକ୍ରମଣର ମୁଖ୍ୟ ଷଡଯନ୍ତ୍ରକାରୀ ମାନଙ୍କ ବିରୁଦ୍ଧରେ କଡା କାର୍ଯ୍ୟାନୁଷ୍ଠାନ ଗ୍ରହଣ କରୁ | ଶ୍ରୀ ଟ୍ରମ୍ଫ, ଆଫଗାନିସ୍ତାନରେ ସମ୍ପର୍କ ମାର୍ଗ ସ୍ଥାପିତ କରିବା ଓ ସହାୟତା ପ୍ରଦାନ ଲାଗି ବିକାଶ ଓ ସୁରକ୍ଷା ସହାୟତା ପ୍ରଦାନ କ୍ଷେତ୍ରରେ ଭାରତର ଭୂମିକାକୁ ସ୍ଵାଗତ କରିଥିଲେ | ଏହା ପରେ ଉଭୟ ନେତା ଏକ ସାମ୍ବାଦିକ ସମ୍ମିଳନୀରେ ନିଜ ନିଜର ବକ୍ତବ୍ୟ ରଖିଥିଲେ | ଶ୍ରୀ ଟ୍ରମ୍ଫ ବ୍ୟବସାୟିକ ନେତା ତଥା ଶିଲ୍ପପତି ମାନଙ୍କ ସହ ମଧ୍ୟ ବୈଠକ କରିଥିଲେ | ଶ୍ରୀ ଟ୍ରମ୍ଫଙ୍କ ସମ୍ମାନାର୍ଥେ ରାଷ୍ଟ୍ରପତି ରାମନାଥ କୋବିନ୍ଦଙ୍କ ଦ୍ଵାରା ଆୟୋଜିତ ଏକ ନୈଶ୍ୟ ଭୋଜି ସଭାରେ ଆମେରିକା ରାଷ୍ଟ୍ରପତି ଓ ତାଙ୍କ ପ୍ରତିନିଧି ଦଳ ଯୋଗ ଦେଇଥିଲେ |

ଦୁଇ ଦେଶ ମଧ୍ୟରେ ବ୍ୟାପକ ବୈଶ୍ଵିକ ରଣନୀତିକ ଭାଗୀଦାରୀତା କ୍ଷେତ୍ରରେ ଏହି ଉଚ୍ଚ ସ୍ତରୀୟ ଗସ୍ତକୁ ଗୁରୁତ୍ୱପୂର୍ଣ୍ଣ ମନେ କରାଯାଉଛି | ପ୍ରତିରକ୍ଷା ଓ ସୁରକ୍ଷା ସହଯୋଗ କ୍ଷେତ୍ରରେ ଭାରତ ଏକ ପ୍ରମୁଖ ପ୍ରତିରକ୍ଷା ସହଯୋଗୀ ରାଷ୍ଟ୍ର ବୋଲି ରାଷ୍ଟ୍ରପତି ଟ୍ରମ୍ଫ ଦୋହୋରାଇଥିଲେ | ସେ ଏମଏଚ-60ଆର ନୌବାହିନୀ ଜାହାଜ ଓ ଏମଏଚ-64ଇ ଅପାଚେ ହେଲିକେପ୍ଟର କ୍ରୟ ନେଇ ଭାରତର ନିଷ୍ପତ୍ତି ପ୍ରତି ମଧ୍ୟ ସ୍ଵାଗତ ଜଣାଇଥିଲେ |

ଏହି ଗସ୍ତ କାଳରେ ଭାରତ-ପ୍ରଶାନ୍ତ ମହାସାଗରୀୟ ଅଞ୍ଚଳରେ ରଣନୀତିକ ସହଯୋଗ ଉପରେ ମଧ୍ୟ ଆଲୋକପାତ କରାଯାଇଥିଲା | ଭାରତରେ ଅକ୍ଷୟ ଶକ୍ତି ପ୍ରକଳ୍ପ ଲାଗି 600 ନିୟୁତ ଆମେରିକୀୟ ଡଲାରର ଆର୍ଥିକ ସହାୟତା ସହ ଭାରତରେ ଏକ ସ୍ଥାୟୀ ବ୍ୟବସ୍ଥା ସ୍ଥାପିତ କରିବା ଲାଗି ଆମେରିକା ଆନ୍ତର୍ଜାତୀୟ ବିକାଶ ଆର୍ଥିକ ନିଗମ (ଡ଼ିଏଫସି) ପ୍ରତିଷ୍ଠା କରିବା ଏଦିଗରେ ଏକ ସ୍ଵାଗତ ଯୋଗ୍ୟ ପଦକ୍ଷେପ ବୋଲି ବିବେଚନା କରାଯାଉଛି |

ଆଭ୍ୟନ୍ତରୀଣ ସୁରକ୍ଷା ସହଯୋଗକୁ ଆହୁରି ମଜବୁତ କରିବା ଲାଗି ମଧ୍ୟ ସ୍ଥିର କରାଯାଇଛି | ପରସ୍ପରର ନ୍ୟାୟ ବ୍ୟବସ୍ଥା ସଂସ୍ଥା ମଧ୍ୟରେ ଏକ ନୂତନ କ୍ରିୟାନ୍ବୟନ ଗୋଷ୍ଠୀ ଗଠନ ଲାଗି ଉଭୟେ ରାଜି ହୋଇଛନ୍ତି | ବାଣିଜ୍ୟ ସଙ୍କ୍ରାନ୍ତୀୟ ଜଟିଳ ପ୍ରସଙ୍ଗ ଉପରେ ମଧ୍ୟ ପ୍ରଗତି ପରିଲକ୍ଷିତ ହୋଇଛି , ଉଭୟ ପକ୍ଷ ଖୁବ ଶୀଘ୍ର ଏକ ସ୍ଵତନ୍ତ୍ର ଚୁକ୍ତିରେ ଉପନୀତ ହେବା ଲାଗି ସହମତି ପ୍ରକାଶ କରିଥିବା ବେଳେ ବାଣିଜ୍ୟ କାରବାର ଉପରେ ବ୍ୟାପକ ଦ୍ଵିପକ୍ଷୀୟ ରାଜିନାମା ନେଇ ମଧ୍ୟ କଥାବାର୍ତ୍ତା କରିଛନ୍ତି ଯାହା ଦୁଇ ରାଷ୍ଟ୍ରର ଅର୍ଥବ୍ୟବସ୍ଥାର ପୂର୍ଣ୍ଣ ସାମର୍ଥ୍ୟକୁ ପ୍ରତିଫଳିତ କରିଥାଏ | 

ଶ୍ରୀ ଟ୍ରମ୍ଫଙ୍କ ଭାରତ ଗସ୍ତ ଫଳରେ ଭାରତ ଓ ଆମେରିକା ମଧ୍ୟରେ ଶକ୍ତି ସହଯୋଗ, ମହାକାଶ, ଶିକ୍ଷା ଓ ସ୍ୱାସ୍ଥ୍ୟ ସହଯୋଗ କ୍ଷେତ୍ର ଆହୁରି ମଜବୁତ ହେବ ବୋଲି ବିବେଚନା କରାଯାଉଛି | ଏହି ଅବସରରେ ଆମେରିକା ରାଷ୍ଟ୍ରପତି, ପରମାଣୁ ଯୋଗାଣକାରୀ ଗୋଷ୍ଠୀ (ଏନଏସଜି)ରେ ପ୍ରବେଶ ସହ ଜାତିସଂଘ ସୁରକ୍ଷା ପରିଷଦରେ ଭାରତର ସ୍ଥାୟୀ ସଦସ୍ୟତା ଲାଗି ୱାଶିଙ୍ଗଟନର ସମର୍ଥନ ରହିଥିବା କଥା ସ୍ପଷ୍ଟ କରିଛନ୍ତି | ବାସ୍ତବରେ ଶ୍ରୀ ଟ୍ରମ୍ଫଙ୍କ ଭାରତ ଗସ୍ତ ଏକ ଫଳପ୍ରଦ ଓ ଅବିସ୍ମରଣୀୟ ଗସ୍ତ ଥିଲା ବୋଲି କହିଲେ ଅତ୍ଯୁକ୍ତି ହେବ ନାହିଁ | 

ମୂଳ ଲେଖା : ନବତେଜ ସରନା, ଆମେରିକାରେ ଭାରତର ପୂର୍ବତନ ରାଷ୍ଟ୍ରଦୂତ 

ଅନୁବାଦ : ରୀତା ଯୋଶୀ