ଚତୁର୍ଥ ପଶ୍ଚିମ ଏସିଆ ସମ୍ମିଳନୀ

ପ୍ରତିରକ୍ଷା ଗବେଷଣା ନିମନ୍ତେ ମନୋହର ପାରିକର ପ୍ରତିଷ୍ଠାନ ଏବଂ ଆନାଲିସିସ ଦ୍ୱାରା ଆୟୋଜିତ ଚତୁର୍ଥ ପଶ୍ଚିମ ଏସିଆ ସମ୍ମିଳନୀ ନୂଆଦିଲ୍ଲୀରେ ଅନୁଷ୍ଠିତ ହୋଇଛି। ଚଳିତ ବର୍ଷର ବିଷୟ ଥିଲା ପଶ୍ଚିମ ଏସିଆରେ ଦଶ ବର୍ଷର ରାଜନୈତିକ ଏବଂ ଅର୍ଥନୈତିକ ପରିବର୍ତ୍ତନ, ଚ୍ୟାଲେଞ୍ଜ, ଶିକ୍ଷା ଏବଂ ଭବିଷ୍ୟତ। ଏହି ସମ୍ମିଳନୀରେ ଦେଶ ଏବଂ ବିଦେଶରୁ ବହୁ ପ୍ରତିନିଧି ଯୋଗଦେଇଥିଲେ। ଲେବାନନର ପୂର୍ବତନ ପ୍ରଧାନମନ୍ତ୍ରୀ ଫୌଆଦ ସିନିଓରା ଏବଂ ଇଜିପ୍ଟର ପୂର୍ବତନ ବୈଦେଶିକ ମନ୍ତ୍ରୀ ନବୀଲ ଫାମି ଯୋଗ ଦେଇଥିଲେ। ଦୁଇ ଦିନିଆ ଏହି ସମ୍ମିଳନୀରେ 6ଟି ଅଧିବେଶନ ହୋଇଥିଲା।

ଭାରତର ସଡକ ପରିବହନ ରାଷ୍ଟ୍ର ମନ୍ତ୍ରୀ ଜେନେରାଲ ବିଜୟ କୁମାର ସିଂହ(ସେବାନିବୃତ୍ତ) ଏଥିରେ ଦୀକ୍ଷାନ୍ତ ଭାଷଣ ଦେଇଥିଲେ। ଆୟୋଜକ ସଂସ୍ଥା ମନୋହର ପାରିକର ପ୍ରତିରକ୍ଷା ଗବେଶଣା ପ୍ରତିଷ୍ଠାନର ମହାନିର୍ଦେଶକ ଆଞ୍ଚଳିକ ପୃଷ୍ଠଭୂମିରେ ଭାରତର ଭୂମିକା ଉପରେ ଆଲୋକପାତ କରିଥିଲେ। ସେ କଙିଥିଲେ ଭାରତ ବିଭିନ୍ନ ଦେଶ ସହିତ ସଂପର୍କ ମଜବୁତ କରିବା ସହିତ ନିରାପତ୍ତା, ବାଣିଜ୍ୟ ଏବଂ ପୁଞ୍ଜି ବିନିଯୋଗ ଉପରେ ଏହି ସବୁ ଦେଶ ସହିତ ଭାଗିଦାରୀ ସଂପର୍କ ସୁଦୃଢ କରିଛି।

ବିଭିନ୍ନ ଦେଶରେ ଦେଖାଦେଇଥିବା ସମସ୍ୟା ଉପରେ ଏହି ସମ୍ମିଳନୀରେ ଆଲୋକପାତ କରାଯାଇଥିଲା। ଆରବରେ ଗତ ଦଶନ୍ଧି ଧରି ଯେପରି ଅଚଳାବସ୍ଥା ଦେଖା ଦେଇଛି ଏବଂ ଏବେ ସେଠାରେ ଯେପରି ଗଣତାନ୍ତ୍ରୀକ ପ୍ରକ୍ରିୟା ପାଇଁ ସ୍ୱର ଉଠୁଛି ସେ ବିଷୟ ମଧ୍ୟ ସମ୍ମିଳନୀରେ ସ୍ଥାନ ପାଇଥିଲା । ବହୁ ବକ୍ତା ଏହି ବିଷୟକୁ ଉଠାଇଥିଲେ। ସିରିୟା, ୟମେନ, ଇରାକ, ଲିବିୟା ପରି ଦେଶରେ ଆଭ୍ୟନ୍ତରିଣ କନ୍ଦଳ ବିଷୟ ମଧ୍ୟ ସମ୍ମିଳନୀରେ ସ୍ଥାନ ପାଇଥିଲା। ଏସବୁ ପଛରେ କାରଣ ହେଉଛି ଯେ ସେଠାକାର ଶାସନ ଏବଂ ପ୍ରଶାସନ ଯୁବକମାନଙ୍କ ରାଜନୈତିକ ଏବଂ ଅର୍ଥନୈତିକ ଅଭିଳାଷାକୁ ପୂରଣ କରିବାରେ ଅସମର୍ଥ ହେଉଛନ୍ତି। ଏହା ବ୍ୟତିତ ବେକାରୀ ଏବଂ ଜିଡିପି ହ୍ରାସ ସମଗ୍ର ବିଶ୍ୱରେ ଏବେ ଏକ ଚିନ୍ତାର କାରଣ ହୋଇଛି। ଉପସାଗରୀୟ ଅଞ୍ଚଳରେ ଯେପରି ହିଂସା ଏବଂ ଅଚଳାବସ୍ଥା ବଢି ଯାଇଛି ସେପରି ପରିସ୍ଥିତିରେ ଭାରତ, ଜାପାନ, ଦକ୍ଷିଣ କୋରିଆ ଏବଂ ଚିନ ପରି ତୈଳ ଆମଦାନୀ ଦେଶମାନଙ୍କ ପାଇଁ ନିରାପତ୍ତା ପରିସ୍ଥିତି ଦେଖାଦେଇଛି।

ଭାରତ କ୍ଷେତ୍ରରେ ଦେଖିବାକୁ ଗଲେ ଉପସାଗରୀୟ ଦେଶମାନଙ୍କ ସହିତ ଭାରତର ଦ୍ୱିପକ୍ଷୀୟ ବାଣିଜ୍ୟ କାରବାର 200 ବିଲିୟନ ଡଲାରରେ ପହଞ୍ଚିଛି ଏବଂ ଭାରତ ଏହାର ଶକ୍ତି ଆବଶ୍ୟକତାର 60 ଭାଗ ଏହି ସବୁ ଦେଶରୁ ଆମଦାନି କରିଥାଏ। ପ୍ରାୟ 90 ଲକ୍ଷ ଭାରତୀୟ ଉପସାଗରୀୟ ଦେଶମାନଙ୍କରେ ବସବାସ କରୁଛନ୍ତି। ଏଣୁ ସେମାନଙ୍କ ନିରାପତ୍ତା ମଧ୍ୟ ଭାରତ ପାଇଁ ଚିନ୍ତାର କାରଣ ହୋଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିଦେଶ ନୀତି ଭାରତ ସହିତ ଅନ୍ୟ ଦେଶମାନଙ୍କର ସଂପର୍କକୁ ମଜୁତ କରିଛି। ଭାରତର ଲୁକ ୱେଷ୍ଟ ନୀତି ଏବେ ଲିଙ୍କ ଏଣ୍ତ ଆକ୍ଟ ୱେଷ୍ଟ ନୀତିରେ ପରିବର୍ତ୍ତନ ହୋଇଛି ଯାହାକି ସୁଫଳ ପ୍ରଦାନ କରୁଛି। ପଶ୍ଚିମ ଏସିଆରେ ଶାନ୍ତି, ସ୍ଥିରତା ଏବଂ ସମୃଦ୍ଧି ସମସ୍ତଙ୍କ ପାଇଁ ମଙ୍ଗଳକର ହେବବୋଲି ସମ୍ମିଳନୀରେ ମତପ୍ରକାଶ ପାଇଛି।

ଆଲେଖ୍ୟ: ଡକ୍ଟର ମହମ୍ମଦ ମୁଦାସୀର କମର

ଭାଷାନ୍ତର: ରାମଚଂଦ୍ର ନାଥ