ବିନିର୍ମାଣ କ୍ଷେତ୍ରର ଅଭିବୃଦ୍ଧି ହାର

ଭାରତୀୟ ଅର୍ଥବ୍ୟବସ୍ଥାର ବିକାଶର ଗତି ବର୍ତ୍ତମାନ ବୈଶ୍ଵିକ ମାନ୍ଦାବସ୍ଥାର ଚାପରେ ରହିଥିବା ସମୟରେ ଚଳିତ ବର୍ଷ ଜାନୁଆରୀ ମାସରେ ଦେଶର ପ୍ରମୁଖ ବିନିର୍ମାଣ କ୍ଷେତ୍ରରେ ବିକାଶ ହାର ବୃଦ୍ଧି ପାଇବା ନିଃସନ୍ଦେହରେ ଏକ ସକାରାତ୍ମକ ଘଟଣାବଳୀ ବୋଲି ବିବେଚନା କରାଯାଉଛି | ଏକ ଅଗ୍ରଣୀ ବିପଣନ ଓ ଅର୍ଥନୈତିକ ଗବେଷଣା ସଂସ୍ଥା ଆଇଏଚଏସ ମାର୍କିଟ ଦ୍ଵାରା କରାଯାଇଥିବା ସର୍ବେକ୍ଷଣ ଅନୁଯାୟୀ ଭାରତ ବିନିର୍ମାଣ ପରଚେଜିଙ୍ଗ ମେନେଜର୍ସ ଇଣ୍ଡେକ୍ସ (ପିଏମଆଇ)ସୂଚକାଙ୍କ ଗତ ଡିସେମ୍ବରରେ 52.7 ପଏଣ୍ଟ ରହିଥିବା ବେଳେ ଚଳିତ ବର୍ଷ ଜାନୁଆରୀ ମାସରେ ଏହା ବୃଦ୍ଧି ପାଇ 55.3 ପଏଣ୍ଟ ହୋଇଛି | ପାଖାପାଖି ଆଠ ବର୍ଷ ମଧ୍ୟରେ ଏହା ସର୍ବାଧିକ ବୋଲି କୁହାଯାଉଛି | ଏହିପରି ଭାବେ ଭାରତୀୟ ଅର୍ଥବ୍ୟବସ୍ଥା ପୁଣିଥରେ ବିକାଶର ପ୍ରଗତି ପଥରେ ଅଗ୍ରସର ହେଉଥିବା ବିଷୟ ଏଥିରୁ ସ୍ପଷ୍ଟ ଅନୁମେୟ ହେଉଛି |

ବିଶ୍ଵବ୍ୟାପୀ 40 ରୁ ଅଧିକ ଅର୍ଥବ୍ୟବସ୍ଥା ପାଇଁ ଆଇଏଚଏସ ମାର୍କିଟ ଦ୍ଵାରା ପରଚେଜିଙ୍ଗ ମେନେଜର୍ସ ଇଣ୍ଡେକ୍ସ ଡାଟା ସଂକଳନ କରାଯାଇଛି | ବେସରକାରୀ କମ୍ପାନୀ ଗୁଡିକରେ ବରିଷ୍ଠ ଅଧିକାରୀ ମାନଙ୍କ ସର୍ବେକ୍ଷଣରୁ ମାସିକିଆ ଡାଟା ମିଳିଥାଏ | ପିଏମଆଇ ଡାଟାସେଟରେ ଏକ ହେଡଲାଇନ ନମ୍ବର ଥାଏ ଯାହାକି କୌଣସି ଅର୍ଥବ୍ୟବସ୍ଥାର ସ୍ଥିତି ବିଷୟରେ ସୁଚାଇଥାଏ | 50ରୁ ଅଧିକ ପିଏମଆଇ ସୂଚକାଙ୍କ ସମ୍ପ୍ରସାରିତ ବୋଲି ଦର୍ଶାଇଥାଏ | ଉପଭୋକ୍ତା ସାମଗ୍ରୀର ଉପ କ୍ଷେତ୍ରରେ ପୁଣି ଥରେ ଅଭିବୃଦ୍ଧି ଘଟୁଥିବା ବେଳେ ମଧ୍ୟବର୍ତ୍ତୀ ସାମଗ୍ରୀ ଏହାର ବିକାଶ ଗତିକୁ ବଜାୟ ରଖିଛି |

ପିଏମଆଇ ସଙ୍କେତକ ମଧ୍ୟ ବାହ୍ୟ ବଜାରର ନୂତନ ବ୍ୟବସାୟକୁ ତ୍ୱରାନ୍ୱିତ କରିବା ଲାଗି ସହାୟକ ହେଉଛି | ଏସିଆ, ୟୁରୋପ ଓ ଉତ୍ତର ଆମେରିକାକୁ ନିର୍ମାତା ମାନେ ଅଧିକ ବିକ୍ରି କରିବା ସହ 2018 ନଭେମ୍ବର ମାସ ପରେ ସାନି ରପ୍ତାନି ଚାହିଦା ମଧ୍ୟ ଅଧିକ ମାତ୍ରାରେ ବୃଦ୍ଧି ପାଇଛି | ଆମଦାନୀ ଓ ରପ୍ତାନି ଟିକସରେ କୋହଳତା ଦେଖାଯାଇଥିବା ବିଷୟ ପିଏମଆଇ ଡାଟାରୁ ଜଣାପଡିଛି|କେତୋଟି କମ୍ପାନୀ ଧାତୁ, ବୟନ ଓ ଭୋଜନ ଲାଗି ଉଚ୍ଚ ଟିକସ ବିଷୟରେ ସୂଚନା ଦେଉଥିବା ବେଳେ ଅନ୍ୟ କେତେ ଜଣ ତମ୍ବା, ପେକେଜିଙ୍ଗ ସାମଗ୍ରୀ ଓ ରବର ପାଇଁ କମ ଶୁଳ୍କ ବିଷୟ ନେଇ କହିଛନ୍ତି |

ଚାହିଦା ବୃଦ୍ଧି ପାଇବା ପରେ ଭାରତୀୟ ସାମଗ୍ରୀ ଉତ୍ପାଦନକାରୀ ମାନେ ଜାନୁଆରୀରେ ଉତ୍ପାଦନ ବଢାଇଦେଇଥିଲେ | ବିଗତ ସାଢେ ସାତ ବର୍ଷରେ ଅଭବୃଦ୍ଧି ହାର ସଶକ୍ତ ରହିଥିବା କଥା ପିଏମଆଇ ଡାଟା ସୁଚାଇଛି | କମ୍ପାନୀ ଗୁଡିକ ବାଧ୍ୟତାକୁ ସମ୍ମିଳିତ କରିବା ପାଇଁ ସାମଗ୍ରୀ ସୁଚିର ପ୍ରୟୋଗ କରିବା ଆରମ୍ଭ କରିଦେଇଛନ୍ତି ଯଦ୍ୱାରା ପ୍ରସ୍ତୁତ ସାମଗ୍ରୀ ସୁଚିରେ ହ୍ରାସ ଘଟିଛି | ଭାରତର ବିନିର୍ମାଣ କ୍ଷେତ୍ରରେ ନୂତନ ସର୍ବେକ୍ଷଣ ଫଳାଫଳ ଉପରେ ମନ୍ତବ୍ୟ ପ୍ରଦାନ କରି ଆଇଏଚଏସ ମାର୍କେଟର ମୁଖ୍ୟ ଅର୍ଥନୀତିଜ୍ଞ ପୋଲିଆନ୍ନା ଦେ ଲିମା କହିଛନ୍ତି “ପିଏମଆଇର ପରିଣାମରୁ ଜଣାପଡୁଛି ଯେ ବିକ୍ରି, ଇନ୍ପୁଟ କ୍ରୟ, ଉତ୍ପାଦନ ଓ ରୋଜଗାର ଚାହିଦାରେ ଉଲ୍ଲେଖନୀୟ ପ୍ରକ୍ଷପ୍ତ ଯୋଗୁଁ ବିକାଶକୁ ପ୍ରୋତ୍ସାହନ ମିଳିଛି, କାରଣ କମ୍ପାନୀ ଗୁଡିକ ସାମଗ୍ରୀର ସୂଚୀର ପୁନଃନିର୍ମାଣ ତଥା କ୍ଷମତାରେ ବିସ୍ତାର ଓ ନୂତନ ବ୍ୟବସାୟ ବୃଦ୍ଧି କରିବା ଉପରେ ଅଧିକ ଧ୍ୟାନ ଦେଉଛନ୍ତି |

ସମ୍ପ୍ରତ୍ତି ଉପସ୍ଥାପିତ ସାଧାରଣ ବଜେଟ 2020-21 ରେ ମୌଳିକଢାଞ୍ଚା ବିକାଶ ଓ କୃଷି ଜନିତ ଉତ୍ପାଦ କ୍ଷେତ୍ରରେ ନିବେଶ ବୃଦ୍ଧି କରିବା ଉପରେ ପ୍ରାଧାନ୍ଯ ଦିଆଯାଇଛି | ଭିତ୍ତିଭୂମି ବିକାଶ ଓ କୃଷି ଉତ୍ପାଦ ପ୍ରମୁଖ ବିନିର୍ମାଣ କ୍ଷେତ୍ର ହୋଇଥିବାରୁ ଅର୍ଥନୀତି ଉପରେ ଏହାର ଅଧିକ ପ୍ରଭାବ ପଡିବ ବୋଲି ଅର୍ଥନୀତିଜ୍ଞ ମାନେ ମତ ଦେଇଛନ୍ତି |

ତେଣେ ଭାରତୀୟ ଅର୍ଥନୀତି ମାନ୍ଦାବସ୍ଥା ଦେଇ ଗତି କରୁନାହିଁ ବୋଲି ଆନ୍ତର୍ଜାତୀୟ ମୁଦ୍ରାପାଣ୍ଠିର ପରିଚାଳନା ନିର୍ଦ୍ଦେଶକ କ୍ରିଷ୍ଟାଲିନା ଜର୍ଜିଏଭା ସ୍ପଷ୍ଟ କରିସାରିଛନ୍ତି |ସେ କହିଥିଲେ ଯେ ଗତ ବର୍ଷ ଭାରତୀୟ ଅର୍ଥନୀତି ଧିମେଇ ଯାଇଥିଲା ଏବଂ ଆଇଏମଏଫ ଦ୍ଵାରା ଅଭିବୃଦ୍ଧି ଆକଳନର ପୁନଃନିରୀକ୍ଷଣ କରାଯାଇଥିଲା | ବୈଶ୍ଵିକ ମାନ୍ଦାବସ୍ଥା ସତ୍ତ୍ୱେ 2020 ରେ ଅଭିବୃଦ୍ଧି ହାର ଶତକଡା 5.8 ଭାଗ ଓ 2021ରେ ଏହା 6.5 ଭାଗ ରହିବ ବୋଲି ଆଇଏମଏଫ ପକ୍ଷରୁ ଆକଳନ କରାଯାଇଛି | ଭାରତ ପକ୍ଷରୁ ଗ୍ରହଣ କରାଯାଇଥିବା ବିଭିନ୍ନ ସଂସ୍କାରମୂଳକ ପଦକ୍ଷେପ ଭବିଷ୍ୟତରେ ଦେଶ ପାଇଁ ହିତକାରୀ ହେବ ବୋଲି ଆଇଏମଏଫ ମୁଖ୍ୟ ମତବ୍ୟକ୍ତ କରିଛନ୍ତି |

ମୂଳ ଲେଖା : ଆଦିତ୍ୟ ରାଜ ଦାସ, ବରିଷ୍ଠ ଅର୍ଥନୈତିକ ସାମ୍ବାଦିକ

ଅନୁବାଦ : ରୀତା ଯୋଶୀ