କୋଭିଡ -19 ର ମୁକାବିଲା କରୁଛି ଭାରତ

ସମଗ୍ର ବିଶ୍ଵରେ କରୋନାଭାଇରସ ମହାମାରୀ ସଂକ୍ରମଣ ଜାରି ରହିଥିବା ବେଳେ ଭାରତରେ ମଧ୍ୟ ଏହି ମହାମାରୀର ସଂକ୍ରମଣ ବ୍ୟାପିବାରେ ଲାଗିଛି | 2019 ଶେଷ ବେଳକୁ ଚୀନରେ ଏହି ଭାଇରସ ଚିହ୍ନଟ ହେବା ପରଠୁ ଭାରତର ବୈଜ୍ଞାନିକ ଓ ଭେଷଜ ସମ୍ପ୍ରଦାୟ ଏହି ଭାଇରସ ଉପରେ ପୁଙ୍ଖାନୁପୁଙ୍ଖ ଭାବେ ଅଧ୍ୟୟନ କରୁଛନ୍ତି |

ଚଳିତ ବର୍ଷ ଜାନୁଆରୀରେ କେରଳରେ ଜଣେ ବିଦେଶ ଫେରନ୍ତା ବ୍ୟକ୍ତିଙ୍କ ଠାରେ ପ୍ରଥମ କାରୋନାଭାଇରସ ମାମଲା ଜଣା ପଡିଥିଲା | ସେହି ଦିନଠାରୁ ଭାରତ ଅନେକ ନିର୍ଦ୍ଦେଶାବଳୀ ଜାରି କରିଛି ଓ ଏହାକୁ ବହୁ ଦେଶରେ ଅନୁକରଣ କରାଯାଉଛି |

କାରୋନାଭାଇରସ ସଂକ୍ରମଣ ବ୍ୟାପୁଥିବା ବେଳେ ଅନେକ ବିକଶିତ ଦେଶ ଏହି ପ୍ରଳୟଙ୍କାରୀ ମହାମାରୀର ସମ୍ମୁଖୀନ ହୋଇଛନ୍ତି | ଗରିବ ଦେଶ ମାନଙ୍କ ଲାଗି ଏହା ଏକ ବଡ ଆହ୍ଵାନ ସଦୃଶ ହୋଇଛି | ଭାରତ ଏକ ବିକାଶଶୀଳ ଦେଶ ଭାବେ ଏହି ମହାମାରୀର ର ମୁକାବିଲା ଲାଗି ନିଜର ନୀତି ପ୍ରସ୍ତୁତ କରି ସବୁ ମନ୍ତେ ପ୍ରୟାସ ଜାରି ରଖିଛି |

ଗତ ମାର୍ଚ୍ଚ ମାସ ପହିଲାରୁ ଭାରତ, ବିଦେଶରେ ଅଟକ ଥିବା ନାଗରିକ ମାନଙ୍କୁ ସ୍ଥାନାନ୍ତରିତ କରିବାକୁ ନିଷ୍ପତ୍ତି ନେଇଥିଲା | ଏହି ନାଗରିକ ମାନେ ଭାରତକୁ ପ୍ରତ୍ୟାବର୍ତ୍ତନ କରିବା ପରେ ସେମାନଙ୍କୁ 14 ଦିନ ଲାଗି ଏକାନ୍ତବାସରେ ରଖାଯିବା ପରେ ଘରକୁ ଯିବାକୁ ଅନୁମତି ଦିଆଯାଉଥିଲା |

ପ୍ରଧାନମନ୍ତ୍ରୀଙ୍କ ଅନୁରୋଧ କ୍ରମେ ଗତ ମାସ 22 ତାରିଖରେ ଦେଶବ୍ୟାପୀ ଏକ ଦିନିକିଆ କରଫ୍ୟୁ ପାଳନ କରାଯାଇଥିଲା ଓ କାରୋନା ଯୋଦ୍ଧା ମାନଙ୍କୁ କୃତଜ୍ଞତା ଜ୍ଞାପନ କରାଯାଇଥିଲା |

ତେବେ ଏହି ମହାମାରୀର ସଂକ୍ରମଣକୁ ରୋକିବା ପାଇଁ ଗତ ମାସ 25 ତାରିଖରୁ ତିନି ସପ୍ତାହ ଲାଗି ଦେଶରେ ଲକଡାଉନ ଲାଗୁ କରାଯାଇଥିଲା | ଏହା ବହୁମାତ୍ରାରେ ସଫଳ ହୋଇଥିବାର ପରିଲକ୍ଷିତ ହୋଇଛି | ହେଲେ ଏକ ଧାର୍ମିକ ଅନୁଷ୍ଠାନରେ ଥିବା ଏକ ବେଆଇନ ଜନସମାଗମ ଯୋଗୁଁ କେତୋଟି କରୋନା ପ୍ରବଣ ଅଞ୍ଚଳ ଉଭା ହୋଇଛି | କିନ୍ତୁ ଏହି ଧାର୍ମିକ ସମାଗମରେ ଉପସ୍ଥିତ ଥିବା ଲୋକମାନଙ୍କୁ ଅନୁସନ୍ଧାନ, ପରୀକ୍ଷା ଓ ପୃଥକୀକରଣ ଲାଗି ବହୁ ପଦକ୍ଷେପ ନିଆଯାଇଛି |ଏମାନଙ୍କ ମଧ୍ୟରୁ କୋଭିଡ-19 ପଜିଟିଭ ଥିବା ବ୍ୟକ୍ତି ମାନଙ୍କୁ ବିଭିନ୍ନ ହାସପାତାଳରେ ଚିକିତ୍ସା କରାଯାଉଛି |

ଏହି ମହାବିପତ୍ତି ସମୟରେ ଦେଶର ଗରିବ ତଥା ବାସହରା ଲୋକମାନଙ୍କୁ ସବୁ ପ୍ରକାରର ସହାୟତା ପ୍ରଦାନ କରାଯାଉଛି | ସରକାର, ଗରିବ ଓ ଦିନ ମଜୁରିଆ ମାନଙ୍କ ଲାଗି 1.7 ଲକ୍ଷ କୋଟି ଟଙ୍କା ଘୋଷଣା କରିଥିବା ବେଳେ ପ୍ରବାସୀ ଶ୍ରମିକ ମାନଙ୍କୁ ଖାଦ୍ୟ ଓ ଆଶ୍ରୟ ଯୋଗାଇବା ପାଇଁ ହଜାର ହଜାର ସଂଖ୍ୟାରେ ଆଶ୍ରୟସ୍ଥଳୀ ନିର୍ମାଣ କରାଯାଇଛି |

ଏହି ଘଡିସନ୍ଧି ମୁହୂର୍ତ୍ତରେ ଭାରତ, ପଡୋଶୀ ରାଷ୍ଟ୍ର ମାନଙ୍କୁ ସାହାଯ୍ୟ କରିବାକୁ ନିର୍ଣ୍ଣୟ ନେଇ ଏହି ମହାମାରୀ ବିରୁଦ୍ଧରେ ସଂଗ୍ରାମ ଲାଗି ସ୍ଥାପିତ ଏକ ସାର୍କ ପାଣ୍ଠିରେ 10 ନିୟୁତ ଡଲାର ଦାନ କରିଛି | ଭାରତ ମଧ୍ୟ ବିଦେଶୀ ନାଗରିକ ମାନଙ୍କୁ ସ୍ଵତନ୍ତ୍ର ବିମାନ ଯୋଗେ ସେମାନଙ୍କ ଦେଶକୁ ପଠାଇ ଦେଇଛି | ଆମେରିକା, ବ୍ରିଟେନ, ନେପାଳ, ମାଳଦ୍ଵୀପ ଏବଂ ଶ୍ରୀଲଙ୍କାକୁ ଚିକିତ୍ସା ପାଇଁ ଔଷଧ ପତ୍ର ରପ୍ତାନି କରିବାକୁ ମଧ୍ୟ ଭାରତ ନିଷ୍ପତ୍ତି ନେଇଛି | ଏଥିସହିତ ମାଳଦ୍ଵୀପ ଓ ନେପାଲକୁ ଡାକ୍ତରୀ ଟିମ ମଧ୍ୟ ପଠାଯାଇଥିଲା |

କରୋନାଭାଇରସ ମହାମାରୀର ସଂପୂର୍ଣ୍ଣ ମୂଳପୋଛ ଲାଗି ଭାରତ ଅଙ୍ଗୀକାରବଦ୍ଧ | ଏହି ମହାମାରୀ ଯୋଗୁଁ ଆର୍ଥିକ ଦୂରାବସ୍ଥା ହୋଇପାରେ କିନ୍ତୁ ଦେଶବାସୀଙ୍କ ସ୍ୱାସ୍ଥ୍ୟ ହେଉଛି ସର୍ବୋଚ୍ଚ ପ୍ରାଥମିକତା ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି | ବର୍ତ୍ତମାନର ସଙ୍କଟଜନକ ପରିସ୍ଥିତିରେ ଭାରତ, ବିଶ୍ଵ ପଟଳରେ ଏକ ଆଦର୍ଶ ଭାବେ ପ୍ରଶଂସାର ପାତ୍ର ହୋଇଛି ଓ ଅନ୍ୟ ଦେଶ ପାଇଁ ଅନୁକରଣୀୟ ହୋଇଛି |

ଭାରତ ନିଶ୍ଚିତ ରୂପରେ ଏହି ମହାମାରୀ ବିରୁଦ୍ଧରେ ଲଢେଇରେ ବିଜୟଲାଭ କରିବ |

ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ

ଅନୁବାଦ : ରୀତା ଯୋଶୀ