କୋଭିଡ-19 ମହାମାରୀ ବିରୁଦ୍ଧରେ ସଂଗ୍ରାମ ଲାଗି ଭାରତର ବୈଶ୍ଵିକ ସମ୍ପର୍କ ଜାରିରହିଛି

କୋଭିଡ-19 ମହାମାରୀ ଦୃଷ୍ଟିରୁ ଭାରତ ତୃତୀୟ ପର୍ଯ୍ୟାୟ ଲକଡାଉନରେ ପ୍ରବେଶ କରିଥିବା ବେଳେ ଦେଶ ବାହ୍ୟ ରାଷ୍ଟ୍ର ଗୁଡିକ ପ୍ରତି ମଧ୍ୟ ଯଥେଷ୍ଠ ଧ୍ୟାନ ଦେଉଛି | ଭାରତ କେବଳ କରୋନା ଭାଇରସର ମୂଳପୋଛ ଲାଗି ପ୍ରତିଶୃତିବଦ୍ଧ ନୁହେଁ ବରଂ ସମଗ୍ର ବିଶ୍ଵକୁ ସାହାଯ୍ୟ ସହଯୋଗ ଲାଗି ସଦା ସର୍ବଦା ପ୍ରସ୍ତୁତ ରହିଛି |

ଭାରତ ଏହାର ନିକଟ ପଡୋଶୀ ରାଷ୍ଟ୍ର ଗୁଡିକ ସହ ସମନ୍ଵୟ ଜାରୀ ରଖିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମହାମାରୀ ଯୋଗୁଁ ବର୍ତ୍ତମାନ ଉଭା ହୋଇଥିବା ପରିସ୍ଥିତି ନେଇ ବାଙ୍ଗଲାଦେଶ ପ୍ରଧାନମନ୍ତ୍ରୀ ଶେଖ ହାସିନାଙ୍କ ସହ ଟେଲିଫୋନ ଯୋଗେ କଥାବାର୍ତ୍ତା କରିଥିଲେ | ଏହି ମହାମାରୀକୁ ପ୍ରତିହତ କରିବା ପାଇଁ ଦୁଇ ଦେଶରେ ନିଆଯାଉଥିବା ପ୍ରତିକାରାତ୍ମକ ପଦକ୍ଷେପ ନେଇ ଉଭୟ ନେତା ପୁଙ୍ଖାନୁପୁଙ୍ଖ ଆଲୋଚନା କରିଥିଲେ |ଏହି ଆଲୋଚନା ବେଳେ ଗତ ମାର୍ଚ୍ଚ ମାସରେ ଭିଡିଓ କନଫରେନ୍ସ ମାଧ୍ୟମରେ ସାର୍କ ନେତା ମାନଙ୍କ ବୈଠକ ସମୟରେ ସହମତ ହୋଇଥିବା ସ୍ଵତନ୍ତ୍ର ବ୍ୟବସ୍ଥା ଗୁଡିକର କାର୍ଯ୍ୟକାରିତାରେ ପ୍ରଗତି ନେଇ ଦୁଇ ନେତା ଖୁସି ପ୍ରକଟ କରିଥିଲେ | ସାର୍କ କୋଭିଡ-19 ଜରୁରୀକାଳିନ ପାଣ୍ଠିକୁ 1.5 ନିୟୁତ ଡଲାର ଅବଦାନ ପାଇଁ ଶ୍ରୀ ମୋଦୀ ବାଙ୍ଗଲାଦେଶକୁ ଧନ୍ୟବାଦ ଜଣାଇଥିଲେ |

ବାଙ୍ଗଲାଦେଶରେ ଏହି ମହାମାରୀ ବିରୁଦ୍ଧରେ ସଂଗ୍ରାମ ଲାଗି ସହାୟତା ଯୋଗାଇବା ଓ କୋଭିଡ-19 ଲଢେଇ ଲାଗି ସମନ୍ଵୟ କ୍ଷେତ୍ରରେ ନେତୃତ୍ଵ ନେଇଥିବା ଯୋଗୁଁ ପ୍ରଧାନମନ୍ତ୍ରୀ ହାସିନା ଭାରତର ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି | ଚେନ୍ନାଇ ଓ କୋଲକାତାରେ ଅଟକ ଥିବା ବାଙ୍ଗଲାଦେଶୀ ନାଗରିକଙ୍କୁ ସ୍ଥାନାନ୍ତରିତ କରିବାରେ ମଧ୍ୟ ଭାରତ ସହାୟତା କରିଥିଲା |ସଡକ ପଥ, ରେଳ ପଥ, ଆକାଶ ପଥ ଓ ଆଭ୍ଯନ୍ତରୀଣ ଜଳପଥ ଦେଇ ସୀମାରେ ଅତ୍ୟାବଶ୍ୟକୀୟ ସାମଗ୍ରୀର ଯୋଗାଣ ଜାରୀ ରହିଥିବା ଯୋଗୁଁ ଉଭୟ ନେତା ସନ୍ତୋଷ ବ୍ୟକ୍ତ କରିଛନ୍ତି | କୋଭିଡ-19 ସଂକ୍ରମଣକୁ ରୋକିବା ଓ ଏହି ମହାମାରୀ ଯୋଗୁଁ ସ୍ୱାସ୍ଥ୍ୟ ଜନିତ ଓ ଅର୍ଥନୈତିକ ପ୍ରଭାବକୁ ହ୍ରାସ କରିବାରେ ବାଙ୍ଗଲାଦେଶକୁ ସବୁମନ୍ତେ ସାହାଯ୍ୟ କରିବା ଲାଗି ଭାରତ ପ୍ରସ୍ତୁତ ଅଛି ବୋଲି ଶ୍ରୀ ମୋଦୀ, ବାଙ୍ଗଲାଦେଶ ପ୍ରଧାନମନ୍ତ୍ରୀଙ୍କୁ ଆଶ୍ଵାସନା ଦେଇଛନ୍ତି | ପ୍ରଧାନମନ୍ତ୍ରୀ ଶ୍ରୀ ମୋଦୀ, ପବିତ୍ର ରମଜାନ ମାସରେ ବାଙ୍ଗଲାଦେଶର ନାଗରିକ ମାନଙ୍କୁ ଶୁଭେଚ୍ଛା ଜଣାଇଛନ୍ତି ଓ ଏହି ଘଡିସନ୍ଧି ମୁହୂର୍ତ୍ତରେ ଭାରତ ସେମାନଙ୍କ ସହ ରହିଛି ବୋଲି ନିଶ୍ଚିତ କରିଛନ୍ତି |


ଶ୍ରୀ ମୋଦୀ, ମିଆଁମାର ର ରାଜ୍ୟ ପରାମର୍ଶଦାତା ସୁଶ୍ରୀ ଅଙ୍ଗ ସାନ ସୁ କିଙ୍କ ସହ ମଧ୍ୟ କଥାବାର୍ତ୍ତା କରି କୋଭିଡ ମହାମାରୀ ଯୋଗୁଁ ଘରୋଇ ଓ ଆଞ୍ଚଳିକ କ୍ଷେତ୍ରରେ ଉପୁଜିଥିବା ପରିସ୍ଥିତି ନେଇ ଆଲୋଚନା କରିବା ସହ ଏହି ମହାମାରୀକୁ କାବୁ କରିବା ଲାଗି ପରସ୍ପରର ଦେଶରେ ଗ୍ରହଣ କରାଯାଉଥିବା ପଦକ୍ଷେପ ବିଷୟରେ ମତ ବିନିମୟ କରି ଏନେଇ ବ୍ୟାପକ ଆଲୋଚନା କରିଛନ୍ତି |ଭାରତର ‘ପଡୋଶୀ ପ୍ରଥମ ନୀତି’ ର ଏକ ଗୁରୁତ୍ୱପୂର୍ଣ୍ଣ ସ୍ତମ୍ଭ ଭାବେ ମିଆଁମାରର ମହତ୍ତ୍ଵ କୁ ପ୍ରତିପାଦନ କରି ପ୍ରଧାନମନ୍ତ୍ରୀ ଶ୍ରୀ ମୋଦୀ, ମିଆଁମାରରେ କୋଭିଡ-19 ମହାମାରୀର ପ୍ରଭାବକୁ ହ୍ରାସ କରିବା ପାଇଁ ସବୁ ପ୍ରକାରର ସହାୟତା ଯୋଗାଇବାକୁ ସୁଶ୍ରୀ ସୁ କୀଙ୍କୁ ପ୍ରତିଶୃତି ଦେଇଥିଲେ |

ଶ୍ରୀ ମୋଦୀ ମଧ୍ୟ ଭାରତରେ ଥିବା ମିଆଁମାରର ନାଗରିକ ମାନଙ୍କୁ ସବୁ ସମ୍ଭାବ୍ୟ ସହାୟତା ଯୋଗାଇବାକୁ ଆଶ୍ଵାସନା ଦେଇଛନ୍ତି | ମିଆଁମାରରେ ଭାରତୀୟ ନାଗରିକ ମାନଙ୍କୁ ସହାୟତା ପ୍ରଦାନ କରାଯାଉଥିବାରୁ ସେ ସୁଶ୍ରୀ ସୁ କୀଙ୍କୁ ଧନ୍ୟବାଦ ଜଣାଇଛନ୍ତି | କୋଭିଡ-19 ଯୋଗୁଁ ଉଭା ହୋଇଥିବା ଚାଲେଞ୍ଜର ମୁକାବିଲା କରିବା ପାଇଁ ରୀତିମତ ଯୋଗାଯୋଗ କରିବା ସହ ମିଳିମିଶି କାର୍ଯ୍ୟ କରିବାକୁ ଦୁଇ ନେତା ରାଜି ହୋଇଛନ୍ତି |

ପ୍ରଧାନମନ୍ତ୍ରୀ ଶ୍ରୀ ମୋଦୀ ଥାଇଲାଣ୍ଡର ପ୍ରଧାନମନ୍ତ୍ରୀ ଜେନେରାଲ ପ୍ରାୟୁତ ଚାନ ଓ ଚା ଙ୍କ ସହ ଟେଲିଫୋନ ଯୋଗେ କଥାବାର୍ତ୍ତା କରି, ଆସିଆନ ଓ ତତ ସଙ୍କ୍ରାନ୍ତୀୟ ସମ୍ମିଳନୀରେ ଯୋଗ ଦେବା ଲାଗି 2019 ନଭେମ୍ବର ରେ ତାଙ୍କ ବ୍ୟାଙ୍କକ ଗସ୍ତକୁ ସ୍ମରଣ କରାଇଥିଲେ | ସେ ଥାଇ ରାଜକୀୟ ପରିବାରର ସଦସ୍ୟ ତଥା ଥାଇ ଲୋକଙ୍କୁ ଆନ୍ତରିକ ଶୁଭେଚ୍ଛା ଜଣାଇଥିଲେ | କୋଭିଡ ମହାମାରୀର ମୁକାବିଲା ଲାଗି ଦୁଇ ଦେଶରେ କଣ ସବୁ ପଦକ୍ଷେପ ନିଆଯାଉଛି ମୁଖ୍ଯତଃ ସେ ବିଷୟ ନେଇ ଦୁଇ ନେତା ପରସ୍ପର ମଧ୍ୟରେ ମତ ଆଦାନ ପ୍ରଦାନ କରିଥିଲେ |

ଏହି ମହାମାରୀ ବିରୁଦ୍ଧରେ ଫଳପ୍ରଦର ସହ ମୁକାବିଲା କରିବା ପାଇଁ ଆଞ୍ଚଳିକ ଓ ବିଶ୍ଵ ସ୍ତରରେ ସହଯୋଗ ସ୍ଥାପନା ର ଆବଶ୍ୟକତା ଉପରେ ପ୍ରଧାନମନ୍ତ୍ରୀ ମୁଖ୍ଯତଃ ଜୋର ଦେଇ କହିଥିଲେ | ଶ୍ରୀ ମୋଦୀ, ଥାଇଲାଣ୍ଡର ଫାର୍ମାସିୟୁଟିକାଲ ଆବଶ୍ୟକତା ପରିପୂରଣ ଲାଗି ସହଯୋଗ କରିବା ନେଇ ଭାରତର ପ୍ରତିଶୃତିବଦ୍ଧତା ବିଷୟ ଦୋହୋରାଇଥିଲେ | ଦୁଇ ଦେଶ ର ଗବେଷକ, ବୈଜ୍ଞାନିକ ଓ ଉଦ୍ଭାବକ ମାନଙ୍କ ମଧ୍ୟରେ ଅଧିକରୁ ଅଧିକ ସହଯୋଗ ସ୍ଥାପନ ଲାଗି ମଧ୍ୟ ଉଭୟ ନେତା ସହମତି ପ୍ରକାଶ କରିଥିଲେ | ପରସ୍ପରର ଅଞ୍ଚଳରେ ଥିବା ସେମାନଙ୍କ ନାଗରିକ ମାନଙ୍କୁ ଦିଆଯାଉଥିବା ସୁବିଧା ସୁଯୋଗକୁ ଦୁଇ ନେତା ଉଚ୍ଚ ପ୍ରଶଂସା କରିବା ସହ ଭବିଷ୍ୟତରେ ମଧ୍ୟ ଏପରି ସମର୍ଥନ ଜାରୀ ରଖିବାକୁ ଉଭୟେ ପ୍ରତିଶୃତି ଦେଇଥିଲେ |

ଦୁଇ ଦେଶ ମଧ୍ୟରେ ଜାତିଗତ ଓ ପ୍ରାଚୀନ ସାଂସ୍କୃତିକ ଯୋଗାଯୋଗ ସମ୍ପର୍କ ସହ ଭାରତର ବିସ୍ତାରିତ ପଡୋଶୀ ରାଷ୍ଟ୍ର ମଧ୍ୟରେ ଥାଇଲାଣ୍ଡ ହେଉଛି ଏକ ଗୁରୁତ୍ୱପୂର୍ଣ୍ଣ ସାମୁଦ୍ରିକ ସହଯୋଗୀ ରାଷ୍ଟ୍ର |

ଆଞ୍ଚଳିକ ଓ ବିସ୍ତାରିତ ପଡୋଶୀ ରାଷ୍ଟ୍ର ସ୍ତରରେ ଭାରତ, ବର୍ତ୍ତମାନ ଉଭା ହୋଇଥିବା ସଙ୍କଟଜନକ ସମୟରେ ସବୁ ସହଯୋଗୀ ରାଷ୍ଟ୍ର ମାନଙ୍କୁ ସହାୟତାର ହାତ ବଢାଇଛି | ଭାରତ ବହୁ ଦେଶକୁ ବିଶେଷଜ୍ଞ ଟିମ ପଠାଇବା ସହ ବହୁ ମାତ୍ରାରେ ଚିକିତ୍ସା ସାମଗ୍ରୀ ମଧ୍ୟ ଯୋଗାଇଛି | ଏପରିକି ଭାରତରେ ଅଟକ ରହିଥିବା ବିଦେଶୀ ନାଗରିକ ମାନଙ୍କୁ ସ୍ଵଦେଶ ପ୍ରତ୍ୟାବର୍ତ୍ତନ କରିବାରେ ମଧ୍ୟ ସହାୟତା କରିଛି |

କରୋନାଭାଇରସ ମହାମାରୀ ବିଶ୍ୱବ୍ୟାପି କାୟା ବିସ୍ତାର କରି ଚାଲିଥିବା ସମୟରେ ବିଭିନ୍ନ ଦେଶକୁ ଭାରତର ଅବିଶ୍ରାନ୍ତ ସହଯୋଗକୁ ବିଶ୍ଵ ସମୁଦାୟ ପକ୍ଷରୁ ଭୂୟସୀ ପ୍ରଶଂସା କରାଯାଇଛି | ଏହି ମହାମାରୀ ବିରୁଦ୍ଧରେ ସଂଗ୍ରାମ ଲାଗି ଭାରତର ନିଃସ୍ଵାର୍ଥପର ଅବଦାନ, କରୋନା ପରବର୍ତ୍ତୀ ସମୟରେ, ନିଶ୍ଚିତ ରୂପରେ ଏହାକୁ ଏକ ଦୃଢ ବିଶ୍ଵସନୀୟ ସ୍ଥିତିରେ ପହଞ୍ଚାଇବ କହିଲେ ଅତ୍ଯୁକ୍ତି ହେବ ନାହିଁ |
ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ