ଅର୍ଥବ୍ୟବସ୍ଥାରେ ସୁଧାର ପରିଲକ୍ଷିତ ହେଉଛି : ପ୍ରଧାନମନ୍ତ୍ରୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରାଜ୍ୟ ମୁଖ୍ୟମନ୍ତ୍ରୀ ଓ କେନ୍ଦ୍ର ଶାସିତ ଅଞ୍ଚଳର ଉପରାଜ୍ୟପାଳଙ୍କ ସହ ଭିଡିଓ କନଫରେନ୍ସ ଜରିଆରେ ଅନଲକ 1 ପରେ ଦେଶର ସ୍ଥିତି ଓ କୋଭିଡ-19 ମହାମାରୀର ମୁକାବିଲା ଲାଗି ଆଗକୁ ନେବାକୁ ଥିବା ପଦକ୍ଷେପ ସଙ୍କ୍ରାନ୍ତରେ ପୁଙ୍ଖାନୁପୁଙ୍ଖ ଆଲୋଚନା କରିଛନ୍ତି | ମୁଖ୍ୟମନ୍ତ୍ରୀ ମାନଙ୍କ ସହ ପ୍ରଧାନମନ୍ତ୍ରୀଙ୍କ ଏହା ହେଉଛି ଷଷ୍ଠ ବୈଠକ | ଏହା ପୂର୍ବରୁ ମାର୍ଚ୍ଚ 20, ଅପ୍ରେଲ 2, 11, 27 ତାରିଖ ଓ ମେ 11 ତାରିଖରେ ବୈଠକ ବସିଥିଲା |

ପ୍ରଧାନମନ୍ତ୍ରୀ କହିଛନ୍ତି ଯେ ମହାମାରୀ ବିରୁଦ୍ଧରେ ସଂଗ୍ରାମ ଲାଗି ସମୟାନୁଯାୟୀ ନିଆଯାଇଥିବା ଫଳପ୍ରଦ ପଦକ୍ଷେପ ଦେଶରେ ଏହାର ସଂକ୍ରମଣକୁ ରୋକିପାରିଛି | ଯେତେବେଳେ ଆମେ ଅତୀତକୁ ଚାହିଁବା ଲୋକ ମାନେ ସ୍ମରଣ କରିବେ ଯେ ବିଶ୍ଵ ପାଇଁ ଆମେ ସହଯୋଗୀ ସଙ୍ଘିୟତାର ଏକ ଜ୍ଵଳନ୍ତ ଉଦାହରଣ ଉପସ୍ଥାପନ କରିଛୁ |ପ୍ରଧାନମନ୍ତ୍ରୀ କହିଛନ୍ତି ଆମେ ପ୍ରତି ଟି ଜୀବନ ରକ୍ଷା ଲାଗି ପ୍ରାଣପଣେ ଉଦ୍ୟମ କରୁଛୁ | ସେ କହିଛନ୍ତି ପରିବହନର ସବୁ ସେବା ବର୍ତ୍ତମାନ ଖୋଲାଯାଇଛି, ଲକ୍ଷ ଲକ୍ଷ ପ୍ରବାସୀ ଶ୍ରମିକ ଘର ବାହୁଡା କରିଥିବା ବେଳେ ହଜାର ହଜାର ଭାରତୀୟ ବିଦେଶରୁ ଫେରିଛନ୍ତି | ଭାରତର ଜନସଂଖ୍ୟା ବହୁତ ଅଧିକ ହୋଇଥିଲେ ମଧ୍ୟ ଅନ୍ୟ ଦେଶ ଭଳି ଆମ ଦେଶରେ କାରୋନା ଭାଇରସ ଜୀବନ ପ୍ରତି ସେତେଟା ବିପଦ ସୃଷ୍ଟି କରିନାହିଁ | ବର୍ତ୍ତମାନ ଦେଶର ଆରୋଗ୍ୟ ହାର 50 ପ୍ରତିଶତ ଟପିଛି ବୋଲି ଦର୍ଶାଇ ସମଗ୍ର ବିଶ୍ଵର ସ୍ୱାସ୍ଥ୍ୟ ବିଶେଷଜ୍ଞ ମାନେ ଭାରତୀୟ ମାନଙ୍କ ଦ୍ଵାରା ଗ୍ରହଣ କରାଯାଉଥିବା ଅନୁପାଳନର ଉଚ୍ଚ ପ୍ରଶଂସା କରୁଛନ୍ତି ବୋଲି ସେ ଜଣାଇଛନ୍ତି | କାରୋନା ଭାଇରସ ଯୋଗୁଁ ସ୍ୱଳ୍ପ ମୃତ୍ଯୁ ହୋଇଥିବା ଦେଶ ମଧ୍ୟରେ ଭାରତ ରହିଛି ବୋଲି ମଧ୍ୟ ସେ କହିଛନ୍ତି |

ପ୍ରଧାନମନ୍ତ୍ରୀ କହିଛନ୍ତି ଯେ ଆମେ ଯଦି ସବୁ ନିୟମ ଗୁଡିକୁ କଡାକଡି ଭାବେ ପାଳନ କରି ଶୃଙ୍ଖଳିତ ଜୀବନ ଯାପନ କରିବା ତେବେ କରୋନାଭାଇରସ ଆମର କିଛି କ୍ଷତି କରିପାରିବ ନାହିଁ | ସେ , ‘ଦୁଇ ଗଜ ଦୂରତା’ର ମନ୍ତ୍ର ଅନୁକରଣ କରିବା ସହ ମାସ୍କ ପିନ୍ଧିବା, ସାବୁନରେ ହାତ ଧୋଇବା ଓ ସାନିଟାଇଜର ବ୍ୟବହାର କରିବା ଆଦି ଉପରେ ଗୁରୁତ୍ଵାରୋପ କରିଛନ୍ତି | ସେ କହିଛନ୍ତି ଯେ କିଛି ସପ୍ତାହ ଧରି ନିଆଯାଇଥିବା ବିଭିନ୍ନ ପଦକ୍ଷେପ ଯୋଗୁଁ ଦେଶର ଅର୍ଥ ବ୍ୟବସ୍ଥାରେ ସବୁଜ ସଂକେତ ଦେଖିବାକୁ ମିଳିଛି | ସେ ଆହୁରି କହିଛନ୍ତି ଗତ ବର୍ଷ ତୁଳନାରେ ଖରିଫ ଚାଷ ବୃଦ୍ଧି ପାଇଛି , ଦୁଇ ଚକିଆ ଯାନର ଉତ୍ପାଦନ ବୃଦ୍ଧି ପାଇଛି, ଖୁଚୁରା ବ୍ୟବସାୟ କ୍ଷେତ୍ରରେ ଡିଜିଟାଲ ଅର୍ଥ ପଇଠ ଲକଡାଉନ ପୂର୍ବ ସ୍ଥିତିରେ ପହଞ୍ଚିଛି ଓ ଗତ ମାସରେ ଟୋଲ ଆଦାୟ ବୃଦ୍ଧି ପାଇବା ସହ ରପ୍ତାନୀରେ ମଧ୍ୟ ଉନ୍ନତି ପରିଲକ୍ଷିତ ହୋଇଛି | ଏହି ସବୁ ସଂକେତ ଆମକୁ ଆଗକୁ ବଢିବାକୁ ଉତ୍ସାହିତ କରୁଛି ବୋଲି ପ୍ରଧାନମନ୍ତ୍ରୀ ଜଣାଇଛନ୍ତି |


ଶ୍ରୀ ମୋଦୀ କହିଛନ୍ତି ଆତ୍ମନିର୍ଭର ଭାରତ ଅଭିଯାନ ଅଧୀନରେ କୃଷି, ଉଦ୍ୟାନକୃଷି, ମତ୍ସ୍ୟଚାଷ ଓ ଏମଏସଏମଇ ଉପରେ ଯଥେଷ୍ଟ ଗୁରୁତ୍ଵ ଦିଆଯାଇଛି | ସମ୍ପୃକ୍ତ ଉଦ୍ୟୋଗ ଗୁଡିକୁ ଯଥାଶୀଘ୍ର ଋଣ ପ୍ରଦାନ କରାଗଲେ ନିଯୁକ୍ତି ସୁଯୋଗ ନିଶ୍ଚିତ କରାଯାଇପାରିବ | ବାଣିଜ୍ୟ ଓ ଉଦ୍ୟୋଗ କ୍ଷେତ୍ରରେ ମିଳିମିଶି କାର୍ଯ୍ୟ କରିବାର ମହତ୍ଵ ବିଷୟରେ ସେ ବର୍ଣ୍ଣନା କରିଛନ୍ତି | ଅର୍ଥନୈତିକ କାର୍ଯ୍ୟକଳାପ ତ୍ୱରାନ୍ୱିତ ଲାଗି ରାଜ୍ୟ ଗୁଡିକ ଅହରହ କାର୍ଯ୍ୟ କରିବା ଉଚିତ ବୋଲି ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି |



ଦୁଇଦିନିଆ ବୈଠକର ପ୍ରଥମ ଦିନରେ ପ୍ରଧାନମନ୍ତ୍ରୀ ଏକଥା କହିଛନ୍ତି | ଏହି ବୈଠକରେ ପଞ୍ଜାବ, ଆସାମ, କେରଳ, ଉତ୍ତରାଖଣ୍ଡ, ଝାଡଖଣ୍ଡ, ଛତିଶଗଡ, ତ୍ରିପୁରା, ହିମାଚଳପ୍ରଦେଶ, ଚଣ୍ଡିଗଡ, ଗୋଆ, ମଣିପୁର,

ନାଗାଲାଣ୍ଡ, ଲଦାଖ, ପୁଦ୍ଦୁଚେରି, ଅରୁଣାଚଳ ପ୍ରଦେଶ, ମେଘାଳୟ, ମିଜୋରାମ, ଆଣ୍ଡାମାନ ଓ ନିକୋବର ଦ୍ବୀପପୁଞ୍ଜ, ଦାଦ୍ରା ନଗର ହଭେଲି ଓ ଡାମାନ ଡିଉ , ସିକିମ ଓ ଲାକ୍ଷାଦ୍ଵୀପ ଆଦି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ମୁଖ୍ୟ ମାନେ ଯୋଗ ଦେଇଥିଲେ |



ମୁଖ୍ୟମନ୍ତ୍ରୀ ଓ ଉପ ରାଜ୍ୟପାଳ ମାନେ ବର୍ତ୍ତମାନର ଘଡିସନ୍ଧି ମୁହୂର୍ତ୍ତରେ ପ୍ରଧାନମନ୍ତ୍ରୀଙ୍କ ବଳିଷ୍ଠ ନେତୃତ୍ଵ ପାଇଁ ତାଙ୍କୁ ଧନ୍ୟବାଦ ଜଣେଇଥିଲେ | ଏହି ଅବସରରେ ସେମାନେ ନିଜ ରାଜ୍ୟରେ ଥିବା ସ୍ୱାସ୍ଥ୍ୟ ଜନିତ ଭିତ୍ତିଭୂମି ଓ କାରୋନା ଭାଇରସର ମୁକାବିଲା ପାଇଁ ନିଆଯାଉଥିବା ପଦକ୍ଷେପ ବିଷୟରେ ମତ ଆଦାନ ପ୍ରାଦାନ କରିଥିଲେ | ସେମାନେ ମଧ୍ୟ ରାଜ୍ୟରେ ଆରମ୍ଭ ହୋଇଥିବା ଅର୍ଥନୈତିକ କାର୍ଯ୍ୟକଳାପ, ଆରୋଗ୍ୟ ସେତୁ ଆପର ବ୍ଯବହାର, ଘର ବାହୁଡା କରିଥିବା ଶ୍ରମିକଙ୍କୁ ସହାୟତା ଯୋଗାଇବା ଓ ସେମାନଙ୍କ ଦ୍ଵାରା ପରିଚାଳିତ ସଚେତନତା ଅଭିଯାନ ବିଷୟରେ ବର୍ଣ୍ଣନା କରିଥିଲେ |

ଏହା ପୂର୍ବରୁ ଜୁନ 13 ତାରିଖରେ ପ୍ରଧାନମନ୍ତ୍ରୀ ବରିଷ୍ଠ ମନ୍ତ୍ରୀ ଓ ଅଧିକାରୀ ମାନଙ୍କ ସହ ବୈଠକ କରି ଦେଶର କୋଭିଡ-19 ମହାମାରୀ ସ୍ଥିତି ସମୀକ୍ଷା କରିଥିଲେ | ଦେଶର ବଡ ବଡ ସହରରେ କାରୋନା ମାମଲା ବୃଦ୍ଧି ପାଇ ମୋଟ କୋଭିଡ ମାମଲା ମଧ୍ୟରୁ ଦୁଇ ତୃତୀୟାନ୍ଶ ମାମଲା 5ଟି ରାଜ୍ୟରେ ରହିଥିବାର ଜଣାପଡିଛି |

ପ୍ରଧାନମନ୍ତ୍ରୀ, ସହର ଓ ଜିଲ୍ଲା ଅନୁଯାୟୀ ହସ୍ପିଟାଲ ବେଡ ଓ ଆଇସୋଲେସନ ବେଡର ଆବଶ୍ୟକତା ଉପରେ କ୍ଷମତାପର୍ଣ୍ଣ ଗୋଷ୍ଠୀର ସୁପାରିଶକୁ ସଜ୍ଞାନରେ ନେଇ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଗୁଡିକ ସହ ପରାମର୍ଶ କରି ଜରୁରୀକାଳିନ ଯୋଜନା ପ୍ରସ୍ତୁତ କରିବାକୁ ସ୍ୱାସ୍ଥ୍ୟ ମନ୍ତ୍ରଣାଳୟର ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି | ମୌସୁମୀର ଆଗମନକୁ ଦୃଷ୍ଟିରେ ରଖି ଉପଯୁକ୍ତ ପ୍ରସ୍ତୁତି ନିଶ୍ଚିତ କରିବା ଲାଗି ମଧ୍ୟ ସେ ମନ୍ତ୍ରଣାଳୟକୁ ପରାମର୍ଶ ଦେଇଛନ୍ତି |

ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ