ଚୀନକୁ ଭାରତର ଦୃଢ ପ୍ରତିବାଦ

ଲଦାଖର ପଶ୍ଚିମାଞ୍ଚଳ କ୍ଷେତ୍ର ଗଲୱାନ ଏବଂ ପାଙ୍ଗୋଙ୍ଗ ଅଞ୍ଚଳରେ ଚୀନର ବିସ୍ତାରବାଦି ନୀତି ଏବଂ ଆକ୍ରମଣାତ୍ମକ କାର୍ଯ୍ୟ ଯୋଗୁଁ ଜୁନ 15ରେ ଦୁଇ ଦେଶର ସୈନ୍ୟ ମଧ୍ୟରେ ହୋଇଥିବା ଧସ୍ତାଧସ୍ତି ଯୋଗୁଁ ଭାରତର 20 ଜଣ ସୈନ୍ୟ ଶହିଦ ହୋଇଥିବାବେଳେ ଚୀନର 43 ଜଣ ସୈନ୍ୟ ପ୍ରାଣ ହରାଇବା ଘଟଣା ଉତ୍ତେଜନାକୁ ବଢାଇ ଦେଇଛି | ବୈଦେଶିକ ମନ୍ତ୍ରୀ ଡକ୍ଟର ଏସ. ଜୟଶଙ୍କର ତାଙ୍କର ଚୀନ ପ୍ରତିପକ୍ଷ ୱାଙ୍ଗ ୟିଙ୍କୁ ଫୋନ କରି ଦୃଢ ପ୍ରତିବାଦ ଜଣାଇଛନ୍ତି | ଜୁନ 6ରେ ହୋଇଥିବା ସ୍ଥାନୀୟ କମାଣ୍ତର ସ୍ତରୀୟ ବୁଝାମଣାକୁ ଚୀନ ଲଂଘନ କରିଥିବା ମଧ୍ୟ ଜୟଶଙ୍କର କହିଛନ୍ତି | ପ୍ରକୃତ ନିୟନ୍ତ୍ରଣ ରେଖାରେ ସ୍ଥିତାବସ୍ଥାକୁ ବଦଳାଇବା ପାଇଁ ଚୀନ ଚେଷ୍ଠା କରୁଥିବା ଜୟଶଙ୍କର ତାଙ୍କ ପ୍ରତିପକ୍ଷଙ୍କୁ ଜଣାଇ ଦେଇଛନ୍ତି | ଏପରି କାର୍ଯ୍ୟ ଦୁଇ ଦେଶ ମଧ୍ୟରେ ଥିବା ସଂପର୍କ ଉପରେ ସାଂଘାତିକ ପ୍ରଭାବ ପକାଇବ ବୋଲି ମଧ୍ୟ ଜୟଶଙ୍କର ଚେତାଇ ଦେଇଛନ୍ତି କିନ୍ତୁ ଏକ ଦାୟିତ୍ଵଶୀଳ ଭାବେ ପରିସ୍ଥିତିର ସମାଧାନ କରିବାକୁ ଦୁଇ ମନ୍ତ୍ରୀ ରାଜି ହୋଇଛନ୍ତି |

ମଇ 5 ତାରିଖରୁ ଚୀନର ସେନାବାହିନୀ ଲଦାଖରେ ପଙ୍ଗୋଙ୍ଗ ଏବଂ ଗଲୱାନ ତଥା ସିକ୍କିମର ନାକୁଲାରେ ଅନଧିକାର ପ୍ରବେଶ ପରେ ସୀମାରେ ଉତ୍ତେଜନା ସୃଷ୍ଟି ହୋଇ ଗଲୱାନ ଉପତ୍ୟକା ଘଟଣା ଘଟିଲା | ନାକୁଲା ଅନୁପ୍ରବେଶକୁ ରୋକାଯାଇଥିବାବେଳେ ଗଲୱାନ ଉପତ୍ୟକାର ଭାରତ ପଟରେ ଚୀନ ନିଜର ସୈନ୍ୟ ସଂରଜାନ ଏକତ୍ର କରିବା ଦ୍ଵାରା ଦୁଇ ପକ୍ଷ ମଧ୍ୟରେ ପଥର ଫିଙ୍ଗାଫିଙ୍ଗି ହୋଇଥିଲା |

ପ୍ରକୃତ ନିୟନ୍ତ୍ରଣ ରେଖା ଯଥାଯଥ ଭାବେ ଚିହ୍ନଟ ହୋଇ ନଥିବାରୁ ଦୁଇ ଦେଶ ସ୍ଥିତାବସ୍ଥା ବଜାୟ ରଖିବାକୁ ତଥା ଆଲୋଚନା ଜାରି ରଖିବାକୁ ବହୁ ପୂର୍ବରୁ ବୁଝାମଣା ହୋଇଛି କିନ୍ତୁ ବୁଝାମଣାକୁ ଲଂଘନ କରି ଚୀନ ଭାରତ ପଟରେ ଅବାଞ୍ଛିତ କାର୍ଯ୍ୟକଳାପ ଚଳାଇଥିଲା | 

ଲଦାଖ କ୍ଷେତ୍ରର ଦେପସାଙ୍ଗ ପ୍ଲେନରେ 2013 ମଇ 6ରେ ଚୀନର ସୈନ୍ୟମାନେ ପ୍ରବେଶ କରିଥିଲେ ଏବଂ ଚୀନ ରାଷ୍ଟ୍ରପତି ସି ଜିନପିଙ୍ଗ ଯେତେବେଳେ ଭାରତ ଗସ୍ତରେ ଥିଲେ ସେତେବେଳେ 2014 ସେପ୍ଟେମ୍ଵରରେ ଚୀନ ସୈନ୍ୟ ଚୁମାର ଅଞ୍ଚଳରେ ଅନୁପ୍ରବେଶ କରିଥିଲେ | ଯେତେବେଳେ ଚୀନର ସୈନ୍ୟ 2016 ମଇରେ ସୀମାର ମଧ୍ୟଭାଗ ବାରାହୋଟିରେ ଅନୁପ୍ରବେଶ କଲେ ସେତେବେଳେ ଭାରତ ବିସ୍ମିତ ହେଲା କାରଣ ଏହି ଅଞ୍ଚଳ ବିବାଦିତ ନଥିଲା | ସେହିପରି 2017ରେ ଚୀନ ଡୋକଲାମ ଅଞ୍ଚଳରେ ଅନୁପ୍ରବେଶ କରିଥିଲା ସେତେବେଳେ 73 ଦିନ ଯାଏଁ ଏହାକୁ ନେଇ ଅଚଳାବସ୍ଥା ସୃଷ୍ଟି ହୋଇଥିଲା |

ଏସବୁରୁ ଏହା ସ୍ପଷ୍ଟ ପ୍ରତୀୟମାନ ଯେ ଚୀନ ସ୍ଥିତାବସ୍ଥାକୁ ପରିବର୍ତ୍ତନ କରିବାକୁ ସର୍ବଦା ହୀନ ଉଦ୍ୟମ କରି ଆସିଛି | 2017 ଏବଂ 2018ରେ ଅରୁଣାଚଳ ପ୍ରଦେଶର ସୀମା ଅଞ୍ଚଳ ଟୁଟିଙ୍ଗ ଏବଂ ଦିବାଙ୍ଗରେ ଏପରି ଘଟଣା ଚୀନ ଘଟାଇଥିବାବେଳେ 2019ରେ ପୋଙ୍ଗାଙ୍ଗ ହ୍ରଦ ନିକଟରେ ପଥର ଫିଙ୍ଗା ଘଟଣା ଘଟିଥିଲା |

ତିଦ୍ବତ ଏବଂ ସିଂଜିୟାଙ୍ଗରେ ଚୀନ ସଡ଼କ, ରେଳପଥ, ବିମାନ ବନ୍ଦର ଏବଂ ଫାଇବର ଅପଟିକ ପରି ଅନେକ ଭିତ୍ତିଭୂମି ନିର୍ମାଣ କରିଛି ଏବଂ ଏହାର ସୈନ୍ୟମାନଙ୍କୁ ଏଲଏସିକୁ ବଦଳି କରି ଆଞ୍ଚଳିକ ସ୍ଥିତିକୁ ହଇଚଇ କରିବାକୁ ଚେଷ୍ଠା କରିଆସୁଛି | ସୀମା ଅଞ୍ଚଳରେ ଚୀନ ସୁଢଙ୍ଗ ପଥ ନିର୍ମାଣ କରୁଛି | ସାମରିକ କାର୍ଯ୍ୟ ପାଇଁ ଏହାକୁ ଭାରତ ଅନେକ ଥର ପ୍ରତିବାଦ କରି ଆସିଛି |

ଏବେ ଗଲୱାନ ଉପତ୍ୟକା ଘଟଣା ଭାରତ ସହିତ ହୋଇଥିବା ଦ୍ଵିପକ୍ଷୀୟ ରାଜିନାମାର ଘୋର ଲଂଘନକୁ ଦର୍ଶାଉଛି | 1978 ରେ ପଶ୍ଚିମାଞ୍ଚଳ ସେକ୍ଟର ଚୁଶୁଲରେ ହୋଇଥିବା ବୁଝାମଣା ପରେ ନିୟମିତ ଭାବେ ଫ୍ଲାଗ ବୈଠକ ହୋଇ ଆସୁଛି | ଦୁଇ ଦେଶର ସୈନ୍ୟମାନଙ୍କ ମଧ୍ୟରେ ମତଭେଦ ଯେପରି ନହୁଏ ସେଥିପାଇଁ ସୀମା ବିବାଦର ସମାଧାନ ପାଇଁ 1993, 1996 ଏବଂ 2013ରେ ସ୍ଵତନ୍ତ୍ର ବୈଠକ କରାଯାଇଛି |

କିନ୍ତୁ ଦୀର୍ଘ ଦଶନ୍ଧି ଦଶନ୍ଧି ଧରି ଯେଉଁ ବୁଝାମଣା କାଏମ ରହିଥିଲା ତାହା ଭାରତର 20 ଜଣ ଯବାନଙ୍କ ଶହିଦ ହେବା ପରେ ତାହା ବିଚଳିତ କରିଛି | ଏହି ଘଟଣା 1962,1967 ଏବଂ 1975ର ହିଂସାତ୍ମକ ସଂଘର୍ଷକୁ ସ୍ମରଣ କରାଉଛି |

ଦ୍ଵିପକ୍ଷୀୟ ରାଜିନାମାକୁ ସମ୍ମାନ ଏବଂ କାର୍ଯ୍ୟକାରୀ କରିବାକୁ ବୈଦେଶିକ ମନ୍ତ୍ରୀ ଚେତାବନୀ ମାଧ୍ୟମରେ ଚୀନକୁ ମନେ ପକାଇ ଦେଇଛନ୍ତି |

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଭାରତ ଶାନ୍ତି ଚାହେଁ କିନ୍ତୁ ଉଚିତ ଜବାବ ଦେବାକୁ ମଧ୍ୟ ସକ୍ଷମ ଅଛି |

ମୂଳ ଲେଖା : ପ୍ରଫେସର ଶ୍ରୀକାନ୍ତ କୋଣ୍ତାପଲ୍ଲୀ, ଜେଏନୟୁ