ଭାରତ ଗାଲୱାନ ଉପତ୍ୟକା ଉପରେ ଚୀନର ଦାବିକୁ ପ୍ରତ୍ୟାଖ୍ୟାନ କରିଛି

ଭାରତ –ଚୀନ ସୀମାର ପ୍ରକୃତ ନିୟନ୍ତ୍ରଣ ସୀମାରେଖା (ଏଲଏସି)ରେ ଜୁନ 15 ତାରିଖରେ 20 ଜଣ ଭାରତୀୟ ଯବାନ ଓ ଅଧିକାରୀଙ୍କ ଜଘନ୍ୟ ହତ୍ୟାକାଣ୍ଡ ପରେ ଚୀନ, ଲଦାଖରେ ଗଲୱାନ ଉପତ୍ୟକା ଉପରେ ଏହାର ମିଥ୍ୟା ଦାବି ଉପସ୍ଥାପନ କରିଛି | ଏହା ହେଉଛି ଏକ ଅଞ୍ଚଳ ଯାହାକି ଭାରତୀୟ ସାର୍ବଭୌମ୍ୟ ଭୂଖଣ୍ଡ ପରିସିମାରେ ରହିଛି | ଚୀନ ଭାରତ ସହ ପ୍ରତାରଣା ଓ ବିଶ୍ଵାସଘାତକତା କରି ଏହାର ପୂର୍ବ ଆଭିମୁଖ୍ୟ ପ୍ରତି ବିରୁଦ୍ଧାଚରଣ କରିଛି | ଚୀନର ଏଭଳି ଅଯୁକ୍ତିକର ଦାବିକୁ ଭାରତ ସରକାର ତୀବ୍ର ରୂପରେ ଖଣ୍ଡନ କରିଛନ୍ତି | ବୈଦେଶିକ ମନ୍ତ୍ରଣାଳୟ ପକ୍ଷରୁ ଜାରି ଏକ ବିବୃତ୍ତିରେ ଗଲୱାନ ଉପତ୍ୟକାରେ ଭାରତର ଐତିହାସିକ ପ୍ରତିଷ୍ଠା ବିଷୟ ଦୋହୋରାଯାଇଛି | ଏଲଏସି ସଙ୍କ୍ରାନ୍ତରେ ଚୀନର ଅମୂଳକ ପ୍ରୟାସ ତଥା ଭିତ୍ତିହୀନ ଦାବି ଆଦୌ ଗ୍ରହଣୀୟ ନୁହେଁ ବୋଲି ନୂଆଦିଲ୍ଲୀ ଦୃଢୋକ୍ତି ପ୍ରକାଶ କରିଛି |

ଏହି ଅଞ୍ଚଳ କେବଳ ଭାରତ ଅଧିକାରରେ ନାହିଁ ବରଂ ଏହି ନାମରୁ ସ୍ପଷ୍ଟ ପ୍ରତୀୟମାନ ହୁଏ ଯେ ବ୍ରିଟିଶ-ଭାରତ ସମୟରେ ଗୁଲାମ ରସୁଲ ଗାଲୱାନ ନାମକ ଜଣେ ସ୍ଥାନୀୟ ବାସିନ୍ଦାଙ୍କ ନାମରେ ଏହା ନାମିତ ହୋଇଥିଲା | ଯଥେଷ୍ଟ ତଥ୍ୟ ଓ ପ୍ରମାଣ ଥିବା ସତ୍ତ୍ୱେ ବେଜିଂ ଏହି ଅଞ୍ଚଳ ଉପରେ ଅଧିକାର ନେଇ ଅଯଥା ଦାବି କରୁଛି | କିନ୍ତୁ ଚୀନର ଏଭଳି ବିଭ୍ରାନ୍ତିକର ପ୍ରୟାସ ଐତିହାସିକ, ଭୌଗୋଳିକ ଏବଂ ଆଇନସମ୍ବନ୍ଧୀୟ ପ୍ରମାଣକୁ ନଷ୍ଟ କରିପାରିବ ନାହିଁ | ପ୍ରକୃତ ତଥ୍ୟ ଓ ପ୍ରମାଣକୁ ଅବମାନନା କରି ପିଏଲଏର ୱେସ୍ଟର୍ନ ଥିଏଟର କମାଣ୍ଡ ଜୁନ 16 ତାରିଖରେ ଏକ ବିବୃତ୍ତି ଜାରି କରି ସମଗ୍ର ଗଲୱାନ ଉପତ୍ୟକାରେ ଚୀନର ଆଞ୍ଚଳିକ ସାର୍ବଭୌମତ୍ଵ ଦାବି କରିଛି | ଏହା ପରେ ଜୁନ 17 ରେ ଚୀନର ବୈଦେଶିକ ମନ୍ତ୍ରଣାଳୟ ମୁଖପାତ୍ର ମଧ୍ୟ ଏହାକୁ ସମର୍ଥନ ଜଣାଇ ଏକ ବିବୃତ୍ତି ଜାରି କରିଥିଲେ | ବିନାକାରଣରେ ସମସ୍ୟା ଉତ୍ପର୍ଣ୍ଣ କରିବା ହେଉଛି ଚୀନର ଚିରାଚରିତ ଅଭ୍ୟାସ |

ଚୀନର ଦୋମୁହାଁ ରୀତି ପଦାରେ ପଡିଯାଇଛି ବୋଲି ବର୍ଣ୍ଣନା କରି ଭାରତ କହିଛି ପ୍ରକୃତ ନିୟନ୍ତ୍ରଣ ସୀମାରେଖାର ଭାରତ ପଟରେ ଢାଞ୍ଚା ନିର୍ମାଣକୁ ଭାରତୀୟ ଯବାନ ମାନେ ରୋକିବା ପରେ ଜୁନ 15 ରେ ଚୀନ ସେନାବାହିନୀ ହିଂସାତ୍ମକ ଆକ୍ରମଣ କରିଥିଲା ଯାହାକି ସମୟ ସମୟରେ ଉଭୟ ପକ୍ଷ ଦ୍ଵାରା ସହମତ ହୋଇଥିବା ବିଶ୍ଵାସ ପ୍ରତିଷ୍ଠା ସଙ୍କ୍ରାନ୍ତୀୟ ରାଜିନାମାର ଘୋର ଲଙ୍ଘନ | ପ୍ରକୃତ ନିୟନ୍ତ୍ରଣ ସୀମାରେଖାରେ ଉତ୍ତେଜନା ହ୍ରାସ କରିବା ଓ ଉଭୟ ପକ୍ଷର ଯବାନ ମାନେ ସେଠାରୁ ହଟିଯିବା ନେଇ ଜୁନ 6 ତାରିଖରେ ଦୁଇ ପକ୍ଷର ବରିଷ୍ଠ ସାମରିକ କମାଣ୍ଡର ମାନେ ସହମତ ହୋଇଥିଲେ ବୋଲି ମଧ୍ୟ ଭାରତ ଜଣାଇଛି |

ନୂଆଦିଲ୍ଲୀ କହିଛି ଯେ ଉଭୟ ପକ୍ଷ ଏଲଏସି ପାଇଁ ଉଦ୍ଦିଷ୍ଟ ନିୟମାବଳୀକୁ କଡାକଡି ଭାବେ ଅନୁପାଳନ କରିବା ଓ ଏହାକୁ ସମ୍ମାନ କରିବା ସହ ଯଥାସ୍ଥିତିରେ ପରିବର୍ତ୍ତନ ଆଣିବା ଲାଗି କୌଣସି କାର୍ଯ୍ୟକଳାପ ନକରିବାକୁ ରାଜି ହୋଇଥିଲେ | ତେବେ ଚୀନ ଏହି ବୁଝାମଣାରୁ ଓହରିଯାଇ ଏଲଏସି ନିକଟରେ ଢାଞ୍ଚା ନିର୍ମାଣ କରିଥିଲା | ହେଲେ ଭାରତୀୟ ସେନାବାହିନୀ ଏହି ଉଦ୍ୟମକୁ ପଣ୍ଡ କରିଦେଇଥିବାରୁ ଚୀନ ସେନାବାହିନୀ ଜୁନ 15 ତାରିଖରେ ହିଂସାକାଣ୍ଡ ଭିଆଇଥିଲା ଫଳରେ ଭାରତୀୟ ଯବାନ ମାନେ ସହିଦ ହୋଇଥିଲେ |

ବୈଦେଶିକ ମନ୍ତ୍ରଣାଳୟ କହିଛି ଯେ ଭାରତୀୟ ସେନାବାହିନୀ ଗଲୱାନ ଉପତ୍ୟକା ସମେତ ସବୁ କ୍ଷେତ୍ରରେ ପ୍ରକୃତ ନିୟନ୍ତ୍ରଣ ସୀମାରେଖାର ନିୟମାବଳୀକୁ କଡାକଡି ଭାବେ ପାଳନ କରିଥାଏ ଓ ଏଲଏସି ଠାରେ ଆଜି ପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ | ଭାରତୀୟ ବାହିନୀ କୌଣସି ପ୍ରକାରର ଅଘଟଣ ବିନା ଦୀର୍ଘ ଦିନ ହେଲା ଗଲୱାନ ଉପତ୍ୟକାରେ ପହରା ଦେଇଆସୁଛନ୍ତି |

ନୂଆଦିଲ୍ଲୀ ଆହୁରି ମଧ୍ୟ କହିଛି ଯେ “ସୀମା ଇଲାକାରେ ଶାନ୍ତି ଓ ସ୍ଥିରତା ନିଶ୍ଚିତ କରିବା ଲାଗି ଊଭୟ ଦେଶର ବୈଦେଶିକ ମନ୍ତ୍ରୀଙ୍କ ମଧ୍ୟରେ ହୋଇଥିବା ବୁଝାମଣାକୁ ଚୀନ ଆନ୍ତରିକତାର ସହ ପାଳନ କରିବ ବୋଲି ଆମର ଆଶା ରହିଛି ଯାହାକି ଆମର ଦ୍ଵିପକ୍ଷୀୟ ସମ୍ପର୍କର ସର୍ବାଙ୍ଗୀନ ବିକାଶ ପାଇଁ ଏକାନ୍ତ କାମ୍ୟ”|

ଭାରତ-ଚୀନ ସୀମା ପ୍ରସଙ୍ଗକୁ ନେଇ ଚୀନର ଆକ୍ରୋଶକୁ ଆନ୍ତର୍ଜାତୀୟ ସ୍ତରରେ ତୀବ୍ର ନିନ୍ଦା କରାଯାଇଛି | ଆମେରିକାର ବୈଦେଶିକ ମନ୍ତ୍ରୀ ମାଇକ ପୋମ୍ପିଓ ଭାରତ-ଚୀନ ସୀମା ସଂଘର୍ଷ ଲାଗି ଚୀନ ଦାୟୀ ବୋଲି ବର୍ଣ୍ଣନା କରି ଏହାକୁ ଏକ ଦାୟିତ୍ଵହୀନ ରାଷ୍ଟ୍ର ବୋଲି ଆଖ୍ୟା ଦେଇଛନ୍ତି | ଆମଷ୍ଟରଡାମ ଭିତ୍ତିକ ୟୁରୋପୀୟ ଫାଉଣ୍ଡେସନ ଫର ସାଉଥ ଏସିଆନ ଷ୍ଟଡିଜ (ଇଏଫଏସଏଏସ) ଏକ ବିବୃତ୍ତିରେ କହିଛି ଯେ ଏହା ଏକ ସୁଚିନ୍ତିତ, ଯୋଜନାବଦ୍ଧ ଏବଂ ବର୍ବର ଆକ୍ରମଣ ଥିଲା ଓ ଏହା ଦୀର୍ଘ ଦଶନ୍ଧି ପୂର୍ବରୁ ଉଭୟ ପକ୍ଷ ମଧ୍ୟରେ ସହମତ ହୋଇଥିବା ରାଜିନାମାର ସ୍ପଷ୍ଟ ଲଙ୍ଘନ ହୋଇଛି | ଇଏଫଏସଏଏସ ଆହୁରି ମଧ୍ୟ କହିଛି ଯେ ଦକ୍ଷିଣ ଚୀନ ସାଗର, ତାଇୱାନ ବା ହଙ୍ଗକଙ୍ଗ ରେ ଚୀନ ଏହାର ଆଧିପତ୍ୟ ବିସ୍ତାର ଲାଭ କରିଚାଲିଥିବା ବେଳେ ଭାରତୀୟ ସେନାବାହିନୀ ଉପରେ ମଧ୍ୟ ଏହି ଜଘନ୍ୟ ଆକ୍ରମଣ କରିଛି | ଚୀନ ଏହିପରି ଭାବେ ସମଗ୍ର ଅଞ୍ଚଳରେ ନିଜର ପ୍ରାଦୁର୍ଭାବ ବଢାଇ ଚାଲିଛି |

ମୂଳଲେଖା : ଡଃ ରୂପା ନାରାୟଣ ଦାସ, ଚୀନ ବ୍ୟାପାରୀୟ ରଣନୀତିକ ବିଶ୍ଳେଷକ