ପ୍ରଧାନମନ୍ତ୍ରୀ କହିଛନ୍ତି ଆତ୍ମନିର୍ଭରଶୀଳ ହିଁ ଆଗକୁ ବଢିବାର ଏକ ମାଧ୍ୟମ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆକାଶବାଣୀର ମନ କି ବାତ କାର୍ଯ୍ୟକ୍ରମର 67ତମ ସଂସ୍କରଣରେ କହିଛନ୍ତି ଯେ ଆମେ 2020 ବର୍ଷ ପାଇଁ ଏହାର ବିକାଶ ଯାତ୍ରାରେ ଅଧାରାସ୍ତାରେ ପହଞ୍ଚିଛୁ | ଏହି ସମୟରେ ବୈଶ୍ଵିକ ମହାମାରୀ ଅଧିକ ଚର୍ଚ୍ଚାର ବିଷୟ ହୋଇଛି ଓ ଏହାର କେବେ ଅନ୍ତ ଘଟିବ ତାହା ମଧ୍ୟ ଲୋକମାନେ ଆଲୋଚନା କରୁଛନ୍ତି | କୌଣସି ପ୍ରକାରେ ହେଉନା କାହିଁକି ଏହି ସଂକଟମୟ କରୋନା କାଳର ଅନ୍ତ ଘଟୁ ବୋଲି ଲୋକମାନେ ଚାହୁଁଛନ୍ତି ବୋଲି ସେ କହିଛନ୍ତି |

ସେ କହିଛନ୍ତି ଯେ 6-7 ମାସ ପୂର୍ବରୁ ଆମେ ଜାଣି ନଥିଲୁ ଯେ କରୋନା ଭାଇରସ ମହାମାରୀ ଆମକୁ ଏତେ ମାତ୍ରାରେ ପ୍ରଭାବିତ କରିବ ଓ ଏହା ବିରୁଦ୍ଧରେ ଦୀର୍ଘ ଦିନ ଧରି ଲଢେଇ କରିବାକୁ ପଡିବ | ଏହି କରୋନା କାୟା ବିସ୍ତାର କରି ଚାଲିଥିବା ବେଳେ ପୂର୍ବ ଉପକୂଳରେ ସାମୁଦ୍ରିକ ମହାବାତ୍ୟା ଅମ୍ଫାନ ଓ ପଶ୍ଚିମ ଉପକୂଳରେ ନିସର୍ଗ ଭଳି ଚାଲେଞ୍ଜର ମଧ୍ୟ ଆମେ ସମ୍ମୁଖୀନ ହୋଇଛୁ | ଅନେକ ରାଜ୍ୟରେ ପଙ୍ଗପାଳ ଆକ୍ରମଣ ଭଳି ସମସ୍ଯା ଯୋଗୁଁ କୃଷକ ମାନେ ଅତ୍ୟଧିକ କ୍ଷ୍ୟତିଗ୍ରସ୍ତ ହୋଇଛନ୍ତି ବୋଲି ସେ ଜଣାଇଛନ୍ତି | ଦେଶର ଅନେକ ଭାଗରେ ଭୂମିକମ୍ପ ମଧ୍ୟ ଅନୁଭୂତ ହୋଇଛି | ଏହିସବୁ ସମସ୍ଯା ମଧ୍ୟରେ ପଡୋଶୀ ଦେଶ ଦ୍ଵାରା ଦିଆଯାଉଥିବା ଉତ୍ତେଜନାର ମଧ୍ୟ ଆମେ ଦୃଢତାର ସହ ମୁକାବିଲା କରୁଛୁ |

ଶ୍ରୀ ମୋଦୀ କହିଛନ୍ତି ଆମ ସାମ୍ନାରେ ଅନେକ ଦୁର୍ବିପାକ ଓ ବିପର୍ଯ୍ୟୟ ସହ ବହୁ ଆହ୍ଵାନ ଆସିଚାଲିଛି କିନ୍ତୁ ଆମ ଦେଶର ଇତିହାସରୁ ସ୍ପଷ୍ଟ ପ୍ରତୀୟମାନ ହୋଇଛି ଯେ ଆମେ ସବୁ ପ୍ରତିବନ୍ଧକକୁ ଦୂର କରି ସଦା ସର୍ବଦା ଆହୁରି ଦୃଢ ଭାବରେ ବିକାଶ ପଥରେ ଆଗେଇ ଚାଲିଛୁ | ସେ କହିଛନ୍ତି ଯେ ସବୁବେଳେ ଆମେ ବିପଦର ସମ୍ମୁଖୀନ ହୋଇଆସିଛୁ କିନ୍ତୁ ସବୁ ପ୍ରକାରର ବିପର୍ଯ୍ୟୟ ଓ ସମସ୍ଯା ଉପରେ ବିଜୟ ହାସଲ ସୁନିଶ୍ଚିତ କରି ଭାରତ ଏକ ଦୃଢ ଶକ୍ତି ଭାବେ ଉଭା ହୋଇଥିବା ଇତିହାସରେ ମଧ୍ୟ ବର୍ଣ୍ଣନା କରାଯାଇଛି | ଶତାବ୍ଦୀ ଶତାବ୍ଦୀ ଧରି ବହୁ ଅତ୍ୟାଚାରୀ ମାନେ ଭାରତ ଉପରେ ଆକ୍ରମଣ କରି ଏହାକୁ ପ୍ରତିକୂଳ ଅବସ୍ଥାକୁ ଠେଲି ଦେଇଛନ୍ତି କିନ୍ତୁ ଭାରତ ଏହି ସବୁ ବିପଦରୁ ଗୌରବମୟ ଭାବେ ମୁକୁଳିଆସିଛି | ଭାରତୀୟ ମାନେ ଆମର ପ୍ରବାଦ ସହ ବେଶ ପରିଚିତ – ଯାହା ହେଲା ‘ ସୃଷ୍ଟି ସ୍ଥାୟୀ ......ସୃଷ୍ଟି ନିରନ୍ତର ଅଟେ’ |

ପ୍ରଧାନମନ୍ତ୍ରୀ କହିଛନ୍ତି ମହାମାରୀର ଶିକାର ହୋଇଥିବା ସତ୍ତ୍ୱେ ଭାରତର ସଂସ୍କାର, ଜୀବନ ଶୈଳୀ ସମସ୍ତଙ୍କୁ ନିଃସ୍ଵାର୍ଥପର ଭାବେ ସେବା କରିବାକୁ ପ୍ରେରଣା ଦେଇଥାଏ | ଏହିପରି ଘଡିସନ୍ଧି ମୁହୂର୍ତ୍ତରେ ଭାରତ ବିଶ୍ବଜଗତକୁ ସହାୟତାର ହାତ ବଢାଇଛି ଓ ଏହା ଶାନ୍ତି ଏବଂ ବିକାଶ କ୍ଷେତ୍ରରେ ଭାରତର ଭୂମିକାକୁ ପ୍ରତିପାଦିତ କରିଛି | ସାର୍ବଭୌମତ୍ଵ ଓ ଆଞ୍ଚଳିକ ଅଖଣ୍ଡତା ରକ୍ଷା କରିବା ଦିଗରେ ମଧ୍ୟ ଭାରତ ବିଶ୍ଵ ପଟଳରେ ଏହାର ପ୍ରତିବଦ୍ଧତା ପରିପ୍ରକାଶ କରିଛି | ଯେଉଁମାନେ ଭାରତୀୟ ମାଟି ଲଦାଖ ଉପରେ ଲୋଲୂପ ଦ୍ରୁଷ୍ଟି ରଖିବାର ପ୍ରୟାସ କରିଛନ୍ତି ସେମାନଙ୍କୁ କଡା ଜବାବ ମିଳିଛି | ସେ କହିଛନ୍ତି ଭାରତ ବନ୍ଧୁତ୍ଵକୁ ସମ୍ମାନ ଦେଇଥାଏ | ହେଲେ ଯେକୌଣସି ଶତ୍ରୁକୁ ଉଚିତ ଜବାବ ଦେବା ପାଇଁ ମଧ୍ୟ ଦେଶ ବେଶ ସକ୍ଷମ ଅଛି |ଆମର ବୀର ଯବାନ ମାନେ ପ୍ରମାଣ କରି ଦେଖେଇଛନ୍ତି ଯେ ସେମାନେ ଭାରତ ମାତାର ଗୌରବ ତଥା ସମ୍ମାନ ଉପରେ କାହାର ଖରାପ ନଜର ପକାଇବାକୁ ଦେବେ ନାହିଁ |

ଶ୍ରୀ ମୋଦୀ କହିଛନ୍ତି ଲଦାଖ ରେ ଆତ୍ମବଳିଦାନ ଦେଇ ସହିଦ ହୋଇଥିବା ବୀର ଯବାନ ମାନଙ୍କୁ ପୁରା ଦେଶ ମଥାନତ ହୋଇ ଶ୍ରଦ୍ଧା ସୁମନ ଅର୍ପଣ କରୁଛି | ଭାରତ ମାତାର ସୁରକ୍ଷା ପାଇଁ ସାହସୀ ଯବାନ ମାନେ ଯେଉଁ ପ୍ରତିବଦ୍ଧତା ସହ ଚରମ ବଳିଦାନ ଦେଇଛନ୍ତି ତାହା ଆମ ସମସ୍ତଙ୍କ ଜୀବନର ଲକ୍ଷ ହେବା ଉଚିତ ବୋଲି ସେ କହିଛନ୍ତି | ପ୍ରଧାନମନ୍ତ୍ରୀ କହିଛନ୍ତି ଏକ ଆତ୍ମନିର୍ଭର ଭାରତ ଶହୀଦ ମାନଙ୍କ ପାଇଁ ଉପଯୁକ୍ତ ଓ ଶ୍ରେଷ୍ଠ ଶ୍ରଦ୍ଧାଞ୍ଜଳି ହୋଇପାରିବ|

ସ୍ଵାଧୀନତା ପୂର୍ବରୁ ଆମ ଦେଶ ପ୍ରତିରକ୍ଷା କ୍ଷେତ୍ରରେ ବିଶ୍ଵର ବହୁ ଦେଶ ତୁଳନାରେ ଆଗୁଆ ଥିଲା ହେଲେ ଅନେକ ଦେଶ ଯାହା ସେତେବେଳେ ଆମ ପଛରେ ଥିଲେ ବର୍ତ୍ତମାନ ସେମାନେ ଆମ ଠାରୁ ଆଗରେ ଅଛନ୍ତି ବୋଲି ସେ କହିଛନ୍ତି | ସ୍ଵାଧୀନତା ପରେ ଆମ ପୂର୍ବ ଅଭିଜ୍ଞତାର ଫାଇଦା ନେଇ ଆମର ପ୍ରତିରକ୍ଷା କ୍ଷେତ୍ରର କ୍ଷମତା ବୃଦ୍ଧି ପାଇଁ ଉଦ୍ୟମ କରିବାର ଆବଶ୍ୟକତା ଥିଲା କିନ୍ତୁ ତାହା ଆମେ କରିନଥିଲୁ ତେବେ ଆଜି ପ୍ରତିରକ୍ଷା ପ୍ରଯୁକ୍ତିବିଦ୍ୟା କ୍ଷେତ୍ରରେ ଭାରତ ନିରନ୍ତର ଉଦ୍ୟମ କରୁଛି ଓ ଆତ୍ମନିର୍ଭରଶୀଳ ଆଡକୁ ଦ୍ରୁତଗତିରେ ଆଗେଇ ଚାଲିଛି ବୋଲି ପ୍ରଧାନମନ୍ତ୍ରୀ କହିଛନ୍ତି |

ଜନସାଧାରଣଙ୍କ ଅଂଶଗ୍ରହଣ ବିନା କୌଣସି ଅଭିଯାନ ସଫଳ ହେବ ନାହିଁ ବୋଲି ପ୍ରଧାନମନ୍ତ୍ରୀ ଜଣାଇଛନ୍ତି | ସାମୁହିକ ଅଙ୍ଗୀକାରବଦ୍ଧ ଓ ପ୍ରତିଶୃତିବଦ୍ଧତା ଦ୍ଵାରା ଏକ ଆତ୍ମନିର୍ଭର ଭାରତ ଗଢି ତୋଳିବା ପାଇଁ ପ୍ରଧାନମନ୍ତ୍ରୀ ଜନସାଧାରଣଙ୍କୁ ଆହ୍ଵାନ ଦେଇଛନ୍ତି | ସେ କହିଛନ୍ତି ଯେ ଯଦି ଆମେ ସ୍ଥାନୀୟ ଉତ୍ପାଦ କିଣିବା ତେବେ ଦେଶକୁ ଶକ୍ତିଶାଳୀ କରିବାରେ ଭୂମିକା ନିର୍ବାହ କରିପାରିବା |

ଦେଶ ବର୍ତ୍ତମାନ ଲକଡାଉନ ପର୍ଯ୍ୟାୟରୁ ଅନଲକ ପର୍ଯ୍ୟାୟରେ ପ୍ରବେଶ କରିଛି | ଏହି ଅନଲକ ସମୟରେ କରୋନାକୁ ହରାଇବା ଓ ଅର୍ଥବ୍ୟବସ୍ଥାକୁ ସୁଦୃଢ କରିବା ଉପରେ ପ୍ରାଧାନ୍ଯ ଦେବାର ଆବଶ୍ୟକତା ଅଛି | ଲକଡାଉନ ତୁଳନାରେ ବର୍ତ୍ତମାନର ଅନଲକ ସମୟରେ ଆମକୁ ଅଧିକ ସତର୍କ ରହିବାକୁ ପଡିବ | କେବଳ ଆମର ସତର୍କତା ଆମକୁ କରୋନା କବଳରୁ ରକ୍ଷା କରିପାରିବ | ସେ କହିଛନ୍ତି ଆମେ ମାସ୍କ ପିନ୍ଧିବା ଓ ଦୁଇ ଗଜ ଦୂରତା ପାଳନ କରିବା ସହ ଅନ୍ୟାନ୍ୟ ନିୟମ ଗୁଡିକୁ କଡାକଡି ଭାବେ ଅନୁପାଳନ କରିବାକୁ ପଡିବ | ପ୍ରଧାନମନ୍ତ୍ରୀ, ଅବହେଳା ନକରି ନିଜ ତଥା ଅନ୍ୟ ମାନଙ୍କ ଉପଯୁକ୍ତ ଯତ୍ନ ନେବା ଲାଗି ଦେଶବାସୀଙ୍କୁ ନିବେଦନ କରିଛନ୍ତି |

ମୂଳ ଲେଖା : ପଦମ ସିଂ, ଆକାଶବାଣୀ ସମ୍ବାଦ ବିଶ୍ଳେଷକ