ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଗରିବ କଲ୍ୟାଣ ଅନ୍ନ ଯୋଜନାର ବଢାଇବା ବିଷୟ ଘୋଷଣା କରିଛନ୍ତି

ଅନଲକ-ଟୁ ଆରମ୍ଭ ହେବା ପୂର୍ବରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶ ଉଦ୍ଦେଶ୍ୟରେ ଉଦବୋଧନ ଦେଇ କହିଛନ୍ତି ଦେଶରେ ମୌସୁମୀ ଋତୁ ଆରମ୍ଭ ହୋଇଯାଇଛି ଓ ଏହି ସମୟରେ ଅନେକ ରୋଗ ଦେଖାଦେଇଥାଏ ତେଣୁ ଆମକୁ ସ୍ୱାସ୍ଥ୍ୟପ୍ରତି ଅଧିକ ଯତ୍ନବାନ ହେବାକୁ ପଡିବ ବୋଲି ସବୁ ଭାରତୀୟଙ୍କୁ ନିବେଦନ କରିଛନ୍ତି |

ପ୍ରଧାନମନ୍ତ୍ରୀ କହିଛନ୍ତି କରୋନାର ମୃତ୍ୟୁହାରକୁ ଦେଖିବାକୁ ଗଲେ ବିଶ୍ଵର ଅନେକ ଦେଶ ତୁଳନାରେ ଭାରତ ବହୁତ ଭଲ ସ୍ଥିତିରେ ରହିଛି | ଉଚିତ ସମୟରେ ଲକଡାଉନ ଲାଗୁ କରିବା ସହ ଅନ୍ୟାନ୍ୟ ନିର୍ଣ୍ଣାୟକ ପଦକ୍ଷେପ ନିଆଯାଇଥିବା ଯୋଗୁଁ ଲକ୍ଷ ଲକ୍ଷ ଲୋକଙ୍କ ଜୀବନ ରକ୍ଷା କରାଯାଇପାରିଛି | ପ୍ରଧାନମନ୍ତ୍ରୀ କହିଛନ୍ତି ପୂର୍ବରୁ ମାସ୍କ ପିନ୍ଧିବା ଓ ସାମାଜିକ ଦୂରତା ପାଳନ ସହ 20 ସେକେଣ୍ଡ ଯାଏଁ ହାତ ଧୋଇବା ନେଇ ଆମେ ବେଶ ସତର୍କ ଥିଲୁ ହେଲେ ଆଜି ଯେତେବେଳେକି ଆମେ ଅଧିକ ସତର୍କ ହେବା ଜରୁରୀ ସେତେବେଳେ ଆମେ ଅବହେଳା କରୁଥିବାରୁ ଏହା ଚିନ୍ତାର କାରଣ ପାଲଟିଯାଇଛି |

ଶ୍ରୀ ମୋଦୀ କହିଛନ୍ତି କଣ୍ଟେନମେଣ୍ଟ ଜୋନ ଗୁଡିକ ଉପରେ ଆମକୁ ଅଧିକ ଧ୍ୟାନ ଦେବାକୁ ପଡିବ | ନିୟମ ପାଳନ କରୁନଥିବା ଲୋକଙ୍କୁ ଅବରୋଧ କରିବାକୁ ପଡିବ ଓ ସତର୍କ କରାଇବାକୁ ପଡିବ | ଏକ ସର୍ବସାଧାରଣ ସ୍ଥାନରେ ମାସ୍କ ପିନ୍ଧି ନଥିବା ଯୋଗୁଁ ଗୋଟିଏ ଦେଶର ପ୍ରଧାନମନ୍ତ୍ରୀଙ୍କ ଉପରେ କିପରି 13,000 ଟଙ୍କାର ଜୋରିମାନା ଲାଗୁ କରାଯାଇଥିଲା ସେ ବିଷୟରେ ସମସ୍ତେ ଖବରରେ ଦେଖିଥିବେ ବୋଲି ପ୍ରଧାନମନ୍ତ୍ରୀ ଜଣାଇଥିଲେ | ଭାରତରେ ମଧ୍ୟ ଏହି ସମାନ ଉତ୍ସାହର ସହ ସ୍ଥାନୀୟ ପ୍ରଶାସନ କାର୍ଯ୍ୟ କରିବା ଉଚିତ | 130 କୋଟି ଭାରତୀୟଙ୍କ ଜୀବନ ରକ୍ଷା ପାଇଁ ଏହା ଏକ ଅଭିଯାନ ବୋଲି ସେ ଅଭିହିତ କରିଥିଲେ | ଭାରତରେ କୌଣସି ଗାଁ ର ‘ପ୍ରଧାନ’ ହୁଅନ୍ତୁ ବା ଦେଶର ପ୍ରଧାନମନ୍ତ୍ରୀ ହୁଅନ୍ତୁ ,କେହିବି ଆଇନର ଉପରେ ନାହାନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି |

ଲକଡାଉନ ସମୟରେ କେହି ଯେପରି ଭୋକିଲା ନରୁହନ୍ତୁ ତାହା ଦେଶର ସର୍ବୋଚ୍ଚ ପ୍ରାଥମିକତା ଥିଲା | ଏଥିପାଇଁ କେନ୍ଦ୍ର ସରକାର, ରାଜ୍ୟ ସରକାର ତଥା ନାଗରିକ ସମାଜ ସବୁ ମନ୍ତେ ପ୍ରୟାସ ଚଳେଇଥିଲେ | ତେଣୁ ଲକଡାଉନ ପରେ ସରକାର ତତ୍କାଳ ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାର ଶୁଭାରମ୍ଭ କରିଥିଲେ | ଏହି ଯୋଜନା ଅନ୍ତର୍ଗତ ଗରିବଙ୍କ କଲ୍ୟାଣ ପାଇଁ 1.75 ଲକ୍ଷ କୋଟି ଟଙ୍କାର ଏକ ପ୍ୟାକେଜର ବ୍ୟବସ୍ଥା କରାଗଲା |

ବିଗତ ତିନି ମାସ ମଧ୍ୟରେ 20 କୋଟି ଗରିବ ପରିବାରଙ୍କ ଜନଧନ ଖାତାରେ ସିଧାସଳଖ 31 ହଜାର କୋଟି ଟଙ୍କା ଜମା କରାଯାଇଛି | ଏହି ସମୟରେ 9 କୋଟିରୁ ଅଧିକ କୃଷକଙ୍କ ବ୍ୟାଙ୍କ ଖାତାରେ ମଧ୍ୟ 18 ହଜାର କୋଟି ଟଙ୍କା ଜମା କରାଯାଇଛି | ସେହିପରି ଗ୍ରାମୀଣ ଇଲାକାର ଶ୍ରମିକ ମାନଙ୍କୁ ରୋଜଗାରକ୍ଷମ କରିବା ଲାଗି ପ୍ରଧାନମନ୍ତ୍ରୀ ଗରିବ କଲ୍ୟାଣ ରୋଜଗାର ଅଭିଯାନ ଆରମ୍ଭ କରାଯାଇଛି | ସରକାର ଏହା ଉପରେ 50,000 କୋଟି ଟଙ୍କା ଖର୍ଚ୍ଚ କରୁଛନ୍ତି |

ଭାରତରେ 80 କୋଟିରୁ ଅଧିକ ଲୋକଙ୍କୁ ତିନି ମାସ ପାଇଁ ମାଗଣା ରାସନ ଯୋଗାଇଦିଆଯାଇଛି | ଗରିବ ପରିବାରକୁ ମୁଣ୍ଡପିଛା ମାଗଣାରେ 5 କିଲୋ ଗହମ କିମ୍ବା ଚାଉଳ ଦିଆଯାଇଛି | ଏଥିସହିତ ପରିବାର ପିଛା ମାଗଣାରେ ମାସକୁ ଗୋଟିଏ କିଲୋ ଡାଲି ଦିଆଯାଇଛି | ଆମେରିକାର ଜନସଂଖ୍ୟାରୁ ଅଢେଇଗୁଣରୁ ଅଧିକ, ବ୍ରିଟେନ ଜନସଂଖ୍ୟାର ବାର ଗୁଣା ଅଧିକ ଓ ୟୁରୋପୀୟ ସଂଘର ମୋଟ ଜନସଂଖ୍ୟାର ଦୁଇ ଗୁଣା ଅଧିକ ଲୋକଙ୍କୁ ଆମ ସରକାର ମାଗଣାରେ ଖାଦ୍ଯଶସ୍ୟ ଯୋଗାଉଛନ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି |

ପ୍ରଧାନମନ୍ତ୍ରୀ କହିଛନ୍ତି ଯେ ମୌସୁମୀ ପରେ ପରେ ଭାରତରେ ପାର୍ବଣ ଋତୁ ଆରମ୍ଭ ହୋଇଯିବ | ଏଥିଯୋଗୁଁ ଆବଶ୍ୟକତା ସହ ଖର୍ଚ୍ଚ ମଧ୍ୟ ବଢିବ | ତେଣୁ ଏହାକୁ ଦୃଷ୍ଟିରେ ରଖି ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାକୁ ଦୀପାବଳୀ ଓ ଛଟ ପୂଜା ପର୍ଯ୍ୟନ୍ତ ନଭେମ୍ବର ଶେଷ ଯାଏଁ ବଢାଇଦିଆଯାଇଛି |

ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନା ଅଧୀନରେ ଦେଶର 80 କୋଟି ଗରିବ ଲୋକଙ୍କୁ ମିଳୁଥିବା ମାଗଣା ଖାଦ୍ଯଶସ୍ଯ ସୁବିଧାକୁ ଜୁଲାଇ, ଅଗଷ୍ଟ, ସେପ୍ଟେମ୍ବର, ଅକ୍ଟୋବର ଓ ନଭେମ୍ବର ପର୍ଯ୍ୟନ୍ତ ବଢାଇଦିଆଯାଇଛି | ସରକାର 80 କୋଟି ଗରିବ ଲୋକଙ୍କୁ ଆଉ ପାଞ୍ଚ ମାସ ଲାଗି ମାଗଣା ରାସନ ଯୋଗାଇବେ |ଏହି ଯୋଜନା ଅନ୍ତର୍ଗତ ପରିବାରର ପ୍ରତୀଟି ସଦସ୍ୟଙ୍କୁ ପାଞ୍ଚ କିଲୋ ମାଗଣା ଗହମ କିମ୍ବା ଚାଉଳ ଓ ପ୍ରତି ପରିବାରକୁ ଏକ କିଲୋ ଚଣା ମାଗଣାରେ ଦିଆଯିବ |

ଏହି ଯୋଜନାକୁ ବଢାଇ ଦିଆଯାଇଥିବାରୁ ଅତିରିକ୍ତ 90 ହଜାର କୋଟି ଟଙ୍କା ଖର୍ଚ୍ଚ ହେବ | ଏକ ରାଷ୍ଟ୍ର ଏକ ରାସନ କାର୍ଡ ବ୍ୟବସ୍ଥାକୁ ମଧ୍ୟ କାର୍ଯ୍ୟକାରୀ କରାଯିବ ଯାହା ଦ୍ଵାରା ରୋଜଗାର ସନ୍ଧାନରେ ଅନ୍ୟ ରାଜ୍ୟକୁ ଯାଉଥିବା ଲୋକ ମାନେ ଏଥିରୁ ଉପକୃତ ହେବେ ବୋଲି ସେ କହିଛନ୍ତି |

ପ୍ରଧାନମନ୍ତ୍ରୀ କହିଛନ୍ତି ଯେ ସରକାର, ଅସହାୟ ଓ ଗରିବ ଲୋକଙ୍କୁ ମାଗଣା ରାସନ ଯୋଗାଇବାରେ ଆଜି ଯଦି ସକ୍ଷମ ହୋଇଛନ୍ତି ତେବେ ଏହାର ଶ୍ରେୟ ଦୁଇଟି ବର୍ଗର ଲୋକଙ୍କୁ ଯାଉଛି | ଗୋଟିଏ ହେଲା ପରିଶ୍ରମୀ କୃଷକ ଓ ଅନ୍ୟଟି ଆମ ଦେଶର ସଚ୍ଚୋଟ ଟିକସ ଦାତା | ସେମାନଙ୍କ କଠିଣ ପରିଶ୍ରମ ଓ ଉତ୍ସର୍ଗୀକୃତ ମନୋଭାବ ଯୋଗୁଁ ଏହା ସମ୍ଭବ ହୋଇପାରିଛି ବୋଲି ସେ କହିଛନ୍ତି | ପ୍ରଧାନମନ୍ତ୍ରୀ , ଅନ୍ନଦାତା କୃଷକ ଓ ସଚ୍ଚୋଟ ଟିକସ ଦାତାଙ୍କୁ ଗଭୀର କୃତଜ୍ଞତା ଜଣାଇଛନ୍ତି |

ଭାରତ, ଆଗାମୀ ଦିନରେ ଗରିବ, ଅସହାୟ, ନିଷ୍ପେସିତ ଓ ସମାଜର ଅବହେଳିତ ବର୍ଗର ଲୋକଙ୍କୁ ଆହୁରି ସଶକ୍ତ କରିବା ଲାଗି ବଳିଷ୍ଠ ପ୍ରୟାସ ଜାରି ରଖିବା ସହ ସବୁ ସତର୍କତା ଅବଲମ୍ବନ କରି ଅର୍ଥନୈତିକ କାର୍ଯ୍ୟକଳାପକୁ ଆହୁରି ସମ୍ପ୍ରସାରିତ କରାଯିବ ବୋଲି ସେ କହିଛନ୍ତି | ଆତ୍ମନିର୍ଭର ଭାରତ ଲାଗି ଆମକୁ ଅହରହ କାର୍ଯ୍ୟ କରିବାକୁ ପଡିବ ଓ ସ୍ଥାନୀୟ ଉତ୍ପାଦକୁ ପ୍ରୋତ୍ସାହନ ଦେବା ଉଚିତ | ଏହି ପ୍ରତିଶ୍ରୁତି ଓ ଅଙ୍ଗୀକାରବଦ୍ଧତା ସହ ଦେଶର 130 କୋଟି ଲୋକ ମିଳିମିଶି କାର୍ଯ୍ୟ କରି ଆଗେଇବାକୁ ପଡିବ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି |

ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ