ପ୍ରଧାନମନ୍ତ୍ରୀ ଅର୍ଥନୈତିକ କାର୍ଯ୍ୟକଳାପରେ ଅଭିନବତା ପାଇଁ ଆହ୍ଵାନ ଜଣେଇଲେ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ମାସିକିଆ ରେଡିଓ କାର୍ଯ୍ୟକ୍ରମ “ମନ କୀ ବାତ” ରେ ଦେଶବାସୀଙ୍କ ସହ ଭାବ ବିନିମୟ କରିଛନ୍ତି | ପ୍ରଧାନମନ୍ତ୍ରୀ ଦେଶକୁ ସମ୍ବୋଧିତ କରିବା ବେଳେ କହିଛନ୍ତି ଜୁଲାଇ 26 ତାରିଖ ହେଉଛି ଏକ ଅତ୍ୟନ୍ତ ବିଶେଷ ଦିନ | ଦୀର୍ଘ 21 ବର୍ଷ ପୂର୍ବେ ଆଜିର ଦିନରେ ଭାରତୀୟ ସେନା କାରଗିଲ ଯୁଦ୍ଧରେ ବିଜୟ ତ୍ରିରଙ୍ଗା ଉଡାଇଥିଲେ |କାରଗିଲ ଯୁଦ୍ଧ ଯେଉଁଭଳି ପରିସ୍ଥିତିରେ ହୋଇଥିଲା ଭାରତ ତାହା କେବେ ବି ଭୁଲି ପାରିବ ନାହିଁ | ପାକିସ୍ତାନ ଏହାର ଆଭ୍ୟନ୍ତରୀଣ କଳହରୁ ଧ୍ୟାନ ହଟେଇବା ଲାଗି ଭାରତ ମାଟିରେ ଅତିକ୍ରମଣ ପାଇଁ ଉଦ୍ୟମ ଆରମ୍ଭ କରିଥିଲା | ଭାରତ ସେତେବେଳେ ପାକିସ୍ତାନ ସହ ସୌହାର୍ଦ୍ଯପୂର୍ଣ୍ଣ ଭାବେ ସୁସମ୍ପର୍କ ସ୍ଥାପନ କରିବାକୁ ପ୍ରୟାସ କରୁଥିଲା |

ପ୍ରଧାନମନ୍ତ୍ରୀ କହିଛନ୍ତି ଯୁଦ୍ଧ ସମୟରେ ଆମେ ଯାହା କହୁ ବା କରୁ ତାହା ସୀମାରେ ସଦା ସର୍ବଦା ସଜାଗ ରହିଥିବା ଯବାନ ତଥା ସେମାନଙ୍କ ପରିବାରର ନୈତିକ ବଳ ଉପରେ ବିଶେଷ ପ୍ରଭାବ ପକାଇଥାଏ | ଆମେ ଏହା ଆଦୌ ଭୁଲିବା ଉଚିତ ନୁହେଁ ଏବଂ ସେଥିପାଇଁ ଆମର ଆଚରଣ, ମନ୍ତବ୍ୟ, ବକ୍ତବ୍ୟ, ଆମର ସୀମା ଓ ଲକ୍ଷ ତଥା ଯାହା ଆମେ କହୁ ବା କରୁ ସେସବୁ ସେନାର ସମ୍ମାନ ଓ ମନୋବଳ ବୃଦ୍ଧି କରିବାରେ ସହାୟକ ହେବା ଉଚିତ |

ପ୍ରଧାନମନ୍ତ୍ରୀ କହିଛନ୍ତି ଯେ ଗତ କିଛି ମାସ ହେଲା ଦେଶ ଐକ୍ଯବଦ୍ଧତାର ସହ ଯେଉଁଭଳି ଭାବେ କାରୋନା ବିରୁଦ୍ଧରେ ସଂଗ୍ରାମ ଜାରି ରଖିଛି, ଏହି ଭାବନା ଅନେକ ଆଶଙ୍କାକୁ ଭୁଲ ପ୍ରମାଣିତ କରିଦେଇଛି | ତେଣୁ ବର୍ତ୍ତମାନ ଆମ ଦେଶର ଆରୋଗ୍ୟ ହାର ଅନ୍ୟ ଦେଶ ତୁଳନାରେ ଅଧିକ ରହିଛି ଓ ସେହିପରି ମୃତ୍ୟୁହାର ମଧ୍ୟ ଅନ୍ୟ ଦେଶ ତୁଳନାରେ କମ ରହିଛି | ଅବଶ୍ୟ ଜଣଙ୍କ ଜୀବନହାନୀ ମଧ୍ୟ ଅତ୍ୟନ୍ତ ଦୁଃଖଦାୟକ ହେଲେ ଲକ୍ଷ ଲକ୍ଷ ଲୋକଙ୍କ ଜୀବନ ବଞ୍ଚାଇବାରେ ଭାରତ ସଫଳତା ହାସଲ କରିଛି | ତେବେ ଏହି କାରୋନା ସଙ୍କଟ ନଟଳିଲା ପର୍ଯ୍ୟନ୍ତ ଆମକୁ ଅଧିକ ସତର୍କତା ଅବଲମ୍ବନ କରିବାକୁ ପଡିବ ବୋଲି ପ୍ରଧାନମନ୍ତ୍ରୀ ଜନସାଧାରଣଙ୍କୁ ଚେତାଇଦେଇଛନ୍ତି |

ଏହି ଅବସରରେ ଶ୍ରୀ ମୋଦୀ ଜାମ୍ମୁ ଓ କାଶ୍ମୀରର ଗନ୍ଦେରବାଲର ଯାଇତୁନା ବେଗମଙ୍କ ବଳିଷ୍ଠ ସେବା ବିଷୟ ସ୍ମରଣ କରାଇ କହିଛନ୍ତି ଯେ ସେ ସ୍ଥିର କରିଥିଲେ ଯେ ତାଙ୍କ ପଞ୍ଚାୟତ କାରୋନା ବିରୁଦ୍ଧରେ ସଂଗ୍ରାମ କରିବ ଓ ଏଥିସହିତ ରୋଜଗାରର ସୁଯୋଗ ମଧ୍ୟ ସୃଷ୍ଟି କରିବ | ସେ ନିଜ ଆଖପାଖ ଅଞ୍ଚଳରେ ମାଗଣା ମାସ୍କ ଓ ଖାଦ୍ଯ ପଦାର୍ଥ ବାଣ୍ଟିବା ସହ ଲୋକମାନଙ୍କୁ ବିହନ ଓ ସେଓ ଚାରା ମଧ୍ୟ ବଣ୍ଟନ କରିଥିଲେ ଯଦ୍ୱାରା ଲୋକମାନେ ଚାଷକାମ ଓ ଉଦ୍ୟାନ କୃଷିରେ ଯେପରି ଅସୁବିଧାର ସମ୍ମୁଖୀନ ନହେବେ |

ପ୍ରଧାନମନ୍ତ୍ରୀ କହିଛନ୍ତି ଯେ ସଠିକ ଓ ସକାରାତ୍ମକ ଆଭିମୁଖ୍ଯ ଜରିଆରେ ସଙ୍କଟଜନକ ସମୟକୁ ସୁଯୋଗରେ ରୂପାନ୍ତରିତ କରିଥାଏ ଓ ଏହା ବିକାଶର ମୂଳ କାରଣ ହୋଇଥାଏ | କରୋନା ମହାମାରୀ କାୟା ବିସ୍ତାର କରି ଚାଲିଥିବା ବେଳେ ଆମେ ଦେଖିଛୁ ଯେ ଆମ ଦେଶର ଯୁବକ ଓ ମହିଳା ମାନେ ନିଜର ପ୍ରତିଭା ଓ ଦକ୍ଷତା ବଳରେ କିପରି ନୂତନ ପରୀକ୍ଷା ନିରୀକ୍ଷା ଆରମ୍ଭ କରିଦେଇଛନ୍ତି | ବିହାରର ଅନେକ ସ୍ଵୟଂ ସହାୟକ ଗୋଷ୍ଠୀ ଲୋକପ୍ରିୟ ମଧୁବନୀ ଚିତ୍ରକଳା ଯୁକ୍ତ ମାସ୍କ ପ୍ରସ୍ତୁତ କରିବା ଆରମ୍ଭ କରିଦେଇଛନ୍ତି | ଏହାଦ୍ବାରା ସେମାନେ ସ୍ୱାସ୍ଥ୍ୟ ସୁରକ୍ଷା ସହ ଜୀବିକା ପାଇଁ ମଧ୍ୟ ସୁଯୋଗ ସୃଷ୍ଟି କରିଛନ୍ତି | ତ୍ରିପୁରା, ମଣିପୁର ଓ ଆସାମର କାରିଗର ମାନେ ବାଉଁଶ ବ୍ୟବହାର କରି ଉଚ୍ଚମାନର ପାଣି ବୋତଲ ଓ ଟିଫିନ ବାକ୍ସ ତିଆରି କରୁଛନ୍ତି | ଏହା ଏକ ନୂଆଁ ଉତ୍ପାଦ ହେବା ସହିତ ପରିବେଶ ଅନୁକୂଳ ମଧ୍ୟ |

ଶ୍ରୀ ମୋଦୀ ଲୋକମାନଙ୍କୁ ଅଭିନବ ବିଚାରଧାରାକୁ ଆପଣେଇବାକୁ କହିଛନ୍ତି | ବିହାରର ଯୁବା ମାନେ ରାସ୍ତା ଦେଖାଇଛନ୍ତି ବୋଲି ସେ କହିଛନ୍ତି | ପୂର୍ବରୁ ସେମାନେ ନିଜର ଦୈନନ୍ଦିନ କାର୍ଯ୍ୟ କରୁଥିଲେ କିନ୍ତୁ ଦିନେ ସେମାନେ ମୁକ୍ତା ଚାଷ କରିବାକୁ ମନସ୍ଥ କଲେ | ସେମାନଙ୍କ ଇଲାକାରେ ଲୋକମାନେ ଏସଂକ୍ରାନ୍ତରେ ଅଧିକ କିଛି ଜାଣିନଥିଲେ ହେଲେ ଏହି ଯୁବା ଗୋଷ୍ଠୀ ସବୁ ଆବଶ୍ୟକୀୟ ତଥ୍ୟ ସଂଗ୍ରହ କରି ଜୟପୁର ଏବଂ ଭୁବନେଶ୍ବରରେ ତାଲିମ ନେଇଥିଲେ ଏବଂ ନିଜ ଗାଁରେ ମୁକ୍ତା ଚାଷ ଆରମ୍ଭ କରିଥିଲେ | ଆଜି ସେମାନେ କେବଳ ଉପାର୍ଜନ କରି ଆତ୍ମନିର୍ଭର ହେଉନାହାନ୍ତି ବରଂ ଅନ୍ୟ ରାଜ୍ୟରୁ ମୁଜାଫରପୁର, ବେଗୁସରାଇ ଏବଂ ପାଟନାକୁ ଫେରିଆସିଥିବା ପ୍ରବାସୀ ଶ୍ରମିକ ମାନଙ୍କୁ ପ୍ରଶିକ୍ଷଣ ଦେବାରେ କିପରି ସଫଳ ହୋଇଛନ୍ତି ସେ ନେଇ ପ୍ରଧାନମନ୍ତ୍ରୀ ବର୍ଣ୍ଣନା କରିଥିଲେ |ଅନେକ ଲୋକଙ୍କୁ ଏହା ଆତ୍ମନିର୍ଭରଶୀଳତାର ମାର୍ଗ ଦେଖେଇଛି |

ଶ୍ରୀ ମୋଦୀ କହିଛନ୍ତି ଯେ ଅଗଷ୍ଟ 7 ତାରିଖ ହେଉଛି ଜାତୀୟ ହସ୍ତତନ୍ତ ଦିବସ | ଭାରତୀୟ ହସ୍ତତନ୍ତ ଓ ଆମର ହସ୍ତଶିଳ୍ପ ଶହ ଶହ ବର୍ଷର ଏକ ଗୌରବମୟ ଇତିହାସର ମହିମା ମଣ୍ଡିତ କରିଥାଏ | ତେଣୁ ଆମେ ସମସ୍ତେ ଭାରତୀୟ ହସ୍ତତନ୍ତ ଓ ହସ୍ତଶିଳ୍ପର ବ୍ୟବହାର କରିବା ସହ ଅନ୍ୟ ମାନଙ୍କୁ ମଧ୍ୟ ଏହାର ଉପଯୋଗ ଲାଗି ପ୍ରବର୍ତ୍ତାଇବା ଉଚିତ ବୋଲି ସେ କହିଛନ୍ତି |

ପ୍ରଧାନମନ୍ତ୍ରୀ ଦେଶବାସୀଙ୍କୁ ସମ୍ବୋଧିତ କରିବା ସମୟରେ ସୁରିନାମ ସହିତ ଭାରତର ନିବିଡ ସମ୍ପର୍କକୁ ସ୍ମରଣ କରାଇଥିଲେ |ଦୀର୍ଘ ଶହେ ବର୍ଷରୁ ଅଧିକ ସମୟ ପୂର୍ବରୁ ଭାରତର ଲୋକମାନେ ସେଠାକୁ ଯାଇ ବସବାସ କରିଥିଲେ | ଅଧୁନା ସୁରିନାମର ଏକ ଚତୁର୍ଥାଂଶରୁ ଅଧିକ ଲୋକ ଭାରତୀୟ ମୂଳ ଅଟନ୍ତି |’ ସାରନାମୀ’ ସେଠାକାର ସାଧାରଣ ଭାଷା ମଧ୍ୟରୁ ଅନ୍ୟତମ, ଯାହାକି ଭୋଜପୁରୀର ଏକ ଉପଭାଷା | ଏହି ଘନିଷ୍ଠ ସଂସ୍କୃତିକ ବନ୍ଧନ ପାଇଁ ଭାରତ ଅତ୍ୟନ୍ତ ଗର୍ବିତ ମନେ କରେ ବୋଲି ପ୍ରଧାନମନ୍ତ୍ରୀ ଜଣାଇଛନ୍ତି |

ସମ୍ପ୍ରତ୍ତି ଶ୍ରୀ ଚନ୍ଦ୍ରିକା ପ୍ରସାଦ ସାନ୍ତୋଖି ସୁରିନାମର ରାଷ୍ଟ୍ରପତି ଭାବେ ନିର୍ବାଚିତ ହୋଇଛନ୍ତି | ତାଙ୍କ ଶପଥ ଗ୍ରହଣ ଉତ୍ସବରେ ଶ୍ରୀ ସାନ୍ତୋଖି ବେଦ ପାଠ କରିଥିଲେ ଓ ସେ ସଂସ୍କୃତ ଭାଷାରେ ମଧ୍ୟ ସମ୍ବୋଧନ କରିଥିଲେ | ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶ୍ରୀ ସାନ୍ତୋଖିଙ୍କୁ ଅଭିନନ୍ଦନ ଜଣାଇବା ସହ 130 କୋଟି ଭାରତୀୟଙ୍କ ତରଫରୁ ତାଙ୍କ ମଙ୍ଗଳ କାମନା କରି ଶୁଭେଚ୍ଛା ଜଣାଇଛନ୍ତି |

ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ