ଶ୍ରୀଲଙ୍କା ସଂସଦୀୟ ନିର୍ବାଚନ 2020 ରାଜପକ୍ଷେଙ୍କ ପ୍ରତି ବହୁମତ

ଶ୍ରୀଲଙ୍କାରେ ବୁଧବାର ଦିନ ସଫଳତାର ସହିତ ସଂସଦୀୟ ନିର୍ବାଚନ ସଂପନ୍ନ ହୋଇଛି | ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେଙ୍କ ନେତୃତ୍ଵାଧୀନ ଶ୍ରୀଲଙ୍କା ପୋଡୁଜନ ପେରାମୁନ (ଏସଏଲପିପି) ନିର୍ବାଚନରେ 59.09 ଭାଗ ଭୋଟ ପାଇ ବିଜୟୀ ହୋଇଛି | 225 ସଦସ୍ୟ ବିଶିଷ୍ଟ ସଂସଦରେ ଏସଏଲପିପି 145ଟି ଆସନ ଅକ୍ତିଆର କରିଛି | ନବଗଠିତ ମେଣ୍ଟ ସମାଗୀ ଜନ ବଲବେଗୟା 54ଟି ଆସନ ପାଇଥିବା ବେଳେ ମୁଖ୍ୟ ତାମିଲ ଦଳ ତାମିଲ ନ୍ୟାସନାଲ ମେଣ୍ଟ 10ଟି ଆସନ ପାଇଛି, ଜନ ବଲବେଗୟା ନେତୃତ୍ଵାଧୀନ ଜନତା ବିମୁକ୍ତି ପେରାମୁନା 3ଟି ଆସନ ପାଇଚି | 2015ରୁ 2019 ପର୍ଯ୍ୟନ୍ତ ଶାସନରେ ଥିବା ଶ୍ରୀଲଙ୍କାର ସର୍ବ ପୁରାତନ ପାର୍ଟି ୟୁନାଇଟେଡ ନ୍ୟାସନାଲ ପାର୍ଟି ମାତ୍ର ଗୋଟିଏ ଆସନ ପାଇ ପାରିଛି | ପ୍ରକାଶ ଥାଉକି ଶ୍ରୀଲଙ୍କାର ନିର୍ବାଚନ ପଦ୍ଧତି ଅନୁଯାୟୀ 225ଟି ସଂସଦୀୟ ଆସନ ମଧ୍ୟରୁ 29ଟି ଆସନ ଜାତୀୟ ତାଲିକା ଭୁକ୍ତ ଥିବା ବେଳେ ବାକି 198ଟି ଆସନ ପାଇଁ ସାବାଳକମାନେ ଭୋଟ ଦେଇଥାନ୍ତି |

ଏଥର କରୋନା ମହାମାରୀ ପରି ସଂକଟ ସମୟରେ ନିର୍ବାଚନ ହୋଇଛି | ବିଶ୍ଵ ମହାମାରୀ ମଧ୍ୟରେ ନିର୍ବାଚନ ହେବାରେ ଶ୍ରୀଲଙ୍କା ହେଉଛି ଦକ୍ଷିଣ ଏସିଆର ପ୍ରଥମ ଦେଶ | କରୋନାର ଭୟ ଏବଂ ଆଶଙ୍କା ମଧ୍ୟରେ 71 ଭାଗ ଭୋଟର ବିଧବାର ଦିନ ସେମାନଙ୍କର ମତଦାନ ସାବ୍ୟସ୍ତ କରିଛନ୍ତି | କରୋନାର ଯେପରି ସାମୁଦାୟିକ ସଂକ୍ରମଣ ନହୁଏ ଏବଂ ସ୍ଵାସ୍ଥ୍ୟଗତ ନିର୍ଦେଶ ପାଳନ କରାଯାଏ ସେସବୁକୁ ଦୃଷ୍ଟିରେ ରଖି ଦେଶର ସମସ୍ତ 12985 ଭୋଟ ଗ୍ରହଣ କେନ୍ଦ୍ରରେ କଡା ବ୍ୟବସ୍ଥା ଗ୍ରହଣ କରାଯାଇଥିଲା | ଦେଶର ପ୍ରାୟ 10 ହଜାର ସ୍ଵାସ୍ଥ୍ୟ କର୍ମୀ, 69 ହଜାର ପୋଲିସ କର୍ମୀ ଏବଂ 30 ହଜାର ସରକାରୀ ଅଧିକାରୀ ନିର୍ବାଚନ ଦାୟିତ୍ଵରେ ଥିଲେ | କାଁଭାଁ ସ୍ଥାନରେ ଛୋଟମୋଟ ହିଂସାକୁ ବାଦ ଦେଲେ ଏହି ନିର୍ବାଚନ ମୋଟ ଉପରେ ଶାନ୍ତି ଶୃଙ୍ଖଳାର ସହିତ ସଂପନ୍ନ ହୋଇଥିଲା |

ନିର୍ବାଚନ ଫଳାଫଳ ଆସିବା ପରେ ପ୍ରଧାନମନ୍ତ୍ରୀ ମହିନ୍ଦା ରାଜପକ୍ଷେ ତାଙ୍କ ପ୍ରତି, ରାଷ୍ଟ୍ରପତି ଗୋତାବାୟା ରାଜପକ୍ଷେଙ୍କ ପ୍ରତି ତଥା ତାଙ୍କ ଦଳ ପ୍ରତି ଆସ୍ଥା ପ୍ରକଟ କରିଥିବାରୁ ଲୋକମାନଙ୍କୁ ଧନ୍ୟବାଦ ଜଣାଇବା ସହିତ ତାଙ୍କ ଶାସନ କାଳରେ ସେ ଲୋକମାନଙ୍କ ଆଶା ଆକାଂକ୍ଷାକୁ ପାଳନ କରିବେ ଏବଂ ସେମାନଙ୍କୁ ନିରାଶ କରିବେ ନାହିଁ ବୋଲି ପ୍ରତିଶ୍ରୁତି ଦେଇଛନ୍ତି | ନିର୍ବାଚନ ଘୋଷଣା ପତ୍ରରେ ତାଙ୍କ ପାର୍ଟି ଯେଉଁସବୁ ପ୍ରତିଶ୍ରୁତି ଦେଇଛନ୍ତି ଯେପରିକି ଜାତୀୟ ନିରାପତ୍ତାକୁ ଗୁରୁତ୍ଵ, ବଂଧୁତ୍ଵପୂର୍ଣ୍ଣ ଗୋଷ୍ଠି ନିରପେକ୍ଷ ବିଦେଶ ନୀତି, ଦୁର୍ନିତୀ ମୁକ୍ତ ପ୍ରଶାସନ, ଲୋକମାନଙ୍କ ଆଶା ଆକାଂକ୍ଷାକୁ ପୂରଣ କରିପାରୁଥିବା ନୂଆ ସମ୍ଵିଧାନ, ମାନବ ସମ୍ଵଳ, ମାନବ କେନ୍ଦ୍ରିତ ଅର୍ଥନୈତିକ ବିକାଶ, ଜ୍ଞାନକୌଶଳ ଭିତ୍ତିକ ସମାଜ, ସମ୍ଵଳର ବିକାଶ, ଜଳବାୟୁ ପରିଚାଳନା, ଶୃଙ୍ଖଳା, ଆଇନ ମାନୁଥିବା ଏକ ମୂଲୟବୋଧ ଭିତ୍ତିକ ସମାଜ ଆଦିକୁ ସେ ଆଗ୍ରାଧିକାର ଦେବେ ବୋଲି କହିଛନ୍ତି | ଏହିସବୁ ନୀତିକୁ କାର୍ଯ୍ୟକାରୀ କରିବା ପାଇଁ ବିଶେଷ କରି ନୂଆ ସମ୍ଵିଧାନ ପ୍ରଣୟନ ପାଇଁ ସରକାରଙ୍କୁ ଦୁଇ ତୃତୀୟାଂଶ ସମର୍ଥନ ଆବଶ୍ୟକ | ସରକାରଙ୍କୁ ଇଲମ ପିପୁଲ୍ସ ଡେମୋକ୍ରାଟିକ ପାର୍ଟିର 2 ଜଣ ନିର୍ବାଚିତ ସଦସ୍ୟ, ତାମିଲ ମକ୍କଲ ବିଧୁଥଲାଇ ପୁଲିକଲର ଜଣେ ସଦସ୍ୟ ସହିତ ଏସଏଲପିପି ଦୁଇ ତୃତୀୟାଂଶ ସଂଖ୍ୟା ଗରିଷ୍ଠତା ହାସଲ କରି ସାରିଛି | ରାଷ୍ଟ୍ରପତି ଗୋତାବୟା ରାଜପକ୍ଷେ ଅଗ,୍ଟ 20 ତାରିଖରେ ନୂଆ ସଂସଦୀୟ ଅଧିବେଶନ ଡାକିଛନ୍ତି |

ନିର୍ବାଚନକୁ ସଫଳତାର ସହିତ ସଂପନ୍ନ କରାଯାଇଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ପ୍ରତିପକ୍ଷ ମହିନ୍ଦା ରାଜପକ୍ଷେଙ୍କୁ ଫୋନ କରି ଶୁଭେଚ୍ଛା ଜଣାଇଛନ୍ତି | କୋଭିଡ-19 ମହାମାରୀ ସତ୍ଵେ ଦେଶରେ ଏହି ନିର୍ବାଚନ ସଫଳତାର ସହିତ ହୋଇଥିବାରୁ ଶ୍ରୀ ମୋଦି ଶ୍ରୀଲଙ୍କାକୁ ପ୍ରଶଂସା କରିଛନ୍ତି | ଶ୍ରୀ ମୋଦି କହିଛନ୍ତି ନିର୍ବାଚନ ଫଳାଫଳ ଏହା ପ୍ରମାଣ କରିଛି ଏସଏଲପିପି ପ୍ରତି ଲୋକମାନଙ୍କର ବହୁତ ଆସ୍ଥା ରହିଛି ଏବଂ ଏଥିପାଇଁ ସେ ପ୍ରଧାନମନ୍ତ୍ରୀ ରାଜପକ୍ଷେଙ୍କୁ ଅଭିନନ୍ଦନ ଜଣାଇଛନ୍ତି |

ଭାରତ ଏବଂ ଶ୍ରୀଲଙ୍କା ମଧ୍ୟରେ ଯେପରି ଦୀର୍ଘ ବର୍ଷ ଧରି ବହୁ କ୍ଷେତ୍ରରେ ଉତ୍ତମ ସଂପର୍କ ଏବଂ ସହଯୋଗ ରହିଛି ତାହା ଆହୁରି ସୁଦୃଢ କରିବାକୁ ଦୁଇ ନେତା ସହମତ ହୋଇଛନ୍ତି | ଉତ୍ତର ପ୍ରଦେଶର ବୌଦ୍ଧ ତୀର୍ଥ ସ୍ଥଳି କୁଶୀନଗରରେ ଏକ ଆନ୍ତର୍ଜାତୀକ ବିମାନ ବନ୍ଦର ନିର୍ମାଣ କରାଯାଉଥିବାର ସୂଚନା ଶ୍ରୀ ମୋଦି ରାଜପକ୍ଷେଙ୍କୁ ଦେଇ ଶ୍ରୀଲଙ୍କାର ପର୍ଯ୍ୟଟକମାନଙ୍କୁ ସ୍ଵାଗତ କରିବାକୁ ଭାରତ ଚାହିଁ ରହିଥିବା କହିଛନ୍ତି |

ଆଗାମୀ ଦିନରେ ଦୁଇ ଦେଶ ଦ୍ଵିପକ୍ଷୀୟ ସଂପର୍କକୁ ଆହୁରି ସୁଦୃଢ କରିବାକୁ ସହମତ ହୋଇଛନ୍ତି |

ଆଲେଖ୍ୟ: ଗୁଲବୀନ ସୁଲତାନା