ରାଷ୍ଟ୍ରପତି ମାନବ- କୈନ୍ଦ୍ରିକ ସହଯୋଗ ଲାଗି ଆହ୍ଵାନ ଜଣେଇଛନ୍ତି

ଭାରତର 74 ତମ ସ୍ଵାଧୀନତା ଦିବସ ଅବ୍ୟବହିତ ପୂର୍ବରୁ ଜାତି ଉଦ୍ଦେଶ୍ୟରେ ଅଭିଭାଷଣ ପ୍ରଦାନ କରି ରାଷ୍ଟ୍ରପତି ରାମନାଥ କୋବିନ୍ଦ କହିଛନ୍ତି ଯେ ଆମର ସ୍ଵାଧୀନତା ସଂଗ୍ରାମର ସ୍ଵଭାବ ଓ ସଦାଚାର ଆଧୁନିକ ଭାରତର ମୂଳଦୁଆ ଅଟେ | ସେ କହିଛନ୍ତି ଯେ ଆମର ଦୁରଦୃଷ୍ଟି ସମ୍ପର୍ଣ୍ଣ ନେତୃବୃନ୍ଦ ବିଶ୍ଵର ସର୍ବୋତ୍ତମ ଚିନ୍ତାଧାରା ଅନୁକରଣ କରି ଏକ ସାଧାରଣ ଜାତୀୟ ଚେତନା ସୃଷ୍ଟି କରିଥିଲେ | ମହାତ୍ମା ଗାନ୍ଧୀ ଆମ ସ୍ଵାଧୀନତା ଆନ୍ଦୋଳନର ମାର୍ଗଦର୍ଶକ ଓ ଆଲୋକବର୍ତ୍ତିକା ହୋଇଥିବାରୁ ଆମେ ବହୁତ ଭାଗ୍ୟବାନ | ତାଙ୍କ ବ୍ୟକ୍ତିତ୍ବରେ ପ୍ରତିଫଳିତ ଜଣେ ରାଜନେତା ତଥା ଜଣେ ସାଧୁଙ୍କ ସମନ୍ଵୟ ଥିଲା ଯାହା କେବଳ ଭାରତରେ ହିଁ ସମ୍ଭବ ହୋଇଥିଲା | ସାମାଜିକ ଅସ୍ଥିରତା , ଅର୍ଥନୈତିକ ସମସ୍ୟା ଓ ଜଳବାୟୁ ପରିବର୍ତ୍ତନ ଦ୍ଵାରା ଅସୁବିଧାର ସମ୍ମୁଖୀନ ହେଉଥିବା ସମଗ୍ର ବିଶ୍ଵ ଏଥିରୁ ମୁକୁଳିବା ଲାଗି ଗାନ୍ଧୀଜୀଙ୍କ ଆଦର୍ଶ ଓ ଶିକ୍ଷାରୁ ସମାଧାନର ବାଟ ବାହାର କରୁଛି |ସମାନତା ଏବଂ ନ୍ୟାୟ ପାଇଁ ତାଙ୍କ ଅନ୍ଵେଷଣ ହେଉଛି ଆମ ଗଣତନ୍ତ୍ରର ମୂଳମନ୍ତ୍ର | ଯୁବ ପିଢୀ ଗାନ୍ଧୀଜୀଙ୍କ ଆଦର୍ଶର ପୁନଃ ଆବିଷ୍କାର କରୁଥିବା ଯୋଗୁଁ ରାଷ୍ଟ୍ରପତି ଖୁସି ବ୍ୟକ୍ତ କରିଛନ୍ତି |

ଚଳିତ ବର୍ଷ ସ୍ଵାଧୀନତା ଦିବସକୁ ସତର୍କତାର ସହ ପାଳନ କରାଯାଉଛି |ସମଗ୍ର ବିଶ୍ଵ ଏକ ଭୟଙ୍କର କରୋନା ଭାଇରସର ଶିକାର ହୋଇଛି ଓ ଏଥିଯୋଗୁଁ ବିଶ୍ୱବ୍ୟାପି ସବୁ କାର୍ଯ୍ୟକଳାପ ବାଧାପ୍ରାପ୍ତ ହୋଇଛି | ଏହି ମହାମାରୀ ଯୋଗୁଁ ବହୁ ଲୋକଙ୍କ ଜୀବନହାନୀ ଘଟିସାରିଲାଣି | ଆମେ ପୂର୍ବରୁ ଯେଉଁ ପୃଥିବୀରେ ବଞ୍ଚିଥିଲୁ ତାହାକୁ ଏହି କରୋନା ମହାମାରୀ ବଦଳେଇଦେଇଛି |

ହେଲେ କେନ୍ଦ୍ର ସରକାର ଉଚିତ ସମୟରେ ଦୃଢ ପଦକ୍ଷେପ ନେଇ ଏହି ଚାଲେଞ୍ଜର ସଫଳତାର ସହ ମୁକାବିଲା କରିଥିଲେ |ଭାରତ ଭଳି ଏକ ବିଶାଳ ଓ ବିପୁଳ ଜନସଂଖ୍ୟା ବିଶିଷ୍ଟ ଏକ ବିବିଧତା ପୂର୍ଣ୍ଣ ଦେଶ ପାଇଁ ଏପରି ଚାଲେଞ୍ଜର ମୁକାବିଲା କରିବା ପାଇଁ ମାନବୀୟ ଦକ୍ଷତା ଓ ଉଦ୍ୟମର ଆବଶ୍ୟକ ହୋଇଥାଏ | ସବୁ ରାଜ୍ୟ ସରକାର ସ୍ଥାନୀୟ ସ୍ଥିତି ଅନୁଯାୟୀ ବଳିଷ୍ଠ ପଦକ୍ଷେପ ଗ୍ରହଣ କରିଥିବା ବେଳେ ଲୋକ ମାନେ ମଧ୍ୟ ପୂର୍ଣ୍ଣ ପ୍ରାଣରେ ଏଥିପ୍ରତି ଦୃଢ ସମର୍ଥନ ଜଣାଇଥିଲେ | ଆମେ ବଚନବଦ୍ଧତା ସହ ମହାମାରୀ ସଂକ୍ରମଣକୁ ପ୍ରତିହତ କରିବାରେ ସଫଳ ହୋଇଛୁ ଓ ବହୁ ସଂଖ୍ୟକ ଲୋକଙ୍କ ଜୀବନ ରକ୍ଷା କରିପାରିଛୁ | ଏହା ସମଗ୍ର ବିଶ୍ଵ ପାଇଁ ଅନୁକରଣନୀୟ ଅଟେ |

ରାଷ୍ଟ୍ରପତି, ଏହି ଭାଇରସ ବିରୁଦ୍ଧରେ ଅବିଶ୍ରାନ୍ତ ସଂଗ୍ରାମ ଚଳେଇଥିବା ଡାକ୍ତର, ନର୍ସ, ସ୍ୱାସ୍ଥ୍ୟ କର୍ମୀ ତଥା ଅନ୍ୟାନ୍ୟ ଅତ୍ୟାବଶ୍ୟକୀୟ ସେବା ପ୍ରଦାନକାରୀଙ୍କୁ ଶ୍ରଦ୍ଧା ସୁମନ ଅର୍ପଣ କରିଛନ୍ତି | ଏମାନେ ହେଉଛନ୍ତି ଆମର ଜାତୀୟ ନାୟକ ବୋଲି ଉଲ୍ଲେଖ କରି ସବୁ କରୋନା ଯୋଦ୍ଧା ଉଚ୍ଚ ପ୍ରଶଂସାର ପାତ୍ର ବୋଲି ବର୍ଣ୍ଣନା କରିଛନ୍ତି | ଜୀବନ ବଞ୍ଚାଇବା ଓ ଅତ୍ୟାବଶ୍ୟକୀୟ ସେବା ଉପଲବ୍ଧ କରେଇବା ପାଇଁ ସେମାନେ ନିଜ ଦାୟିତ୍ଵ ଓ କର୍ତ୍ତବ୍ୟରୁ ବହୁ ଊର୍ଦ୍ଧ୍ଵକୁ ଉଠି ସବୁ ଲୋକଙ୍କ ଜୀବନ ରକ୍ଷା କରିବା ସହିତ ଅତ୍ୟାବଶ୍ୟକୀୟ ସେବାକୁ ନିଶ୍ଚିତ କରିଛନ୍ତି |

ରାଷ୍ଟ୍ରପତି ଶ୍ରୀ କୋବିନ୍ଦ କହିଛନ୍ତି ଯେ ଗରିବ ଓ ଦିନ ମଜୁରିଆ ମାନେ ଏହି ମହାମାରୀ ଯୋଗୁଁ ଅତ୍ୟଧିକ ପ୍ରଭାବିତ ହୋଇଛନ୍ତି | ହେଲେ କେନ୍ଦ୍ରସରକାର ‘ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନା’ କୁ କାର୍ଯ୍ୟକାରୀ କରି କୋଟି କୋଟି ଅସହାୟ ଲୋକଙ୍କୁ ଜୀବିକା ନିର୍ବାହ କରିବାରେ ସକ୍ଷମ କରିଛନ୍ତି ଏବଂ ଏହି କରୋନା ମହାମାରୀ କାରଣରୁ ଚାକିରି ହରାଇବା, ସ୍ଥାନାନ୍ତରିତ ହେବା ଓ ଅନ୍ୟାନ୍ୟ ଅସୁବିଧାର ସମ୍ମୁଖୀନ ହୋଇଥିବା ଲୋକଙ୍କ ଦୁଃଖ ଦୁର୍ଦ୍ଦଶା ଦୂର କରିଛନ୍ତି |

ଶ୍ରୀ କୋବିନ୍ଦ କହିଛନ୍ତି ଯେ କୌଣସି ପରିବାର ଯେପରି ଭୋକିଲା ନରୁହନ୍ତୁ, ସେଥିପାଇଁ ଅତି ଅଭାବି ଲୋକଙ୍କୁ ମାଗଣା ଖାଦ୍ୟଶସ୍ୟ ଯୋଗାଇଦିଆଯାଉଛି | ପ୍ରତି ମାସ 80 କୋଟି ଗରିବ ଅସହାୟ ଲୋକଙ୍କୁ ସହାୟତା ଯୋଗାଇବା ପାଇଁ ବିଶ୍ଵର ସର୍ବବୃହତ ମାଗଣା ଖାଦ୍ୟ ବଣ୍ଟନ କାର୍ଯ୍ୟକ୍ରମର ସମୟ ସୀମାକୁ ଚଳିତ ବର୍ଷ ନଭେମ୍ବର ଶେଷ ପର୍ଯ୍ୟନ୍ତ ବଢାଇଦିଆଯାଇଛି | ଦେଶର ସବୁ ରାଜ୍ୟକୁ ‘ଏକ ରାଷ୍ଟ୍ର -ଏକ ରାଶନ କାର୍ଡ’ ଯୋଜନାରେ ଅନ୍ତର୍ଭୁକ୍ତ କରାଯାଉଛି|

ସରକାର ‘ବନ୍ଦେ ଭାରତ ମିସନ’ ଅନ୍ତର୍ଗତ 10 ଲକ୍ଷରୁ ଅଧିକ ଭାରତୀୟଙ୍କୁ ସ୍ଵଦେଶ ଫେରାଇଆଣିଛନ୍ତି | ବର୍ତ୍ତମାନ ଉପୁଜିଥିବା ସଙ୍କଟଜନକ ପରିସ୍ଥିତିରେ ଭାରତୀୟ ରେଳବାଇ ଯାତ୍ରୀ ଓ ମାଲ ପରିବହନ ସୁଗମ କରିବା ଲାଗି ଟ୍ରେନ ସେବା ଜାରି ରଖିଛି |

ରାଷ୍ଟ୍ରପତି କହିଛନ୍ତି ଯେ ଭାରତ, କୋଭିଡ-19 ବିରୁଦ୍ଧରେ ସଂଗ୍ରାମ ଲାଗି ଅନ୍ୟାନ୍ୟ ଦେଶ ଗୁଡିକୁ ମଧ୍ୟ ସହାୟତା ଯୋଗାଉଛି | ଏଭଳି ମହାବିପତ୍ତି ସମୟରେ ବିଶ୍ଵ ସମୁଦାୟ ସହ ଛିଡା ହୋଇଛି ବୋଲି ଭାରତ ପୁଣିଥରେ ପ୍ରମାଣ କରିଦେଖେଇଛି | ଜାତିସଂଘ ସୁରକ୍ଷା ପରିଷଦର ଅସ୍ଥାୟୀ ସଭ୍ୟ ପଦ ଲାଗି ଅନୁଷ୍ଠିତ ନିର୍ବାଚନରେ ଭାରତକୁ ଯେଉଁ ବିପୁଳ ସମର୍ଥନ ମିଳିଛି ତାହା ଭାରତ ପ୍ରତି ଆନ୍ତର୍ଜାତୀୟ ସ୍ତରରେ ଏକ ଶୁଭେଚ୍ଛାର ନିଦର୍ଶନ|

ସମଗ୍ର ବିଶ୍ଵର ମଙ୍ଗଳ କାମନା ନିମନ୍ତେ କାର୍ଯ୍ୟ କରିବା ହେଉଛି ଭାରତର ଏକ ପରମ୍ପରା | ଭାରତର ‘ଆତ୍ମନିର୍ଭର’ ନୀତିର ଅର୍ଥ ହେଉଛି ଆତ୍ମନିର୍ଭରଶୀଳ ହେବା କିନ୍ତୁ ବିଶ୍ୱରୁ ପୃଥକ ହୋଇଯିବା ବା ଦୁରତ୍ଵ ସୃଷ୍ଟି କରିବା ନୁହେଁ | ଏହାର ଅର୍ଥ ହେଉଛି ଭାରତ ନିଜର ପରିଚୟ ବଜାୟ ରଖିବା ସହିତ ବିଶ୍ଵ ଅର୍ଥନୀତିରେ ନିଜ ସହଯୋଗ ଅବ୍ୟାହତ ରଖିବା ପାଇଁ ବଚନବଦ୍ଧ ହେବା |

ରାଷ୍ଟ୍ରପତି ଦେଶବାସୀଙ୍କ ଉଦ୍ଦେଶ୍ୟରେ ଉଦବୋଧନ ଦେବା ସମୟରେ କହିଛନ୍ତି ଯେ ‘ବସୁଦେବ କୁଟୁମ୍ବକମ’ ବା ସମଗ୍ର ବିଶ୍ଵ ଏକ ପରିବାର ବୋଲି ବହୁ ପୂର୍ବରୁ ଆମର ମୁନିରୁଷି ମାନେ ଯେଉଁ କହିଥିଲେ ସମଗ୍ର ବିଶ୍ଵ ବର୍ତ୍ତମାନ ତାହା ବେଶ ହୃଦୟଙ୍ଗମ କରିଛି | ତେବେ ବିଶ୍ଵ ସମୁଦାୟ ଯେତେବେଳେ ମିଳିତ ଭାବେ ମାନବ ସମାଜ ସମ୍ମୁଖୀନ ହେଉଥିବା ଚାଲେଞ୍ଜ ବିରୁଦ୍ଧରେ ଲଢେଇ କରୁଛି ଠିକ ସେତେବେଳେ ଆମର ଏକ ପଡୋଶୀ ବିସ୍ତାରବାଦୀ ଦୁଃସାହସ ପ୍ରଦର୍ଶନ କରୁଛି | ଆମର ସାହସୀ ଯବାନ ମାନେ ସୀମାର ସୁରକ୍ଷା ପାଇଁ ଆତ୍ମବଳିଦାନ ଦେଇଛନ୍ତି | ଭାରତ ମାତାର ସେହି ବରପୁତ୍ର ମାନେ ଜାତୀୟ ଗର୍ବ ଓ ଗୌରବ ପାଇଁ ବଞ୍ଚିଥିଲେ ଓ ଦେଶ ପାଇଁ ଶହିଦ ହେଲେ |ଗଲୱାନ ଉପତ୍ୟକାର ବୀର ଶହୀଦ ମାନଙ୍କ ବୀରତ୍ଵକୁ ସମଗ୍ର ଦେଶ ଭକ୍ତିପୂତ ନମନ କରିଛି ଓ ପ୍ରତୀଟି ଭାରତୀୟ ସେମାନଙ୍କ ପରିବାରଙ୍କ ପ୍ରତି କୃତଜ୍ଞତା ଜ୍ଞାପନ କରିଛନ୍ତି | ସେମାନଙ୍କ ଅଦମ୍ୟ ସାହସିକତାରୁ ଏହା ସ୍ପଷ୍ଟ ପ୍ରତୀୟମାନ ହୋଇଛି ଯେ ଆମେ ଶାନ୍ତିପ୍ରତିଷ୍ଠାରେ ବିଶ୍ଵାସ କରୁଥିଲେ ହେଁ ଆମେ କୌଣସି ଆକ୍ରମଣର କଡା ଜବାବ ଦେବା ଲାଗି ମଧ୍ୟ ବେଶ ସକ୍ଷମ ଅଟୁ |

ରାଷ୍ଟ୍ରପତି ଶ୍ରୀ କୋବିନ୍ଦ ତାଙ୍କ ଅଭିଭାଷଣ ଶେଷରେ କହିଛନ୍ତି, “ଆମେ 2020 ବର୍ଷରେ କିଛି କଠୋର ଶିକ୍ଷାଲାଭ କରିଛୁ| ମନୁଷ୍ୟ ପ୍ରକୃତିର ପ୍ରଭୁ ବୋଲି ଯେଉଁ ଭ୍ରାନ୍ତ ଧାରଣା ଥିଲା ତାହା ଏକ ଅଦୃଶ୍ୟ ଭୂତାଣୁ ଧୂଳିସାତ କରିଦେଇଛି | ମାନବଜାତି ନିଜକୁ ସଂଶୋଧନ କରି ପ୍ରକୃତି ସହ ସମନ୍ଵୟ ରକ୍ଷା ପୂର୍ବକ ବଞ୍ଚିବା ପାଇଁ ଏବେ ମଧ୍ୟ ଅଧିକ ବିଳମ୍ବ ହୋଇନାହିଁ” | ମହାମାରୀ ଓ ଜଳବାୟୁ ପରିବର୍ତ୍ତନ ଭଳି ଘଟଣାବଳୀ ବିଶ୍ଵ ସମୁଦାୟକୁ ଆମର ମିଳିତ ଭାଗ୍ୟ ସମ୍ବନ୍ଧରେ ଜାଗ୍ରତ କରାଇଛି | ବର୍ତ୍ତମାନ ପରିପ୍ରେକ୍ଷୀରେ ‘ମାନବ –କୈନ୍ଦ୍ରିକ ସହଯୋଗ’, ‘ଅର୍ଥ- କୈନ୍ଦ୍ରିକ ସମାବେଶ’ ଠାରୁ ଅଧିକ ଗୁରୁତ୍ୱପୂର୍ଣ୍ଣ | ନିଜ ନିଜ ମତ ପାର୍ଥକ୍ୟରୁ ଦୂରେଇ ରହି ମାନବିକତା ଆଧାରରେ ସମଗ୍ର ବିଶ୍ଵକୁ ସୁରକ୍ଷିତ କରିବା ଲାଗି ମିଳିମିଶି ସାହାଯ୍ୟ ସହଯୋଗ କରି କାମ କରିବା ନିମନ୍ତେ ଏକବିଂଶ ଶତାବ୍ଦୀ ସ୍ମରଣୀୟ ହେବା ଉଚିତ |

ମୂଳ ଲେଖା : କୌଶିକ ରାୟ, ଆକାଶବାଣୀ ସମ୍ବାଦ ବିଶ୍ଳେଷକ