ଆର୍ଥିକ ଗତିବିଧିରୁ ବିକାଶକୁ ଗତିଶୀଳ ହେବ କହିଲା ରିଜର୍ଭ ବ୍ୟାଙ୍କ

ଭାରତ ଏବେ କୋଭିଡ-19ର କୁପ୍ରଭାବକୁ ମୁକାବିଲା କରି ଅର୍ଥନୀତିକୁ ଦୃଢ କରିବା ପାଇଁ ସବୁ ପ୍ରକାର ଉଦ୍ୟମ କରୁଥିବାବେଳେ ଭାରତୀୟ ରିଜର୍ଭ ବ୍ୟାଙ୍କ ଋଣ ହାରକୁ ଅପରିବର୍ତ୍ତିତ ରଖିବା ନିଷ୍ପତ୍ତି ଏହି ନୀତିର ଅନୁରୂପ ହୋଇଛି ଏବଂ ଅର୍ଥନୀତିକୁ ସୁଦୃଢ କରିବା ପାଇଁ ବର୍ତ୍ତମାନ ସମୟରେ ରିଜର୍ଭ ବ୍ୟାଙ୍କର ଏହି ନିଷ୍ପତ୍ତି ଏକ ବ୍ୟବହାରିକ ପଦକ୍ଷେପ |

ରିଜର୍ଭ ବ୍ୟାଙ୍କ ଗଭର୍ଣ୍ଣରଙ୍କ ଅଧ୍ୟକ୍ଷତାରେ ଛଅ ଜଣିଆ ସଦସ୍ୟ ବିଶିଷ୍ଟ ମୁଦ୍ରା ନୀତି କମିଟି ବୈଠକରେ ଋଣ ହାରକୁ ଅପରିବର୍ତ୍ତିତ ରଖାଯାଇଛି ଯାହାକି ସବୁଠୁ କମ ଶତକଡା 4 ଭାଗ ରହିଛି ତଥା କରୋନା ଦ୍ଵାରା କ୍ଷତିଗ୍ରସ୍ତ ଅର୍ଥନୀତିକୁ ସୁଧାରିବା ପାଇଁ ଋଣର ପୁନଃଗଠନ ପରି କେତେକ ପଦକ୍ଷେପର ଆବଶ୍ୟକତା ଉପରେ ଘୋଷଣା କରିଛି | ଗଭର୍ଣ୍ଣର ଶକ୍ତିକାନ୍ତ ଦାସ କହିଛନ୍ତି କମିଟି ସୁଧ ହାରକୁ ଅପରିବର୍ତ୍ତିତ ରଖିବାକୁ ନିଷ୍ପତ୍ତି ନେଇଛି ଏବଂ ବିକାଶକୁ ଗତିଶୀଳ କରିବା ଜାରି ରଖିବାକୁ ପ୍ରୟାସ କରିଛି |

ମଇ 22 ତାରିଖରେ ରିଜର୍ଭ ବ୍ୟାଙ୍କ ଏହାର ମୁଦ୍ରା ନୀତି ବୈଠକରେ ସୁଧ ହାରକୁ ସବୁଠୁ କମ କରିଥିଲା | ଅଣୁ ଅର୍ଥନୀତିର ପରିବର୍ତ୍ତନକୁ ଦୃଷ୍ଟିରେ ରଖି ରିଜର୍ଭ ବ୍ୟାଙ୍କ ଚଳିତ ବର୍ଷ ମାର୍ଚ୍ଚରେ ଏବେ ପୁଣି ମଇରେ ହୋଇଥିବା ମୁଦ୍ରା ନୀତି ବୈଠକରେ ଆବଶ୍ୟକ ପଦକ୍ଷେପ ଗ୍ରହଣ କରିଥିଲା |

ମହାମାରୀ ଏବଂ ପରବର୍ତ୍ତୀ ଲକଡାଉନ ଯୋଗୁଁ ଅର୍ଥନୀତିରେ ସୃଷ୍ଟି ହୋଇଥିବା ଚାପକୁ ସୀମିତ ରଖିବା ପାଇଁ ଆରବିଆଇ ସକ୍ରିୟ ପଦକ୍ଷେପ ନେଇଛି। ବିଶେଷଜ୍ଞମାନେ ଅନୁଭବ କରୁଛନ୍ତି ଯେ ଋଣ ହାରକୁ ଅପରିବର୍ତ୍ତିତ ରଖିବା ପାଇଁ ଆରବିଆଇ ନିଷ୍ପତ୍ତି ଆଶା କରାଯାଉଥିଲା ଏବଂ କୋଭିଡ-19 ର ପ୍ରଭାବକୁ ମୁକାବିଲା କରିବା ପାଇଁ ଏହି ସମୟରେ ଋଣର ପୁନଃଗଠନ ଅଧିକ ଜରୁରୀ ଅଟେ |

ଅର୍ଥମନ୍ତ୍ରୀ ନିର୍ମଳା ସୀତାରମଣ କିଛି ଦିନ ପୂର୍ବରୁ କହିଥିଲେ ଯେ ପୁନଃଗଠନ ଉପରେ ଧ୍ୟାନ ଦିଆଯାଇଛି । ଅର୍ଥ ମନ୍ତ୍ରଣାଳୟ ଆରବିଆଇ ସହିତ ସକ୍ରିୟ ଭାବେ ଏ କ୍ଷେତ୍ରରେ ଜଡ଼ିତ ଅଛି | ଏହା ଏକ ଅନୁକୂଳ ନିଷ୍ପତ୍ତି ବୋଲି କୁହାଯାଇ ପାରେ ଏଥିପାଇଁ , ଋଣ ନେଇଥିବା ଚାପଗ୍ରସ୍ତ ବ୍ୟକ୍ତିଙ୍କ ପାଇଁ ପୁନଃଗଠନ ଢାଞ୍ଚା ବିକଶିତ କରିବା ପାଇଁ ରିଜର୍ଭ ବ୍ୟାଙ୍କ କେ ଭି କାମାଥଙ୍କ ନେତୃତ୍ୱରେ ଏକ ଉଚ୍ଚ ସ୍ତରୀୟ କମିଟି ଗଠନ ଘୋଷଣା କରିଥିଲା । ଏହି ପଦକ୍ଷେପ ଋଣଦାତାମାନଙ୍କୁ ଏହି ପ୍ରକ୍ରିୟାରେ ସାହାଯ୍ୟ କରିବାରେ ଫଳପ୍ରଦ ହେବ| ଋଣ ହାର ବଜାୟ ରଖିବା, ତଥା ଯୋଗ୍ୟ ବ୍ୟାଙ୍କଗୁଡିକର ଆର୍ଥିକ ସ୍ଥିତି ପ୍ରତି ମଧ୍ୟ ରିଜର୍ଭ ବ୍ୟାଙ୍କ ଯଥେଷ୍ଟ ଧ୍ୟାନ ଦେଇଛି | ପ୍ରସ୍ତାବିତ ଉଚ୍ଚ ସ୍ତରୀୟ କମିଟି ଏଥି ପାଇଁ ନିୟମ ସ୍ଥିର କରିବ।

କମାଥଙ୍କ ପରି ଜଣେ ପ୍ରସିଦ୍ଧ ଏବଂ ଉଚ୍ଚ ସ୍ତରୀୟ ବ୍ୟାଙ୍କର ଏହି କମିଟିର ଅଧ୍ୟକ୍ଷ ଥିବାରୁ ଆର୍ଥିକ ପାରାମିଟର ସ୍ଥିର କରାଯିବା କ୍ଷେତ୍ରରେ ପାତର ଅନ୍ତର କରାଯିବ ନାହିଁ ଏବଂ ସମସ୍ତଙ୍କ ପାଇଁ ଗ୍ରହଣୀୟ ନୀତି ନିର୍ଦ୍ଧାରଣ ହେବ ବୋଲି ଦୃଢ ଆସା ପୋଷଣ କରାଯାଇପାରେ | ଏହି ନୀତି ଚାପଗ୍ରସ୍ତ ଅର୍ଥନୀତିକୁ ଅଭିବୃଦ୍ଧି ଆଡକୁ ନେଇଯିବ |

ବିଶ୍ଵରେ ଦେଖା ଦେଇଥିବା ଆର୍ଥିକ ମାନ୍ଦାବସ୍ଥା କାଳରେ ଆରବିଆଇ ଘରୋଇ ଏବଂ ବିଶ୍ଵ ଅର୍ଥନୀତିକୁ ଖୁବ ଭଲ ଭାବରେ ଆକଳନ କରିପାରିଛି | ଉଦାହରଣ ସ୍ଵରୂପ ଗୃହ ଋଣ କଂପାନୀ ଏବଂ ନାବାର୍ଡକୁ 5000 କୋଟି ଟଙ୍କା ଲେଖାଏଁ ଅତିରିକ୍ତ ନଗଦି ଦେବା ନିଷ୍ପତ୍ତି ନିଶ୍ଚିତ ଭାବେ ଏହି କ୍ଷେତ୍ରକୁ ଆଶ୍ଵସ୍ତ କରିବ | ସେହିପରି ସୁନା ପାଇଁ ଋଣ 90 ଭାଗ ବୃଦ୍ଧି ନିଷ୍ପତ୍ତି ମଧ୍ୟ ସାଧାରଣ ଲୋକମାନଙ୍କୁ ସେମାନଙ୍କ ଆର୍ଥିକ ବୋଝକୁ ଲାଘବ କରିବ |

ଦେଶରେ ଅର୍ଥନୈତିକ କାର୍ଯ୍ୟକଳାପ ପୁନଃଆରମ୍ଭ ହେବାପରେ କେନ୍ଦ୍ରୀୟ ବ୍ୟାଙ୍କ କହିଛି ଯେ ଦେଶର କିଛି ଅଂଶରେ ଲକଡାଉନ ଅନଲକ ହେବା ପରେ ଏପ୍ରିଲ-ମେ ମାସର ଅବନତିରୁ ଅର୍ଥନୀତି ପୁନରୁଦ୍ଧାର ଆରମ୍ଭ କରିଛି। ଆରବିଆଇ ଗଭର୍ଣ୍ଣର କହିଛନ୍ତି ଯେ ଗ୍ରାମାଞ୍ଚଳର ଅର୍ଥନୀତିରେ ପୁନରୁଦ୍ଧାର ଦୃଢ ହେବ ବୋଲି ଆଶା କରାଯାଉଛି।

ଆଲେଖ୍ୟ : ଆଦିତ୍ୟ ରାଜ ଦାସ