ଭାରତ-ୟୁଏଇ ରଣନୀତିକ ସମ୍ପର୍କ ଆହୁରି ନିବିଡ ହୋଇଛି

ଭାରତ ଓ ସଂଯୁକ୍ତ ଆରବ ଏମିରେଟ୍ସର ଶାନ୍ତି ତଥା ସମୃଦ୍ଧ ପାଇଁ ଏକ ସମାନ ଦୁରଦୃଷ୍ଟି ରହିଛି | ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ରାଜକୁମାର ମହମ୍ମଦ ବିନ ଯାଏଡ ଅଲ ନାହାୟାନଙ୍କ ନେତୃତ୍ଵରେ ବାଣିଜ୍ୟ, ପୁଞ୍ଜି ବିନିଯୋଗ, ପ୍ରତିରକ୍ଷା, ସୁରକ୍ଷା, ବିଜ୍ଞାନ ଓ ପ୍ରଯୁକ୍ତିବିଦ୍ୟା, ଶିକ୍ଷା ଓ ସଂସ୍କୃତି କ୍ଷେତ୍ରରେ ଦ୍ଵିପାକ୍ଷୀୟ ସହଯୋଗକୁ ଆହୁରି ମଜବୁତ କରିବା ଲାଗି ଦୁଇ ଦେଶ ଯଥେଷ୍ଟ ମାତ୍ରାରେ ନିବେଶ କରିଛନ୍ତି | ମିଳିତ କମିଶନ ବୈଠକ ଭଳି ଦ୍ଵିପକ୍ଷୀୟ ବ୍ୟବସ୍ଥା ଜରିଆରେ ବ୍ୟାପକ ରଣନୀତିକ ଭାଗୀଦାରୀତା ସହ ସମ୍ପର୍କ ନିବିଡ କରିବା ଲାଗି ଦୁଇ ପକ୍ଷ କାର୍ଯ୍ୟ କରିଛନ୍ତି |

ବାଣିଜ୍ୟ, ଅର୍ଥନୈତିକ ଓ ବୈଷୟିକ ସହଯୋଗ ଉପରେ ଭାରତ ଓ ୟୁଏଇର 13 ତମ ମିଳିତ କମିଶନ ବୈଠକ ଭିଡିଓ କନଫରେନ୍ସ ଜରିଆରେ ଅନୁଷ୍ଠିତ ହୋଇଛି | ଭାରତର ବୈଦେଶିକ ମନ୍ତ୍ରୀ ଏସ ଜୟଶଙ୍କର ଓ ୟୁଏଇର ବୈଦେଶିକ ମନ୍ତ୍ରୀ ଅବଦୁଲ୍ଲା ବିନ ଜାଏଦ ଅଲ ନାହାୟାନ ଏହି ବୈଠକରେ ସହଅଧ୍ୟକ୍ଷତା କରିଥିଲେ | କୋଭିଡ-19 ମହାମାରୀ ଯୋଗୁଁ ପ୍ରଥମଥର ଲାଗି ଏହି ମିଳିତ କମିଶନ ବୈଠକ ଭର୍ଚୁଆଲ ଭାବେ ଅନୁଷ୍ଠିତ ହୋଇଥିଲା | ଦ୍ଵିପକ୍ଷୀୟ ସହଯୋଗକୁ ଆହୁରି ମଜବୁତ କରିବା ଲାଗି ମତ ବିନିମୟ କରିବା ସହ ବିଚାରଧାରା ଆଦାନ ପ୍ରଦାନ ଜାରି ରଖିବା ପାଇଁ ଏହା ଦୁଇ ଦେଶର ଅଦମ୍ୟ ଉତ୍ସାହକୁ ରେଖାଙ୍କିତ କରିଛି |

ଭାରତ ଓ ୟୁଏଇ ବିଶ୍ଵ ମହାମାରୀ ବିରୁଦ୍ଧରେ ସଂଗ୍ରାମ ଲାଗି ମିଳିତ ଭାବେ କାର୍ଯ୍ୟ କରୁଛନ୍ତି | ଏପ୍ରିଲ ମାସରେ କୋଭିଡ-19 ରୋଗୀଙ୍କ ଚିକିତ୍ସା ପାଇଁ ଭାରତ ୟୁଏଇକୁ 5.5 ନିୟୁତ ହାଇଡ୍ରୋକ୍ସିକ୍ଳୋରୋକ୍ବିନ ବଟିକା ପଠାଇଥିଲା | ମେ ମାସରେ ଭାରତ, ୟୁଏଇର ଏମିରାତି ହସ୍ପିଟାଲ ଗୁଡିକରେ ସ୍ୱାସ୍ଥ୍ୟ ପେଷାଦାରଙ୍କୁ ସହାୟତା କରିବା ପାଇଁ ଇଣ୍ଟେନ୍ସିଭ କେୟାର ୟୁନିଟର 88 ଜଣନର୍ସଙ୍କୁ ନେଇ ଗଠିତ ଏକ ଦଳ ପଠାଇଥିଲା | ଅନ୍ୟ ପକ୍ଷରେ ୟୁଏଇ କୋଭିଡ-19 ବିରୁଦ୍ଧରେ ଦୃଢ ମୁକାବିଲା ଲାଗି ଭାରତକୁ 7 ମେଟ୍ରିକ ଟନ ଚିକିତ୍ସା ସାମଗ୍ରୀ ପଠାଇଥିଲା | ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ରାଜକୁମାର ମହମ୍ମଦଙ୍କ ସମେତ ଦୁଇ ଦେଶର ନେତା ମାନେ ମହାମାରୀ ବିରୁଦ୍ଧରେ ସ୍ଥିତିର ଆକଳନ କରିବା ଓ ସହଯୋଗ ବୃଦ୍ଧି ଲାଗି ମତ ଆଦାନ କରିବା ନିମନ୍ତେ ଟେଲିଫୋନ ଯୋଗେ ରୀତିମତ କଥାବାର୍ତ୍ତା କରୁଛନ୍ତି |

ମିଳିତ କମିଶନ ବୈଠକ ସମୟରେ ଉଭୟ ପକ୍ଷ ଗତ କିଛି ମାସ ମଧ୍ୟରେ କୋଭିଡ-19 ମହାମାରୀ ବିରୁଦ୍ଧରେ ସଂଗ୍ରାମରେ ମିଳିତ ସହଯୋଗର ସ୍ଵାଗତ ଜଣାଇଥିଲେ ଓ ଉଭୟ ଦେଶରେ ମହାମାରୀ ଯୋଗୁଁ ଉପୁଜିଥିବା ଆର୍ଥିକ ତଥା ସାମାଜିକ ପ୍ରଭାବକୁ ଦୂର କରିବା ପାଇଁ ମିଳିତ ରଣନୀତି ପ୍ରସ୍ତୁତ କରିବା ଉପରେ ବ୍ୟାପକ ଆଲୋଚନା କରିଥିଲେ | ମହାମାରୀ କାରଣରୁ ବାଧାପ୍ରାପ୍ତ ହୋଇଥିବା ଅର୍ଥନୈତିକ ଓ ବାଣିଜ୍ୟିକ କାର୍ଯ୍ୟକଳାପକୁ ପୁଣିଥରେ ଆରମ୍ଭ କରିବା ସମ୍ବନ୍ଧୀୟ ଅଭିନବ ସମାଧାନର ବାଟ ଖୋଜିବା ଲାଗି ଦୁଇ ଦେଶ ତଥା ବିଶ୍ଵ ପ୍ରୟାସ ଚଳେଇଥିବାରୁ ଦୁଇ ଦେଶର ମିଳିତ ରଣନୀତିକୁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ମନେ କରାଯାଉଛି |

ଏହି ବୈଠକରେ ଦ୍ଵିପକ୍ଷୀୟ ସହଯୋଗ ଅନ୍ତର୍ଗତ ଚିହ୍ନଟ କରାଯାଇଥିବା ସବୁ କ୍ଷେତ୍ରକୁ ବ୍ୟାପକ ରଣନୀତିକ ଭାଗୀଦାରୀତା ଅଧୀନରେ ଆଗେଇ ନେବା ଲାଗି କାର୍ଯ୍ୟ ଜାରି ରଖିବା ଉପରେ ସନ୍ତୋଷ ବ୍ୟକ୍ତ କରାଯାଇଛି | ପ୍ରଚଳିତ କ୍ଷେତ୍ରରେ ସହଯୋଗକୁ ଆହୁରି ଘନିଷ୍ଠ କରିବା ସହ ନୂତନ କ୍ଷେତ୍ରରେ ସହଯୋଗର ସମ୍ଭାବନାକୁ ଅନ୍ଵେଷଣ ଲାଗି ଉଭୟ ପକ୍ଷ ସହମତ ପ୍ରକଟ କରିଛନ୍ତି |ମିଳିତ କମିଶନ ବୈଠକ ଅଧୀନରେ ଅର୍ଥନୀତି, ବାଣିଜ୍ୟ ଓ ବିନିଯୋଗ,ରାଷ୍ଟ୍ରଦୂତ ଓ ସଂପ୍ରଦାୟ ବ୍ୟାପାର, ପ୍ରତିରକ୍ଷା ଏବଂ ସୁରକ୍ଷା ଓ ଶିକ୍ଷା, ସଂସ୍କୃତି ଏବଂ ଯୁବା ସମ୍ବନ୍ଧିତ କ୍ଷେତ୍ର ନେଇ ଉଚ୍ଚ ସ୍ତରୀୟ ମତ ଆଦାନ ପ୍ରଦାନରେ ଦୁଇ ପକ୍ଷପାଞ୍ଚୋଟି ଉପକମିଟି ଗଠନ କରିଛନ୍ତି | ଭାରତ ଏବଂ ୟୁଏଇର ଉପ କମିଟିର ସଦସ୍ୟ ମାନେ ଏହି ମିଳିତ କମିଶନ ବୈଠକ ପ୍ରସ୍ତୁତି ପାଇଁ ଭର୍ଚୁଆଲ ବୈଠକ କରି ବ୍ୟାପକ, ଖୋଲା ଏବଂ ବନ୍ଧୁତ୍ବପୂର୍ଣ୍ଣ ଆଳାପ ଆଲୋଚନା କରିଥିଲେ |

​ଏହି ମିଳିତ କମିଶନ ବୈଠକରେ ଦକ୍ଷିଣ ଏବଂ ପଶ୍ଚିମ ଏସିଆର ଆଞ୍ଚଳିକ ବିକାଶ ତଥା ଜାତିସଂଘ ଏବଂ ଅନ୍ୟାନ୍ୟ ବହୁପକ୍ଷୀୟ ମଞ୍ଚରେ ଭାରତ-ୟୁଏଇ ସହଯୋଗ ବୃଦ୍ଧି କରିବା ନିମନ୍ତେ ଉପାୟ ବାହାର କରିବା ଉପରେ ମଧ୍ୟ ପୁଙ୍ଖାନୁପୁଙ୍ଖ ଆଲୋଚନା କରାଯାଇଥିଲା | ଉଲ୍ଲେଖ ଯୋଗ୍ୟଯେ ପଶ୍ଚିମ ଏସିଆରେ ଭାରତର ଦୁଇ ନିକଟତମ ରଣନୈତିକ ଭାଗୀଦାରୀ ରାଷ୍ଟ୍ର ୟୁଏଇ ଓ ଇସ୍ରାଏଲ ମଧ୍ୟରେ ସମ୍ପର୍କ ସ୍ଵାଭାବିକ ହେବା ବିଷୟ ଘୋଷଣା କରି ଆମେରିକା-ଇସ୍ରାଏଲ-ୟୁଏଇ ଦ୍ଵାରା ଜାରି ମିଳିତ ବିବୃତ୍ତିକୁ ଭାରତ ସ୍ଵାଗତ ଜଣାଇଛି |

ଏହି ବୈଠକ ସମୟରେ ବୈଦେଶିକ ବ୍ୟାପାରୀୟ ମନ୍ତ୍ରୀ ଏସ ଜୟଶଙ୍କର ୟୁଏଇର ନିରନ୍ତର ସମର୍ଥନ ବିଷୟ ଉଲ୍ଲେଖ କରିଥିଲେ ଓ ଭାରତର ସୁରକ୍ଷା ଓ ରଣନୀତିକ ଉଦବେଗ ବିଶେଷକରି ଇସଲାମିକ ସହଯୋଗ ସଂଗଠନ (ଓଆଇସି) ଭଳି ମଞ୍ଚକୁ ନେଇ ଚିନ୍ତା ବ୍ୟକ୍ତ କରିଥିଲେ | ସୂଚନାଯୋଗ୍ୟ ଯେ ଏହି ଓଆଇସି ମଞ୍ଚରେ ପାକିସ୍ତାନ ପ୍ରାୟତଃ ସବୁବେଳେ ଭାରତ ବିରୁଦ୍ଧରେ ଅପପ୍ରଚାର କରିବାକୁ ଚେଷ୍ଟା କରିଆସୁଛି | ମହାମାରୀ ଯୋଗୁଁ ୟୁଏଇରେ ଅଟକ ରହିଥିବା ଭାରତୀୟ ନାଗରିକ ମାନଙ୍କୁ ସେଠାକାର କର୍ତ୍ତୁପକ୍ଷ ସବୁ ପ୍ରକାରର ସହାୟତା ଯୋଗାଉ ଥିବାରୁ ମନ୍ତ୍ରୀ ମହୋଦୟ ଏହାର ଭୂୟସୀ ପ୍ରଶଂସା କରିଥିଲେ |

ବାଣିଜ୍ୟ, ବ୍ୟବସାୟ ଓ ପୁଞ୍ଜି ନିବେଶ ତଥା ପ୍ରତିରକ୍ଷା, ସୁରକ୍ଷା, ବିଜ୍ଞାନ ଓ ପ୍ରଯୁକ୍ତି ବିଦ୍ୟା ଏବଂ ଶିକ୍ଷା ଆଦି ସମେତ ବିଭିନ୍ନ କ୍ଷେତ୍ରରେ ନିକଟ କିଛି ବର୍ଷରେ ଭାରତ ଓ ୟୁଏଇ ଦ୍ଵିପକ୍ଷୀୟ ସହଯୋଗରେ ଅନେକ ପ୍ରଗତି ପରିଲକ୍ଷିତ ହୋଇଛି | ୟୁଏଇ ହେଉଛି ବିଶ୍ଵର ତୃତୀୟ ବୃହତ୍ତମ ବାଣିଜ୍ୟ ଭାଗୀଦାରୀ ରାଷ୍ଟ୍ର ଏବଂ ଭାରତରେ ନିବେଶ କରୁଥିବା ଉପସାଗରୀୟ ଦେଶମାନଙ୍କ ମଧ୍ୟରୁ ମୁଖ୍ୟ ନିବେଶକ | ୟୁଏଇରେ ଅଧିକାଂଶ ଭାରତୀୟ ଶ୍ରମିକ ଓ ପ୍ରମୁଖ ବ୍ୟବସାୟ ପେଷାଦାର ଭାବେ କାର୍ଯ୍ୟରତ ଅଛନ୍ତି | ଦୁଇ ଦେଶ ମହାମାରୀ ବିରୁଦ୍ଧରେ ମିଳିମିଶି ସଂଗ୍ରାମ ଲାଗି ପରସ୍ପର ସହ ସହଯୋଗ ଜାରି ରଖିଛନ୍ତି ଓ କୋଭିଡ-19 ପରବର୍ତ୍ତୀ କାଳରେ ଉଭୟଙ୍କ ମଧ୍ୟରେ ଦ୍ଵିପକ୍ଷୀୟ ରଣନୀତିକ ଭାଗୀଦାରୀତା ଆହୁରି ନିବିଡ ହେବ |

ମୂଳ ଲେଖା : ଡଃ ମହମ୍ମଦ ମୁଦାସିର କୁମାର, ପଶ୍ଚିମ ଏସିଆ ମାମଲା ଉପରେ ରଣନୀତିକ ବିଶ୍ଳେଷକ