ଜାତିସଂଘରେ ସଂସ୍କାର ପାଇଁ ପ୍ରଧାନମନ୍ତ୍ରୀଙ୍କ ଆହ୍ଵାନ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦି 2020 ସେପ୍ଟେମ୍ଵର 26 ତାରିଖରେ ଜାତିସଂଘର 75 ତମ ବାର୍ଷିକୀ ସମ୍ମିଳନୀରେ ଜାତିସଂଘର ମୂଳ ମିଶନ ଅସମ୍ପୂର୍ଣ୍ଣ ରହିଛି ବୋଲି ହୃଦୟଙ୍ଗମ କରି ଜାତିସଂଘର ସାଧାରଣ ପରିଷଦକୁ ସମ୍ଵୋଧିତ କରି ଶାନ୍ତି, ସୁରକ୍ଷା ଏବଂ ବିକାଶ ଏହାର ଭବିଷ୍ୟତ ପାଇଁ ଏକ ଦୃଷ୍ଟିକୋଣ ବୋଲି ବର୍ଣ୍ଣନା କରିଛନ୍ତି ।

ଏହି ଦୂରଦୃଷ୍ଟିକୁ ସଫଳ କରିବା ପାଇଁ ପରିବର୍ତ୍ତନର ଆବଶ୍ୟକତା ଉପରେ ସେ ଗୁରୁତ୍ଵ ଦେଇଛନ୍ତି | ପ୍ରଧାନମନ୍ତ୍ରୀ କହିଛନ୍ତି ଯେ 1945 ମସିହାରେ ଯେଉଁ ଉଦ୍ଧେଶ୍ୟରେ ଜାତିସଂଘ ଗଠନ କରାଯାଇଥିଲା ସେଥିରେ ଗତ 75 ବର୍ଷ ମଧ୍ୟରେ ବହୁତ ପରିବର୍ତ୍ତନ ହୋଇଛି । ଜାତିସଂଘର ପ୍ରତିଷ୍ଠାତା ସଦସ୍ୟ ଭାବରେ ଭାରତ “ଏହି ମହାନ ଅନୁଷ୍ଠାନର ପ୍ରାସଙ୍ଗିକତା ବଜାୟ ରଖିବା” ପାଇଁ ପ୍ରତିବଦ୍ଧ ରହିଛି । ଅବଶ୍ୟ, ଏକବିଂଶ ଶତାବ୍ଦୀର ଆବଶ୍ୟକତା ଏବଂ ଆହ୍ଵାନଗୁଡ଼ିକ ଅତୀତଠାରୁ ଭିନ୍ନ ଥିଲା | ସେ କହିଛନ୍ତି ଯେ ବର୍ତ୍ତମାନ ସମୟର ଆବଶ୍ୟକତା ହେଉଛି କାର୍ଯ୍ୟରେ, ପ୍ରକ୍ରିୟାରେ ଏବଂ ମିଳିତ ଜାତିସଂଘର ବୈଶିଷ୍ଠରେ ସଂସ୍କାର ଆଣିବା ।

ଜାତିସଂଘ ସୁରକ୍ଷା ପରିଷଦର ଏହି ସଂସ୍କାରର ମୂଳ ଅଂଶ ବିଫଳ ହେବାରୁ ବିବାଦ ରୋକିବାରେ ଅସଫଳ, ଗୃହଯୁଦ୍ଧ ଏବଂ ଆତଙ୍କବାଦୀ ଆକ୍ରମଣ ଯୋଗୁଁ ଶହ ଶହ ହଜାର ହଜାର ଶିଶୁଙ୍କ ସମେତ ଅନେକ ସାଧାରଣ ମଣିଷଙ୍କ ମୃତ୍ୟୁ ଘଟୁଛି। ସଂଘର୍ଷ ଯୋଗୁଁ ଲକ୍ଷ ଲକ୍ଷ ଲୋକ ବାସହୀନ ହୋଇ ଶରଣାର୍ଥୀ ହୋଇଛନ୍ତି।

ଶ୍ରୀ ମୋଦୀ କହିଛନ୍ତି ଯେ ଭାରତର 1.3 ବିଲିୟନ ଲୋକ ସଂସ୍କାର ପାଇଁ ଦୀର୍ଘ ସମୟ ଧରି ଅପେକ୍ଷା କରିଛନ୍ତି। ଜାତିସଂଘ ସୁରକ୍ଷା ପରିଷଦର ନିଷ୍ପତ୍ତି ସଂରଚନାରେ ଭାରତକୁ ସାମିଲ କରିବା ଉପରେ ସଂସ୍କାରଗୁଡ଼ିକର ଯୁକ୍ତିସଂଗତ ସିଦ୍ଧାନ୍ତ ରହିଥିଲା।

ପରିଷଦରେ ଭାରତର ସ୍ଥାୟୀ ଉପସ୍ଥିତି ମିଳିତ ଜାତିସଂଘକୁ ବିଶ୍ୱର ସର୍ବବୃହତ ଗଣତନ୍ତ୍ର ଭାବରେ ଭାରତର ଅଭିଜ୍ଞତାରୁ ଉପକୃତ କରିବାକୁ ସକ୍ଷମ କରିବ, ଯାହାକି ବିଶ୍ଵ ଜନସଂଖ୍ୟାର 18 ପ୍ରତିଶତ ପ୍ରତିନିଧିତ୍ୱ କରୁଛି। ଏହା ଏକ ପରିବାର ଭାବରେ ମିଳିତ ଜାତିସଂଘର ଦୂରଦୃଷ୍ଟିକୁ ସୁଦୃଢ କରିବ, ଭାରତୀୟ ସଭ୍ୟତାର ବସୁଧୈବ କୁଟୁମ୍ଵକମ ଦୃଷ୍ଟିକୋଣକୁ ପ୍ରତିଫଳିତ କରିବ ଯାହା ବିଶ୍ୱ କଲ୍ୟାଣକୁ ପ୍ରାଧାନ୍ୟ ଦେଇଥାଏ |

ପ୍ରଧାନମନ୍ତ୍ରୀ 2 ଅକ୍ଟୋବରରେ ଆନ୍ତର୍ଜାତୀୟ ଅହିଂସା ଦିବସ ଏବଂ 21 ଜୁନ୍ ରେ ଆନ୍ତର୍ଜାତୀୟ ଯୋଗ ଦିବସ, ବିପର୍ଯ୍ୟୟ ମୁକାବିଲା ଭିତ୍ତିଭୂମି ତଥା ଆନ୍ତର୍ଜାତୀୟ ସୌର ମେଣ୍ଟକୁ ଶାନ୍ତି, ମାନବ ଏବଂ ପ୍ରକୃତି ମଧ୍ୟରେ ସହାବସ୍ଥାନ ତଥା ସ୍ଥାୟୀ ବିକାଶ ପାଇଁ ଭାରତର ପ୍ରତିବଦ୍ଧତାର ନିଦର୍ଶନ ଭାବେ ଦର୍ଶାଇଛନ୍ତି |

ଲାଗି ରହିଥିବା କୋଭିଡ -19 ମହାମାରୀ ସମୟରେ ଭାରତ 150 ରୁ ଅଧିକ ଦେଶକୁ ଅତ୍ୟାବଶ୍ୟକ ଔଷଧ ପଠାଇଥିଲା, ବିଷୟ ଉଲ୍ଲେଖ କରି ପ୍ରଧାନମନ୍ତ୍ରୀ ମୋଦି ବିଶ୍ୱ ସମୁଦାୟକୁ ଆଶ୍ୱାସନା ଦେଇଥିଲେ ଯେ ଭାରତର ଟିକା ଉତ୍ପାଦନ ଏବଂ ବିତରଣ କ୍ଷମତା ବିଶ୍ଵ ସ୍ତରରେ ବ୍ୟବହୃତ ହେବ, ସମସ୍ତ ଦେଶରେ ଏହି ଟିକା ବିତରଣ ଏବଂ ଭଣ୍ତାରଣ ହେବ |

ମହାମାରୀ ପରବର୍ତ୍ତୀ ସମୟ ପାଇଁ ଭାରତ ଏକ “ଆତ୍ମନିର୍ଭରଶୀଳ ଭାରତ” ହେବ ବୋଲି ପ୍ରଧାନମନ୍ତ୍ରୀ ଘୋଷଣା କରି କହିଥିଲେ ଯେ ଏହା ବିଶ୍ୱ ଅର୍ଥନୀତିକୁ ଶକ୍ତିଶାଳି କରିବ । ବିଗତ ପାଞ୍ଚ ବର୍ଷ ମଧ୍ୟରେ ଭାରତରେ ଘଟିଥିବା ପରିବର୍ତ୍ତନ କୁ ପ୍ରଧାନମନ୍ତ୍ରୀ ମୋଦୀ ଉଲ୍ଲେଖ କରି କହିଛନ୍ତି ଯେ ଏହା ଦ୍ଵାରା ଶହ ଶହ କୋଟି କୋଟି ଲୋକ ଆନୁଷ୍ଠାନିକ ଆର୍ଥିକ କ୍ଷେତ୍ରରେ ପ୍ରବେଶ କରିପାରିବେ, ଖୋଲାରେ ଶୌଚରୁ ମୁକ୍ତ ହୋଇପାରିବେ ଏବଂ ମାଗଣା ସ୍ୱାସ୍ଥ୍ୟ ସେବା ପାଇପାରିବେ। ଉଦ୍ୟୋଗୀତା ଏବଂ ନେତୃତ୍ୱର ପ୍ରୋତ୍ସାହନ, ମାଇକ୍ରୋ ଫାଇନାନ୍ସ ଏବଂ ବେତନଯୁକ୍ତ ମାତୃତ୍ୱ ଛୁଟି ମାଧ୍ୟମରେ ମହିଳାଙ୍କ ସଶକ୍ତିକରଣ ଭାରତର ଭେଦଭାବ ବିହୀନ ବିକାଶ ନୀତିରେ ଅବିଚ୍ଛେଦ୍ୟ ଅଂଶ ହୋଇ ରହିଛି । ପ୍ରଧାନମନ୍ତ୍ରୀ କହିଛନ୍ତି ଯେ ଡିଜିଟାଲ୍ କାରବାରରେ ଭାରତ ଅନ୍ୟତମ ଅଗ୍ରଣୀ ଦେଶ ଏବଂ ନିଜ ବିକାଶର ଅଭିଜ୍ଞତା ବାଣ୍ଟିବାକୁ ଭାରତ କେବେ ବି ଦ୍ୱିଧାବୋଧ କରି ନାହିଁ।

ମିଳିତ ଜାତିସଂଘର ବିସ୍ତାରିତ ଭୂମିକା ପାଇଁ ଭାରତର ଗୁରୁତ୍ୱପୂର୍ଣ୍ଣ ଅବଦାନ ଉପରେ ପ୍ରଧାନମନ୍ତ୍ରୀ ଗୁରୁତ୍ୱାରୋପ କରିଥିଲେ। ଜାତିସଂଘର ଶାନ୍ତି ରକ୍ଷାକାରୀ ବାହିନୀଙ୍କ ମଧ୍ୟରେ ଭାରତର ସାହସୀ ସୈନିକମାନେ ସର୍ବାଧିକ ସଂଖ୍ୟକ ଶହିଦ ହୋଇଛନ୍ତି। ବିଶ୍ୱ ଶାନ୍ତି ବଜାୟ ରଖିବା ପାଇଁ ସୁରକ୍ଷା ପରିଷଦ ଦ୍ଵାରା ପ୍ରାୟ 50 ଟି ଶାନ୍ତି ରକ୍ଷା ମିଶନରେ ଭାରତୀୟ ସୈନ୍ୟ ନିୟୋଜିତ ହୋଇଛନ୍ତି। ଭାରତର ବୈଦେଶିକ ନୀତିରେ ‘ପଡୋଶୀ ପ୍ରଥମ’ ନୀତି ଏବଂ ‘ଆକ୍ଟ ଇଷ୍ଟ’ ନୀତି, ‘ଅଞ୍ଚଳରେ ସମସ୍ତଙ୍କ ପାଇଁ ସୁରକ୍ଷା ଏବଂ ଅଭିବୃଦ୍ଧି’ ପ୍ରତି ଭାରତର ବିଶ୍ୱବ୍ୟାପୀ ଶାନ୍ତି ଏବଂ ସହଯୋଗ ପାଇଁ ପ୍ରତିବଦ୍ଧତା ଦର୍ଶାଉଛି ବୋଲି ସେ କହିଛନ୍ତି |

ଆସନ୍ତା ବର୍ଷ ଜାନୁୟାରୀରୁ ଜାତିସଂଘ ସୁରକ୍ଷା ପରିଷଦରେ ଭାରତକୁ ଚୟନ କରିଥିବାରୁ ଆନ୍ତର୍ଜାତୀୟ ସମୁଦାୟକୁ ଧନ୍ୟବାଦ ଜଣାଇ ପ୍ରଧାନମନ୍ତ୍ରୀ କହିଛନ୍ତି ଯେ ସମଗ୍ର ବିଶ୍ୱର ହିତ ପାଇଁ ଭାରତ ନିଜର ଅଭିଜ୍ଞତାକୁ କାର୍ଯ୍ୟରେ ଲଗାଇବ। ଏହା ମିଳିତ ଜାତିସଂଘର ସ୍ଥିରତା ଏବଂ ସଶକ୍ତିକରଣରେ ସହାୟକ ହେବ ଯାହା ବିଶ୍ଵର କଲ୍ୟାଣ ପାଇଁ ଆବଶ୍ୟକ ଥିଲା।
ଆଲେଖ୍ୟ :ଅଶୋକ କୁମାର ମୁଖାର୍ଜୀ