କଣ ପାକିସ୍ତାନର ସର୍ବଦଳୀୟ ସମ୍ମିଳନୀ ନିଜ ଉଦ୍ଦେଶ୍ୟରେ ସଫଳ ହୋଇପାରିବ?

ପରିଶେଷରେ, ପାକିସ୍ତାନ ପିପୁଲ୍ସ ପାର୍ଟି (ପିପିପି) ର ଅଧ୍ୟକ୍ଷ ବିଲାୱାଲ ଭୂଟ୍ଟୋଙ୍କ ଆମନ୍ତ୍ରଣ କ୍ରମେ ପାକିସ୍ତାନର ବିରୋଧୀ ଦଳ ଗୁଡିକ ଏକ ସର୍ବଦଳୀୟ ସମ୍ମିଳନୀର ଆୟୋଜନ କରିବା ଓ ଭବିଷ୍ୟତ କାର୍ଯ୍ୟପନ୍ଥା ନିର୍ଦ୍ଧାରଣ ଲାଗି ମିଳିତ କାର୍ଯ୍ୟାନୁଷ୍ଠାନ ପାଇଁ ଏକ ଏଜେଣ୍ଡା ସ୍ଥିର କରିବାକୁ ଇସଲାମାବାଦରେ ଏକାଠି ହୋଇଥିଲେ | ଏହି ଶିଖର ସମ୍ମିଳନୀରେ ଅନ୍ୟ 12ଟି ବିରୋଧୀ ପାର୍ଟି ଯୋଗ ଦେଇଥିବା ବେଳେ ଜମାତ-ଇ-ଇସଲାମୀ ଯୋଗ ଦେଇନଥିଲା |

ଜୁଲାଇ 2018 ନିର୍ବାଚନ ଅନୁଷ୍ଠିତ ହେବା ପରଠୁ ବିରୋଧୀ ପାର୍ଟି ଗୁଡିକ ଚତୁର୍ଥ ଥର ଲାଗି ସର୍ବଦଳୀୟ ବୈଠକର ଆୟୋଜନ କରିଥିଲେ | ନିର୍ବାଚନର ତିନିଦିନ ପରେ 28 ଜୁଲାଇ 2018ରେ ପ୍ରଥମ ସର୍ବଦଳୀୟ ସମ୍ମିଳନୀ ଅନୁଷ୍ଠିତ ହୋଇଥିଲା | ଏହି ବୈଠକରେ ବିରୋଧୀ ଦଳ ଗୁଡିକ ଇମ୍ରାନ ଖାଁଙ୍କ ପାକିସ୍ତାନ ତେହେରିକ-ଇ-ଇନସାଫ ପାର୍ଟି ଅନିୟମିତତା କରି କିପରି ବିଜୟଲାଭ କରିଛି ସେ ନେଇ ବ୍ୟାପକ ଅଭିଯୋଗ କରିଥିଲେ | ଜେୟୁଆଇ –ଏଫ ଦ୍ଵାରା ଆହୁତ ଦୁଇଟି ବୈଠକ ଜୁନ 2019 ଓ ଜୁନ 2020ରେ ଅନୁଷ୍ଠିତ ହୋଇଥିଲା | ଏହି ବୈଠକରେ ବହୁତ କମ ସଦସ୍ୟ ଯୋଗ ଦେଇଥିଲେ ଓ ସରକାରଙ୍କ ଖରାପ ପ୍ରଦର୍ଶନ ନେଇ ବିବୃତ୍ତି ଜାରି କରିବା ବ୍ୟତିତ ଆଉ କୌଣସି ବିଷୟରେ ଆଲୋଚନା ହୋଇନଥିଲା |

ବହୁ ପାର୍ଟି ସମ୍ମିଳନୀ (ଏମପିସି) ନାମକ ଏହି ଏପିସି ପାକିସ୍ତାନ ସରକାରଙ୍କ ମୁକାବିଲା ଲାଗି ପ୍ରତିବଦ୍ଧତାର ସଂକେତ ଦେଇଛି | ଏହି ବୈଠକରେ ଇମ୍ରାନ ଖାଁଙ୍କ ଇସ୍ତଫା ଦାବି କରାଯାଇଥିଲା ଓ ଏକ 26-ସୂତ୍ରୀ ସଂକଳ୍ପ ସହ ବୈଠକର ସମାପନ ହୋଇଥିଲା | ଏକ ସର୍ବଦଳୀୟ ପାକିସ୍ତାନ ଡେମୋକ୍ରାଟିକ ମୁଭମେଣ୍ଟ (ପିଡ଼ିଏମ) ର ଆରମ୍ଭ କରିବା ଲାଗି ଏକ ତିନି ପର୍ଯ୍ୟାୟ ବିଶିଷ୍ଟ ସରକାରୀ ବିରୋଧୀ କାର୍ଯ୍ୟ ଯୋଜନା ଘୋଷଣା କରାଯାଇଥିଲା |

ପିଡ଼ିଏମ ଶୀଘ୍ର କାର୍ଯ୍ୟକାରୀ କରିବାକୁ ଯାଉଛି | ଡିସେମ୍ବରରେ ଦେଶବ୍ୟାପୀ ସାଧାରଣ ସଭା, ପ୍ରଦର୍ଶନ ଏବଂ ରାଲିର ଆୟୋଜନ କରାଯିବ ଓ ଜାନୁଆରୀ 2021ରେ ଇସଲାମାବାଦ ଅଭିମୁଖେ “ନିର୍ଣ୍ଣାୟକ ଦୀର୍ଘ ଶୋଭାଯାତ୍ରା “ ସହ ଏହାର ସମାପନ ହେବ | ପାର୍ଲିଆମେଣ୍ଟରେ ଅବିଶ୍ଵାସ ପ୍ରସ୍ତାବ ଆଗତ, ସାମୁହିକ ଇସ୍ତଫା ଓ ପ୍ରତିବାଦ ଭଳି ସବୁ ଗଣତାନ୍ତ୍ରିକ ପଦ୍ଧତି ଅବଲମ୍ବନ କରାଯିବ ବୋଲି ବିରୋଧୀ ନେତା ମାନେ କହିଛନ୍ତି |

ପିଏମଏଲ –ଏନ ଓ ପିପିପି ଭଳି ଦୁଇଟି ପ୍ରମୁଖ ରାଜନୈତିକ ପାର୍ଟିର ବରିଷ୍ଠ ନେତା ନୱାଜ ସରିଫ ଓ ଆସିଫ ଅଲି ଜର୍ଦାରୀ ଭିଡିଓ ଲିଙ୍କ ଜରିଆରେ ଲୋକମାନଙ୍କୁ ଉଦବୋଧନ ଦେଇଥିଲେ | ଏହି ସମୟରେ ସରିଫ ଖୋଲାଖୋଲି ଭାବେ ଇମ୍ରାନ ଖାଁ ସରକାର ଓ ଏହାର ସମର୍ଥକ ମାନଙ୍କୁ ସମାଲୋଚନା କରିଥିଲେ ଏବଂ କହିଥିଲେ ଯେ ଆମର ସଂଗ୍ରାମ ଇମ୍ରାନ ଖାଁଙ୍କ ବିରୋଧରେ ନୁହେଁ ବରଂ ସେମାନଙ୍କ ବିରୁଦ୍ଧରେ ଯେଉଁମାନେ ଇମ୍ରାନ ଖାଁଙ୍କ ଭଳି ଜଣେ ଅଯୋଗ୍ୟ ବ୍ୟକ୍ତିଙ୍କୁ କ୍ଷମତାସୀନ କରିବା ଲାଗି ନିର୍ବାଚନରେ ଅନିୟମିତତା କରିଥିଲେ ଓ ଦେଶକୁ ବରବାଦ କରିଦେଇଥିଲେ | ତେଣେ ପାକିସ୍ତାନ ସରକାର ତାଙ୍କ ଉଦବୋଧନକୁ ବନ୍ଦ କରିବାକୁ ବିବେଚନା କରୁଥିଲେ ହେଲେ ଶେଷରେ ଏଥିରୁ ଓହରି ଯାଇଥିଲେ ବୋଲି ଖବରରୁ ଜଣାପଡିଛି |

ମୂଲ୍ୟ ବୃଦ୍ଧିରୁ ସାମ୍ପ୍ରଦାୟିକତା, ଆତଙ୍କବାଦ ଉପରେ ଜାତୀୟ କାର୍ଯ୍ୟ ଯୋଜନା କାର୍ଯ୍ୟକାରୀ ନକରିବା, ନ୍ୟାୟୀକ ମାମଲାରେ ହସ୍ତକ୍ଷେପ, ରାଜନୈତିକ ବନ୍ଦୀ ମାନଙ୍କୁ ଖଲାସ କରିବା, ସିପିଇସି ଏବଂ ଏକ ସତ୍ୟ ଓ ପୁନଃସ୍ଥାପନା କମିଶନ ପ୍ରତିଷ୍ଠା କରିବା ପର୍ଯ୍ୟନ୍ତ ସବୁ କ୍ଷେତ୍ରରେ ପିଟିଆଇ ସରକାର କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ବିଫଳ ହୋଇଥିବା ଆଦି ବହୁ ପ୍ରସଙ୍ଗ ଉତଥାପନ କରାଯାଇଥିଲା | ରାଜନୀତିରେ ସଂସ୍ଥାନର ଭୂମିକାକୁ ପରିସମାପ୍ତି କରିବା ଲାଗି ଏପିସି ବୈଠକରେ ଆଲୋଚନା ହୋଇଥିଲା |

ଏହା ମଧ୍ୟ ଖବର ମିଳିଛି ଯେ ସେନାଧ୍ୟକ୍ଷ ବାଜୱା ଓ ଅନ୍ୟ 15 ଜଣ ବିରୋଧୀ ନେତାଙ୍କ ମଧ୍ୟରେ ଗତ ମାସ ଏକ ବୈଠକ ବସିଥିଲା | ଏହି ବୈଠକରେ ପିଏମଏଲ (ଏନ) ର ଶାହବାଜ ସରିଫ, (ପିପିପି) ର ବିଲାୱାଲ ଭୁଟ୍ଟୋ, (ଜେୟୁଆଇ)ର ଶିରାଜୁଲ ହକ, (ଏଏନପି)ର ଆମିର ହାଇଦର ହୋତି , (ଜେୟୁଆଇ –ଏଫ)ର ଆସାଦ ମେହମୁଦ ତଥା ଅନ୍ୟ ନେତା ମାନେ ଯୋଗ ଦେଇଥିଲେ | ଖବର ଅନୁଯାୟୀ ସରକାରଙ୍କ କେତେଜଣ ମନ୍ତ୍ରୀ ମଧ୍ୟ ଏହି ବୈଠକରେ ଯୋଗ ଦେଇଥିଲେ |

ଏହି ବୈଠକରେ ପାକିସ୍ତାନ ସେନାଧ୍ୟକ୍ଷ, ରାଜନୀତିରେ ସେନା ହସ୍ତକ୍ଷେପ କରିବ ନାହିଁ ବୋଲି ପ୍ରତିଶୃତି ଦେଇଛନ୍ତି ଓ ସେନାକୁ ଏଥିରେ ଟଣା ନଯାଉ ବୋଲି ନିବେଦନ କରିଛନ୍ତି ବୋଲି ଖବର ମିଳିଛି | ସେ ମଧ୍ୟ କହିଛନ୍ତି ଯେ କୌଣସି ରାଜନୈତିକ ଦଳ ସହ ସେନାର ପ୍ରତ୍ୟକ୍ଷ କିମ୍ବା ପରୋକ୍ଷ ସମ୍ପର୍କ ନାହିଁ କିନ୍ତୁ ଯେତେବେଳେ ବେସାମରିକ ପ୍ରଶାସନ ସେନାର ସାହାୟତା ଲୋଡିବ, ଏହା ସମ୍ବିଧାନ ଅନୁଯାୟୀ ସାହାଯ୍ୟ କରିବାକୁ ବାଧ୍ୟ ହେବ |

ସବୁଠୁ କୌତୁହଳପୂର୍ଣ୍ଣ କଥା ହେଲା ବିଲାୱାଲ ଭୁଟ୍ଟୋ ଜର୍ଦାରୀ ଏବଂ ପିଏମଏଲ-ଏନ ର କେତେଜଣ ନେତା ଭବିଷ୍ୟତରେ ସ୍ଵଚ୍ଛ ଓ ନିରପେକ୍ଷ ନିର୍ବାଚନ ନିଶ୍ଚିତ କରିବାକୁ ଜେନେରାଲ ବାଜାୱାଙ୍କୁ ଅନୁରୋଧ କରିଥିଲେ | ହେଲେ, କିଛି ସମୟପରେ ପିଏମଏଲ (ଏନ)ର ମାରିୟମ ସରିଫ ଏହି ବୈଠକରେ ଯୋଗ ଦେଇଥିବା ନେତା ମାନଙ୍କୁ ସମାଲୋଚନା କରି କହିଥିଲେ ଯେ ନିର୍ବାଚନ ଓ ଗଣତନ୍ତ୍ର ସଙ୍କ୍ରାନ୍ତୀୟ ଏଭଳି ପ୍ରସଙ୍ଗକୁ ଜିଏଚକିଉ, ରାୱାଲପିଣ୍ଡିରେ ନୁହେଁ ବରଂ ପାର୍ଲିଆମେଣ୍ଟରେ ଉତଥାପନ କରିବା ଉଚିତ |

ତେବେ ଏହି ବୈଠକ ବସିବାର କିଛି ଦିନ ପରେ ଜାତୀୟ ଉତ୍ତରଦାୟୀତ୍ଵ ବ୍ୟୁରୋ, ପାକିସ୍ତାନ ନେସନାଲ ଏସେମ୍ବ୍ଲିର ବିରୋଧୀ ଦଳ ନେତା ତଥା ପିଏମଏଲ (ଏନ) ସଦସ୍ୟ ଶାହାବାଜ ସରିଫଙ୍କୁ ଦୁର୍ନୀତି ମାମଲାରେ ଗିରଫ କରିଥିଲା | ପାକିସ୍ତାନ ପ୍ରଧାନମନ୍ତ୍ରୀ, ଲଣ୍ଡନରୁ ନୱାଜ ସରିଫଙ୍କୁ ଖୁବ ଶୀଘ୍ର ଫେରାଇ ଆଣିବାକୁ ଚାହୁଁଛନ୍ତି ବୋଲି ଜଣାପଡିଛି | ଏହି ପଦକ୍ଷେପ ଦୁର୍ନୀତି ବିରୁଦ୍ଧରେ ମୁକାବିଲା ଦିଗରେ ପ୍ରଧାନମନ୍ତ୍ରୀ ଭାବେ ଇମ୍ରାନ ଖାଁଙ୍କ ଭାବମୂର୍ତ୍ତିକୁ ଚିତ୍ରଣ କରିବାର ଏକ ପ୍ରୟାସ |

ପାକିସ୍ତାନ ସରକାର ଓ ବିରୋଧୀ ଦଳ ମଧ୍ୟରେ ଜାରି ରହିଥିବା ଅଚଳାବସ୍ଥା ନିକଟ ଭବିଷ୍ୟତରେ ଆହୁରି ଖରାପ ହେବାକୁ ଯାଉଥିବାର ସ୍ପଷ୍ଟ ପ୍ରତୀୟମାନ ହେଉଛି |

ଆଲେଖ୍ୟ : ଡଃ ଅଶୋକ ବେହୁରିଆ, ମନୋହର ପାରିକର ପ୍ରତିରକ୍ଷା ଅଧ୍ୟୟନ ଏବଂ ବିଶ୍ଳେଷଣ ପ୍ରତିଷ୍ଠାନ