ଆଞ୍ଚଳିକ ସ୍ଥିରତା ପାଇଁ ଭାରତ ଆଫଗାନିସ୍ଥାନ ଦ୍ଵିପକ୍ଷୀୟ ସଂପର୍କ ସୁଦୃଢ ଦିଗରେ ଅଗ୍ରଗତି

ସେପ୍ଟେମ୍ବର 12, 2020 ରେ କତାରର ରାଜଧାନୀ ଦୋହା ଠାରେ ଆରମ୍ଭ ହୋଇଥିବା ଆଫଗାନିସ୍ତାନ ସରକାର ଏବଂ ତାଲିବାନ ମଧ୍ୟରେ ଶାନ୍ତି କଥାବାର୍ତ୍ତା ମଧ୍ୟରେ ଆଫଗାନିସ୍ତାନର ପୂର୍ବତନ ମୁଖ୍ୟ କାର୍ଯ୍ୟନିର୍ବାହୀ ତଥା ବର୍ତ୍ତମାନର ଜାତୀୟ ପୁନଃ ନିର୍ମାଣ ପରିଷଦର ଅଧ୍ୟକ୍ଷ ଡକ୍ଟର ଅବଦୁଲ୍ଲା ଅବଦୁଲ୍ଲା ଭାରତକୁ ପାଞ୍ଚ ଦିନିଆ ଗସ୍ତ କରିଛନ୍ତି ଚାଲିଥିବା ଶାନ୍ତି ପ୍ରକ୍ରିୟା ପାଇଁ ଅଞ୍ଚଳରେ ଏକ ସହମତି ସୃଷ୍ଟି କରିବା ଦିଗରେ ଏହି ଗସ୍ତକୁ ଦେଖାଯାଉଛି | ଭାରତର ନିମନ୍ତ୍ରଣରେ ଡକ୍ଟର ଅବଦୁଲ୍ଲାଙ୍କ ଗସ୍ତ ଭାରତ ଏବଂ ଆଫଗାନିସ୍ତାନ ମଧ୍ୟରେ ଉଚ୍ଚ ସ୍ତରୀୟ ଆଲୋଚନାର ଏକ ଅଂଶବିଶେଷ । ତାଙ୍କ ପୂର୍ବରୁ ଆଫଗାନିସ୍ତାନ ପୁନଃ ନିର୍ମାଣ ଉପରେ ଆମେରିକାର ସ୍ୱତନ୍ତ୍ର ପ୍ରତିନିଧୀ ଜଲମାଇ ଖଲିଲଜାଦ ଏବଂ ଆଫଗାନିସ୍ତାନର ପ୍ରମୁଖ ନେତା ଅବଦୁଲ ରସିଦ ଦୋଷ୍ଟମ ସେପ୍ଟେମ୍ବର ମାସରେ ଭାରତ ଗସ୍ତ କରିଥିଲେ।

ଚାଲିଥିବା ଆଫଗାନିସ୍ତାନ ଶାନ୍ତି କଥାବାର୍ତ୍ତା ପାଇଁ ଡକ୍ଟର ଅବଦୁଲ୍ଲା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ, ବୈଦେଶିକ ବ୍ୟାପାର ମନ୍ତ୍ରୀ ଡକ୍ଟର ଏସ ଜୟଶଙ୍କର ଏବଂ ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲଙ୍କୁ ଭେଟିଛନ୍ତି। ଭାରତୀୟ ନେତୃତ୍ୱ ଆଫଗାନିସ୍ତାନ-ତାଲିବାନ ଆଲୋଚନାକୁ ସମ୍ପୂର୍ଣ୍ଣ ସମର୍ଥନ ଜଣାଇଛନ୍ତି। ଗତ ମାସରେ ଭିଡିଓ କନଫରେନସିଙ୍ଗ ମାଧ୍ୟମରେ ଶାନ୍ତି ଆଲୋଚନାର ଉଦଘାଟନୀ ଭାଷଣରେ ଡକ୍ଟର ଜୟଶଙ୍କର ଆଫଗାନିସ୍ତାନର ନେତୃତ୍ୱାଧୀନ, ଆଫଗାନିସ୍ତାନ ମାଲିକାନା ଏବଂ ଆଫଗାନିସ୍ତାନ ନିୟନ୍ତ୍ରିତ ବୁଝାମଣାର ସିଦ୍ଧାନ୍ତକୁ ଭାରତ ସମର୍ଥନ କରୁଥିବା କହିଥିଲେ । ଦୋହାରେ ହୋଇଥିବା କଥାବାର୍ତ୍ତାର ଉଦଘାଟନୀ ଉତ୍ସବରେ ଏକ ଭାରତୀୟ ପ୍ରତିନିଧୀ ମଧ୍ୟ ଉପସ୍ଥିତ ଥିଲେ। ଶାନ୍ତି ଆଲୋଚନାରେ ଭାରତ ସାମିଲ ହେଉ ବୋଲି ଆଫଗାନିସ୍ତାନ ଭାରତକୁ ଅନୁରୋଧ କରୁଛି । ତାଲିବାନ ସହ ସିଧାସଳଖ ଜଡିତ ହେବା ନେଇ ଭାରତ ଏପର୍ଯ୍ୟନ୍ତ ନିରବ ରହିଛି। ତେଣୁ ଆଫଗାନିସ୍ତାନ ଦୃଷ୍ଟିକୋଣରୁ ବୈଦେଶିକ ବ୍ୟାପାର ମନ୍ତ୍ରୀ ଏହି ବୈଠକରେ ଅଭିଭାଷଣ ଦେବା ଏକ ଗୁରୁତ୍ୱପୂର୍ଣ୍ଣ କଥା ବୋଲି ବିବେଚନା କରାଯାଇପାରେ।

ଆଫଗାନିସ୍ତାନର ଭବିଷ୍ୟତ ଗଠନରେ ଭାରତର ଗୁରୁତ୍ୱପୂର୍ଣ୍ଣ ଭୂମିକା ରହିଛି ବୋଲି ଡକ୍ଟର ଅବଦୁଲ୍ଲା କହିଛନ୍ତି। ଭାରତ ଏବଂ ଆଫଗାନିସ୍ତାନ ଗଭୀର ଐତିହାସିକ ସଂପର୍କରେ ଆବଦ୍ଧ ଏବଂ ବର୍ଷ ବର୍ଷ ଧରି ଭାଗିଦାରୀ ଭାବରେ ରହି ଆସିଛନ୍ତି | ଆଫଗାନିସ୍ତାନର ସ୍ଥିରତା ପାଇଁ ଭାରତର ବୃହତ୍ ଯୋଗଦାନ ଅଛି କାରଣ ସେଠାରେ ପୁନଃ ନିର୍ମାଣ କାର୍ଯ୍ୟରେ ଏହା ବହୁତ ଅବଦାନ ରଖିଛି | ଏହା ମଧ୍ୟ ପାକିସ୍ତାନ-ତାଲିବାନ ଜାଣିବା ଆବଶ୍ୟକ ଯାହାକି ଭାରତର ସୁରକ୍ଷା ସ୍ୱାର୍ଥ ବିରୁଦ୍ଧରେ ନିରନ୍ତର କାର୍ଯ୍ୟ କରିଛି। ଆଫଗାନିସ୍ତାନରେ ଶାନ୍ତି କେବଳ ତାଲିବାନକୁ ଆଣିବା ଦ୍ୱାରା ସମ୍ଭବ, ବୋଲି ରାଜନୈତିକ ବିଶେଷଜ୍ଞମାନଙ୍କମାନେ ହୃଦୟଙ୍ଗମ କରିଛନ୍ତି । ଆମେରିକା ଏବଂ ତାଲିବାନ ମଧ୍ୟରେ ସ୍ୱାକ୍ଷରିତ ଫେବୃଆରୀ 2020 ଶାନ୍ତି ଚୁକ୍ତି ଅନ୍ତର୍ଗତ ବର୍ତ୍ତମାନର ଆଫଗାନିସ୍ତାନ ଶାନ୍ତି ଆଲୋଚନା ଚାଲିଛି। ଆଫଗାନିସ୍ତାନର ରାଜନୈତିକ ଏବଂ ସାମାଜିକ ଦୃଶ୍ୟପଟ୍ଟର ଅସମାନତାକୁ ଦୃଷ୍ଟିରେ ରଖି ଏହା ଏକାନ୍ତ ଆବଶ୍ୟକ ଯେ ଭାରତ ସମେତ ସମସ୍ତ ଅଂଶୀଦାର ଏହି ପ୍ରକ୍ରିୟାରେ ଯଥାସମ୍ଭବ ସାମିଲ ହେବା ଉଚିତ ଯାହାଦ୍ଵାରା ଶାନ୍ତି ବ୍ୟବସ୍ଥା ସଫଳ ହୋଇ ପାରିବ।

ଏକ ଉଲ୍ଲେଖନୀୟ ଦିଗ ହେଉଛି ଆଫଗାନିସ୍ତାନରେ ଶାନ୍ତି ପ୍ରତିଷ୍ଠା ଦିଗରେ ସହଯୋଗ କରିବାକୁ ଇସଲାମାବାଦକୁ ପ୍ରବର୍ତ୍ତାଇବା ପାଇଁ ଆଫଗାନିସ୍ତାନର ନେତୃତ୍ୱ ମଧ୍ୟ ପାକିସ୍ତାନ ନିକଟରେ ପହଞ୍ଚିଛନ୍ତି। ଏହାର କାରଣ ହେଉଛି ପାକିସ୍ତାନ ତାଲିବାନ ସହିତ ଦୀର୍ଘ ଦିନର ସଂପର୍କ ରହିଛି। ତେଣୁ ପାକିସ୍ତାନର ଜଣେ ସମାଲୋଚକ ଥିବା ଡକ୍ଟର ଅବଦୁଲ୍ଲା ଏବେ ପାକିସ୍ତାନ ନେତୃତ୍ୱ ସହ ଆଲୋଚନା କରିବା ଦେଖିବାକୁ ମିଳୁଛି । ତାଲିବାନ ସହ ପାକିସ୍ତାନର ସମ୍ପର୍କ ଥିବାରୁ ଆମେରିକାର ସ୍ୱତନ୍ତ୍ର ପ୍ରତିନିଧୀ ଖାଲିଲଜାଦ ମଧ୍ୟ ଇସଲାମାବାଦ ଗସ୍ତ କରିଥିଲେ। ପ୍ରସ୍ଥାବିତ ଆମେରିକୀୟ ସୈନ୍ୟବାହିନୀର ପ୍ରତ୍ୟାହାର ଏବଂ ଆଫଗାନିସ୍ତାନରେ ଶାନ୍ତି ଫେରାଇ ଆଣିବା ବିଷୟ ମଧ୍ୟ ଆଗାମି ଦିନରେ ଗୁରୁତ୍ୱପୂର୍ଣ୍ଣ ହେବ।

ଆଫଗାନିସ୍ତାନ ଶାନ୍ତି ପ୍ରକ୍ରିୟାକୁ ଭାରତ ସ୍ୱାଗତ କରିଥିବାବେଳେ ଆଫଗାନିସ୍ତାନ ନେତୃତ୍ୱକୁ ମଧ୍ୟ ଚେତାବନୀ ଦେଇଛି ଯେ ଆଫଗାନିସ୍ତାନର ମାଟିରୁ ହିଂସା ନଘଟାଇବା ପର୍ଯ୍ୟନ୍ତ ଏହି ପ୍ରକ୍ରିୟା ଯେପରି ଶେଷ ନହୁଏ। ଆଫଗାନିସ୍ତାନରେ ସଂଖ୍ୟାଲଘୁ ଏବଂ ମହିଳାଙ୍କ ଅଧିକାର ସୁରକ୍ଷିତ ରଖିବା ପ୍ରସଙ୍ଗ ମଧ୍ୟ ଭାରତ ଉଠାଇଥିଲା ଏବଂ ଆଫଗାନିସ୍ତାନରେ ତାଲିବାନର ପ୍ରସ୍ତାବିତ ହାନାଫି ଇସଲାମକୁ ନେଇ ବିବାଦ ଉପରେ ନିଜର ଆଭିମୁଖ୍ୟ ସ୍ପଷ୍ଟ କରିଥିଲା।

ଆଲେଖ୍ୟ: ଡକ୍ଟର ପ୍ରିୟଙ୍କା ସିଂହ