ଆଞ୍ଚଳିକ ଅଖଣ୍ତତାକୁ ସମ୍ମାନ ଦେବା ପାଇଁ ଏସ୍‌ସିଓ ରାଷ୍ଟ୍ରଙ୍କୁ ପ୍ରଧାନମନ୍ତ୍ରୀଙ୍କ ଆହ୍ବାନ

ଆଠ ସଦସ୍ୟ ବିଶିଷ୍ଟ ସାଂଘାଇ ସହଯୋଗ ସଂଗଠନ (ଏସ୍‌ସିଓ) ର ଭର୍ଚୁଆଲ୍ ସମ୍ମିଳନୀ ରୁଷର ଅଧ୍ୟକ୍ଷତାରେ ଅନୁଷ୍ଠିତ ହୋଇଛି । ସମଗ୍ର ବିଶ୍ୱରେ ଲୋକଙ୍କ ସ୍ୱାସ୍ଥ୍ୟ ତଥା ସାମାଜିକ-ଅର୍ଥନୈତିକ ଅବସ୍ଥା ଉପରେ କରୋନାର ଅପ୍ରତ୍ୟାଶିତ ପ୍ରଭାବର ପୃଷ୍ଠଭୂମିରେ ଏହି ବୈଠକ ଅନୁଷ୍ଠିତ ହେଇଥିଲା । ଆରମ୍ଭ ହେବା ଦିନଠାରୁ ଏସ୍‌ସିଓନିଜକୁ ବିଶ୍ୱଶୃଙ୍ଖଳାର ଏକ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ଭାବରେ ପ୍ରତିଷ୍ଠିତ କରିପାରିଛି ଏବଂ ଶାନ୍ତି ଓ ସ୍ଥିରତା ବଜାୟ ରଖିବା ସହ ଏହି ଅଞ୍ଚଳର ବିକାଶକୁ ସୁଗମ କରିବାରେ ସ୍ବତନ୍ତ୍ର ଭୂମିକା ନିର୍ବାହ କରୁଛି ।

ସାଂଘାଇ ସହଯୋଗ ସଂଗଠନର ଭର୍ଚୁଆଲ ସମ୍ମିଳନୀକୁ ସମ୍ବୋଧିତ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ରୁଷର ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ସଂଗଠନର ଦକ୍ଷ ନେତୃତ୍ୱ ପାଇଁ ତଥା କୋଭିଡ -19 ମହାମାରୀ ଦ୍ବାରା ସୃଷ୍ଟ ଆହ୍ବାନ ତଥା ପ୍ରତିବନ୍ଧକ ସତ୍ତ୍ବେ ଏହି ସମ୍ମିଳନୀ ଆୟୋଜନ କରିଥିବାରୁ ଧନ୍ୟବାଦ ଅର୍ପଣ କରିଛନ୍ତି । ପ୍ରଧାନମନ୍ତ୍ରୀ ମୋଦୀ ସଦସ୍ୟ ଦେଶଗୁଡ଼ିକୁ ପରସ୍ପରର ଆଞ୍ଚଳିକ ଅଖଣ୍ଡତାକୁ ସମ୍ମାନ କରିବାକୁ ଅନୁରୋଧ କରିଛନ୍ତି । ସେ କହିଛନ୍ତି ଯେ ଯେତେବେଳେ ସାଂଘାଇ ସହଯୋଗ ସଂଗଠନ ଦେଶଗୁଡ଼ିକ ଭାରତ ସହ ଘନିଷ୍ଠ ସାଂସ୍କୃତିକ ଏବଂ ଐତିହାସିକ ସମ୍ପର୍କ ବଜାୟ ରଖନ୍ତି ସେତେବେଳେ ଏହି ସଂଯୋଗକୁ ଗଭୀର କରିବାକୁ ଭାରତ ବିଶ୍ୱାସ କରେ । ପରସ୍ପରର ସାର୍ବଭୌମତ୍ୱ ଏବଂ ଆଞ୍ଚଳିକ ଅଖଣ୍ଡତାକୁ ସମ୍ମାନ ଦେବା ପାଇଁ ମୂଳ ନୀତିଗୁଡିକ ସହିତ ଆଗକୁ ଯିବା ଆବଶ୍ୟକ । ଏଠାରେ ଉଲ୍ଲେଖଯୋଗ୍ୟ ଯେ, ସାଂଘାଇ ସହଯୋଗ ସଂଗଠନର ଚାର୍ଟର୍, ଅନ୍ୟାନ୍ୟ ବିଷୟ ମଧ୍ୟରେ, ସାର୍ବଭୌମତ୍ୱ, ସ୍ବାଧୀନତା, ରାଜ୍ୟଗୁଡିକର ଆଞ୍ଚଳିକ ଅଖଣ୍ଡତା ଏବଂ ରାଜ୍ୟ ସୀମା​ରେ ଅହିଂସା, ଆକ୍ରୋଶହୀନତା ଏବଂ ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ ନକରିବା ଉପରେ ଗୁରୁତ୍ୱାରୋପ କରିଛି । ମେ ମଧ୍ୟଭାଗରୁ ଭାରତ-ଚୀନ୍ ସୀମାରେ ଥିବା ଲାଇନ୍ ଅଫ୍ ଆକ୍ଚୁଆଲ୍ କଣ୍ଟ୍ରୋଲରେ ଭାରତ ଏବଂ ଚୀନ୍ ସୈନ୍ୟବାହିନୀ ମଧ୍ୟରେ ଚାଲିଥିବା ଷ୍ଟାଣ୍ଡ-ଅଫ୍ ପୃଷ୍ଠଭୂମିରେ ଭାରତୀୟ ପ୍ରଧାନମନ୍ତ୍ରୀଙ୍କ ଖୋଲାଖୋଲି ନିଜର ବାର୍ତ୍ତା ସ୍ପଷ୍ଟ କରିଛନ୍ତି । ଦୁଇ ଦେଶ ବର୍ତ୍ତମାନ ସମସ୍ୟାବହୁଳ ଅବସ୍ଥା ଦେଇ ଗତି କରୁଛନ୍ତି । ଦୁଇ ଦେଶ ସୀମାରେ ସାମରିକ ଷ୍ଟାଣ୍ଡ-ଅଫ୍‌ର ଶାନ୍ତିପୂର୍ଣ୍ଣ ସମାଧାନ, ସଦସ୍ୟ ରାଷ୍ଟ୍ରଙ୍କ ମଧ୍ୟରେ ଉତ୍ତମ ପାରସ୍ପରିକ ବିଶ୍ୱାସ ଏବଂ ବନ୍ଧୁତ୍ୱର ପ୍ରଶଂସନୀୟ ଲକ୍ଷ୍ୟକୁ ବହୁଗୁଣିତ କରିବ ।

ଏସ୍‌ସିଓ ପରି ବହୁପକ୍ଷୀୟ ଫୋରମରେ ଦ୍ୱିପାକ୍ଷିକ ପ୍ରସଙ୍ଗ ଉଠାଇବାକୁ ପାକିସ୍ତାନର ପ୍ରୟାସକୁ ନେଇ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଏସ୍‌ସିଓ ଏଜେଣ୍ଡାରେ ଦ୍ୱିପାକ୍ଷିକ ପ୍ରସଙ୍ଗ ଆଣିବା ଦୁର୍ଭାଗ୍ୟଜନକ ଯେଉଥିପାଇଁ ବାରମ୍ବାର ଚେଷ୍ଟା କରାଯାଉଛି ଏବଂ ଯାହା ସହଯୋଗ ସଂଗଠନ ଚାର୍ଟର୍ ଓ ଏହାରୀ ଆଭିମୁଖ୍ୟକୁ ଉଲ୍ଲଂଘନ କରୁଛି । ମନେପକାଇ ଦିଆଯାଇପାରେ ଯେ ଗତ ବର୍ଷ ବିସ୍‌କେକ୍‌ ଏସସିଓ ଶିଖର ସମ୍ମିଳନୀରେ ଶ୍ରୀ ମୋଦୀ ଚୀନ୍ ରାଷ୍ଟ୍ରପତି ସିଙ୍କୁ କହିଥିଲେ ଯେ ସେ ପାକିସ୍ତାନ ସହ ଶାନ୍ତି ପ୍ରତିଷ୍ଠା ପାଇଁ ଉଦ୍ୟମ କରାଯାଉଛି ; କିନ୍ତୁ ତାଙ୍କର ଉଦ୍ୟମ ବିଫଳ ହୋଇଛି । ସେ ଆହୁରି ମଧ୍ୟ କହିଛନ୍ତି ଯେ ପାକିସ୍ତାନକୁ ଆତଙ୍କବାଦ ମୁକ୍ତ ପରିବେଶ ସୃଷ୍ଟି କରିବା ଆବଶ୍ୟକ । ବାସ୍ତବରେ ଆତଙ୍କବାଦ ଜନିତ ବିପଦକୁ ମୁକାବିଲା କରିବା ସଂଗଠନର ଏକ ପ୍ରମୁଖ ଉଦ୍ଦେଶ୍ୟ ହେବା ବାଞ୍ଛନୀୟ ।

ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ ଏହା ମଧ୍ୟ ଉଲ୍ଲେଖ କରିଛନ୍ତି ଯେ କରୋନା ମହାମାରୀ ସମୟରେ ଭାରତର ଫାର୍ମା ଶିଳ୍ପ 150 ରୁ ଅଧିକ ଦେଶକୁ ଅତ୍ୟାବଶ୍ୟକ ଔଷଧ ଯୋଗାଉଛି । ସେ 2021 ମସିହାରେ ଏସ୍‌ସିଓର 20 ତମ ବାର୍ଷିକୀକୁ ‘ସଂସ୍କୃତିର ଏସ୍‌ସିଓ ବର୍ଷ’ ଭାବରେ ପାଳନ କରିବା ପାଇଁ ଭାରତର ଆଗ୍ରହ ଜଣାଇଥିଲେ ଏବଂ ଭାରତର ଜାତୀୟ ସଂଗ୍ରହାଳୟ ଦ୍ୱାରା ଆୟୋଜିତ ହେବାକୁ ଥିବା ‘ବୌଦ୍ଧ ଐତିହ୍ୟ’ ଉପରେ ପ୍ରଥମ ଏସ୍‌ସିଓ ପ୍ରଦର୍ଶନୀ ଆୟୋଜନ କରିବା ପାଇଁ ଭାରତର ନିଜସ୍ୱ ପଦକ୍ଷେପ ଓ ଭାରତରେ ଏସ୍‌ସିଓ ଖାଦ୍ୟ ମହୋତ୍ସବ ଏବଂ ଦଶଟି ଆଞ୍ଚଳିକ ସାହିତ୍ୟ କୃତିକୁ ରୁଷୀୟ ଓ ଚାଇନିଜ ଅନୁବାଦ କରାଇବା ବିଷୟରେ କହିଥିଲେ । ମହାମାରୀର ସାମାଜିକ ତଥା ଆର୍ଥିକ ପ୍ରଭାବରେ ପୀଡିତ ବିଶ୍ବର ଆଶା ପୂରଣ କରିବା ପାଇଁ ସଂସ୍କାରିତ ବହୁପକ୍ଷୀୟତାର ମହତ୍ତ୍ୱ ଉପରେ ଶ୍ରୀ ମୋଦୀ ମଧ୍ୟ ଗୁରୁତ୍ୱାରୋପ କରିଥିଲେ ।

ଆସନ୍ତା ବର୍ଷ ଏସ୍‌ସିଓର ଚେୟାରମ୍ୟାନ୍ ଭାବରେ ଦାୟିତ୍ବ ଗ୍ରହଣ କରିଥିବାରୁ ତାଜିକିସ୍ତାନର ରାଷ୍ଟ୍ରପତି ଇମୋମାଲି ରହମାନଙ୍କୁ ଅଭିନନ୍ଦନ ଜଣାଇ ପ୍ରଧାନମନ୍ତ୍ରୀ ମୋଦୀ ଭାରତ ସମ୍ପୂର୍ଣ୍ଣ ସହଯୋଗ କରିବ ବୋଲି କହିଛନ୍ତି । ଶ୍ରୀ ମୋଦୀ ଏସ୍‌ସିଓ କାଉନସିଲ୍ ମୁଖ୍ୟଙ୍କ ପରବର୍ତ୍ତୀ ନିୟମିତ ବୈଠକ ଆୟୋଜନ କରିବାକୁ ଭାରତର ପ୍ରସ୍ତୁତି ବିଷୟରେ ଉଲ୍ଲେଖ କରିଛନ୍ତି । ପରିଷଦ ହେଉଛି ଏସ୍‌ସିଓର ସର୍ବୋଚ୍ଚ ସଂସ୍ଥା ଏବଂ ଏହା ପ୍ରାଥମିକତା ନିର୍ଣ୍ଣୟ କରେ ଏବଂ ସଂଗଠନର କାର୍ଯ୍ୟକଳାପର ପ୍ରମୁଖ କ୍ଷେତ୍ରଗୁଡ଼ିକୁ ବ୍ୟାଖ୍ୟା କରେ । ପରିଷଦ ବୈଠକ ଆୟୋଜନ କରିବାକୁ ଭାରତୀୟ ପ୍ରଧାନମନ୍ତ୍ରୀଙ୍କ ପ୍ରସ୍ତାବ ଏସ୍‌ସିଓକୁ ଉଦ୍ଦେଶ୍ୟ ସାଧନରେ ବାଟ କଢ଼ାଇବା ସହ ଭାରତ ଓ ଅନ୍ୟ ସଦସ୍ୟ-ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କ ବୃଦ୍ଧି କରିବ ।

ଏସ୍‌ସିଓର ସଫଳତା ସଦସ୍ୟ ରାଷ୍ଟ୍ରମାନଙ୍କ ମଧ୍ୟରେ ଏବଂ ପାରସ୍ପରିକ ଆସ୍ଥା ଏବଂ ବିଶ୍ୱାସ ଉପରେ ନିର୍ଭରଶୀଳ । ସଦସ୍ୟ-ରାଷ୍ଟ୍ରଗୁଡିକ ମଧ୍ୟରେ ନିରନ୍ତର ନିରାପତ୍ତା ଦ୍ୱନ୍ଦ୍ୱ ଏବଂ ବିଶ୍ୱାସ ଅଭାବ କେବଳ ସଂଗଠନର ବୃହତ ତଥା ସାମୂହିକ ସ୍ୱାର୍ଥ ଏବଂ ସଦସ୍ୟ-ଦେଶର ନିଜସ୍ବ ସ୍ୱାର୍ଥକୁ କ୍ଷତି ପହଞ୍ଚାଇବ । ଭାରତର ସମର୍ଥନ ତଥା ଏସ୍‌ସିଓକୁ ପ୍ରସାରିତ କରିବା ପାଇଁ ପ୍ରଧାନମନ୍ତ୍ରୀ ମୋଦୀଙ୍କ ଆଗ୍ରହ ଦୁଇ ପଡୋଶୀ ଦେଶ ମଧ୍ୟରେ ରହିଥିବା ସମସ୍ୟା ସମାଧାନର ଆଶା ବଢ଼ାଇଛି ।

ଆଲେଖ୍ୟ : ଡ. ରୂପନାରାୟଣ ଦାସ, ଚୀନ ବ୍ୟାପାର ରଣନୀତିକ ବିଶ୍ଳେଷକ