ଚକ୍ଷୁ କର୍କଟ ରୋଗ ଚିକିତ୍ସା କ୍ଷେତ୍ରରେ ଉଲ୍ଲେଖନୀୟ ସଫଳତା ହାସଲ କରିଛି ଭାରତ

ଭାରତ ଚକ୍ଷୁ କର୍କଟ ରୋଗର ଚିକିତ୍ସାରେ ଅତ୍ୟାଧୁନିକ ଜ୍ଞାନକୌଶଳ ବିକାଶ କରିବାରେ ସକ୍ଷମ ହୋଇଛି । ଯାହାକି ସାଧାରଣ ଲୋକଙ୍କ ପାଇଁ ଏକ ବଡ଼ ଆଶ୍ବସ୍ତିକର ବିଷୟ ହୋଇଛି | ଏହି ପଦ୍ଧତି ବ୍ୟୟବହୁଳ ମଧ୍ୟ ନୁହେଁ | ମୁମ୍ବାଇର ଭାବା ପରମାଣୁ ଗବେଷଣା କେନ୍ଦ୍ର (ବିଏଆରସି ) ଆଖିରେ ଟ୍ୟୁମରର ଚିକିତ୍ସା ପାଇଁ ପ୍ରଥମ ସ୍ୱଦେଶୀ ରୁଥେନିୟମ୍ 106 ପ୍ଲେକ୍ ଆକାରରେ ଏକ ଚକ୍ଷୁ କର୍କଟରୋଗ ଚିକିତ୍ସା ବିକଶିତ କରିଛି |

ଚକ୍ଷୁ ସହିତ ଜଡିତ ଟ୍ୟୁମର୍ କୁ ଓକୁଲାର୍ ଟ୍ୟୁମର୍ ବା ଚକ୍ଷୁ ଟ୍ୟୁମର୍ କୁହାଯାଏ | ଏକ ଟ୍ୟୁମର୍ ହେଉଛି କୋଷଗୁଡିକର ଏକ ସଂଗ୍ରହ ଯାହା ଅସ୍ୱାଭାବିକ ଭାବରେ ବଢିଥାଏ, ଏବଂ ଏହା କ୍ଷତିକାରକ (କର୍କଟ) କିମ୍ବା କ୍ଷତିକାରକ ହୋଇନଥାଏ | ଚକ୍ଷୁ ଟ୍ୟୁମରର ସାଧାରଣ ପ୍ରକାର ହେଉଛି ମେଟାଷ୍ଟାଟିକ୍ - ଏହା ହେଉଛି ଏକ ଗୌଣ ଟ୍ୟୁମର୍ ଯାହା କର୍କଟଦ୍ଵାରା ଶରୀରର ଗୋଟିଏ ଭାଗରୁ ଅନ୍ୟ ଭାଗକୁ ବ୍ୟାପିଥାଏ | ଏହା ପ୍ରାୟତଃ ଫୁସଫୁସ, ସ୍ତନ, ଅନ୍ତନଳୀ କିମ୍ବା ପ୍ରୋଷ୍ଟେଟରୁ ଆସିଥାଏ |

ଓକୁଲାର ମେଲାନୋମା ହେଉଛି ସବୁଠାରୁ ସାଧାରଣ ପ୍ରାଥମିକ ଟ୍ୟୁମର୍ ଯାହା ଆଖିରେ ସୃଷ୍ଟି ହୁଏ | ଏହାକୁ ବେଳେବେଳେ "ଉଭିଆଲ୍" ମେଲାନୋମା ବା "କୋରୋଇଡାଲ୍" ମେଲାନୋମା କୁହାଯାଏ | ଏହା ଆଖିର ପିଗମେଣ୍ଟେଡ୍ କୋଷରୁ ସୃଷ୍ଟି ହୋଇଥାଏ ଏବଂ ଆଇରିସ୍, ସିଲିୟାରି ଶରୀର ଏବଂ କୋରିଏଡ୍ ଆଦି ଆଖିର ତିନୋଟି ମୁଖ୍ୟ କ୍ଷେତ୍ରରେ ଦେଖାଯାଇଥାଏ | ଆଖିର ଏହି ତିନୋଟି ଅଞ୍ଚଳ ସାମୂହିକ ଭାବରେ “ଉଭେଆ” ସୃଷ୍ଟି କରିଥାନ୍ତି |

ମୁମ୍ବାଇର ଭାବା ପରମାଣୁ ଗବେଷଣା କେନ୍ଦ୍ର (ବିଏଆରସି ) ଅକୁଲାର ଟ୍ୟୁମରର ଚିକିତ୍ସା ପାଇଁ ପ୍ରଥମ ସ୍ୱଦେଶୀ ରୁଥେନିୟମ୍ 106 ପ୍ଲେକ୍ ଆକାରରେ ଏକ ଚକ୍ଷୁ କର୍କଟ ରୋଗ ଚିକିତ୍ସା ବିକଶିତ କରିଥିବାରୁ ଉତ୍ତର ପୂର୍ବାଞ୍ଚଳର ବିକାଶ, ପ୍ରଧାନମନ୍ତ୍ରୀ କାର୍ଯ୍ୟଳୟ , କର୍ମଚାରୀ ଓ ସର୍ବସାଧାରଣ ଆପତ୍ତି ଅଭିଯୋଗ, ପେନ୍ସନ୍, ପରମାଣୁ ଶକ୍ତି ଏବଂ ମହାକାଶ ବିଭାଗର ସ୍ଵାଧୀନ ଦାୟିତ୍ଵରେ ଥିବା କେନ୍ଦ୍ର ରାଷ୍ଟ୍ର ମନ୍ତ୍ରୀ ଡକ୍ଟର ଜିତେନ୍ଦ୍ର ସିଂ ଏହି କେନ୍ଦ୍ରର ଭୂୟସୀ ପ୍ରଶଂସା କରିଛନ୍ତି | ଏହି ପ୍ଲେକ୍ କୁ ନିୟନ୍ତ୍ରଣ କରିବା ଚିକିତ୍ସକଙ୍କ ପାଇଁ ଅତ୍ୟନ୍ତ ସୁବିଧାଜନକ ଏବଂ ଏହା ଆନ୍ତର୍ଜାତୀୟ ମାନକ ସହିତ ସମାନ ବୋଲି ବିଶ୍ଵାସ କରାଯାଉଛି |

ସୂଚନା ଯୋଗ୍ୟ ଯେ ଗତ ବର୍ଷ ଅକ୍ଟୋବରରେ ପରମାଣୁ ଶକ୍ତି ବିଭାଗର ଅଧ୍ୟକ୍ଷ ତଥା ସଚିବ ଡକ୍ଟର କେ ଏନ ବ୍ୟାସ ପରମାଣୁ ଶକ୍ତି ବିଭାଗର ଦାୟିତ୍ବରେ ଥିବା ରାଷ୍ଟ୍ରମନ୍ତ୍ରୀ ଡକ୍ଟର ଜିତେନ୍ଦ୍ର ସିଂଙ୍କ ସହିତ କଥାବାର୍ତ୍ତା କରି ପରମାଣୁ ଶକ୍ତି ବିଭାଗ ଦ୍ୱାରା ଚକ୍ଷୁ ଚିକିତ୍ସା ଓ ଏହି ବ୍ୟବସ୍ଥାର ବିକାଶର ସମ୍ଭାବନା ବିଷୟରେ ବିସ୍ତୃତ ଆଲୋଚନା କରିଥିଲେ । ଏହା ପରେ ଡକ୍ଟର ଜିତେନ୍ଦ୍ର ସିଂଙ୍କ ହସ୍ତକ୍ଷେପରେ ପରମାଣୁ ଶକ୍ତି ବିଭାଗ, ନୂଆଦିଲ୍ଲୀ ସ୍ଥିତ ସର୍ବଭାରତୀୟ ଭେଷଜ ବିଜ୍ଞାନ ପ୍ରତିଷ୍ଠାନ (ଏମ୍ସ) ଓ ଡଃ ରାଜେନ୍ଦ୍ର ପ୍ରସାଦ ଚକ୍ଷୁ ବିଜ୍ଞାନ କେନ୍ଦ୍ରସହ ସହଯୋଗ କରିଥିଲା । ଏହା ପରେ ଚକ୍ଷୁ କର୍କଟରୋଗର ଚିକିତ୍ସା ପାଇଁ ଭାବା ପରମାଣୁ ଗବେଷଣା କେନ୍ଦ୍ର (BARC) ଦ୍ୱାରା ବିକଶିତ ପ୍ଲେକ୍ ବ୍ୟବହାର କରିବାକୁ ନୂଆଦିଲ୍ଲୀର ଏମ୍ସ ରାଜି ହୋଇଥିଲା ଏବଂ ସେପ୍ଟେମ୍ବର 2020 ରେ ଏହାକୁ ପ୍ରଥମ ଥର ପାଇଁ କୋରୋଇଡାଲ ହେମାଙ୍ଗିଓମାରେ ପୀଡିତ ରୋଗୀଙ୍କ ଚିକିତ୍ସା ପାଇଁ ବ୍ୟବହାର କରାଯାଇଥିଲା | ଏହି ଚିକିତ୍ସାର ପରିଣାମ ସନ୍ତୋଷଜନକ ପ୍ରମାଣିତ ହେଲା |

ନୂଆଦିଲ୍ଲୀ ଏମ୍ସର ଡକ୍ଟର ରାଜେନ୍ଦ୍ର ପ୍ରସାଦ କେନ୍ଦ୍ରର ଚକ୍ଷୁ ବିଜ୍ଞାନ ବିଭାଗର ମୁଖ୍ୟ ତଥା ପ୍ରଫେସର ଡକ୍ଟର ଅତୁଲ କୁମାର କହିଛନ୍ତି ଯେ ପରମାଣୁ ଶକ୍ତି ବିଭାଗ ମାଧ୍ୟମରେ ଭାରତରେ ନିର୍ମିତ BARC ପ୍ଲାକ୍ କୁ ଓକୁଲାର କର୍କଟ ରୋଗ ପାଇଁ ସାତୋଟି ମାମଲାରେ ବ୍ୟବହାର କରାଯାଇଛି । ସେଥିମଧ୍ୟରୁ ଦୁଇଟି ରେଟିନୋବ୍ଲାଷ୍ଟୋମା, ଦୁଇଟି କୋରୋଇଡାଲ୍ ମେଲାନୋମା, ଦୁଇଟି ଅକୁଲାର୍ ସର୍ଫେସ୍ ସ୍କ୍ୱାମସ୍ ନେପ୍ଲାସିଆ (OSSN) ଏବଂ ଗୋଟିଏ କୋରୋଇଡାଲ ହେମାଙ୍ଗିଓମା | ଏହି ପ୍ଲେକ୍ କୁ ବ୍ୟବହାର କରିବା ଅତ୍ୟନ୍ତ ସୁବିଧାଜନକ ଏବଂ ପ୍ରାଥମିକ ଫଳାଫଳଗୁଡିକ ଅତ୍ୟନ୍ତ ସନ୍ତୋଷଜନକ ରହିଛି ବୋଲି ସେ କହିଛନ୍ତି |

ଏହି ଉଲ୍ଲେଖନୀୟ ସଫଳତା ଉପରେ ମନ୍ତବ୍ୟ ପ୍ରକାଶ କରି ଡକ୍ଟର ଜିତେନ୍ଦ୍ର ସିଂ କହିଛନ୍ତି ଯେ ପରମାଣୁ ଶକ୍ତି ବିଭାଗ ଗତ ପାଞ୍ଚ ବର୍ଷ ମଧ୍ୟରେ ସାଧାରଣ ନାଗରିକଙ୍କୁ ଫାଇଦା ପହଞ୍ଚାଇବା ପାଇଁ ଏହାର କାର୍ଯ୍ୟକଳାପ ତଥା ପ୍ରୟୋଗକୁ ବିବିଧ କରିବାକୁ ଚେଷ୍ଟା କରିଛି । ସେ କହିଛନ୍ତି ଯେ, ଚକ୍ଷୁ କର୍କଟ ରୋଗୀଙ୍କ ପାଇଁ ସ୍ୱଦେଶୀ ପ୍ଲେକ୍ ବ୍ରାକିଥେରାପି ବିକାଶ ମଧ୍ୟ ଚିକିତ୍ସା ପରିଚାଳନା କ୍ଷେତ୍ରରେ ଏଭଳି ଏକ ନୂତନ ପଦକ୍ଷେପ । ଏହି ଚିକିତ୍ସା ପଦ୍ଧତି ରୋଗୀଙ୍କ ପାଇଁ ଏକ ସରଳ ଏବଂ ସୁଲଭ ମୂଲ୍ୟର ଚିକିତ୍ସା ବିକଳ୍ପ ଯୋଗାଇ ଦେଇଛି ବୋଲି ସେ କହିଛନ୍ତି।

ଇତିମଧ୍ୟରେ, ପରମାଣୁ ଶକ୍ତି ବିଭାଗ ଅଧୀନରେ କାର୍ଯ୍ୟ କରୁଥିବା ମୁମ୍ବାଇର ଟାଟା ମେମୋରିଆଲ କର୍କଟ ରୋଗ ହସ୍ପିଟାଲ ଆସାମର ଗୁଆହାଟୀରେ ଥିବା ବୋରୋହ କର୍କଟ ରୋଗ ହସ୍ପିଟାଲ ସହିତ ମିଶି କାର୍ଯ୍ୟ କରୁଛି ବୋଲି ଡକ୍ଟର ଜିତେନ୍ଦ୍ର ସିଂ ସୂଚନା ଦେଇଛନ୍ତି। ଉତ୍ତର ପୂର୍ବାଞ୍ଚଳର ପ୍ରଥମ ଡ଼ିଏମ ଏବଂ Mch ସୁପର ସ୍ପେସିଆଲିଟି ଅନୁଷ୍ଠାନରେ ଟ୍ୟୁମର ଓ କର୍କଟ ରୋଗର ଚିକିତ୍ସା ଲାଗି ପାଠ୍ୟକ୍ରମ ମଧ୍ୟ ଆରମ୍ଭ ହୋଇଯାଇଛି ବୋଲି ସେ କହିଛନ୍ତି।

ପରମାଣୁ ଶକ୍ତି ବିଭାଗ ଅନ୍ୟାନ୍ୟ କ୍ଷେତ୍ରରେ ମଧ୍ୟ ସହଯୋଗ କରୁଛି | ଭାବା ପରମାଣୁ ଗବେଷଣା କେନ୍ଦ୍ର (BARC) ନିରାପତ୍ତା କର୍ମଚାରୀଙ୍କ ପାଇଁ ବୁଲେଟ୍ ପ୍ରୁଫ୍ ଜ୍ୟାକେଟ୍ ବିକାଶ କରୁଥିବା ବେଳେ କୃଷି କ୍ଷେତ୍ରରେ, ପନିପରିବା ଏବଂ ଖାଦ୍ୟ ପଦାର୍ଥର ଶେଲ୍ଫ ଲାଇଫ ବଢାଇବା ପାଇଁ ବିକିରଣ ପଦ୍ଧତି ପ୍ରୟୋଗ କରାଯାଉଛି |

ଆଲେଖ୍ୟ : ପଦମ ସିଂ, ଆକାଶବାଣୀ ସମ୍ବାଦ ବିଶ୍ଳେଷକ